Etiket: Transformation Prayer Ministry

Die beginsel van oortuiging en keuse (TPM)

~ Toortsie ~ 5 Kommentaar

Hierdie bloginskrywing skryf ek aan die hand van die TPM (Transformasie gebedsbediening SA) se studentehandleiding, maar ook uit die ondervinding wat ek reeds deur TPM-sessies met myself en andere opgedoen het.

Wat ons voel, hoe ons reageer op iets, is nie die gevolg van wat iemand anders aan ons gedoen het nie, maar wel van wat ons werklik glo. Wat ons glo, die kernoortuiging wat ons het wat ons laat reageer soos wat ons wel reageer, kom die meeste van die tyd uit iets wat gebeur het toe ons nog klein was, gewoonlik onder die ouderdom van 12 jaar. Baie keer is die insident nie eers verwant aan wat ons nou ontstel nie. (Ja, ander mense kan baie lelike dinge met ons doen, daaroor stry ek nie! Wat ons egter daaroor voel is ons eie.)

Wat gebeur is dat daar kleintyd iets gebeur het, soms selfs iets belagliks, soos dat ek op verkeerde tyd iets gesê het in my kleinkindonkunde en dan begin glo dat ek ALTYD die verkeerde ding sê. Of iemand het nie met my gespeel nie en nou glo ek dat ek NIE GOED GENOEG IS NIE. Of watter rede ookal. Soms het daar regtig slegte dinge met my gebeur wat ek verkies om eerder in die drein af te gooi en die dreindeksel daarop te hou en dit NOOIT WEER op te tel nie.

Ongelukkig bly ons daardie waninterpretasie wat ons dalk gemaak het wat nie waar is nie, glo en sou ons as volwassene daarna kyk, kan ons in ons kop die waarheid weet, maar wanneer iets gebeur, kom daardie ou geloofsoortuiging weer op die voorgrond en tree ons op volgens daardie oortuiging, selfs al is dit nie waar nie.

Daarom is dit nodig dat wanneer ons ontsteld raak oor iets, ons ondersoek instel oor hoekom is ons regtig ontsteld. Was dit ‘n geval dat ek onseker gevoel het? Of nie goed genoeg nie? Laat dit my soos ‘n niks voel? Asof ek geen beheer het nie? Asof ek totaal alleen gelaat is? Bang om ‘n fout te maak? Wat is die regte rede dat ek so voel?

Met TPM (Transformation Prayer Ministry) gebruik ons die toerusting in ons hand in samewerking met God tydens ‘n gebedsessie en die regte vrae en as die kliënt kies om daardie deksel op te lig en die pyn in die oë te kyk, by die wortel van daardie leuen uit wat ons glo, daardie leuen wat vir ons die waarheid is. God gee dan vir die persoon perspektief. Die persoon kry nuwe waarheid en word dit wat sy deur haar ervaring altyd verkeerd geglo het, reggestel. Met God se hulp. Op God se manier. En dis een van die dinge waaroor ek keer op keer in verwondering staan: Hy praat met elke persoon op ‘n manier wat daardie persoon sal verstaan. Nie noodwendig wat ek verstaan nie, maar wat vir daardie persoon sal werk. Op sy eie manier.

En wanneer die persoon eers sy kernoortuiging deur ervaring en waarheid van God verander, is dit soos dominoes wat val. Elke keer wat die persoon daardie leuen geglo het in sy lewe, elke keer wat daardie spesifieke leuen hom ontstel het, is skielik opgelos omdat die persoon nuwe waarheid ontdek het. Elke keer het die persoon ‘n treetjie vorentoe gegee. Onmiddellik en totaal opgelos. Soms word daar egter ‘n hele paar leuens tydens so ‘n kinderjaregebeurtenis geglo en mag daar weer in ‘n volgende sessie na dieselfde gebeurtenis verwys word om die ander leuens ook uit te sorteer.

Dit bly egter die kliënt se eie keuse of hy die deksel gaan optel of nie. Of hy bereid is om sy pyn in die oë te kyk of nie. Want God is ‘n Ware Heer, ‘n Gentleman wat Homself nooit op mense afdwing nie. Maar vir die persoon wat bereid is om vorentoe te stap, selfs te vergewe waar nodig, bring Hy ongelooflike verligting. Heling.

Tydens ‘n TPM-sessie beweeg ons op heilige grond en ons respekteer dit en hanteer dit met die grootste deernis, respek en heiligheid.

Toortsie

Ja, ander mense tree nie altyd reg teenoor ons op nie. En as ons deur TPM daarna kyk, maak dit nie die ander persoon se verkeerde optrede reg nie. Wat egter gebeur is dat ek heel word, ek God toelaat om my pyn reg te maak.

Heling

~ Toortsie ~ 12 Kommentaar

Iemand vir wie ek gereeld bid, vra my of daar ietsie is waarvoor hulle vir my kan bid.

Dis presies wat ons in TPM (Transformation Prayer Ministry) glo. Wanneer jy dit wat swaar op jou hart druk – hartseer, pyn, sonde, enige iets – vir iemand betroubaars vertel en julle bid daaroor, begin heling. God sorg daarvoor.

Dit voel vir my of mense al hoe swaarder dra aan swaarder goed, of die pakkaas op ons rûe net swaarder en swaarder raak, of die laaitjies in ons bêrekassies oorvol raak. Of mense net nie meer die las kan dra nie, want dit raak te swaar, maar hulle weet nie hoe om daarvan ontslae te raak nie. Dalk voel ons skaam daaroor, bang omdat dit te seer is, te trots? Dalk het ons al probeer om dit af te laai en dit was nie suksesvol nie? Bang omdat die pyn daar net te erg is?

Dis soos die keuse om tandarts toe te gaan of nie. Loop jy eerder met die seer tand, of gaan jy dit waag dat daarin geboor word en die tand heelgemaak word?

Una vertel hoe die kinders so amper teësinnig was om hulle gevoelens in ‘n opstel te beskryf. Tot hulle begin het …

Dit laat my dink aan die kere wat ek by #Imagine gehelp het. Wanneer die kinders skielik die moed kry om tog hulle seer wat hulle op daardie ouderdom reeds swaar aan dra, af te laai, is dit soos ‘n brander wat kom soos almal kom, net vir die aflaaikans. Dalk was dit die eerste keer wat hulle so ‘n geleentheid kry? Ons ‘cope’ mos maar. Ons ‘hanteer’ dit maar op die manier wat vir ons die beste lyk. Die maklikste om dit agter ons te sit is mos maar net om dit te vergeet. Te onderdruk. Te ignoreer.

Tot ons die dag die moed het om dit vir iemand betroubaars te vertel. Te vertel wat my so seermaak. Te vertel hoe ek voel. Regtig voel. Want gevoelens is eg. En as ons nog kan saambid oor die probleem, soveel te beter.

Want dan begin heling.

Toortsie

Transformasie Gebedsbediening Struisbaai

Transformasie Gebedsbediening TPM

~ Toortsie ~ 9 Kommentaar

Jare gelede was ek in ‘n krisis en het ek te doen gekry met Transformasie Gebedsbediening (TPM Transformation Prayer Ministry). Op daardie stadium was dit bekend as Theophostic Prayer Ministry. Wat dit aan my siel en gees gedoen het, kan ek nie beskryf nie. Dit was fantasties. Intussen is ek ook opgelei as TPM Fasiliteerder en sien ek hier en daar kliënte terwyl ek dit ook steeds op myself toepas.

Ek sien wonderwerke voor my oë gebeur. Ek sien hoe mense met swaar harte by ‘n TPM sessie opdaag en verlig en verlos van jarelange vragte wat hulle saamgedra het, daar wegstap.

TPM is ‘n gebedsbediening waar ek slegs as fasiliteerder optree tussen die kliënt en God. Ek vra slegs vrae soos vasgestel deur TPM self en gee nie raad nie. Deur baie spesifieke vrae kom ons gewoonlik uit by die wortel van die probleem, by iets wat dalk in die persoon se kinderdae gebeur het, baie keer iets wat die persoon al lankal vergeet het. Dit word dan na God uitgehou en Sy waarheid word gevra. Hy wys die persoon die waarheid op ‘n unieke manier wat daardie persoon sal verstaan. Gewoonlik, wanneer die persoon waarheid ontvang het, is daardie probleem opgelos.

Tydens TPM kry die kliënt ook die geleentheid om wrokke, woede of kwaadwees wat hy mag hê teenoor iemand anders, te vergewe. Natuurlik is dit vrywillig, maar wanneer iemand sy kwaadwees teenoor ‘n persoon, God, of iets laat gaan, is sy hart baie ligter en word sy eie probleme ook sommer makliker opgelos.

Ons werk op hoe die persoon oor iets voel en vir baie mense is dit die eerste keer vreemd omdat hulle nog nooit hulleself die voorreg gegun het om te dink oor hoe hulle voel nie. Of die gevoel is dalk nog al die jare doodgedruk omdat dit te seer is daar. Ons gee die seer lug en dit is nie altyd maklik nie, net soos dit nie maklik en lekker is om aan ‘n seer tand te laat boor nie. Tog weet ons dat as daardie tand geboor is, dit skoongemaak is en nuut opgevul is, dit aansienlik beter voel as om met die seer tand te loop.

Ek bied TPM aan op Struisbaai omdat dit so rustig en mooi is daar en ook privaat sodat die persoon ongesteurd kontak met God kan maak en sy probleme in die oë kyk.

Groete

Toortsie

Soms het ons TPM nodig

~ Toortsie ~ 18 Kommentaar

Soms het ons almal TPM (Transformation Prayer Ministry – Transformasie Gebedsbediening) nodig. Soms het ons nodig om te kyk wat ons ontstel. Nie net wat nie, maar ook sommer hoekom dit ons so ontstel. Soms het ons sommer net die ‘tender loving care’ van die Here nodig. Soms het ons sommer net nodig om ons hart uit te huil voor Hom.

Soms het ons nodig om te waag en dieper in ons eie lewens in te kyk, na daardie dinge wat ons al lankal ‘verwerk’ het en ver en diep weggepak het in laaitjies waar niemand anders ooit sal kyk nie. Soms kom ons af op onbenullige gebeurlikheidjies in ons kinderdae wat regtig niks beteken nie, maar wat vir ons as kinders, in ons kindergemoedjies, leuens oor onsself gefluister het wat ons ons hele lewe lank glo.

Soms het ons nodig om die kwaadwees te laat gaan. Kwaadwees vir God, kwaadwees vir ander mense, kwaadwees vir onsself. Soms het ons nodig om te besef dat ons kwaadwees nie ons beskerm of regop hou nie, maar dat dit God is wat ons beskerm. Soms het ons nodig om dit by Homself te hoor dat Hy ons beskerm en dat Hy veg vir ons.

Soms het ons sommer net nodig om by Hom self te hoor dat Hy lief is vir ons, net soos ons is omdat Hy ons juis so gemaak het, of dat Hy ‘n doel met ons het, ‘n plan, of wat Hy ookal vir ons wil sê. Dat ons kosbaar is vir Hom, dat Hy ons uitgesoek het as Sy kinders. Soms het ons sommer net nodig om by Sy voete sit en gekoester te word.

Ons almal het dit soms nodig. Waag dit!

Toortsie

Bevryding van angs en bekommernis

~ Toortsie ~ Lewer kommentaar

Die lewe is onseker. Ons weet nie wat ons toekoms inhou nie. Verhoudings is onseker. Dit gaan swaar met ons geldsake. Die reën bly weg. Ons kry skielik slegte nuus van die dokter af.

Of ons nou daarvan hou, of nie, die lewe is nie aldag maklik nie. Uitdagings wag om elke hoek en draai. Ons weet nie altyd watter kant toe nie. Ons raak bang. Angstig. Ons begin twyfel in onsself, oor onsself, oor ons omstandinghede, oor God.

Bevryding van Angs en Bekommernis is ‘n oulike boek om aan te skaf. Bruce Wilkinson, ‘n baie dinamiese geestelike skrywer van Amerika, hanteer in hierdie boek situasies soos gesondheidsprobleme, finansiële probleme, geestes- en emosionele gesondheid, werksekerheid, persoonlike veiligheid, en vele meer.

By elke onderwerp gesels hy eers in die algemeen daaroor. Hy probeer om vir jou ‘n bietjie perspektief te gee. Kopkennis. Dan volg ‘n paar teksgedeeltes, met ‘n gebed waar jy vir God nader en jou probleem aan Hom stel. Hartskennis.

Agter in die boek is ‘n lys van Skrifgedeeltes wat jou sal help om jou bekommernis te oorwin.

Dit is regtig ‘n oulike boek om te lees.

Terselfdertyd wil ek jou aanmoedig om, as jy regtig ernstig deur angs geteister word, erns daarvan te maak. Gaan sien iemand wat jou daarmee kan help. Vir baie mense is so iets ‘n skrikwekkende gedagte, maar jy voel soveel beter as jy van daardie bekommernisse kan afgooi. Nee, die probleem gaan nie noodwendig weg nie, maar die manier waarop jy daarna kyk en die invloed wat dit op jou gees het, kan wel verander. Het jy dalk ‘n TPM-fasiliteerder (Transformation Prayer Ministry) in jou omgewing? Waag dit en gaan besoek daardie persoon. Jy sal aangenaam verras wees.

Intussen, lekker lees aan Bevryding van Angs en Bekommernis deur Bruce Wilkinson.

Toortsie

Loer gerus by Pinterest en ook HIER vir my boekbesprekings.