Seksuele sonde

Hierdie is vir my ‘n moeilike blog wat ek vandag skryf, omdat dit so een honderd persent indruis met wat vandag geleef en verkondig word. Dis amper outyds. Uit die oude doos. Wel, Ou Testamenties, sal sommige sê en saam met dit dit so effens wegwaai met die hand en die gesig afwysend trek. Met hierdie skrywe wil ek ook geen las op iemand se skouer sit nie of oordeel nie. Glad nie. Ek kon net nie help om dit te skryf nadat ek die stuk in Levitikus gelees het nie. Toe ek dink om dit eerder te verwyder, het ek baie duidelik gehoor dat ek eerder aan God gehoorsaam moet wees as aan mense.

Ek is seker dat die Ou Testament in die Bybel ingesluit is omdat God wil hê dat ons dit ook moet lees. Deur die Ou Testament te lees, verstaan ek God beter, verstaan ek die Nuwe Testament beter. Want God het nog nooit verander nie. Dit wat Hy in die Ou Testament haat, haat Hy vandag nog. Al verskil is dat Jesus gekom het om ons van ons sondes te verlos, dat ons nie meer doodgemaak word as ons dit doen nie. Maar, soos Paulus soveel keer in die Nuwe Testament waarsku, gee die voorreg van Jesus se verlossing ons nie die reg om te maak wat ons wil, ons skouers op te trek en aan te gaan nie. Nee, dit gee ons juis die verantwoordelikheid om self te besluit om te doen wat God wil hê.

Levitikus is baie reguit, op die man af. En ja, ek eet ook onrein kos, maar in die Nuwe Testament is alle kos rein verklaar. En ja, ek doen baie sonde. Elke dag. Ek oordeel. Ek praat soms lelik. Het soms lelike gedagtes. Maar omdat ek self sondig, beteken dit nie dat ek moet stilbly oor wat God haat nie.

God haat seksuele sondes. Hy haat egbreuk. Hy haat dit as iemand gemeenskap het met iemand anders se vrou of man. Hy haat dit as jy gemeenskap met jou skoondogter het, soveel so dat Hy sê hulle verdien die dood. Hy haat dit as ‘n mens met ‘n dier geslagsgemeenskap het, dit is afskuwelik! Vieslik! Ook nie met jou oom of tante nie. Hy haat dit as ‘n man iemand anders se vrou afneem. Hy haat homoseksuele verhoudings.

En net indien ons tog dink dit is Ou Testamenties, word dit oor en oor herhaal in die Nuwe Testament ook. God haat seksuele sonde. Seksuele reinheid is vir Hom só belangrik, hy vergelyk Sy verhouding met die kerk soos met ‘n huweliksverhouding met ‘n vrou. Hy verwag dat ons seksueel rein sal wees. Selfs tot aan die einde van Openbaring praat Hy baie duidelik daarteen. Seks is vir die huwelik tussen een man en een vrou.

Dalk moet ons weer begin dink oor die flieks en sepies en alles wat ons op TV kyk. Dit word so ‘reggepraat’ dat ons dit al begin glo. Dat dit algemeen raak. Dat saamblyverhoudings niks vreemds meer is nie. Dat ek my man of vrou verneuk, maar sommer net iets so in die verbygaan is. Solank ons nog nie seks gehad het nie, het ons niks gedoen nie. Solank ons net nie uitgevang raak nie, en dan maak dit ook eintlik nie saak nie. Dat mense in die platteland sal skinder oor ‘n huwelikspaar wat skei, net om môre aan te gaan asof dit niks is nie. Nie vreemd is as ek vandag die een buurvrou het en môre ‘n ander nie. Of as ek self oor die draad loer nie.

Dalk moet ons almal ‘n slag weer introspeksie doen. Ook ek. Nee, dit gaan my sekerlik nie in die hel laat beland nie, maar dat dit God se hart seermaak en ‘n klomp mense s’n daarmee saam, is nie altemit nie. Dalk moet ons, ook ek, op my knieë gaan, ‘n sirkeltjie om my trek met bordkryt en vra, Here, maak reg wat verkeerd is binne hierdie sirkel.

Toortsie

Die gesels het opgeraak

Ons raak verlief, ons kan net nie genoeg van mekaar kry nie, ons loop oor van woorde en liefde, ons praat en vry as ons by mekaar is, eet mekaar amper op, die res van die dag whattsapp ons en bel en wat nog alles.

Dan trou ons en die lewe gaan aan en ons besef ons het nog ons eie belangstellings ook, ons wil soms ons eie ruimte hê, ons vriende raak weer vir ons belangriker, ons vreet mekaar nie meer heeltemal op nie, die kindertjies kom, die werk roep en ons raak gewoond aan mekaar. En as ‘n mens baie lank getroud is, hét jy al regtig alles gesê en kan jy nie meer ure aaneen babbel nie. Soms is dit selfs moeilik om 10 woorde op ‘n aand te sê.

Dit kan vir party van ons ‘n groot probleem wees, veral as ons praters is. Die stiltes kan ongemaklik raak.

Dis sulke tye wat ‘n mense weer moet kreatief raak. Alles gaan tog nie oor gesels nie, selfs al is opbouende woorde jou liefdestaal. Dis wanneer ons doelbewus maniere moet vind om vir mekaar te wys ons is lief vir mekaar, dat dit vir ons lekker is om in mekaar se teenwoordigheid te wees, selfs al gesels ons nie die hele tyd nie.

Intiem.co.za waarsku ons ook teen iets anders, dat ons so moeite doen om ‘goeie vriende’ in die huwelik te wees, dat ons huismaats raak in plaas van huweliksmaats, en dís baie gevaarlik. Dat dit so ‘goed’ gaan in die huis, maar eintlik het julle niks met mekaar te doen nie.

Ons moet doelbewus planne maak oor hoe om die vlam aan die brand te hou, dis regtig die moeite werd. As die tyd min is, doen klein goedjies. Raak aan jou man as hy by jou verbystap, gaan sit by hom op die stoel as julle saam TV kyk, maak tyd vir ‘n vinnige skemerkelkie, gaan stap saam en hou sy hand vas.

Ook ek moet gereeld hierop konsentreer, ons verval so maklik in ons eie roetiene en vergeet van ons huweliksmaat. En onthou, geen huwelik kan sonder intimiteit voortleef nie. Wanneer seks reg is in die huwelik, het dit te doen met slegs 10% van die probleme. Wanneer die seks egter nie reg is nie, is dit verantwoordelik vir 90% van die probleme.

En, moenie te veel bekommer oor die gesels wat min raak nie, geniet die saamwees.

Groetnis

Toortsie

Seks en die huwelik

Soos die man met die hoed sê, is ons Afrikaanssprekendes nie einlik ingelig oor die seksdeel van die huwelik en die intimiteit daarvan nie. Ons praat nie daaroor nie en skryf ook nie op ons blogs daaroor nie en dit wat ek nou skryf, wou ek al soveel keer skryf, maar ek is mos ‘n Afrikaanssprekende vrou, hoe kan ek?

Maar Toortsie se lig skyn mos orals in, ook in die slaapkamer. Ek luister wat mense sê en hoor baie dinge, soos:

‘Seks is overrated’.

Ek hoor hoe mense verskriklik hard werk en eenvoudig te moeg is saans vir seks. Dan slaap die kinders ook nog die bed vol. Onthou mense, jou huwelik se behoud is belangriker! Die grootste geskenk wat jy jou kinders kan gee, is ‘n gesonde huwelik. Haal hulle uit jou bed uit!

Ek hoor hoe party jongmense oorboord gaan met seks voor hulle troue, dat die plesier daarvan weg is teen die tyd wat hulle trou, dat dit dan al afgesaag is.
Terselfdertyd hoor ek die teenpool dat dit onder jongmeisies ‘n meer algemene tendens raak dat hulle bang is vir seks.

Ja, seks is nie alles nie. Ja, ons het verskillende liefdestale en almal s’n is nie seks nie.

Terug na die basiese dinge. Seks is deur God ingestel vir die huwelik. Buite die huwelik is dit al die lelike woorde wat mense soms van seks sê, binne die huwelik is dit mooi en rein en skoon en fantasties. Dis daar om geniet te word deur huweliksmaats. Dis die kosbaarste ding wat daar tussen huweliksmaats is. Dis die een ding waarmee ek vir my huweliksmaat sê dat hy die spesiaalste mens is wat ek ken, ek doen met hom wat ek met geen ander persoon sal doen nie omdat ek hom so geweldig liefhet.

Die vieslikste ding wat jy jou huweliksmaat kan aandoen, is om sy/haar seksualiteit te beledig. (Seks is ook al waaraan jy kan dink!) Dis hoe God mans gemaak het, hul natuur vra dit! Soos my liewe oom Christo sê, jy kan so kwaad wees vir jou vrou, maar na ‘n rukkie roep die natuur julle weer bymekaar.

Wanneer seks in ‘n huwelik gesond is, is dit 3 persent belangrik in die huwelik. Dan kom die ander dinge sommer reg. Is seks egter afwesig in die huwelik, dra dit by tot 95 persent van die probleme. Dán is ALLES groter probleme as wat dit sou wees.

Asseblief mense, moenie julle sekslewe verwaarloos nie. Gaan sien ‘n seksioloog as dit nodig is. Ons het nodig om ons huwelike op te pas en die duiwel loop rond soos ‘n brullende leeu wat sy bes doen om huwelike te verwoes.

Pas julle huwelike op. Dis regtig die moeite werd.

A marriage wihout sex is only a substandard marriage.

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Pinterest

Plaasakkomodasie by Riversdal, Wes-Kaap

 

versoeke

Die woorde wat, vandat my blog bestaan, die meeste gesoek is in soek-enjins, is wat is liefde? ; Toortsie (natuurlik!! 😆 ) Werk van die huis af, Mondeling onderwerpe, Voedseldriehoek, Bemoediging, Positiwiteit…

Hoekom is hier so ‘n uiterste krisis rondom liefde? Is dit dat ons dalk selfsugtig geword het en net self bevredig wil word, sonder om moeite te doen om die ander een te bevredig? Liefde begin by die GEE daarvan, en sodra ons kan help om die ander persoon se tenkie te vul, gaan hy/sy positief begin reageer en ook MY tenkie begin vul…

Iemand vra: “Hoe kan ek kyk wie is op my man se wattsap?”  Ai ai ai…. ‘n huwelik word gebou op respek en aanvaarding en vertroue. Ons twyfel almal seker maar soms, maar ons MOET werk daaraan dat ons vertrou en vertrou word. Onthou, vertroue skep vertroue.

In my kopkoolslaairesep kom die bestanddeel, peperwortel. Dis iets wat ekself nog nooit gebruik het nie en in Checkers op ons dorp het ek erg gesoek. ‘n Vriendin help my toe en sê dit is “Horse Raddish” 😯 Ek kon dit toe in Spar kry, in ‘n potjie. Ek sien dat ander ook vra waar hulle dit kan kry.

“Lief jou my kind” O ja, ek lief julle ook, al my kinders!! 😆

“Brandwurms”….. ?   huh???? Watse goed is dit? 😯

Hoor hierdie een: “Saam met vriendin in bed” !!!! Nee!!! Ek hoop nie sy bedoel dit “so” nie!! Dis te sê as dit ‘n “sy” is wat dit getik het! Van my lekkerste kuiers ooit was as maatjies by my kom kuier het en ons kon in die spaarkamer in die dubbelbed slaap. Daar het ons tot laatnag lê en gesels en giggel, net soos dogtertjies maar maak. Onskuldig!!  Maar om saam met jou vriendin in die bed te spring as jy ‘n man is? Nee!! Jy maak misbruik van die vriendskap. As jy so oor haar voel, sê dit vir haar en trou met haar! A nee a!! 😦

“eensaam”  … en “help my Here, asseblief!!”… oeeee ek kry mense jammer wat so eensaam en so in nood is dat hulle sulke woorde op die internet uitroep! Ek wens ek kon hulle elkeen ‘n drukkie gee, ‘n hand van bemoediging. Mag hulle vind dit wat hulle soek!! Ek glo die een wat die Here geroep het, ‘n antwoord sal kry, want Hy omarm die een wat Hom soek.

“aanvaar jou huweliksmaat” Wel, dis die beste ding om te doen, in plaas daarvan om hom/haar te probeer verander. Wees lief vir die een wat jy gekies het. Ekself het ‘n rukkie terug ‘n groot irritasie in my hart gehad en ek dink nie ek was so heeltemal verkeerd nie. Maar my huwelik is vir my veel belangriker as die irritasie, en al het dit ‘n tydjie geneem, het ek maar weer by daardie punt gekom: Aanvaar hom, wees lief vir hom. Verander dit wat jy kan verander, aanvaar die res. Bid daaroor. Gee dit vir God.

Mense! Help hierdie persoon!! “boererate oemf in die bed” en “Is sy nog lief vir my as sy nie seks wil hê nie?” Wanneer het seks in huwelike ‘n probleem geword? Is dit omdat ons te besig is en te moeg is vir seks? Of sien ons goed op TV en ander plekke en dit gee vir ons onmoontlike verwagtinge?

Toorts