Etiket: Openbaring ontsluit

Die merk van die dier

~ Toortsie ~ 9 Kommentaar

Jare gelede het ek ‘n reeks boeke deur Tim LaHaye en Jerry B Jenkins gelees. Dit het gehandel oor die Wegraping. Alles wat in Openbaring gebeur is verwerk in ‘n fiktiewe storie. Dit was die eerste keer wat ek van die Wegraping gehoor het. Al die beelde wat in Openbaring gebruik is, het lewe gekry voor my oë. Alles is letterlik opgeneem en wat met die mense wat agter gebly het gebeur het, was angswekkend. Ons moet gereed wees. Ongeag of die Wegraping gaan gebeur en of Jesus net kom en of ons dalk gaan sterf voor dan, ons moet gereed wees.

Ek het die idee van die Wegraping glad nie verstaan nie. Jesus gaan mos een maal kom en klaar. En ons weet nie wanneer dit gaan gebeur nie. Hoe kom Hy en gee ons nog ‘n kans en oor 7 jaar kom Hy weer?

Maar nou het ‘n ander boek in my skoot beland: After the Rapture – An end times guide to survival deur David Jeremiah. En skielik maak dit vir my meer sin. Nee, Jesus kom nie en kom weer nie. Hy roep net Sy kinders wat in Hom glo voor die heel laaste tye aanbreek. Die boek is geskryf vir mense wat agterbly ná die Wegraping. En nee, die Wegraping het nog nie gebeur nie. En ek hoop van harte dat ek nie een sal wees wat agterbly wanneer dit gebeur nie. Jeremiah bekyk Openbaring vanuit ‘n ander perspektief.

Ek is baie lief vir Openbaring. Dit is vir my ‘n boek van hoop vir hulle wat in Jesus Christus glo. ‘n Boek wat Openbaring op ‘n baie duidelike manier verklaar, is Openbaring Ontsluit deur Riekert Botha.

Die merk van die dier. Jeremiah skryf aan hulle wat agterbly: MOENIE DIE MERK NEEM NIE. Wanneer die Antichris jou sal dwing om die 666 op jou liggaam te laat tattoëer of hoe dit ookal aangebring sal word, moenie dit neem nie. En ja, jy gaan verhoed word om te koop of te verkoop. Om kos te koop. Om dokter toe te gaan. As jy nie die merk gaan neem nie, gaan jou alledaagse lewe hel raak. Gaan vervolging van hulle wat in Jesus Christus glo, baie vererger.

Terwyl ek dit lees, kry ek so ‘n effense benoudheid oor my. Ek dink aan die druk wat daar was om die inenting teen Covid te kry. En nee, die inenting was NIE die merk van die dier nie. Ek het baie oor die inenting gelees, veral wat navorsers daaroor geskryf het. Nie sommer net ‘nonsens’ wat oral op Facebook en Twitter verskyn het nie. Ek het selfs ‘n kursus daaroor gedoen by Nutrition Network. Ek was nie teen die inenting nie. Ek het wel gevoel dat ek, omdat ek toe reeds Covid gehad het, selfs beter beskerm was as wat die inenting vir my sou beteken. Maar die druk was groot en hulle wat fanaties ‘vir’ die ent was, wou na geen rede luister nie. Groepsdruk het gemaak dat ek my daardie dag laat ent het, selfs al het my hele wese daarteen geskree. En noudat die bewyse steeds begin instroom, is die ontkenning steeds groot by soveel wat ‘vir’ die ent was.

Ek dink dat die druk om die 666 te neem, net soveel groter gaan wees as die ou bietjie druk vir die ent. Die probleem is dat, anders as die ent, die 666 ewigheidswaarde gaan hê. Dit gaan nie net ‘n liggaamlike ent wees nie, maar ‘n merk wat ‘n invloed op die res van tyd gaan hê.

Mag ons wat glo in Hom wat lewe, sterk staan teen die aanslae en veral die druk. Mag ons oë gevestig wees en bly op Jesus Christus en mag ons gereed wees wanneer Hy kom. Mag ons eerder die 777 kies.

Toortsie

Eli en Moshesh

~ Toortsie ~ 5 Kommentaar

In die “Hulle wat agterbly” reeks, het die twee getuies in Openbaring 11 ‘n baie prominente rol. Hulle het ‘n groot indruk op my gemaak. Eli en Moshes. In rouklere het hulle daar getuig vir presies 3.5 jaar lank, toe hulle vermoor is. Drie en ‘n half dae later het hulle egter weer opgestaan en na die hemel opgevaar.

Riekert Botha verwys ook na Elia en Moses en gee die redes daarvoor.

Die twee getuies staan in Jerusalem en getuig, die mense haat dit, soveel so dat hulle vermoor word.

Dit laat my dink aan wat ek al soveel keer gelees het oor vervorging. Ja, ons weet van vervolging wat baie erg is in sekere lande, en ag, dink ons, dit sal ons tog nooit oorkom nie…

Nooit? Ons moet oppas!

Dit begin iewers, subtiel, waar niemand dit verwag nie. Paul Estabrooks waarsku in “Standing Strong through the storm” dat dit subtiel begin. Subtiel. Sonder dat ‘n mens dit eens agterkom. Die doel daarvan is om gelowiges verdag te maak, sodat, wanneer daar begin “opgetree” word teen hulle, hulle dit eintlik “verdien”.

Ons land, SA, is mos eintlik ‘n Christenland. Of so was dit altyd. So, in ons land kan ons mos “vry” ons geloof uitleef. Waar ek hierdie subtiliteit begin raaksien, is op plekke waar ons as Christene dit aanhelp!

Byvoorbeeld Kersliedjies. Ja, ek weet hoekom baie mense teen kersliedjies is wat in die winkel speel. Kersfees word gekommersialiseer, dit gaan oor verkeerde redes. Maar besef julle dat dit nog ‘n plek was waar iemand dalk vir die eerste keer in sy lewe van Kersfees hoor? Van die Baba in die krip? Nouja, ek gaan dalk ook nie mal wees as sekere “ander” musiek in die winkels gespeel word nie. Terwyl ons die Christenstem smoor in die winkel, is daar ‘n Halaal teken op elke hoender, iets waarvoor ons as Christene duur betaal…

Iets wat my regtig opval, is inbelprogramme op die radio. Veral Loslip. Om “almal” te akkomodeer, hou ons dit “ongelowig”. Daar word alewig neerhalend na mense met Bybelversies verwys. Ja, mense druk partykeer Bybelversies in mense se kele af, maar spesifiek gister se onderwerp was vir my ‘n geloofsaak. Dit het gegaan daaroor of ‘n mens “vergoed” word as jy gee.

Ek het regtig ‘n getuienis hieroor, oor hoe my lewe verander het toe ek begin het om my tiende te gee, en dit in ‘n tyd toe ek dit glad nie kon bekostig nie. Maar hóé vertel jy so iets sonder om aan God die eer te gee?

Ons moet net baie versigtig wees dat ons nie, in ons poging om “almal” te akkomodeer, dit aanhelp dat die Geloof, en Christene, daaronder skade ly nie, dat ons nie onbewustelik vervolging aanhelp deur ons onskuldige optrede nie.

Groete

Toorts

 

Openbaring

~ Toortsie ~ 7 Kommentaar

Die Bybelboek, Openbaring, fassineer my nog my lewe lank. Op Universiteit het ek al daarmee te doen gekry toe ons ‘n bybelstudieboekie oor Openbaring gedoen het. Wat ek nou eers besef, is dat as ons ‘n bybelstudie oor Openbaring doen, dit gewoonlik net die briewe aan die 7 gemeentes behandel. Die res van Openbaring word nooit hanteer nie. Die SciFi deel. Die vreemde deel. Die interessante deel.

Dit lees soos ‘n storie. Mens het nodig om dit baie baie keer te lees voor dit begin sin maak, en selfs na ekstra baie kere is dit maar nog vreemd en sal ek nie vir jou kan verduidelik wat presies aangaan nie. Wat ek wel weet, is dat dit al hoe makliker lees, amper lekkerder lees hoe meer kere jy dit lees.

Wat ekself al raakgelees het, en ek glo dit is die storie van Openbaring, is dat God in beheer is. Selfs in hierdie chaos is Hy in beheer. Vir ons wat in Hom glo is dit ‘n boek van hoop, ‘n hoop op die Ruiter op die Wit perd wat ons red.

In my lewe het ek al verskillende boeke oor Openbaring in die hande gehad. Die een is só teologies, ek kan geen kop of stert daaruit maak nie. Die volgende een is weer op ‘n ander vreemde manier geskryf.

Waar Openbaring vir my regtig oopgemaak is, is deur Jerry B Jenkins en Tim la Haye se “Hulle wat agterbly” reeks. Dis 100% fiksie, maar die skrywers het dit reggekry om Openbaring te laat lewe. Alles wat in Openbaring “gebeur”, het hulle laat gebeur in ‘n periode van sewe jaar. My uitsluitsel aan die einde van die reeks, eintlik ná elke boek was dat, of ek nou glo aan die Wegraping of nie, dis nie van belang nie. Wat van belang is, is dat ek moet REG wees vir wanneer Jesus kom, want kom gaan Hy beslis.    Die reeks het ongeveer 11 boeke, en dit móét in volgorde gelees word. Doen jouself ‘n guns en kry dit! Indien jy dit nog nie gelees het nie, is dit heerlike boeke om die vakansie te lees. Intussen het ek die volgorde van die boeke in die hande gekry, ek sit dit onderaan die stuk.

   

Tans is ek besig met “Openbaring Ontsluit” deur Riekert Botha.  Wat ‘n boek! In doodgewone, verstaanbare taal beskryf Botha Openbaring vers vir vers. Ongelooflik! Met hierdie boek tot beskikking kan niemand meer sê hulle lees nie Openbaring nie omdat dit te moeilik is. Soos die titel sê, ontsluit hy Openbaring.

Lekker lees!

Toortsie

Die “Hulle wat agterbly” reeks se volgorde:

1. Hulle wat agterbly

2. Die mag teen verdrukking

3. Nicolae

4. Die laaste oes

5. Appoleon

6. Die sluipmoordenaars

7. Die inwoning

8. Die merk

9. Die ontheiliging

10. Die oorblyfsel

11. armageddon

12. Die heerlike verskyning van Jesus

(Dis tot waar ek gelees het)

13 Die opkoms

14. Die Regime

15 Die Wegraping

16 Die finale oorwinning