Etiese bemarking

Jy het nou lank by ‘n plek gewerk. Jy het jou beste gelewer. Jy het vaardighede aangeleer. Jou eie vaardighede met die besigheid gedeel. Jy het gesien wat die ander besigheid doen wat werk en wat nie werk nie, waar jy beter kan doen, waar jy dit dalk anders kan doen.

Intussen het jy begin moed kry om jou eie besigheid te begin. Jy beplan jou besigheid haarfyn, soos ‘n mens dit mos maar moet doen. Jy doen jou marknavorsing. Jy kry vir jou ‘n plekkie waar jy jou eie besigheid gaan opstel. Bestel jou toerusting. Vertel vreugdevol vir jou vriende. Jy begin bemark op Instagram, Facebook, Linkedin, Media 24, waar ook al. Jy laat druk selfs advertensies en deel dit uit. Jy sit dit in die plaaslike koerant. Mooi! Ek is so bly vir jou. Ek wens vir jou alles van die beste toe.

Maar moenie in die slaggat trap deur oneties te wees met jou bemarking nie. Moenie by jou vorige werk steel nie. Na my mening is dit oneties as jy byvoorbeeld die kliënte by jou vorige werk se selnommers en e-posadresse afskryf en dan vir hulle laat weet dat jy jou eie plek het. Dit laat ‘n geweldige slegte indruk, ‘n wrang smaak in die mond. Dit sit my so af as ek en verseker dat ek nooit jou besigheid sal gebruik nie.

Ja, die kliënt hét van jou gebruik gemaak toe sy daardie besigheid ondersteun het, maar sy was steeds daardie besigheid se kliënt. Sy hét dalk haar hare by jou laat knip, sy was in daardie tyd ‘jou’ kliënt, maar dis oneties om haar telefoonnommer af te skryf en vir haar laat weet dat jy nou op ‘n ander plek is. Tensy sy jou vra dat as jy weggaan, jy haar moet laat weet. Of, tensy jy die besigheid by die vorige eienaar gekoop het.

Jy kan dalk sê dat ‘almal’ dit so doen, maar selfs al doen almal dit so, is dit nie reg en eerlik nie. Nie eties nie. Hoef jy dit nie so te doen nie. Ja, jy wil graag jou besigheid op die been kry, maar is dit reg om by jou vorige werk te steel om dit te doen? Doen jou eie bemarking. Adverteer so veel as wat jy kan. Gee goeie diens. En as jou diens goed is, sal die mense na jou toe kom en dán is dit nie steel nie, selfs al was dit kliënte van jou vorige besigheid.

Ek weet dat jy graag ‘n sukses van jou besigheid wil maak. Ek gun dit vir jou. Maar waak daarteen om oneties op te tree. Wees eerlik. Gee goeie diens en die werk sal begin inkom, een of ander tyd.

Groetnis

Toortsie

Werk wat jy nie wil doen nie

Ek stap by ‘n winkel in, waar ek nie graag instap nie, omdat ek werklik altyd onwelkom voel daar. Soms kan dit nie anders nie, soms moet jy so ‘n plek besoek. Die eienaar, enigste persoon in die winkel, sit agter sie toonbank toe ek inkom, frons effens toe sy opkyk en sit haar gesprek op die selfoon voort, … en voort, … en voort.

Ek het haar hulp nodig gehad, selfs ‘n bietjie raad met wat ek wou koop, miskien. Ek stap uit en draai terug na die winkel, sy is steeds druk in gesprek met dieselfde persoon, al die huise te koop is al in detail bespreek. Ek vat aan haar arm en sê: ‘Jy kon nou ‘n hele trui se wol verkoop het.’ Inderwaarheid kon sy ‘n hele ROK se wol verkoop het.

People skills. Mensevaardighede. Dalk het ek dit ook nie getoon met my optrede nie. Dalk probeer sy regtig hard. Dalk wil sy regtig ‘n sukses maak en ek gun dit uit my hart uit vir haar.

Liewe vriend/vriendin, as jy nie mensevaardighede het nie, maar in so ‘n werk is waar dit van uiterste belang is, móét jy dit aanleer. Asseblief.

Ja, ons beland soms in ‘n werk wat ons nie regtig wil doen nie, en hier is my les nommer 2: Dis baie beter om ‘n werk te doen waarvan jy dalk nie so baie hou nie, as om werkloos te wees. Daar is egter ‘n geheim aan: Doen elke werk wat jy kry, na die beste van jou vermoë. Vind uit wat nodig is om daardie spesifieke werk goed te doen en gaan leer daardie vaardighede aan. Hanteer kliënte met jou beste gesindheid.

Daardie onlekker werk wat jy na die beste van jou vermoë doen, maak dalk net die pad oop vir ‘n beter geleentheid.

Mense kyk na die manier wat jy optree. Mense kyk na jou gesindheid en as jy met ‘n mooi, leerbare gees werk, gewillig om dit wat oor jou pad kom, te doen sonder om daarop neer te sien, gaan jy beslis altyd werk hê en gaan jy groei op jou pad.

Ek weet dis deesdae nie maklik om werk te kry nie. Ek weet werksgeleenthede is skaars. Daarom is dit ekstra nodig dat jy gewillig moet wees om, veral in die begin, ook dit te doen waarvan jy nie hou nie. Ek belowe jou, jy sal nie spyt wees nie. (Ek doen dit nog my hele lewe en is nie een dag spyt daaroor nie!)

Vir die winkeleienaar van netnou wil ek sê: Luister na die raad wat soveel mense jou gee en jy kan regtig ‘n sukses maak van jou winkel. Hê ‘n leerbare gees en klim uit jou gemaksone. Ontvang jou klante met vreugde op die gesig, jy sál die vrugte daarvan pluk.

Groete

Toortsie