Etiket: vergifnis

Boekhou van die kwaad

~ Toortsie ~ 4 Kommentaar

Ek geniet hierdie boek, Om lief te hê ten spyte van seerkry, deur Jentezen Franklin, regtig baie. Almal van ons is al iewers in die lewe seergemaak, soveel van ons het al seergekry deur iemand baie naby aan ons.

Ek wil dit vinnig lees omdat dit so maklik en gemaklik lees, maar terselfdertyd wil ek elke woord indrink en oordink omdat dit so treffend is.

Oor vergifnis sê hy: Hou op boekhou en begin tred verloor. Dat, al is ons nie goed met wiskunde nie, ons tog elke stukkie seer wat iemand ons aandoen, in detail onthou en boekhou daarvan. Dat ons soveel keer sukkel om te vergewe.

Hy sê om lief te hê asof ons nog nooit seergekry het nie, moet ons vergewe. Dat vergifnis juis nie gaan om boek te hou nie, maar om tred te verloor.

Seerkry is ‘n werklikheid. Om bitter te word, is ‘n reaksie. Ons kan egter ‘n leefstyl van vergifnis kies.

Hy wys daarop dat onvergifnis onvergeeflik is. Dat God van ons verwag om ander te vergewe, net soos wat Hy ons vergewe.

Hy skryf dat die sterk winde van beproewing wat ons soms moet verduur, ons juis hoër kan lig en die beste in ons na vore laat kom.

Dit neem soms tyd om te vergewe. Dit is soms ‘n proses. Maar jy moet aanhou en aanhou. Weer en weer vergewe, selfs al word jy weer kwaad vir die persoon.

Hy skryf:

‘As jy sukkel om iemand te vergewe, skep moed. Hou aan bid. Hou aan vra. Hou aan soek. Hou aan klop. En bietjie vir bietjie, kloppie vir kloppie, sal God jou help om vergifnis vry te stel. Dit kan tyd neem. Maar moenie ophou nie. Vergifnis sal vloei as jy nie moed opgee nie.’

Mooi né?

In die res van die hoofstuk bespreek hy vergifnis verder, dat dit nie beteken dat jy, wanneer jy iemand vergewe, goedkeur wat hy gedoen het nie. Of dat jy noodwendig sal veegeet wat gebeur het nie. Of dat jy ‘n willose lappop is waarmee die persoon nou kan maak wat hy wil nie. Dit beteken ook nie altyd versoening nie. Dis maar net dat jy die oordeel in God se hande sit.

In die laaste stukkie van die hoofstuk gee hy kosbare raad hoe om dit te doen, hoe om iemand te vergewe selfs al vra hy nie om verskoning nie.

Dis regtig ‘n boek om te lees.

Toortsie

Vir nog van my boekbesprekings, kliek HIER, of volg my by Pinterest.

Unbroken – Path to redemption

~ Toortsie ~ 5 Kommentaar

Hierdie fliek is tans beskikbaar op Catchup en ek wil dit regtig aanbeveel. Dit is gebaseer op ‘n ware verhaal en, lyk dit my, die opvolg op ‘n ander fliek.

‘n Olimpiese Amerikaanse atleet se atletiekloopbaan word omver gegooi toe hy vir sy land in die Tweede Wêreldoorlog moes gaan veg. Hy beland in ‘n Japannese strafkamp waar hy verskriklik gemartel word.

In hierdie fliek word sy lewe ná die oorlog vertel. Die voorheen legendariese atleet wat wonderbaarlik die strafkamp oorleef het, maar nou nie ‘n werk kan kry nie. Post Traumatiese Stressindroom neem sy lewe oor en hy verloor byna alles wat hy het.

Sy grootste plan in die lewe is om hom te gaan wreek op Bird, die Japannees wat hom so gemartel het.

Dan gebeur daar iets. Sy hele lewe verander en hy gaan wel terug Tokio toe, na die strafkamp toe, maar met ‘n heel ander doel.

Kyk gerus die fliek, dis beslis die moeite werd.

Toortsie

Verkrag?

~ Toortsie ~ 7 Kommentaar

Het jy die sleg ervaring van verkragting beleef? Ken jy iemand wat verkrag is? Het jy enige groot trauma beleef en sukkel om daaroor te kom? Dan is Woensdag deur Elsabet Louw die boek om te lees.

Woensdag is die ware verhaal van ‘n verkragtingslagoffer se pad van woede, vergifnis, pyn, herstel totdat sy met sekerheid kan sê dat sy dit oorleef en oorwin het. Dis ‘n positiewe, oop boek wat die leser boei tot die end. Met God se hulp en ondersteunende familie en vriende kon sy hierdie trauma verwerk.

Persoonlik voel ek dat elke persoon hierdie boek moet lees. Dit troos die verkragtingslagoffer, maar bied ‘n ongelooflike inligting en gee insig vir mense wie genadiglik nie ‘n verkragting beleef het nie. Haar pad van herstel kan ook die pad van herstel wees vir iemand wat ander trauma beleef het. Die boek is as  e-publikasie en ook in druk beskikbaar.

Baie dankie, Elsabet Louw, dat jy bereid was om jou lewe oop te stel, ‘n boek te skryf, sodat soveel ander mense daardeur kon baat. Sy is ook die stigter van verkragtingsteungroepe dwarsoor die land.

……………………………………………………………………

Nog ‘n ware verhaal is die verhaal van Elizabeth Robertson Campbell.

Dis die storie van ‘n Christen meisie uit Suid-Afrika wat in Israel gaan werk. Sy raak verlief op ‘n Ortodokse Jood. Hy ondersoek Joodse geskrifte en kom tot bekering.

Haar grootste wens is om ‘n Jood te word. ‘n Christen Jood. Sy deurloop al die kursusse wat nodig is, tot by die punt waar sy as Jood aanvaar sal word en met die man mag trou. Twee dae voor haar troue moet sy egter die keuse maak….

Wat sou JY kies?

Die boek is pas herdruk.

Toorts