Moet ons regtig water drink?

Hier is nog ‘n ou bloginskrywing in my “waterreeks”, in opdrag van Scrapydo.

Ons is gelukkig om baie lekker water uit die Theewaterskloofdam te kry, maar regtig, party dorpe se water is so sleg dat ek regtig nie iemand kan kwalik neem wat dit nie wil drink nie. Hoekom is ons so stram om water te drink? Ek het al myself gevang dat ek selfs ‘n appel sal eet om my dors te les. Dit het gebeur in ‘n tyd wat ek so min vloeistof ingeneem het, ek het net nie meer my liggaam se pleidooi na water gehoor nie!

My pa het destyds verduidelik dat jou organie water nodig het om te kan werk. Die algemene voorskrif is dat ‘n mens 2 liter water per dag moet drink. 2 Liter!!! 😯 Weet julle hoe baie is dit? Sluit dit dan jou koffie, tee, koeldrank en wat nog uit? Of sluit dit dit in? Ek het al gehoor dat koffie en alkohol ‘n mens nog meer dehidreer en dat jy dit beslis nie as deel van die twee liter kan tel  nie. Maar rooibostee aan die ander kant, het soveel  goeie eienskappe, en dit mag wel as deel van die 2 liter gereken word. ‘n Mens moet ook versigtig wees dat jy dit nie oordoen nie, hoor! Te veel water is ook nie gesond nie.

Vir gewigsverlies is die drink van water uiters noodsaaklik. Sien, as jy vir jou liggaam laat dink dat jy in ‘n woestyn is omdat jy nie genoeg water drink nie, stoor jou liggaam dan net eenvoudig die water wat jy wel drink. Drink jy egter genoeg water, begin jou liggaam om die water makliker vry te laat. ‘n Klomp gewig dus wat jy afskud.

Dis als goed en wel om al hierdie dinge te weet, maar voor jy jou kom kry is die dag om en het jy nog nie genoeg water gedrink nie. Op ‘n stadium het ek ‘n glas in die badkamer gehad. Elke keer wat ek by die toilet was, het ek sommer ‘n glas water gedrink. Dit werk beslis ook om ‘n beker water en glas in my kantoor te hê. As dit so byderhand is, is dit net soveel makliker om daarvan te drink. Iemand beveel aan dat jy ‘n bierbeker gebruik. Dis soveel groter, so jy het minder glase per dag nodig!!

Wat doen julle om julle water-inname te verhoog?

Woestyntoorts

Toortsie se Faceboekblad.

Toortsie se Banting Boerekos Resepteboek.

Liewe oom Tim

Liewe oom Tim

Hoe gaan dit met oom? Met my gaan dit baie goed, dankie.

Ek wonder of oom weet dat oom my nuutste hero is? Weet oom dat ek nog nooit in my lewe so vinnig so ‘n groot verandering in my liggaam sien plaasvind het met enige ander gewigsverliesprogram soos wat ek nou met “banting” sien nie? Dankie oom! Dankie dat oom bereid was om oom se kop in die bynes in te steek. Sien oom, die ding is dat die goed waarmee ek nog altyd gekul het as ek op dieet is, MAG ek nou maar eet! Ek MAG nou maar elke oggend begin met gebakte eiers! En ek MAG die vet aan die tjoppie wat ek altyd so skelmpies geëet het, eet en ek mag dit nog geniet ook!! En WEET oom hoe verskriklik lief is ek vir hoendervel? Ek kon dit nog nooit regkry om die hoendervel weg te gooi nie, nou hoef ek tog nie meer nie! Room oor groente!

Sjoe oom, ek eet LEKKER! En ek voel goed! En my klere vertel ‘n storie van sy eie. En die beste van als, oom, is dat my bloedtoetse die beste in jare is. 🙂 My cholesterol is so laag, ek sal moet uitvind of ek nog nodig het om cholesterolpille te drink. Hoe’s daai? 🙂  My suiker is ook heeltemal normaal.

Ag oom, ek weet steeds nie van die rooiwyn nie. Sien, oom skryf in oom se boek dat ons mag droë wyn drink, maar weet oom, die glasie rooiwyn lyk regtig nie vir my nat nie! So, ek drink maar elke aand my glasie, en per geleentheid selfs twee. Sommige aande is ek steeds lus vir ‘n glasie brandewyn saam met my man met Coke Lite. Ek weet dis NEE, NEE’S, maar so af en toe enetjie. Dis nou so een maal ‘n week of twee.  En toe ek in Amerika is, het ek ‘n glas bier gedrink. (Weet oom dit was ‘n 500 ml glas?) Terloops oom, in Amerika het ek nou behoorlik ge”bant”. Ek het behoorlik weggelê in kaas en ham en bacon, en wors en eiers en salm… en gewig verloor! 🙂

My kind het gister getrou, oom. Oeee dit was lekker dat ek by die voorgeregte tog nie die ou broodjies en goedjies hoef te geëet het nie, maar wel die verskeidenheid kase kon beproef! Wie wil nou meer hê as dit? Die beeshaas (fillet) was HEERLIK en ek het nie eers die aartappelskywe gemis nie, die slaai daarmee saam was net te lekker. Maar ek moet bieg, oom, ek hét wel twee stukke vrugtekoek en twee van daardie fantastiese cherrie/sjokolade/brandewynballe geëet. Dit was verruklik! 🙂

Maar oom, eintlik dink ek oom kan regtig trots wees op my. Vanoggend het ek weer mooi begin met eiers en varkkaasworsies. Oeps! Ek het die tamatie vergeet!!

Dankie oom, en tatta hoor. Sê groete vir die tannie.

Liefde,

Toorts

Lekker dag 98

Soos voorheen, hierdie is my weergawe. Dit het nie ten doel om iemand te oortuig om Banting te doen nie. Ek aanvaar geen verantwoordelikheid vir enige person wat dit doen nie. Ek sou aanbeveel dat jy eers jou dokter raadpleeg voor jy dit oorweeg.

Verslanker hou Paasfees

Net soos ek verwag het, was daar toe ‘n groot skok toe ek Dinsdagoggend na Paasfees die skaal betree. Hoe dan ook anders?

Ek was REG vir die Paasnaweek. Ons was see toe en al die kinders het ook gekom. Vleis is altyd genoeg, en om nie te hard te werk by die see nie, het ek ‘n groot bak aartappelslaai gemaak (aartappels, gekookte eier, kaas, weense worsies, Trim mayonnaise) en ‘n gestolde komkommerslaai. Ek sal baie mooi dink voor ek weer hierdie komkommerslaai maak. Dit kom uit een van die wenresepteboeke. Die suurlemoenjellie was vervang met Low Cal groenpruimjellie. Baie groen. Maar tog het van die gaste ‘n tweede skeppie geneem, en niemand het dood neergeslaan daarvan nie. Natuurlik was daar ook ‘n groot blik beskuit, en ek kon my hande nie daaruit hou nie! Donderdagoggend het ek gou ‘n lekker kookmelkkoek gebak. Dubbellaag met ‘n vla-vulsel….. Genadiglik vas ek sjokolade, so die paaseiers was veilig…

Met sekondes wat getel word, het ek laat wiel see toe, net betyds vir my haarafspraak. Terwyl die kleur ontwikkel het, vra ek toevallig vir my haarkapster: “Het jy lus vir ‘n stukkie koek?” “Waar gaan jy nou koek kry?” Sy het toe die koek agterin die kar gaan haal en paasnaweek het begin!!

Met dié dat dit die hele naweek gereën het en koud was en ek lui was, het daar niks van ‘n stappie langs die see gekom nie. Waterretensie is ook ‘n vabond as jy te min vloeistof inneem.

So, Dinsdag was dit weer terug in die tuig, terug na opskryf wat ek eet. Ek weet steeds nie wat ertjie/lensiesop met vleis en groente in, tel nie. Dit kan nie te veel wees nie. En ‘n pannekoek? Soveel soos ‘n sny brood? Ek bedoel, voor ek die suiker op gestrooi het? Ek dink tog Dinsdag was binne perke, met baie water inname en ‘n lekker stappie.

Dis of ek hierdie week die effek van waterinname meer beleef het as ooit tevore. Teen Woensdag het die skaal alreeds geroer en Donderdag het ek gedink hy’s ‘n lekker kêrel. (‘n Skaal MOET manlik wees!! 😦 ) Ek het meer water gedrink, en my liggaam het gedink: “Laat los!” 😉

Weet julle hoe lekker is ‘n snackwich (geroosterde toebroodjie) met PIESANG op? Heerlik! En ‘n piesang tel net 1 terwyl die kaas vir dieselfde toebroodjie 4 sou tel.

Die koekstorie van lank gelede bly my by. Ons sou Struisbaai toe gaan en die kinders het huistoe gekom. My kop het so gewerk: Ek sou die Vrydag gou die meisiekind op Swellendam gaan haal en as ons terugkom, moes inderhaas nog 2 soorte eetgoed gemaak word. ‘n Koek en nog iets. In Spar dink ek toe: “Koop sommer koek.” Ek koop toe ruim. By die huis aangekom, los ons sommer die inkopies in die kar, en vergeet skoon van die koeke wat reeds gekoop is. Terug by Plan A, word hier inderhaas gebak en gebrou…… 🙄  …… daar was geëet daardie naweek!

liefvirsoetgoedtoorts

kompulsiewe eter

Ek is ‘n kompulsiewe eter. Ek het eers in die HAT gaan kyk of die woord reg is. Vreemd, dit kom nie voor in die ou HAT nie, maar wel in die nuwe. (Dankie tog dat my ma lief vir woordeboeke was en ek dit nou het!!) Kompulsief: Handelend sonder beheer oor jouself.

Soos gistermiddag wat ek baie moeg, baie warm van die dorp af by die huis gekom het. Onthou, ons plaasmense gaan nie “gou vinnig” dorp toe nie, dis ‘n dag se werk waar jy als doen, hier iets optel, daar iets afsit, plantjies koop, klere koop, kos koop, die oumas besoek, nog ‘n vriendin hello sê…. Ek het ‘n bietjie op my bed gaan lê en net toe ek insluimer, prrrrrrr lui die voordeurklokkie. Iemand het krag nodig. (Ek het ook krag nodig gehad!!) Net daar eet ek die hele pakkie rooiworsies wat ek vir warmbrakke gekoop het, met een slag op! 😯

Iemand het een keer vir my verduidelik hoe ‘n alkoholis se kop werk: Hy drink as hy bly is; as hy hartseer is; as iemand dood is; as iemand nie dood is nie; as die WP wen; As die WP verloor……   ek eet so….

Iets wat mense wie nie met hulle gewig sukkel nie, graag sê, is: xxxxxx is al WEER op dieet. Vir die HOEVEELSTE keer.  Hul weet nie waarvan hulle praat nie. Duidelik nie.

Verlede jaar het ek SO goed gedoen, hier op my eie. 7 kg verloor. Toe kom die Desembervakansie. Maar eintlik, in die oestyd, het Departement Arbeid en SARS gekom… genoeg om ‘n eetsteurnis te veroorsaak…..

Hierdie jaar het net in volle swang begin. Ek soek nie verskonings nie, maar daar was net nie genoeg wilskrag oor om nog kos ook te tel nie. Nou besef ek: Ek sal DRINGEND ‘n plan moet maak, of ek gooi als weg wat ek reggekry het.

So Dames en Here, op hierdie Saterdag van alle dae, met ‘n troue wat ons vandag gaan bywoon en gaan lekker eet….. op hierdie Saterdag haal ek nou weer ‘n papier uit en begin neerskryf wat ek eet. WEER. Vandag sal seker sukkel, maar ek gaan probeer. Ek moet myself net iewers verbind, en jammer vir julle, ek doen dit op hierdie blog…. Ek sal maar weer weekliks hier kom “rapporteer” aangesien ek nie ‘n klas bywoon nie.  (Die moeilikste deel van ‘n troue is daardie stukkie wat jy vir die bruid wag, tussen die kerk en die onthaal. Dan is daar gewoonlik allerhande erg vetmakende goed en dan moet jy ERG sterk wees….)

ALWEERToorts

Verslankers, wanneer is dit vir julle moeilik?

Op hierdie stadium is dit natuurlik vir my moeilik omdat ek lekker vakansie gehou het, en als vergeet het. Ek moet letterlik weer als van voor af leer…..

Dit is mos so dat sekere tye van die dag makliker is om by die eetplan te bly as ander tye. Vir my is van die moeilikste tye wanneer ek in die middag moeg by die huis aankom. Ook na ‘n Sondagmiddagslapie wanneer ek nog so ietwat deurmekaar is. Dan is my weerstand laag en sonder dat ek dink, druk ek enige iets in my mond. Het julle ook so ‘n probleem? Of wanneer is dit vir julle moeilik?

Weighless en ook Weight Watchers het vir my geleer om voorbereid te wees, juis vir sulke tye. En ek belowe julle, ek is ‘n rukkie voorbereid, dan ook nie meer nie. Die meeste van die tyd is ek NIE voorbereid nie!! 😦 Dis belangrik om iets byderhand te hê wat jy dan kan eet en wat nie jou hele eetplan oorboord gooi nie. Want sien, dis maklik om dan die stuk kaas in die yskas te gryp, maar dit tel so baie punte. Of ‘n groot pak chips 😯 ; of dalk is die orige pastei nog nie in die vrieskas gebêre nie….

Wat werk vir my? Dis te sê as ek kophou?

  • Brood! Ja, een of twee snye brood met konfyt op.
  • Sommer ‘n hele tamatie wat ek soos ‘n vrug eet, of ‘n hele sakkie vol klein rooi kersietamatietjies.
  • ‘n Vrug, en die beter opsie vir my is ‘n appel, maar as ek nie kyk nie, is een of twee piesangs ook sommer verorber. Ons mag piesangs eet, maar ‘n piesang tel een terwyl ‘n appel slegs ‘n halwe tel.
  • Rice Crackers, dié met die geur. Nie die ryskoekies wat so dik is en soos saamgepersde strooi proe nie!!
  • Gaar en klaar slaaie in die yskas. Soos ‘n noedelslaai,  drieboneslaai, lensie- en rysslaai. Ek het al baie resepte gegee van verskillende slaaie, kyk maar by kosdinge.
  • Stolslaaie werk ook vir my, want dit hou soveel langer as ‘n vars slaai. Ek het byvoorbeeld een aand wortelslaai gemaak, net gerasperde wortels met fyn pynappels gemeng. Ná ete het ek ‘n pakkie Low Cal lemoenjellie en 2 teelepels gelatien aangemaak met ‘n koppie kookwater en ‘n half koppie koue water, dit by die orige gerasperde wortels en pynappel gegooi en gestol. Heerlik! En al wat iets tel is die pynappel.
  • In die winter help dit as ‘n mens groentesop kook en in porsie-grootte vries. Dit kan dan net vinnig ontdooi kom.
  • Koffie met EEN stukkie beskuit werk ook. Maar dan moet jy die een stukkie uithaal en nie die hele blik voor jou neersit nie!! :mrgreen:
  • Enige Cup a Soup Lite.

Sterkte! Dis nie aldag maklik nie!! 🙂  Watter wenke het julle vir daardie oomblik van swakheid?

Toorts