Eksperiment 2 Sonoond

Ek vorder, ek vorder! En leer. Gister was nou weer ‘n eksperimentele dag.

Die son het sommer lekker geskyn en 10 vm het ek vir oondjie uitgesit met sy gesiggie na die son. Sommer gou het sy temperatuur mooi gelig.

In ‘n swart oondplaat het ek ‘n bevrore ribbetjie gesit. Jammer, ek weet nie al gisteraand dat ek vandag ribbetjie wil gaarmaak nie. Daarom bevrore. Met ‘n swart bakplaat bo-oor as deksel het dit sommer gou ontdooi en mooi begin aanloop.

Toe raak ek meer voortvarend en besluit om my groente ook in die oondjie te sit bo-op die rib met die wete dat dit dalk die rib stadiger laat gaarword. Dit was wel so.

By 1 nm rond was die groente gaar, maar die rib nog nie. Met die groente uitgehaal, sit ek toe nog ‘n varkfilet bo-op die rib.

Teen 4 nm het die oond sy hitte vinnig verloor en het ek alles uitgehaal. Rib was heerlik gaar, vark ook. Tog het die vark baie vog verloor – dalk was dit net te stadig? Ek weet nie.

Hierdie wonderlike webblad het my baie antwoorde gegee.

1) Swart bak met swart deksel is ‘n moet.

2) Son moet op deksel skyn – daarom het die rib soveel stadiger gekook.

3) Daar moet 5 cm spasie rondom die bak wees.

4) 120 grade Celsius is warm genoeg, ook omdat die son direk op die bak se deksel skyn.

5) ‘n Mens moet maar rustig wees en ekstra tyd toelaat.

6) 10 vm tot 2 nm is die beste tyd van die dag om te kook.

7) Jy kan die potte voorafverhit as jy haastig is.

8) Dit kook ook blykbaar vinniger as jy die bak effens lig met ‘n glasbak of iets.

Wel, my kos het alles lekker en gaar gekom ná ‘n dag in die son, alles kosse wat heelwat elektrisiteit sou gebruik om gaar te kom. My week se kos is gaar en reg! En ja, my reseppies kan sowaar in die sonoond gemaak word.

Toortsie

Toortsie se groente uit boek 1 in sonoond gemaak.

So, wat is volgende?

Wel, tot op hede het die volgende items alles gebeur die afgelope vier jaar:

Toortsie 3 Skedule (Sedert 2017):

1. Verwerk en toets van resepte, rofwerk resepte, resepte oor en nogmaals oormaak en oorskryf en tik in rekenaar.  – AFGEHANDEL

2. Resepte tik op rekenaar, druk. – AFGEHANDEL

3. Kosmaak van gedrukte kopié, foute regmaak. – AFGEHANDEL

4. Proeflees deur koskenner. – AFGEHANDEL

5. Foto’s en weer eens resepte toets. – AFGEHANDEL.

6. Resepte waar onsekerheid is, verander en weer eens toets. – AFGEHANDEL.

7. Alle foute regstel op rekenaar. – AFGEHANDEL.

8. Foto’s merk met resepname, verseker dat elke resep ‘n foto het, elke foto ‘n naam. – AFGEHANDEL.

9. Alle ander aantekeninge, ens wat nog in die boek moet kom, skryf. – AFGEHANDEL.

10. Konsepboek ingestuur vir proeflees. – AFGEHANDEL

11. Voorblad kies – wat ‘n storie! – AFGEHANDEL

12. Eerste proefleesresultaat terugontvang, voorstelle deurgegaan, weer geproeflees, terug ontvang. – AFGEHANDEL.

13. Alles nog ‘n keer deurgaan en verseker dat daar nie iewers iets met ‘n hoeveelheid of bestanddeel of metode verlore gegaan het nie. – AFGEHANDEL

14. Teks stuur vir die uiteensetting van die boek. – AFGEHANDEL

15. Uiteensetting saam met haar deurgaan. – AFGEHANDEL

16. Boek terugkry, dit weer eens woord vir woord deurgaan om te soek vir moontlike foute wat deurgeglip het. – AFGEHANDEL. Weer eens en weer eens en weer eens woord vir woord deurgegaan, drukkersduiwelfoute reggestel. AFGEHANDEL.

…………………………………..

17. Finale boek na drukkers stuur.

18. Proefkopié ontvang, deurgaan en goedkeur.

19. Die finale druk! 

20. Die groot bemarkingstorie. Want ‘n mens koop ‘n boek net een keer, dan het hy hom. Nie elke maand weer een nie, tensy hy vir iemand anders ook die boek wil koop.

Ja! Ek is nou daar wat ek wag vir verskillende drukkers om vir my kwotasies te stuur. Die bladuitleg is klaar. Alles is klaar. Dis berge oor tot hier, maar hier is ons nou! En ek is opgewonde, want dit gaan mooi mooi mooi wees.

Toortsie 3, is dit nie? Lekker kos vir Banting, Keto, Intermittent fasting, diabete en sommer vir almal wat hou van lekker eet.

Groete

Toortsie

Jy is seker nie ernstig nie!

“Jy is seker nie ernstig nie!” het iemand vir my gesê toe ek aangekondig het dat ek Banting (Keto) doen. Ja, ek was ernstig en ek het dit ‘aangekondig’ op my blog, want ek het nie, soos ander diëte ‘n ondersteuningsgroep gehad waarby ek een keer per week kon gaan aanklop vir hulp nie. “Ek stel voor dat jy gaan navorsing doen hieroor”, was die antwoord. Gaan doen navorsing.

Die ding van navorsing op Google is dat dit nie saakmaak watter onderwerp jy soek nie, jy beslis iewers iets sal kry wat jou ondersteun. Maar ek is nie ‘n navorser nie. Ek sal ‘n bietjie oplees, maar ernstig navorsing doen? Nope. Nie ek nie.

Gelukkig is daar wel oor baie jare baie navorsing hieroor gedoen, dit was net nie erken deur die sisteem wat deur koolhidraatmagtiges gedryf is nie. Ons almal onthou hoe groot nuus Prof Tim Noakes daardie tyd was toe iemand hom gaan aankla het by die Mediese Raad! Ag, en as hy selfs nou nog waag om iets te sê, haal hy die koerante se hoofopskrifte. Soos oor Covid en LCHF.

Weet julle wat is vir my lekker? As ek die Nutrition Network se webblad oopmaak waar ek die Bantingjuffrou kursus doen en ‘n hele blad vol gesigte van dokters, wetenskaplikes, kenners sien wat my begroet. Almal mense wat weet waarvan hulle praat. Geleerde mense. Dit maak my rustig om te weet dat ek by ‘n organisasie is wat nie dinge sommer net uit hulle duime suig nie. Dat hulle navorsing doen. En dat ek, die ou boervroutjie van die plaas af nie navorsing hoef te doen nie, maar hulle net hoef te volg. Want hulle weet waarvan hulle praat.

As hulle sê dat die LCHF-leefstyl jou sterker maak in die geval van Covid, glo ek hulle. Wel, ek het dit aan my eie bas gevoel. Nee, dit gaan jou nie keer dat jy dit nie kry nie. Dit gaan jou ook nie uit die hospitaal hou nie. Maar julle weet mos dat diabete van die grootste risiko het met Covid? En asma-lyers, terloops. Wel, ek was pre-diabetes sewe jaar gelede, ek is so dankbaar dat ek dit kon verhoed én ek kry asma én ek is al amper by die risiko-ouderdom. Jaja, die Here was goed vir my Januarie.

En as daardie spesialiste sê Banting (Keto/LCHF) is ‘n goeie teenvoeter vir diabetes, wie is ek om te stry? En dan weet ek dat die Bantingleefstyl beslis sal saamwerk met Intermittent Fasting, wat nou die buzzword is.

Nee wat, ek vertrou die span. En ja, ek is ernstig hieroor. Maar, soos altyd, sê ek: Praat net eers met jou dokter voor jy dit begin doen. Want net jy is verantwoordelik vir jou keuse, ek ken nie jou omstandighede nie.

Toortsie

Ná sewe jaar

Vandag is ‘n feesdag, want vandag is dit presies sewe jaar sedert ek die groot besluit geneem het om stysel en suiker uit my dieet te sny. Wat ‘n groot besluit! Wat ‘n drastiese besluit om te neem vir iemand wat kosverslaaf is, suikerverslaaf. Iemand wat die soetste denkbare tjoklit gekoop het, wat mal was oor vleis en brood en niks daarby nie. Vir konfyt. Braaiaartappels. Rys en vleis en aartappels. Boontjiesop. Ertjiesop. Pasta. ‘n Dik sny varsgebakte brood.

Maar ek het die besluit geneem. Oornag. En op ‘n Sondagoggend begin met niks Bantingkos in die huis nie.

In die sewe jaar het ek geleer dat daar lewe is ná stysel. Om die waarheid te sê, wonderlike lewe. Dat daar heerlike kos te eet is selfs al kan jy nie suiker en stysel eet nie. Dat deur LCHF te eet, daar ‘n hele nuwe koswêreld vir jou oopgaan. Dat neute en kaas kos is.

Ek het ook geleer dat as jy ‘n verslawing het, jy dit altyd het. Dat jy dit kan beheer deur gebed en selfdissipline, maar dat hy altyd daar sal wees en dat jy hom nie eers ‘n pinkie kan aanbied nie, dis beter om hom eerder 100% te vermy. Dat hy selfs ná sewe jaar as jy hom sou toelaat, jou weer sal wil oorneem en beheer.

Al volg ek die Bantingleefstyl so te sê 100 persent, sal ek ook weer ‘n slag moet kyk na wat ek eet. Dalk minder suiwel soos joghurt, eerder eiers bak in die oggend. Oppas vir te veel neute in my dieet. Versigtig dat ek nie meer as die aanbevole oranjelysitems per dag gebruik nie. Meer vars groente eet soos in slaai.

Ek is steeds effens oorgewig, maar beslis nie vetsugtig (obese) soos ek was nie. Ek is gelukkig met waar ek tans is.

Toortsie

Herinneringe lê oral opgesluit

Ek is besig om al die kosfoto’s in lêers te sit, een vir elke dis. Want al die foto’s is deurmekaar in Google Drive en al het ek elkeen van die baie foto’s se naam en bladsynommers bygesit, is dit steeds nie georden volgens naam nie. Dit maak die werk vir die grafiese kunstenaar onnodig moeilik, want hoe moet sy nou kies wátter een van die vyf of ses foto’s van elke dis die mooiste een is?

Dit maak my natuurlik honger en lus vir kosse wat nie hier in die huis is nie, maar behalwe dit, sluit dit ander herinneringe oop.

Kyk, ek wys vir jou:

Sjinese bakkies uit my ma se goed. Sy het ‘n volledige stel aangeskaf toe Sjinese kos in die mode was. Ek weet nie wat van die stokkies geword het nie.
Die glasbakkie waarin die patatskywe gepak is, is deur my neef en sy vrou vir my as trougeskenk gegee. Dit is deel van die pragtigste stelletjie met ‘n kleine kristal suikerpotjie en melkbekertjie. Sy lewe lankal nie meer nie, is sommer skielik oordag dood aan ‘n asma-aanval.
Hierdie twee wit bakkies was ‘n kombuisteegeskenk van ‘n meisie wat saam met my skoolgehou het.
‘n Bord uit my ma se mooi blou versameling en een van haar pragtige wit porseleinborde waarmee sy die bloues vervang het.
Pragtige teestel van my ma.
Blou eetstel – Trougeskenk van my oorlede broer en sy vrou.

Wag! Laat ek dadelik ophou met foto’s wys! Netnou is julle net so honger soos ek en dit net van foto’tjies kyk! Toortsie 3 is hopelik binnekort klaar. Teen Vrydag as alles goed gaan, ontmoet ek en die grafiese ontwerper om net die finale verstellinkies te doen voor dit na die drukkers gaan, hopelik teen einde volgende week.

Mooi loop!

Toortsie

Ns. Jajaaa, al hierdie kossies kom uit Toortsie se kombuis!