Toorts se Toeka Tokkel: Stoepstories

Eendag, lank lank gelede het ek ‘n ander blog gehad, in my eie naam. Een nag het my hare skielik gerys, en ek het binne sekondes my hele blog uitgevee. Blogmaats het tot my redding gekom en vir my my verlore bloginskrywings gestuur. Hierdie storie was een van hulle (geredigeer):

Sans Souci se huis het ‘n kaggel op die stoep gehad en daar het ons baie dae omgekuier. Die pad het so ongeveer 100 m voor ons huis verbygegaan.

Een Sondag sit ons en gaste op die stoep en braai toe daar ‘n donkiekar met 2 donkies en natuurlik ‘n hele klomp passasiers pad-af gaan. Hulle gaan kuier by ons heel naaste bure, waar dit toe al die hele oggend jolig gaan. Mense lag en raas, kinders hardloop rond. Die toonhoogte van gesels is hoog…  Musiek se volume op die hoogste nommer gedraai. 🙂

So ‘n hele ruk later kom die donkiekar weer verby, terug op sy pad, met GEEN persoon wat die leisels vashou nie! Die donkiekar is leeg. Die donkies het besluit – genoeg is genoeg! Hulle gaan nou terug huis toe. 

‘n Hele rukkie later besef die eienaars die donkies is weg, kar en al. En dis TOE wat die sports begin!!!  … Dis mense wat skree…. mense wat hardloop in ‘n poging om die donkies in te haal, want as sulke donkies besluit hulle loop nou, laat waai hulle, hoor!!!!…. een spring op ‘n fiets en trap vir ‘n vale…

Hulle het die donkies ingehaal en rustig teruggery na die partytjieplek, met HEELWAT MEER passasiers as die eerste keer.

Die kuier was toe eers oor!!!…

…………………………………………………………………………………………………………………………

Met hierdie skrywe probeer ek twee vlieë met een klap raakslaan. Die eerste is Scrapydo met haar opdrag: Stoepstories.  Gaan loer gerus by haar en skryf sommer jou stoepstorie.

Die tweede opdrag was ‘n moeilike een en ek hoop ek het dit raak geantwoord: Writing 101, Day Eight: Death to Adverbs. Die idee is om gebeure in ‘n openbare plek te beskryf sonder bywoorde, net met werkwoorde.

Groete

Toorts

Ek sit interessante bloginskrywings wat ek raakloop, op ons faceboekblad.