Met die hond, of nie?

Die meerderheid mense sal in elk geval dink dis laf om ‘n Parkrum MET ‘n hond te doen, maar interessant genoeg, is dit een van hulle toegewings: Jy mag met jou hond die parkrun doen, maar slegs een hond en hy moet aan ‘n leiband wees. En jy mag jou baba in die stootwaentjie saambring, maar nie jou hond én ‘n baba in ‘n stootwaentjie nie.

Toe ek die eerste keer park’walk’, en ek sien hoe lekker die roete is tussen bosse en almal stap nie op ‘n hoop nie en hier en daar ‘n hond, dink ek by myself dat ek dit dalk moet probeer. Eintlik is my idee dat ek en hond sommer parkrun toe stap, die parkrun stap en terugstap. Lekker Saterdagoggend uitstappie. Ons kry ons oefening in en ek voel nie sleg dat die honde by die huis bly en net moet lê nie, terwyl hulle noi lekker stap in die veld en hulle kon dit ook mos gedoen het.

Maar watter hond kies ek? Toortsie het twee honde. Grotes.

Ek besluit op die jonger een, en sowaar, hier sê manlief hy gaan ook weer saam, dan kan ons albei honde saamvat.

Ek het maar so stil-stil gewonder hoe dit sal gaan. Dis plaashonde wat soms aan ‘n leiband is en wanner hulle aan die leibande is, is die twee leibande vasgebind aan mekaar.

Ek koop toe sommer twee nuwe leibande, die ander is al erg geknoop en hier gaan ons met die bakkie, die honde agterop. Te lekker.

Of die honde dit geniet het? Beslis ja.

Het die honde ander mense gepla? Ek dink nie so nie. Ek hoop nie so nie. Ons het agterlangs gehou en toe my ou hond sy draaitjie wou stap, het ons mooi in die bossies gaan staan sodat hy nou nie oepsies maak waar mense moet loop nie.

Gaan Toortsie dit weer doen? Ek dink ek gaan die meerderheid volg en dit nie weer met my hond doen nie, want soos ek die vorige keer gesê het, doen ek dit vir die geselligheid daarvan. Ek wil gesels met die mense om my. Ek wil rondkyk. Ek wil hoor hoe dit met almal gaan. As ek egter met ‘n hond aan die leiband loop, en my man is ook by met nóg ‘n hond aan ‘n leiband wat reageer as ek ‘n geluid maak, is my aandag by my twee honde, en by niemand om my nie.

Been there done that got the t-shirt. En nou sien ek ‘n hele paar mense hul koppe in verligting knik.

Groetnis

Toortsie

My eerste parkrun

Saterdag het ek die eerste keer deelgeneem aan ‘n parkrun, alhoewel, ek het geparkwalk. Ek hoor al lank al van mense wat elke week ‘n parkrun doen en dit klink so lekker, maar ons het nie so iets op ons dorp nie. Toe kry ons dorp dit, maar 8 vm op ‘n Saterdagoggend is darem VROEG!

Vrydagaand sien ek weer op Facebook dat die mense skryf oor die parkrun en ek dink so by myself dat dit mos my voorneme was dat as ek op my dorp is en hier gebeur iets, ek gaan deelneem. Verder is ek dan so lief vir stap en kom ook nie gereeld daarby uit nie. Dis nou sommer nonsens! Net daar registreer ek en Saterdagoggend vroeg nooi ek vir manlief saam en whalla, daar gaan ons.

Sjoe! Dis lekker! Net 5 ou kilometertjies en glad nie eers bulte nie. Die geselskap is heerlik! Ek sien soveel bekendes uit my dorp, mense met wie ek al ‘n pad gestap het, mense met wie ek nog ‘n pad wil stap en minder bekendes wat oor tyd mos bekendes kan raak. Dis ‘n fees!

Toortsie sal dit weer wil doen, as sy onthou, en die grootste onthouding is die strepieskode wat moet saamgaan. Dis die eerste plek waar ek totaal uit die bus uit gaan val, maar ag wat, dan doen ek dit sommer net saam vir die geselligheid, strepieskode of te nie. Ek het hom nou in my selfoonsakkie gebêre, dalk werk dit!

Volgens die Parkrun webblad, was die heel eerste Parkrungeleentheid op 2 Oktober 2004 in Bushy Park, Teddington, in die Verenigde Koninkryk, met slegs 13 deelnemers. Oor tyd het hulle gerekenariseer en kon hulle al hoe meer Parkruns aanbied, soveel so dat dit nou ‘n wêreldwye ding geraak het. Hulle leuse bly steeds dat dit weekliks moet plaasvind, gratis moet wees, en tot beskikking van almal wat wil deelneem.

En sou jy een keer geregistreer het, is jy vir die res van jou lewe geregistreer om op enige plek in die wêreld deel te neem op ‘n Saterdagoggend, waar jy ookal is.

In Suid-Afrika is dit orals 8 vm en jy daag net op, neem deel, wys jou strepieskode en dis dit. Hoe moeilik kan dit nou wees? Jy mag selfs jou hond saamneem solank hy aan ‘n leiband is en slegs een hond per persoon, en jou jong kinders mag ook deelneem, solank hulle onder toesig is.

Nou toe! Wie is Saterdag by vir ‘n gesellige saamhardloop/saamstap? Dit lyk my jy kan selfs Vitalitypunte verdien met Parkrun.

Groetnis

Toortsie