Tannie Martha se jas

In die vorige bloginskrywing noem ek toevallig van onheilighede wat moontlik mag uitgebroei het. Ek skryf ‘n hele blog, maar Seegogga sien net daardie drie woorde raak. Hierdie val in by Sonell se uitdaging vir die week, naamlik, iets in my kinderdae wat vir my lekker was.

Ek het vertel van ons pinksterdienste op Ouplaas. Die ou omies het regs gesit, die ou tannies links. Ons gesin en die ander gesinne het bymekaar gesit. My ma het agter die klavier gesit en my pa was ouderling op daardie tyd, hy het in die voorste bank gesit saam met die diaken.

En ons drie kinders het alleen gesit.

Maar ons was soet. Voorbeeldig. Ons het ons gedra.

Ouboet wou altyd langs die muur sit, en omdat hy die oudste was, het hy eerste keuse gehad.

Middelboet het altyd gewéns hy kan teen die muur sit.

En ek? Nou ja, watter sê het ek nou gehad? Ek het maar gesit waar ek sit. Langs middelboet en stilweg wonder ek nou of dit altyd so ‘n goeie roep was.

Ons het net gesit en begin sing, toe ouboet vir middelboet fluister of hy langs die muur wil sit.

Natuurlik wil hy, en hulle ruil om.

Die res van die aand is daar aanmekaar ‘n geproes.

Want tannie Martha het haar jas oor die sitplek gegooi. (Sy het net agter ons gesit.)

So, toe ouboet gaan sit, besef hy dat hy ongemaklik sit en daarom is hy toe ewe bereid om sitplekke te ruil.

Middelboet sit toe op die jas.

En elke lied sing Ouboet vir Middelboet: ‘Sit jy lekker?’

Die res van die lied sluk hulle lag weg.

Nou, jare later, wonder ek, hoekom het ons nie net ‘n sitplek opgeskuif nie? Daar was tog 5 of 6 stoele in ‘n ry?

Groetnis

Toortsie

Om die inskrywings van verskillende bloggers in die Lê-Jou-Eier uitdaging te geniet of om self ‘n blog wat jy geskryf het aan te heg by hierdie skakel, klik op die InLinkz skakel net onder die

paddatjie:

http://www.inlinkz.com/new/view.php?id=781922

Vir die reëls van hierdie uitdaging, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke. Onder hierdie kategorie, kyk na die blogposts Lê-Jou-Eier: Reëls (2017-08-22) en Lê-Jou-Eier: Hoe neem ek deel? (2017-08-22).

Advertisements

Skryfsafari: My lekkerste herinnering as kind

Sonell het gesorg vir hierdie lekker uitdaging. Baie dankie daarvoor.

Eintlik is dit ‘n moeilike onderwerp, want wat moet ek kies? Ek het wonderlike kinderjare gehad. Sorgvry. Gelukkig. Die ergste ding wat in my lewe kon gebeur, was as my broers my geterg het, en hoe erg kon dit nou regtig wees?

As koshuiskind was die hoogtepunt van my week natuurlik om naweke huis toe te gaan. Dan moes ek in ‘n naweek alles gedoen kry wat die dorpskinders in ‘n hele week doen. Vir huiswerk was daar nie tyd nie.

Maar wat was vir my die heel lekkerste? Om saam met my pa op die plaas rond te ry? Om by tannies Mags en Willa te gaan kuier? By my ouma op die appelplaas? Of was dit die heel lekkerste as die niggies by ons kom kuier het? Hoe sal ek kan kies?

Een iets wat nou nog by uitstaan, was Pinkstertyd. Ons het op Ouplaas pinksterbidure gehou. Al die boere van daardie ontrek het daar saam pinkster gehou, en as ek dit reg het, word daar steeds pinksterbidure gehou. Daar het tussen 40 en 60 mense gekom.

My ma het die klavier gespeel en vir my was die heel lekkerste die baie liedere wat ons dan gesing het. Hallelujaliedere. Ek het hulle almal geken. Ag, en die mense het getrek as hulle sing, maar dit het nie saak gemaak nie. ‘Bring my die ou-ou tyding’; Strome van seën van bowe’; As Hy weer kom’; Geseënde Jesus, o Heer van my hart’; ‘Daar’s ‘n dierbare kruis’; noem maar op, ek het hulle geken en gesing. En dan was daar baie geleentheid vir gebed en het ons deur ons vingers geloer om te sien wie bid.

Die ou Ouplasers, dis nou hulle wat ouer as my ouers was, het nog die ou gewoonte gehad: Die mans het aan die regterkant van die paadjie gesit en die vroue links. Toe my ouers getroud is, het die gewoonte verval en het die nuwe jonggetroudes almal as mans en vrouens saam gesit.

Oom Johnie (uitgespreek Jônie) was ‘n platjie, ‘n kindervriend, en as ons die keer by hom kon sit, was ons in die sewenee hemel.

As my pa op die kerkraad was, moes hy voor sit en my ma natuurlik agter die klavier, wat ons drie kinders dan alleen in die bank gelaat het. Soms het daar dan ‘n onheiligheudjie of twee uitgebroei, maar darem nie te erg nie.

Groetnis

Toortsie

Om die inskrywings van verskillende bloggers in die Lê-Jou-Eier uitdaging te geniet of om self ‘n blog wat jy geskryf het aan te heg by hierdie skakel, klik op die InLinkz skakel net onder die

paddatjie:

http://www.inlinkz.com/new/view.php?id=781922

Vir die reëls van hierdie uitdaging, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke. Onder hierdie kategorie, kyk na die blogposts Lê-Jou-Eier: Reëls (2017-08-22) en Lê-Jou-Eier: Hoe neem ek deel? (2017-08-22).

Toentertyd se Ouplasers

Dirkie het ‘n foto op Faceboek gesit van ‘n gebreide hangeroortreksel. Waar kan sy die patroon kry?

Ek het dit! Ek moet mooi gaan soek en kyk dit toe amper mis daar waar ek gedink het dit was.

Wie is tannie Martha? Ek belowe ek sal op my blog vertel. Soos ek oor die Ou Ouplasers dink, kom name by my op waarvan ek al die gesigte vergeet het en gesigte waarvan ek die name vergeet het.

Ek is ‘n Ouplaser. Ja, ek is ‘n Bredasdorper ook, of ‘n Overberger of Wes-Kapenaar, as jy regtig wil, maar as jy die mikoskoop op sy fynste stel, is ek ‘n Ouplaser. Ons het so ses km van Ouplaas af gebly en as jy daar verby ry, sê die padbord: ‘Ouplaas: Skool, winkel, kerk.’ Dis omtrent al waaruit Ouplaas bestaan, en natuurlik sy mense.

Ons bedrywighede het redelik rondom Ouplaas gedraai as kind. Ons was daar in die skool. Een keer per maand is daar kerk gehou, twee keer per maand het ons Ouplasers saam bidure gehou, jaarliks is ‘n volle Pinksterreeks van 10 dae daar aangebied. Ons het vrouediensvergaderings daar gehad en wat nog alles. Op Ouplaas het dinge gebeur!

In my kinderlewetjie was tannies Mags en Willa baie prominent. Ek het baie by hulle gebly. Twee oujongnooiens. As een van hulle verjaar het, het ons hele skool altyd vir hulle gaan sing en dan het tannie Mags vir ons almal lekker koekies en tuisgemaakte lekkers en koeldrank aangebied.

Dieselfde met oom Johnie en tannie Martha. Oom Johnie was tannie Mags se broer. ‘n Regte platjie en kindervriend. Hy het altyd by die pinksterbidure tussen ons kinders kom sit. Dís nou behoorlik om Wolf skaapwagter te maak. Sy naam was Afrikaans uitgespreek met ‘n sagte J en ‘n lang ô. Jônie, nie Johnnie.

Oorkant die riviertjie het nog ‘n broer van hulle gebly, oom Pieter en tannie Bes. Ons het hom geken as oom Pieter Jack. Hy het ‘n hele turksvyboord gehad in verskeie variëteite en as jy turksvytyd daar gaan kuier het, sou hy vir jou die een na die ander turksvy skil totdat jy genoeg gehad het.

Dan was daar tannie Magrieta en ek kan sowaar nie haar van of haar man se naam onthou nie, oom Jan! Oom Jan Koning en tannie Magrieta!,en oom lang Daantjie en ek dink, sy vrou was tannie Kootjie. O gits! André sê oom Lang Daantjie het nie ‘n vrou gehad nie. Ek was baie jonk toe hulle dood is, so ek het min herinneringe aan hulle. Ek kan wel onthou dat ek saam met my pa by hulle gaan kuier het.

Die winkel se bestuurder, wat destyds oom Eric Pratt was en tot my skande kan ek nie nou die tannie se naam onthou nie, het in die huis langs die winkel gebly en die skoolhoof op die skoolgronde. Francois het my nou herinner, dis tannie Kitty. Oom Eric het altyd ‘n koerantbladsy in ‘n keël gedraai dan het jy los lekkers daarin gekoop.

Op ‘n stadium was daar ‘n huis reggemaak waar die juffrouens gebly het. Voorheen was dit ook ‘n ou winkel.

Het ek nou al gesê wie was tannie Martha? Ja man, sy was bekend as tannie Martha Johnie. Ons het heelwat by hulle gekom en as ek langsaan by tannie Mags hulle gebly het, het ek graag daar gaan koeldrank drink. Haar huis was ‘n bietjie moderner as tannie Mags hulle s’n wat nie eers ‘n badkamer in gehad het nie.

So dit was die ou Ouplasers van destyds. Oom Jan en tannie Ina was van die ‘jonges’, my ouers se petuurs.

Groete
Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Finesse: Koop tyd

Toortsie by Pinterest

Plaasakkomodasie by Riversdal, Wes-Kaap