Eksperiment #3

Ja-nee, dis al weer Maandag en vandag moes my ou sonoondjie weer uithaal en wys. En ja, ek het beslis te veel van hom verwag, dit het ek van die eerste oomblik af geweet.

Vanoggend 9 uur het ek ‘n bevrore stukkie ‘pork belly’ in my sonoond gesit. Ek weet, ek weet, ‘n mens moet eerder ontdooide kos insit. Ag, en dit lyk toe of die sonnetjie lekker gaan skyn en oondjie sommer warm gaan word en toe sit ek sommer nog twee beessterte ook in. Bevrore, let wel. En skielik raak dit bewolk, sonnetjie bly wegkruip en die oond se temperatuur val tot by 40 grade Celcius. Wel, met ‘n wolk voor die son en 3 bevrore stukke kos, wat anders kan jy verwag? Dit, terwyl ‘n mens eintlik een ding op ‘n slag moet gaarmaak.

Maar Toortsie pendel mos en moet maar die son gebruik wanneer nodig.

Iewers het son weer sy kop uitgesteek en het hy die vark lieflik gaar gekry. Sag, sag, sag. Ek sou dit graag ‘n bietjie wou gebraai hê ook en ek is seker dat as dit al was in die oond en dit nie met ‘n beesstert of twee moes kompeteer nie, dit sou gebraai het ook. Die beesstert was al gaarderig, maar nog ver van sag af.

Die uitslag van my eksperiment? Ek dink dit was geslaag. Vir wat alles van die oondjie verwag is, beslis, want die vark was gaar en daar is baie ure se kooktyd by die beesstert verkort – kooktyd waarvoor die gas betaal moet word. En ek het weer heelwat kos vir die volgende paar dae. Wat meer kan ek vra?

Ek sal nie aanraai dat soveel kos op een slag gemaak wordnie. Mens oorlaai die oond onnodig.

Toortsie se reseppies werk sowaar in enige tipe oond – elektriese oond, gasoond, sonoond …

Toortsie

Eksperiment 2 Sonoond

Ek vorder, ek vorder! En leer. Gister was nou weer ‘n eksperimentele dag.

Die son het sommer lekker geskyn en 10 vm het ek vir oondjie uitgesit met sy gesiggie na die son. Sommer gou het sy temperatuur mooi gelig.

In ‘n swart oondplaat het ek ‘n bevrore ribbetjie gesit. Jammer, ek weet nie al gisteraand dat ek vandag ribbetjie wil gaarmaak nie. Daarom bevrore. Met ‘n swart bakplaat bo-oor as deksel het dit sommer gou ontdooi en mooi begin aanloop.

Toe raak ek meer voortvarend en besluit om my groente ook in die oondjie te sit bo-op die rib met die wete dat dit dalk die rib stadiger laat gaarword. Dit was wel so.

By 1 nm rond was die groente gaar, maar die rib nog nie. Met die groente uitgehaal, sit ek toe nog ‘n varkfilet bo-op die rib.

Teen 4 nm het die oond sy hitte vinnig verloor en het ek alles uitgehaal. Rib was heerlik gaar, vark ook. Tog het die vark baie vog verloor – dalk was dit net te stadig? Ek weet nie.

Hierdie wonderlike webblad het my baie antwoorde gegee.

1) Swart bak met swart deksel is ‘n moet.

2) Son moet op deksel skyn – daarom het die rib soveel stadiger gekook.

3) Daar moet 5 cm spasie rondom die bak wees.

4) 120 grade Celsius is warm genoeg, ook omdat die son direk op die bak se deksel skyn.

5) ‘n Mens moet maar rustig wees en ekstra tyd toelaat.

6) 10 vm tot 2 nm is die beste tyd van die dag om te kook.

7) Jy kan die potte voorafverhit as jy haastig is.

8) Dit kook ook blykbaar vinniger as jy die bak effens lig met ‘n glasbak of iets.

Wel, my kos het alles lekker en gaar gekom ná ‘n dag in die son, alles kosse wat heelwat elektrisiteit sou gebruik om gaar te kom. My week se kos is gaar en reg! En ja, my reseppies kan sowaar in die sonoond gemaak word.

Toortsie

Toortsie se groente uit boek 1 in sonoond gemaak.

Eksperiment

https://karooplaas.co.za/wp-content/uploads/2021/02/oven-Black-open.jpg

Na aanleiding van ‘n baie interessante gesprek het ek besluit om vir my ‘n sonoond aan te skaf. Ek maak baie graag vleis in die oond gaar en hou daarvan om dit lank in te hou, wat elektrisiteitsverbruik kan opstoot. Met ons Suid-Afrikaanse son wat so graag op ons neerskyn, dink ek toe by myself: Hoekom dan nie? Gestel ek kan ‘n skaapboud vir ‘n dag in die sonoond sit en op so ‘n manier die elektriese oond spaar, hoekom dan nie?

My sonoond het op een koue, reënerige dag hier opgedaag en sedertdien was ons program nog so vol dat ek dit nog nie kon uittoets nie. Vanoggend haal ek toe ‘n halwe boerbokboud uit die vrieskas en sit dit in die sonoond met die gedagte: Kom wat wil. Kom ons kyk wat gebeur.

Daar was baie dinge wat teen my getel het: 1) Die boud was gevries. 2) Die somer is nog nie regtig hier by ons nie, dit was vandag kouerig en vanoggend bewolk. Die stoep waar ek gedink het dit kan werk, het ‘n dak oor wat die son gekeer het, so ek moes die sonoond verskuif na ‘n lieflike plekkie in die son, maar waar daar ‘n effense koue wind gewaai het.

Met die koue, bewolkerigheid en effense windjie in gedagte, was ek nie ontsteld dat die oond se temperatuur stadig gestyg het nie. Op sy warmste was hy ‘n rukkie by 140 grade Celsius, maar meestal tussen 90 en 120. Ek het die halwe boudjie vanoggend kwart oor 10 ingesit en by vier nm het die son alreeds weer begin kwyn. Toe ek dit ná 5 uithaal, was die boud lieflik gaar!

Eksperiment geslaagd.

Toortsie

Ns. Dit wil al vir my lyk of Toortsie se vleisgeregte wel in die sonoond gaargemaak kan word!