Skryf ‘n opstel: Water is lewe

Die nuwe jaar het begin en die kinders skryf opstelle en hulle praat mondeling en die juffrouens soek onderwerpe vir ‘n vale en hulle beland by Toortsie. Ai toggie, sal Toortsie kan help?

Ek is só bly oor hierdie onderwerp wat iemand uitgedink het! Vir die grootste gedeelte van my lewe het ek altyd die gevoel gekry dat dit die boere is wat kerm en huil oor reën en dat die stedelinge nie altyd besef het hoé belangrik dit vir ons almal is nie. Maar, soos die titel van die opstel sê, ís water lewe.

Water raak ‘n al hoe skaarser kommoditeit, veral in Suid-Afrika wat stadig, maar seker, besig is om al hoe droër te raak. Dit reën al hoe minder en wanneer dit reën, is dit geneig om in die vorm van ‘n vloed te kom, wat dan baie skade veroorsaak, en baie van die water loop dan ook weg. Ons opgaardamme is ook nie meer voldoende nie en word ongelukkig nie oral voldoende in stand gehou nie.

Water is besig om ‘n probleem te raak en elkeen van ons begin dit aan ons vel voel. Op een of ander manier raak ons almal daardeur geraak.

Wanneer jy ‘n opstel hieroor skryf, kan jy natuurlik nie my woorde net so herhaal nie. Dis mos belangrik dat jy jou eie opstel skryf. So, wat kan jy skryf?

Jy kán noem wat ek hierbo genoem het, om mee te begin.

Maar dink sommer aan die effek wat dit op jou, op julle gesin, julle huishouding, julle dorp het wanneer daar waterbeperkings is. Het julle dorp al die effek van die droogte gevoel, of selfs die effek van swak waterbestuur? Hoe word julle beperk? Kan julle nog tuin maak? Kan julle nog bad, of moet julle net vinnig afspoel in die stort, en beslis nie elke dag nie? Moes jule in julle tuin al aanpassings maak om dalk eerder meer waterbestande plante te plant? Wat doen julle persoonlik om die probleem te oorkom?

As jy wil loer, kan jy HIER kliek, vir maniere om water te bespaar in die huis, dalk kan jy van dit ook noem.

Dit is natuurlik ook belangrik dat jy noem HOEKOM jy voel water lewe is. Eintlik is dít waarmee jy jou opstel moet begin. Wat is alles van water afhanklik? Hoekom is jy afhanklik vir van water om te lewe? Nie net om te bad of te swem nie, maar dat jou liggaam water nodig het om te funksioneer. Jy kan HIER lees oor die belangrikheid daarvan om water te drink.

Watter oplossings stel jy voor? Wat kan ons doen om ons water beter te bestuur? Wat kan jyself doen? Jou ouers? Julle huishouding?

Sterkte met jou opstel, en onthou, as jy van die inligting op my blog gebruik maak, om dit te noem in jou opstel. Ek sal ook baie daarvan hou as jy in die kommentare noem as dit vir jou gehelp het.

Is daar blogmaats wat oor water ‘n blog wil skryf? Doen dit. 🙂

Groetnis

Toortsie

Vir nog opstelonderwerpe of selfs mondelingonderwerpe, kliek HIER.

Hoe om kos te geniet

Sjoe! Wat ‘n lekker onderwerp stuur Google vir my: ‘Hoe om kos te geniet – mondeling.’ ‘n Mondelingonderwerp oor kos van alle dinge! Ek kan vir ure hieroor praat!

Ek glo met my hele hart dat God kos gegee het om te geniet. Hy sou nie kos so ‘n balangrike item in ons lewens gehad het as Hy nie wou hê dat ons dit moet geniet het nie, want Hy wil regtig hê dat ons gelukkig moet wees en die lewe geniet.

Sonder kos gaan ons dood. Ons liggame het die kos nodig om te bly voortleef. Ons liggame het gesonde kos nodig om te kan funksioneer, kos met goeie voedingswaarde.

Vir jare word ons al gebreinspoel dat ons voedingswaarde moet sny. Ons kos word verwerk dat dit op die ou end minder voedingswaarde het as die boks waarin dit verpak word en dan word dit weer met vitamines en minerale aangevul omdat al die vitamienes en minerale wat daarin was, uitgehaal is. Ek is seker dit was nie wat God se bedoeling was nie.

Kos is regtig daar om te geniet, en wanneer ons eet, moet dit ‘n lekker ervaring wees. Daarom is dit ook vir ons self soveel beter om aan ‘n etenstafel as gesin of as vriende saam te eet, eerder as by die TV, wat ons almal so maklik doen. Wanneer ons as gesin of vriende saam eet om ‘n tafel, of gesellig op die stoep of om ‘n vuur, is ons aandag op mekaar gefokus, gesels ons saam oor lekker dinge of selfs dinge wat vir ons sleg is. Ons maak grappe en so tussendeur geniet ons die kos, soos dit veronderstel is om te wees. Ons kos verteer sommer makliker en ons het ‘n gevoel van genoegdoening. Want, soos ek reeds gesê het, is kos daar om te geniet en nie om oor skuldig te voel nie.

Ongelukkig, met die dat ons al hoe meer gemorskos eet, verwerkte kos eet, kos wat in diep olie gebraai is, kos met baie suiker in, het ons gesondheid oor jare al hoe meer agteruit gegaan en het ons al hoe meer vetsugtig geraak. Ons het verslaaf aan kos geraak en kan onsself nie meer beheer nie. Ons luister nie meer na ons liggame oor wanneer om op te hou eet nie en prop net in, agter die lekker aan. Dit bring ‘n skuldgevoel mee. Dit veroorsaak dat ons skuldig voel as ons eet.

Kos is beslis daar om te geniet, en ons kan dit soveel meer geniet as ons eet wat gesond is, met dankbare harte. Daar is egter ‘n verantwoordelikheid betrokke by die voorreg, en dit is dat ons mooi moet kyk wat ons in ons monde inprop. Dán kan ons elke happie geniet.

Sou jy hierdie bloginskrywing gebruik vir jou mondeling, sal ek dit baie waardeer as jy dit as verwysing sal noem. Vir nog opstelonderwerpe, kliek HIER.

Groetnis

Toortsie

Skryf ‘n opstel: Hoe ek my beste vriendin ontmoet het

Die laaste kwartaal van die jaar het begin en die mense skryf opstelle! Dit lyk my Sondagaande is die tyd wanneer die navorsing op die internet gedoen word vir opstelskryf.

Skryf ‘n opstel: ‘Hoe ek my beste vriendin ontmoet het’. Dit kan natuurlik ook wees, ‘hoe ek my beste vriend ontmoet het’.

As jy nou al 55 jaar oud is, soos hierdie tannie, het jy dalk al ‘n paar beste vriendinne in jou lewe bymekaargemaak, maar dit is dalk ook moontlik vir jou as tiener. Jy is dalk deel van ‘n groep. So die eerste vraag is, oor WIE gaan jy skryf? Selfs al is jy in ‘n groep van vriende, is daar een van hulle wat nader aan jou is as die ander? Iemand met wie jy jou hartsgeheime kan deel?

Dus, wanneer jy besluit het WIE jy as onderwerp gaan gebruik, kan jy jou opstel begin deur te skryf: Ek wil graag skryf hoe ek my beste vriendin, Ronel (vul self naam in), ontmoet het.

Dan kan jy dalk ‘n bietjie uitbrei oor hoekom jy juis vir haar gekies het. Wat maak haar spesiaal? Hoekom kliek julle twee juis meer as van die ander kinders? Aanvaar sy vir jou vir wie jy is? Kraak sy jou nie af nie? Is dit juis haar rustigheid waarvan jy hou? Wat is julle raakpunte?

Jy kan ook vertel of sy saam met jou in die skool is, of woon sy op ‘n ander dorp? Hoe gereeld sien julle mekaar?

En dan, die rede vir hierdie opstel: Hoe het julle mekaar ontmoet? Elkeen van ons se storie sal heeltemal anders wees, want die lewe gebeur nie met almal op dieselfde manier nie. Waar het julle die eerste keer met mekaar gesels? Was dit by die skool? Het julle mekaar toevallig op sosiale media raakgeloop? Wat het gebeur dat julle twee aan die kommunikeer geraak het? Vertel die storie soos wat jy dit vir ‘n ander goeie vriend van jou vertel? Wees opgewonde oor jou beste maat, want sy ís jou beste maat, wat genoeg rede is om oor opgewonde te raak. Brei uit daaroor.

Jy kan jou opstel afsluit deur te vertel oor dinge wat julle saamdoen en dalk ‘n laaste iets spesiaals oor haar sê, sommer net bevestig hóé spesiaal sy regtig vir jou is en hoeveel jy haar waardeer.

(En hier is nou sommer ‘n lekker bloguitdaging vir my blogmaats: Kom ons skryf oor ons beste maats. Dié van ons wat meer as een beste maat het, mag meer as een blog ook skryf. Onthou om elke keer hierdie bloginskrywing te ‘tag’.) En liewe skoolkind, as jy hierdie inligting gebruik het, sal dit nogals oulik wees om te verwys na hierdie blog.

Groetnis

Toortsie

Vir nog opstelonderwerpe kan HIER gekliek word.

Skryf ‘n opstel: My familie

Die kategorie, ‘opstelle’ wat eintlik sommer net so terloops ontstaan het, trek al hoe meer aandag en Google stuur al hoe meer versoeke van opstelle na my mandjie.

‘My familie’ kan ook ‘n lekker onderwerp wees om oor te skryf. Families is mos uiteenlopend en jy kan regtig hier wyd gaan as jy sou wou.

Jy kan dalk net van jou gesin vertel, of gaan jy jou ooms en tannies, niggies en nefies ook insluit?

Voor jy sommer net almal opnoem wat in jou familie is, dink ‘n bietjie aan dinge wat julle familie uniek maak, dinge wat vir jou lekker is om juis deel van julle familie te wees. Het julle sekere familietradisies, of doen julle sommer soms op die ingewing van die oomblik iets lekkers? Kuier julle familie graag saam, of is julle maar elke gesin op sy eie?

Brei ‘n bietjie uit oor elke lid in julle gesin. Wat doen jou ma? Werk sy buitenshuis, of is sy by die huis besig om die gesin te versorg? En jou pa? Wat is sy beroep? Is hy baie betrokke by die gesin en doen julle dinge saam? Vertel van jou broers en susters, en sommer van hulle kêrels en meisies ook.

Is daar dinge waarin van jou gesinslede uitblink? Jou broer is dalk die wêreldskaatskampioen vir elfjariges. Vertel daarvan! Of jou suster is dalk ‘n danser van formaat. Dalk woon sy kompetisies by. Vertel dalk hoe jou kleinsussie elke middag klavier oefen en hoe dit jou irriteer!

Wat is julle familiegeheimpies waaroor julle stilweg lag, maar nie mag oorvertel nie? Dis NOU jou kans!

Is julle familie grapperig en hou van lawwe dinge doen, of is julle ernstig? Is julle spelerig, of sit julle heeltyd voor die rekenaar? Reis julle graag? Gaan stap julle graag in die natuur?

Waar hou julle vakansie? Wat behels dit?

Het julle troeteldiere? Wat is dit? Wie se hond/kat/budjie is dit? Wie versorg dit?

Is daar dalk iets wat nie lekker is in julle familie nie, wat jy voel om te vertel? Iets wat jy van jou hart af wil kry? Dalk is daar nie ‘n pappa of ‘n mamma in julle gesin nie. Dalk moet julle kinders alleen regkom? Dalk moet jy as kind jou ouma versorg? Self kosmaak vir julle gesin? Vertel ons daarvan.

Nou toe! Nou is dit jou beurt. Gaan teken ‘n prentjie van almal in jou familie en dink ‘n bietjie wat jy oor elkeen wil vertel. Onthou, dit is JOU storie. Geniet dit om jou storie te vertel. Dis ‘n unieke storie en niemand anders kan presies dieselfde storie as jy vertel nie.

Groetnis

Toortsie

 

Skryf ‘n opstel: As ek ‘n miljoen rand sou kry

Eendag, lank gelede, het ek hierdie onderwerp hanteer en het ek gedroom oor wat ek sou maak as ek ‘n miljoen rand sou kry, maar hierdie is jóú miljoen en jóú geleentheid om te droom.

Wat sal jy maak as jy ‘n miljoen rand kry? Wat is jou stoutste wense?

Is jy in die bevoorregte posisie om sommer iets baie lekkers daarmee te doen, iets wat ‘n mens nie aldag doen nie, of is jy in ‘n minder bevoorregte posisie en sal daardie miljoen dalk vir jou daaglikse behoeftes moet voorsien?

Sou jy vir jou die beste selfoon of rekenaar en sommer tablet ook koop, met alles wat daarmee saamgaan? Of sal hierdie geld dalk jou pad oopmaak om te kan gaan studeer en die beroep moontlik maak wat jy so diep in jou hart begeer?

Gaan jy dalk belê in die beste motorfiets, of, as jy amper die ouderdom is wat jy ‘n motor mag bestuur, selfs vir jou ‘n motortjie daarmee koop, of gaan jy die geld gebruik om die lewe vir julle gesin makliker te maak. Dalk kan julle nou na beter huisvesting skuif, beter kos koop, klere?

Sal jy dalk ‘n bietjie van die geld vir reis wil spandeer en daardie wêreldstad wat jy nog altyd wou besoek, gaan sien? Dalk een van die musiekstede van die wêreld? Of as jy in renmotors belangstel, ‘n motorwedren op een van die bekendste bane gaan kyk? Of dalk ‘n tennis- of rugbywedstyd van die bestes in die wêreld gaan kyk? Dalk maak hierdie miljoen nou dit vir jou moontlik om saam op die skooltoer te gaan, en daar gaan nog baie geld oor wees!

Sal jy dalk ‘n deel van die geld vir iemand gee wat jy ken wat baie swaar kry, of gaan jy alles vir jouself hou? Gaan jy ‘n groot gedeelte van die geld spaar, en op watter manier sal jy dit doen? Aandele? Bankrekening? Oorsese belegging?

Alhoewel ‘n miljoen rand deesdae nie so baie geld is nie en ‘n mens nie so ver daarmee kom nie, is dit vir ‘n tiener baie geld en kan jy baie ver daarmee kom as jy mooi werk daarmee. Dalk kan jy kundige raad inwin oor hoe om die geld na die beste van jou vermoë te belê vir daardie iets wat jy eendag wil koop, en hou net so ‘n klein bietjie uit vir ‘n lekker bederf vir jouself en dalk jou familie?

Dalk kan die miljoen vir jou betaal om ‘n jaar of meer te gaan liefdadigheidswerk of sendingwerk te gaan doen iewers.

Ek stel voor dat jy ‘n bietjie pryse van goed in jou belangstellingsveld uitvind voor jy jou opstel skryf, sodat jy regtig ingelig kan skryf. Sterkte, en lekker droom.

Toortsie

Vir nog opstel- en mondelingonderwerpe, kliek HIER.

……………

Vandag is ek dankbaar dat die see so binne ons bereik is.