Skryf ‘n opstel oor besoedeling

Die nuwe kwartaal het begin en die kinders skryf opstelle dat dit klap. Dit kan ek aan my blogbesoeke sien.

Skryf ‘n opstel oor besoedeling. Ek vra vir jou vrae en jy skryf dan die gedagtes neer wat in jou kop opkom oor die onderwerp. Dit voeg jy bymekaar tot ‘n opstel.

Ek dink as jy oor so ‘n onderwerp skryf, jy ‘n duidelike standpunt moet inneem. Gaan jy sommer net oor besoedeling in die algemeen praat, die verskillende soorte besoedeling wat daar is? Geraasbesoedeling, lugbesoedeling, waterbesoedeling, grondbesoedeling en nog. Of gaan jy een spesifieke soort besoedeling uitlug?

Hoe voel jy oor besoedeling? Dink jy dit is ‘n werklike probleem, of dink jy die mense oorreageer?

Van watter tipe besoedeling is jy in jou omgewing bewus? Wat veroorsaak die besoedeling, hoe gebeur dit? Wat is die gevolge van besoedeling? Wat, dink jy, gaan die uiteinde daarvan wees? Hoe gaan dit die aarde, maar ook die mensdom beïnvloed?

Is daar iets wat ons as mens kan doen om besoedeling te beperk? Is daar iets wat die regering kan afdwing? Die meeste van alles, is daar iets wat jy, as tiener, kan doen om besoedeling teen te werk? Wat kan julle in julle huis doen om besoedeling te beperk? Is daar dinge wat julle as gesin reeds doen en watter volgende stap kan julle doen om besoedeling selfs meer te beperk in julle onmiddellike omgewing? Dink jy dit sal help as een mens ‘n verskil maak? Kán een mens ‘n verskil maak? Is daar projekte waarby julle as skool betrokke kan raak?

As slothoofstuk kan jy weer jou standpunt herhaal waarmee jy begin het, dat besoedeling wel ‘n probleem is en wat gaan ons daaromtrent doen?

Terwyl daar in Julie ‘n wêreldwye aksie is om plastiek te beveg, kyk bietjie wat ek geskryf het wat ek reeds doen en ook wat ek nou besig is om te implementeer om selfs meer te doen om besoedeling te beveg.

Vir nog opstelhulp kan jy hier kliek. Ook vir mondelinge of toesprake oor dieselfde onderwerpe. Onthou om toortsie.com as bron aan te gee as julle hierdie inligting gebruik.

Blogmaats, as julle lus het om ook hieroor te skryf, maak so en onthou om hierdie bloginskrywing te tag.

Lekker skryf!

Toortsie

Advertisements

Wanneer jy daardie mondeling doen

‘n Mamma kontak my oor ‘n toespraak wat haar kind moet maak. Nes die meeste van kinders, nes ek ook was, is die kind in ‘n toestand daaroor. Dis maklik om te babbel met jou beste vriende, maar om op te staan en te gaan praat voor die klas, is nie ‘n grap nie. My skoolmondelinge het baie keer in so ‘n gelag ontaard, ek kon amper nie praat nie.

Oor jare het ek hierdie wenke geleer, en ek hoop dit help ook vir ‘n kind of twee wanneer sy ‘n toespraak moet maak of mondeling moet praat.

Dis makliker gesê as gedaan, maar sy moet ontspan. (Dit is selfs vir my op die ouderdom van 56 steeds moeilik. Dit is menslik om gespanne te wees.)

Eerstens is dit belangrik dat jy goed voorbereid is. Weet wat jy wil sê. Skryf jou eie mondeling, sodat dit wat jy wil sê, uit jou hart uit kom, dan onthou jy dit makliker. As jy jou eie mondeling praat, hoef jy dit amper nie eers uit jou kop te leer nie, omdat die woorde jou eie is en sou jy ‘n ander woord gebruik, sal dit nie saakmaak nie.

Skryf jou mondeling en oefen, oefen, oefen dit. Oefen dit hardop voor ‘n spieël. Vertel vir die persoon in die spieël dit wat jy wil vertel. Praat jou hart uit. Wees oortuigend. Glo in wat jy wil sê. Glimlag.

Die dag van die mondeling? Die mondelingperiode?

Haal diep asem. Haal rustig asem. Weet dat jy dit mos goed voorberei het.

Dan, terwyl jy nog sit, moet jy net rustig wees. Wanneer hulle jou naam noem, moet jy met vrymoedigheid opstaan en vorentoe stap. (Oefen dit ook by die huis.) Onthou, die toespraak begin van die oomblik af wat hulle jou naam noem, terwyl jy nog in die stoel sit.

Dan gaan staan jy rustig daar voor. Kyk vir die ander. Glimlag. Haal diep asem.

Wanneer jy gereed voel, begin jy jou storie. Jy praat klaar, sê dankie (of nie), stap statig terug en gaan sit. En eers DAN stop die toespraak. Dan blaas jy al die asem wat opgebou het uit, kyk vir jou beste maat en glimlag verlig.

Oefen ook die ‘optrede’ by die huis, van die sit in die stoel, die opstaan, die gaan staan daar voor, die praat, die glimlag, die terugstap en die kom sit in jou stoel. Oefen dit, dit gee vir jou selfvertroue.

Sterkte, jy kan dit doen!

Toortsie

Vir nog mondeling/opstelhulp, kliek HIER.

Toespraak: Waarheid

Alhoewel ek hier ‘n klompie gedagtes rondom ‘waarheid’ neergepen het, en jy meer as welkom is om dit te gebruik, sal ek jou aanraai om dit te verwerk na jou eie toespraak. Gebruik jou eie woorde en vul dit ook aan met jou eie idees. Onthou, ook ander leerders gebruik hierdie bron en jy wil tog nie uitgevang word dat jy iemand se werk net so gebruik nie, of hoe? Veral nie in ‘n toespraak oor die waarheid nie! Onthou om toortsie.com as bron te vermeld indien jy wel hierdie inligting gebruik het.

Waarheid is vir my ‘n goeie redenaarsonderwerp, want waarheid is iets wat al hoe minder mense deesdae respekteer. Mense verdraai die waarheid om elke hoek en draai.

Dit maak net nie meer saak as iemand nie die waarheid praat nie! Hulle voel nie eers meer sleg as hulle uitgevang word nie. Dit het deel van die alledaagse manier van doen geword om halwe waarhede te versprei.

Witleuentjies is aan die orde van die dag. Wat maak dit saak? Dit was tog net ‘n witleuentjie, niemand het skade gelei daardeur nie? Of het iemand? En wat daarvan as iemand skade gelei het, solank ék net nie skade gelei het nie. Of solank ek nie uitgevang word nie.

Want alles gaan oor me, myself and I.

Waarheid is ‘n produk van integriteit. As jy integriteit het, sal jy die waarheid praat. Deur die waarheid te praat, wys jy dat jy respek het vir jouself, vir ander mense en vir God.

Jy kan eers respek aan ander mense betoon as jy respek het vir jouself.

Deur die waarheid te praat, respekteer jy dan jouself en verdien ook die respek van ander.

Respekteer God deur die waarheid te praat, want God is die Vader van die waarheid, Hy sal nooit lieg nie. Hy is die Woord, die Waarheid en die Lewe.

Deur die waarheid te praat, bou jy jou naam, en eintlik is jou naam al wat jy het. Met tyd leer mense hulle kan jou vertrou, glo wat jy sê, omdat jy iemand is wat die waarheid praat. Met tyd bewys jy dat mense jou woord kan vertrou, omdat jy nie lieg nie.

Wanneer jy altyd die waarheid praat, hoef jy ook niks te onthou nie. Jy hoef nie te onthou hoe jy jou stories verdraai het en nou moet regpraat nie.

Daar is klein maniertjies om die waarheid te praat, bv nie lieg op ‘n vorm nie. Sommer net ‘n vorm teken waarop die inligting nie reg is nie.

Sommer net ja of nee sê om die ander persoon stil te kry, al is die teendeel waar.

Die waarheid maak vry. Soms dra jy vir jare swaar aan iets wat jy tog nie wil hê moet uitkom nie, en dan, een dag, kom die waarheid uit. Dis die heel beste ding wat kan gebeur, want as die waarheid eers uit is, kan jy begin werk daaraan, kan jy vry kom en ‘n nuwe mens begin wees.

Afsluiting: Jy kan kies of jy die waarheid gaan praat, of nie, maar ek kies om die waarheid te praat.

Toortsie

Vir nog mondelingonderwerpe, onderwerpe vir toesprake, opstelle, kliek HIER.