Vermeerdering van kos

As gevolg van die grendeltyd en soveel mense wat skielik sonder werk en inkomste is, het ons dorp nou ‘n baie aktiewe sopkombuis wat deur die hele gemeenskap, ook al die kerke bedryf word. Van verlede week af help ek met die uitdeel van die kos en is dit nou ‘n verrykende ervaring! Dis sulke tye wat ‘n mens ekstra bewus is van God se genade.

Die ordelikheid van die mense beïndruk my elke keer. Hulle val outomaties in rye in en kom kry hulle bakkie kos, vrug en snytjies brood. Hier en daar sê een dankie. Die Here sal u seën. Daar is gereeld een van die mense wat kom kos haal, wat sommer begin om te help met die uitdeel daarvan, soms tot groot vermaak van ons almal.

Maandag het ek sop geskep. Daar was aanvanklik ‘n klompie mense en toe hulle weg is, roep ek dat die mense moet kom sop haal. Die volgende oomblik is daar ‘n lang ry. Skielik is die brood en die appels op en ek en die ander kosuitdeler besef dat die sop ook te min gaan wees. Die laaste emmer is reeds ‘n klomp van uitgeskep. Hy sê dat ek dalk minder moet skep per persoon, maar ek kry dit nie oor my hart nie. Ek vra toe maar saggies vir God om te help, skep steeds die bakkies en bekers vol, herinner die mense keer op keer dat hulle die Here moet dankie sê voor hulle eet. Toe ek die laaste bietjie sop uit die emmer skep, was dit vir die heel laaste persoon in die ry. Almal het gekry.

Lank gelede was ons by Landelike Stigting, ‘n organisasie wat die opbou van plaaswerkers ten doel gehad het. Hulle het sportdae gehou, opheffingswerk gedoen, die mense leer lees, brei, hekel, kook, ens. Slegs die boere het gewoonlik die jaarvergadering bygewoon.

Daardie jaar is daar besluit dat die plaaswerkerverteenwoordigers ook na die vergadering kon kom. Ons het altyd ‘n ete ook bedien. Ons het die getal mense gehad wat geantwoord het en vir hulle kos gemaak. Iewers daardie dag het ek besef dat daar dalk meer mense kan kom en maak toe ‘n bietjie ekstra kos.

Daardie aand daag daar dubbeld die aantal mense op wat geantwoord het. Ons het sekerlik ‘n bietjie ligter geskep as wat ons andersins sou, maar daardie aand het dieselfde gebeur. Almal het kos gekry, genoeg kos, en toe die laaste kos ingeskep is, was daar nie meer mense oor wat moes kry nie.

Vermeerdering van die kos op ‘n wonderbaarlike manier? Ek wil dit regtig glo.

Toortsie

Verwagting

Expect a miracle every day. Expect a miracle when you pray. If you expect a miracle, God will find a way to perform a miracle for you each day.

Só sing ons Sondag in die kerk en ek dink by myself dat ons dit darem jare laas gesing het, toe ek nog jonk was. Ons was altyd so lief vir hierdie liedjie en het dit so lekker gesing en aangehou en aangehou. Expect a miracle. Verwag ‘n wonderwerk. Hê die verwagting.

Vanoggend kry ek hierdie per whattsapp:

Wat het jy vir ‘n wonderwerk?

“Maar hulle antwoord Hom: Ons het hier net vyf brode en twee visse. En Hy sê: Bring dit hier vir My.” MATTHÉÜS‬ ‭14:17-18‬ ‭AFR53‬‬

Hier lees ons die verhaal van ‘n groot skare vir wie Jesus woord geleer het. Daar was 5000 mans buiten vrouens en kinders. Die dissipels wou ‘n plan maak vir ete.

Jesus het gevra, ‘wat het julle’? Hulle antwoord, ‘net vyf brode en twee visse’.

Geliefde Jesus se antwoord was ‘bring dit vir my’. Die verhaal ken ons. Jesus het dit geneem en die seën oor dit uitgespreek en almal is gevoed.

Vandag vra Jesus vir jou, ‘wat het jy’? Gee wat jy het en vertrou Jesus om vir jou ‘n wonderwerk te doen.

Gebed: Here vandag gee ek dit wat ek het vir U, en vertrou U vir ‘n wonderwerk in my lewe. In Jesus naam. Amen 🙏🏻

Met erkenning aan Manna uit die Woord

God is al weer besig om Homself te herhaal.

Wel, ek het baie om by te dra vir ‘n wonderwerk. En jy? Het jy iets om te gee waaruit ‘n wonderwerk kan ontstaan?

Toortsie