Skryf ‘n opstel oor besoedeling

Die nuwe kwartaal het begin en die kinders skryf opstelle dat dit klap. Dit kan ek aan my blogbesoeke sien.

Skryf ‘n opstel oor besoedeling. Ek vra vir jou vrae en jy skryf dan die gedagtes neer wat in jou kop opkom oor die onderwerp. Dit voeg jy bymekaar tot ‘n opstel.

Ek dink as jy oor so ‘n onderwerp skryf, jy ‘n duidelike standpunt moet inneem. Gaan jy sommer net oor besoedeling in die algemeen praat, die verskillende soorte besoedeling wat daar is? Geraasbesoedeling, lugbesoedeling, waterbesoedeling, grondbesoedeling en nog. Of gaan jy een spesifieke soort besoedeling uitlug?

Hoe voel jy oor besoedeling? Dink jy dit is ‘n werklike probleem, of dink jy die mense oorreageer?

Van watter tipe besoedeling is jy in jou omgewing bewus? Wat veroorsaak die besoedeling, hoe gebeur dit? Wat is die gevolge van besoedeling? Wat, dink jy, gaan die uiteinde daarvan wees? Hoe gaan dit die aarde, maar ook die mensdom beïnvloed?

Is daar iets wat ons as mens kan doen om besoedeling te beperk? Is daar iets wat die regering kan afdwing? Die meeste van alles, is daar iets wat jy, as tiener, kan doen om besoedeling teen te werk? Wat kan julle in julle huis doen om besoedeling te beperk? Is daar dinge wat julle as gesin reeds doen en watter volgende stap kan julle doen om besoedeling selfs meer te beperk in julle onmiddellike omgewing? Dink jy dit sal help as een mens ‘n verskil maak? Kán een mens ‘n verskil maak? Is daar projekte waarby julle as skool betrokke kan raak?

As slothoofstuk kan jy weer jou standpunt herhaal waarmee jy begin het, dat besoedeling wel ‘n probleem is en wat gaan ons daaromtrent doen?

Terwyl daar in Julie ‘n wêreldwye aksie is om plastiek te beveg, kyk bietjie wat ek geskryf het wat ek reeds doen en ook wat ek nou besig is om te implementeer om selfs meer te doen om besoedeling te beveg.

Vir nog opstelhulp kan jy hier kliek. Ook vir mondelinge of toesprake oor dieselfde onderwerpe. Onthou om toortsie.com as bron aan te gee as julle hierdie inligting gebruik.

Blogmaats, as julle lus het om ook hieroor te skryf, maak so en onthou om hierdie bloginskrywing te tag.

Lekker skryf!

Toortsie

Advertisements

Opstel: My land, Suid-Afrika

Met soveel negatiewe dinge wat in ons land gebeur en mense wat onseker voel, kan ‘n mens dalk geneig voel om negatief te wil skryf oor ons land. Ons land het egter soveel positiewe dinge waaroor ons kan skryf en ek daag jou uit om op die positiewe kant te konsentreer.

Om mee te begin, kry vir jou ‘n stuk papier en ‘n pen en maak nommers van 1 tot 10. Skryf by elke nommer iets waarvan jy hou in ons land. Gebruik dit as basis vir jou opstel. Brei nou uit oor elkeen en skryf jou opstel. Jy mag maar opgewonde wees! Die heel belangrikste van alles: Skryf jou eie opstel. Jy. Self. Jy as tiener wie die opdrag gekry het. Mamma, as jy enigsins voel om dit te doen, MOENIE, jy het reeds jou kans gehad toe jy op skool was. Jy help regtig nie jou kind as jy dit vir hom skryf nie.

Om jou te help gee ek ‘n paar voorstelle. Moet dit egter nie net so gebruik nie, maar brei daarop uit.

Ons mense. Ons verskeidenheid mense met ons hartlikheid.

Braaivleis, rugby, sonskyn. Ons Suid-Afrikaners is lief vir ‘n braai.

Ons sport. Ons doen goed in ‘n verskeidenheid sportsoorte.

Ons kulture. Ons land is ryk aan ‘n verskeidenheid kulture en ons kan soveel by mekaar leer.

Ons humor. Ons Suid-Afrikaners het die vermoë om in die ergste van omstandighede, humor daarin te sien.

Ons verskille, wat maak dat ons leer om met ‘n verskeidenheid mense klaar te kom.

SA het die infrastruktuur om groot geleenthede met trots aan te bied, soos die Sokker Wêreldbeker, die Kore Olimpiese Spele in 2018.

Ons diere. Die groot 5 en die walvis, wat maak dat ons die groot 6 huisves. Ons Nasionale Parke, soos die Kruger Wildtuin, die Addo Olifantpark.

Ons wyne wat wêreldbekend is, ons lieflike skaap- en beesvleis, vrugte.

Ons lang kuslyn met pragtige strande.

Ons verskeidenheid in die natuur, van die mooiste reënwoude by Knysna en in Natal, tot die dorre, droë Karoo, elkeen met sy eie skoonheid.

Hier is só baie wonderlike dinge in Suid-Afrika en ek het nog nie eers die helfte genoem nie. Ek daag jou uit, skryf met oorgawe en lus van die dinge in SA waarvan jy hou, die dinge wat jou opgewonde maak.

En blogmaats, het julle lus om oor hierdie onderwerp te skryf? Hoekom nie? Onthou net om hierdie bloginskrywing te ‘tag’.

Vir nog opstelonderwerpe, kyk HIER.

Toortsie

Opstel: ‘n Wêreld sonder tegnologie

Ek vra die vrae en jy beantwoord dit, skryf die antwoorde neer en gebruik dit as basis vir jou opstel.

Dink jy ‘n lewe sonder tegnologie is vandag moontlik? Ja/Nee. Hoekom/Hoekom nie?

Beskryf hoe tegnologie elke faset van ons lewens oorgeneem: Rekenaars, bankwese, internet, sekuriteit, koop en verkoop, selfone, stoof, yskas, alles werk met tegnologie.

Dink jy daar is nog plekke in die wêreld wat heeltemal sonder tegnologie klaarkom? Dalk diep in Afrika? Hoe kom daardie mense reg? Hoe oorleef hulle?

Hoe sal jy vir jou ‘n wêreld sonder tegnologie voorstel? Hoe sal jy oorleef? Is dit moontlik in vandag se tye? Wat sal jy doen om, sonder tegnologie, die lewe vir jou te probeer leefbaar maak?

Gestel die tegnologiebom bars en dit val heeltemal in duie, wat dink jy, sal dan gebeur? Is dit moontlik dat dit in duie kan stort?

Met internetskelms wat net al hoe gevaarliker en aggressief raak, hoe kan ons onsself beveilig daarteen, of, hoe kan ons minder afhanklik van tegnologie raak?

Loer ‘n bietjie hoe Wolfie hierdie onderwerp hanteer het.

Lekker skryf!

Toortsie

Vir meer opstelonderwerpe, kliek HIER.

Mondeling oor Afrikaanse Boeke

Hierdie is ‘n interessante onderwerp omdat ‘Afrikaanse boeke’ baie verskillende opinies ontlok. Daar is mense wat mal is om Afrikaanse boeke te lees, terwyl ander glad nie daarvan hou nie.

Ek dink dat ‘n goeie beginpunt vir jou mondeling oor Afrikaanse boeke, dalk ‘n ‘verklaring’ sal wees oor waar jy self staan betreffende dit. Hou jy van Afrikaanse boeke, of nie? Lees jy graag Afrikaanse boeke? Dalk moet ek vra, lees jy enigsins, want as jy nie lief is vir lees nie, kan dit onregverdig wees om te sê dat jy nie Afrikaans lees nie. Dan moet jy eerder sê dat jy nie lief is vir lees nie.

Tweedens is die ‘hoekom’ dalk goed. Hoekom lees jy graag Afrikaanse boeke, of, hoekom lees jy nie graag Afrikaanse boeke nie? Lees jy Afrikaans omdat dit jou taal is, omdat dit makliker lees? Dis baie belangrik dat jy regtig jou eie opinie gee. Moenie iets sê wat jy nie self voel nie.

As jy nie Afrikaanse boeke lees nie, lees jy dan wel Afrikaanse koerante, Afrikaanse blogs, Afrikaanse tydskrifte? Of watter Afrikaanse medium lees jy wel? As jy wel lief is om Afrikaans te lees, watter medium verkies jy? En, hoekom? Is dit meer geredelik beskikbaar op die internet?

Lees jy e-boeke of verkies jy gedrukte boeke? Hoe kry jy dit in die hande? Koop jou ouers dit? Koop jy self? Leen jy boeke by vriende? Is jy lid van die biblioteek?

Die groot vraag: Watter tipe Afrikaanse boeke lees jy graag? Misdaad? Liefdesverhale? Vakgerigte goed? Feiteboeke? Watter Afrikaanse boeke maak jou opgewonde?

Het jy ‘n gunsteling skrywer? Wie is dit? Hoekom hou jy juis van sy/haar boeke?

Is daar ‘n sekere boek waarvan jy wil vertel? ‘n Boek waarvan jy baie gehou het? Waaroor het die boek gegaan? Wil jy dit graag aanbeveel? Wat het die boek vir jou beteken? Sal jy dit weer wil lees?

Watter boek(e) is daar wat jy graag nog wil lees? Hoekom? Waaroor gaan dit?

Sluit af met iets soos dat jy regtig van lees hou (of nie hou nie), van Afrikaanse boeke hou (of nie hou) nie.

Toortsie

Vir nog opstel- en mondelingonderwerpe, opstelhulp, kyk HIER. Onthou om toortsie.com as verwysing aan te toon as jy wel van die hulp gebruik gemaak het.

Opstel: As ek onsigbaar kon wees

Hier kan jy nou lekker jou verbeelding gebruik.

Ek vra vir jou vrae en dan skryf jy die antwoorde wat in jou kop opkom, neer en daaruit stel jy jou opstel saam.

Hoekom sal jy graag onsigbaar wil wees? Is dit omdat dit wat jy graag as onsigbare wil doen, nie moontlik is vir iemand wat sigbaar is nie? Het jy dalk nie die moed om dit te doen terwyl ander jou kan sien nie? Is dit om iets te doen, om iemand ‘n poets te bak, om iets skelms te doen, om ‘n dag uit die skool te bly sonder dat iemand daarvan weet, om ‘n bank te beroof, om iemand dop te hou? Of is dit omdat jy skaam en eensaam voel en voel dat dit vir jou beter sal wees as jy maar eerder onsigbaar is omdat jy die swart skaap in die gesin is wat net al die moeilikheid kry? Is jy dalk ‘n introvert en jy hou nie van mense se geselskap nie? Jy kan dus by hierdie vraag in enige rigting gaan: diepsinnig, of laf, selfs in ‘n totaal onmoontlike rigting as jy jou verbeelding regtig vrye teuels wil gee.

Onthou, bogenoemde vraag gaan oor HOEKOM.

Nou kom my volgende vraag: Wat presies beplan jy om te doen as onsigbare? Hoe gaan jy dit doen? Hoe gaan jy dit aanpak?

Watter uitkoms verwag jy? Watter reaksie van mense dalk?

Wat gaan dit vir jou beteken? Dink jy dit is uitvoerbaar?

Lekker skryf. Gee jouself vlerke, skryf jou eie opstel soos net jy kan.

Vir nog opstel- en mondelingonderwerpe, kyk hier.

Toortsie

Lank gelede het die Toortsie en Kameel elkeen vertel waar hulle graag sou wou gaan as hulle onsigbaar kon wees. Julle kan op die blou woorde kliek om by daardie bloginskrywings uit te kom. Dis sommer net vir interessantheid, onthou dat jy jou eie opstel moet skryf, nie ons s’n oortik nie.