Smoothies

Ek wil al lankal smoothies maak, maar kom net nie daarby nie. Toe kom ek gister by ons groentemark en koop lekker groot sakke bevrore aarbeie en brame. Smoothietyd!

In my verpulper gooi ek ‘n halwe avo, ‘n piesang, neute, die brame en aarbeie, dubbelroom joghurt en xylitol. Dis tog te lekker, maar daar kort iets.

Vandag doen ek dit weer, maar gooi ‘n knertsie gemmer en sommer pampoensade ook by en chiasade vir versiering. Te lekker.

Dis toe wat ek besef watter groot verantwoordelikheid die kok in die huis het. Sy bepaal wat by almal se monde ingaan. Sy kan ‘n lieflike, ryk, voedsame, gesonde smoothie aanmekaarslaan of sy kan een maak wat presies dieselfde lyk, maar dit kan vol ongesonde, leë kilojoules, suikers wat mense siek maak, wees.

Ongelukkig weet ons nie altyd wat in klaar verpakte mengsels is wat ons eet nie.

Toortsie

Toortsie se Soetsuurkomkommers

My man se regte egte outydse boerkomkommers dra! Hier is die Bantingweergawe, my eerste poging om soetsuurkomkommers in te lê.

  • Bestanddele:
  • 250 ml wit asyn
  • 200 ml xylitol
  • 400 ml water
  • 10 ml sout
  • 2 lourierblare
  • 2 knoffelhuisies, in stukkies gesny
  • 7 swartpeperkorrels (Ek het sommer fyn peper gebruik)
  • 2 Engelse komkommers, gewas en in skywe gesny
  • 1/2 ui, in skywe

Metode:

Verhit al die bestanddele, behalwe die komkommers en ui tot kookpunt.

Voeg komkommer- en uiskywe by.

Plaas deksel op.

Skakel plaat af.

Laat staan 5 minute op plaat.

Skep in gesteriliseerde potte.

Mensig, ek is opgewonde!

So met die geharwar van die einde van die jaar dinge wat moet klaarkom, dis borduur, en brei en jaareinde en kosmaak vir Toortsie 3 en Nanowrimo en en en het die foto’s van Toortsie 3 gekom, maar het ek nog nie regtig tyd gehad om dit behoorlik deur te gaan en mooi te bekyk nie. Mense! Dit is uit ‘n ander wêreld! Dit is al wat ek kan sê.

Ek het vanoggend begin om dit deur te gaan, net om seker te maak daar is ‘n foto van elke gerig. Ek is so bang ons moet dalk op die ou end weer ‘n foto neem … en is ek nou geïnspireer! Sjoe! Nou moet ek aan die werk spring en dit voltooi. Dalk nie in hierdie jaar nie. Beslis nie in hierdie jaar nie, want Kersfees kom, Kersfees kom … maar niemand keer my mos om intussen deur al die foto’s te gaan en hulle te merk, seker te maak dat al die woorde in die boek is en reg is en en en nie … sodat ek dit vroeg in die nuwe jaar vir die proefleser kan stuur en kort daarna vir die een wat die bladuitleg doen en dan vir die drukkers nie … niemand keer my mos nie, né? Dit is mos net ekself … wat dringend ‘n klompie borduurwerk moet klaarkry en ‘n babakombers moet klaarbrei … want ek geniet mos die VLV so baie. 🙂

Kyk net hier:

Is jy nie ook skielik honger nie?

Toortsie

Die stof het gaan lê

Ná ‘n ekstra woeste tien dae van kosmaak teen topspoed, vinnig planne maak, breinselle gebruik wat ek het en nie het nie, het my kop stilgestaan teen Donderdagaand, my oë stokstyf in my kop. Jy kon geen bruikbare reaksie uit my brein verwag nie en elke woord wat uit my mond gekom het, moes jy met meer as ‘n knippie sout neem.

Die stof het gaan lê. Wat is die slaap? ‘n Wondersoete ding, het een of ander baie bekende digter gesê. Sy naam is iewers in my brein se argiewe weggebêre. Diepppp.

Ek het nog altyd geweet die groep vroue en man wat God my gegee het vir ‘n Bybelstudiegroep is uitgesoek met die hand. Vrydagoggend het hul groepleier ‘n ronde nul op ‘n kontrak beteken. Haar kop het nie geraas nie, nee, haar kop was doodstil. Maar húlle is goud werd. Weer eens het ons ‘n wonderlike Bybelstudie gehad. Want sien, niks het eintlik verander nie. Elkeen in ons groepie stap ‘n wonderlike pad met ons Here en elkeen dra elke keer soveel by, ons leer by mekaar. Ek is eintlik net die koördineerder. Almal dra by.

Met die kinders wat die naweek kom kuier het en ‘n rustige atmosfeer van lekker saamwees, het die stof in my kop gaan lê. Daar is nog 12 maklike en vinnige kossies wat gemaak moet word môre. Dan is ons klaar.

Mense! Ek is opgewonde! Die foto’s is fantasties verby! Ons is presies dieselfde span wat die vorige twee boeke ook gedoen het. Ek kan letterlik sien hoe ons al drie gegroei het.

In die afgelope twee maande het ek twee uitmergelende moeghede ervaar. Met die Baviaans Camino was dit liggaamlike moegheid. Hierdie keer was dit kopmoegheid. Dis goed om dit te ervaar.

Ek is reg vir wat voorlê.

Fotograaf: Lize Venter. Stilis: Lizelle du Toit. Kosmaker: Toortsie (Madelé Burger)

Toortsie 3, is dit nie?

Toortsie

Toe staan Toortsie se kop stil

Die opwinding is groot. Ons maak kos vir die nuwe Toortsieresepteboek. Toortsie 3, is dit nie? Ons werk teen topspoed. Maak planne. Dink. Verander nog hier en daar. Maak goed oor. Die kasmaker kom versterk rakke, vir die boeke, sien. Die nuwe Kinderjareboeke daag op, bokse vol. Tussendeur kom koop iemand nog ‘n boek of twee.

Toortsie het ‘n klompie vriendinne genooi om te kom tee drink die middag as alles klaar is. Iemand moet darem seker help eet en help proe! Die opwinding is groot. Dis nuwe eetgoed, nuwe boeke. Dis tog te gesellig. Toortsie se oë staan stokstyf in haar kop. Sy bied tee aan. Dan sê een, hierdie is lekker. Of, wat is in hierdie tert? Toortsie weet nie. Nie omdat sy die resep geheim wil hou nie, want sy weet nie. Sy weet eintlik niks. Haar kop staan doodstil. Kan nie onthou wat is in die resep nie. Al wat sy weet, is dat daar twee goedjies is waaroor sy nog nie heeltemal gemaklik voel nie. Die een is nog in die proses, maar sal reg wees as die boek drukkers toe gaan. Die ander een was reg. Heerlik. Toe gaan verander Toortsie net aan een item. Sy het altyd winkelgrenadellapulp gebruik, maar dit het mos suiker in. Nou het sy vars grenadellas gebruik. Fout. Resep sal weer verander moet word. Ai toggie. Dis nou te suur. En meer xylitol saam met die roomkaas krap haar keel.

Tee. O ja, tee. Sy het tee aangebied. Sy kom nie by die tee uit nie. Tè veel geselsies wat haar aandag aftrek. Toortsie staan met ‘n leë suikerpot en melkbeker in haar hande. Aalsie sien wat aan die gebeur is. En begin tee maak. En help Toortsie kophou. Sy gee kort instuksies, nie opdragte. Soos vir iemand wat ‘n stilstaande kop het. Nog ‘n vriendin kom in. Aalsie kyk Toortsie in die oë. “‘n Koppie vir jou, Toortsie. Koppie.” Alles verloop glad. Die ander kom niks agter nie, of dalk kom hulle dit agter, maar sê niks.

Dankie Aalsie, jy was ‘n ster!

Toortsie