Opstel: Blom waar jy geplant is

Hoor hier, die mense skryf opstelle in Suid-Afrika! Dit gaan rof! En hoe weet ek dit? My blog se statistieke vertel dit vir my. Vir my blogmaats, die kuierbloggers, vra ek geduld met hierdie ‘opstel’-bloginskrywings, maar ek wil ook mos mense help en ek hoop ek kry dit hiermee reg.

Skryf ‘n opstel: Blom waar jy geplant is.

Wat ‘n lekker positiewe onderwerp, want ek glo dat elke persoon kan blom waar hulle geplant is. Party mense wil dit aan rykdom toeskryf, dat jy makliker kan blom as jy geld het, as wanneer jy nie het nie, maar die lewe het al vir my bewys dat dit juis húlle is met die min, wat so ongelooflik blom.

Wat dink jy hiervan? Hoe dink jy? Dink jy ‘n mens kan makliker blom as jy meer fondse tot jou beskikking het, of dink jy dat dit ‘n persoonlikheidsding is, dat sekere mense meer blom? Onthou om neer te skryf wat jy dink, want dit gaan deel word van jou opstel.

O ja, soms is ‘n mens se omstandighede uiters moeilik en verg dit verskriklik baie om te blom in daardie omstandighede, maar tog kry mense dit reg, net soos ‘n vetplant in die barste woestyn sy kleurvolle blom dra.

‘n Vriendin het een keer gesê dat jy jou eie lewe moet inkleur, dit stem ooreen met blom waar jy geplant is. Hoe kan jy blom waar jy geplant is? Ek gaan nou ‘n paar voorbeelde gee waaraan ek kan dink, maar ek is seker dat as jy begin dink, jy aan sommer nog baie ander kan dink wat direk op jou omstandighede van toepassing is. Skryf hulle almal neer.

My voorbeelde:

Glimlag. ‘n Glimlag verlig jou eie, en ook almal se lewens om jou.

Groet mense, selfs al ken jy hulle nie. Nee man, jy hoef nie almal te soen en te druk of ‘n handdruk te gee nie, groet hulle met ‘n vriendelike hello.

Dien. Help iemand. Maak iemand se las ligter. Gaan doen inkopies vir ‘n ou persoon. Help iemand by ‘n trap af. Dra ‘n oumens se swaar sak. Was iemand se kar. Kyk waar hulp nodig is en bied hulp aan, sonder om ‘n fooitjie te verwag. Was die skottelgoed. Help jou ma stryk. Gryp sommer die besem en vee uit. Maak self jou bed op. Gaan stap met iemand se honde. Help ‘n ou oom om sy bome te snoei. Was iemand se ruite. Pak jou kamer netjies. Help met ‘n blye hart.

Toon waardering. Wys vir mense dat jy waardeer wat jy vir hulle doen. Sê dankie. Soek die mooi rondom jou en sê dit. Gee vir mense opregte komplimente, doen dit doelbewus.

Is jou omstandighede moeilik? Dink dan ‘n bietjie pro-aktief. Wat is daar in jou omstandighede wat jy kan verbeter? Wat is daar waaraan jy iets kan doen? Selfs al is jy al een wat iets doen en die ander om jou niks doen nie? Dalk kan jy julle erf ‘n bietjie netjies maak. Dalk kan jy net probeer om minder negatief te wees, selfs al het jy alle rede om negatief te wees. Dalk kan jy vir jou moeilike ouer of suster of broer iets goeds doen, iets wat jy weet hulle graag gedoen wil hê, sonder om iets terug te verwag.

Ek het nou ‘n hele klompie idees gegee. Jy is welkom om in die kommentare nóg idees te skryf. En sou jy hierdie gebruik in ‘n opstel of mondeling, onthou om toortsie.com as jou bron aan te toon. Jy kan ook by die kommentare noem as jy dit kon gebruik. En blogmaats, julle kan dit as bloguitdaging gebruik en skryf hoe júlle blom waar julle geplant is.

Vir nog opstel- of mondelingonderwerpe, kliek HIER.

Groetnis

Toortsie

Opstel oor krag spaar

Skryf ‘n opstel, of praat mondeling oor krag spaar. Noudat Eskom weer soms beurtkrag toepas, is krag spaar weer skielik ‘n realiteit. Dis darem wonderlik hoe gou ons vergeet en weer in ons ou gewoontes verval. Dieselfde met water spaar: Is die water min, werk ons spaarsamig, maar sodra dit weer gereën het, mors ons maar voort.

Jy kan jou opstel begin deur te skryf hoekom jy dink dit is nodig dat krag gespaar moet word: Beurtkrag, te min energie word opgewek vir die behoeftes, om die aarde te help, omdat ons baie onnodige krag gebruik sonder dat ons selfs bewus is daarvan.

Hoe kan ons krag spaar? Vertel eerstens wat julle in julle huise doen om krag te bespaar. Hier is nog idees: Sit af. Sit al daardie ligte af wat onnodig brand. Ja, dit gebruik min krag, maar al die liggies wat oral onnodig brand in ons land, maak ‘n groot verskil. Sit die rekenaar af as jy dit nie gebruik nie. Ontkoppel al die laaiers en elektroniese toerusting wat liggies het wat brand. Moenie die warm kraan oopdraai as jy net koue water nodig het nie. Tap net genoeg water in die ketel soos wat jy benodig, nie die hele ketel vol nie. Gebruik ekstra komberse in plaas van ‘n elektriese kombers. Hang wasgoed uit in die son, of selfs binneshuis op ‘n droograk in plaas van om die tuimeldroër te gebruik. Pak jou skottelgoedmasjien vol voor jy dit aansit, dit, terloops gebruik minder water en elektrisiteit as wanneer jy dit met die hand sou was. Moenie elke koppie een vir een was in die wasbak nie. Gebruik lae-energie gloeilampe. Gaan slaap vroeër in die aand. Trek jou gordyne oop in die dag dat jy eerder natuurlike lig gebruik. Maak kos in grootmaat gaar en vries dit in klein bakkies, wat in die mikrogolfoond warm gemaak kan word.

Ons kan baie elektrisiteit spaar deur doelbewus dinge te doen, maar ons kan ook elektrisiteit op ‘n ander manier spaar, deur ‘n spaarsamige kultuur aan te kweek, deur goed te hergebruik, nie sommer net alles weggooi en nuwes koop nie, want deur dit te doen, hoef daar nie elektrisiteit gebruik te word om nuwes te vervaardig nie. ‘n Joghurtbakkie kan weer vir iets anders gebruik word, ens. In plaas van goed sommer net weggooi, gee dit vir ‘n behoeftige persoon in jou omgewing, daar is so baie van hulle.

Ek is seker dat jy sommer nog baie ander idees sal hê hoekom ons krag moet bespaar en ook hoe. Dink ‘n bietjie innoverend en skryf jou eie opstel. Julle kan ook van die idees by die kommentare noem.

Die blogmaats kan ook hieroor skryf as hulle wil en net onthou om hierdie bloginskrywing te ‘tag’. Sou jy hierdie inligting gebruik in jou opstel of mondeling, sal dit goed wees as jy toortsie.com as bron noem.

Kliek HIER vir nog opstelonderwerpe.

Lekker skryf!

Toortsie

Geniet jou kos – skryf jou eie mondeling

Kyk hoe slaan ek die bal heeltemal mis! Google het die onderwerp gegee: ‘Geniet jou kos – mondeling’, en ek raak so opgewonde, ek skryf sommer die mondeling, in plaas daarvan om eerder mondelinghulp te gee sodat jy jou eie mondeling kan skryf! Dis tog waaroor dit gaan, jy moet jou eie skryf, nie ek of jou ma of jou ouma nie. 🙂

Dus, as jy ‘n mondeling moet praat oor kos en of jy kos moet geniet of nie, waarmee sal jy begin?

Dink jy ‘n mens mag of kan kos geniet? In vandag se tye wat eet amper ‘n sonde geword het, dink jy regtig ‘n mens mag kos geniet? Mag eet lekker wees? Hoekom voel jy so?

Terwyl jy dan nou dalk noem dat die genot van kos amper sonde geword het, hoekom dink jy het dit gebeur? Wat het gebeur dat soveel mense oorgewig is of selfs vetsugtig, soveel so dat daar nou meer gekonsentreer word op ‘nie eet nie’ as op die genot van kos?

Word die klem dalk op die genot van verkeerde kosse geplaas? Hoeveel het die media hiermee te doen? Wat het die idee rondom kos skeefgetrek dat mense deesdae skuldig voel oor lekker eet?

Hoe voel jy oor gemorskos, en wat, na jou mening, is gemorskos? Hoekom is dit gemorskos?

Hoe voel jy oor verwerkte kos wat ‘n mens in boksies en pakkies koop? Dink jy dit is net so gesond soos die kos wat julle in die huis sou eet en maak?

Wat, na jou mening, is gesonde kos? Kan gesonde kos lekker wees? Dink jy ‘n mens kan gesonde kos geniet, of is ‘gesone kos’ ‘n straf? Dink jy dat gesonde kos lekker voorgesit kan word?

Wat, na jou mening, is gesellige samesyn rondom kos? Hoe sal jy dit beskryf? Doen julle dit in julle gesin, deur soms saam te eet, of gryp elkeen maar sy kos en gaan sit waar hy wil, iewers in ‘n rusbank?

Maak julle ‘n gesellige geleentheid rondom die etenstafel, of op die stoep, of op die gras?

Watter oulike maniere is daar om gesellig rondom kos te verkeer? ‘n Piekniek dalk? Saam op die gras? Onder ‘n boom?

As slotsin, dink jy ‘n mens mag kos geniet, en hoekom?

Vir nog opstel- en mondelingonderwerpe, kyk HIER. En onthou om erkenning aan Toortsie se blog te gee as jy hierdie inligting gebruik.

Vir die blogmaats is die uitdaging: Skryf ‘n bietjie, is kos daar om te geniet of nie? Onthou om hierdie bloginskrywing te ‘tag’.

Groetnis

Toortsie

Skryf ‘n opstel: My familie

Die kategorie, ‘opstelle’ wat eintlik sommer net so terloops ontstaan het, trek al hoe meer aandag en Google stuur al hoe meer versoeke van opstelle na my mandjie.

‘My familie’ kan ook ‘n lekker onderwerp wees om oor te skryf. Families is mos uiteenlopend en jy kan regtig hier wyd gaan as jy sou wou.

Jy kan dalk net van jou gesin vertel, of gaan jy jou ooms en tannies, niggies en nefies ook insluit?

Voor jy sommer net almal opnoem wat in jou familie is, dink ‘n bietjie aan dinge wat julle familie uniek maak, dinge wat vir jou lekker is om juis deel van julle familie te wees. Het julle sekere familietradisies, of doen julle sommer soms op die ingewing van die oomblik iets lekkers? Kuier julle familie graag saam, of is julle maar elke gesin op sy eie?

Brei ‘n bietjie uit oor elke lid in julle gesin. Wat doen jou ma? Werk sy buitenshuis, of is sy by die huis besig om die gesin te versorg? En jou pa? Wat is sy beroep? Is hy baie betrokke by die gesin en doen julle dinge saam? Vertel van jou broers en susters, en sommer van hulle kêrels en meisies ook.

Is daar dinge waarin van jou gesinslede uitblink? Jou broer is dalk die wêreldskaatskampioen vir elfjariges. Vertel daarvan! Of jou suster is dalk ‘n danser van formaat. Dalk woon sy kompetisies by. Vertel dalk hoe jou kleinsussie elke middag klavier oefen en hoe dit jou irriteer!

Wat is julle familiegeheimpies waaroor julle stilweg lag, maar nie mag oorvertel nie? Dis NOU jou kans!

Is julle familie grapperig en hou van lawwe dinge doen, of is julle ernstig? Is julle spelerig, of sit julle heeltyd voor die rekenaar? Reis julle graag? Gaan stap julle graag in die natuur?

Waar hou julle vakansie? Wat behels dit?

Het julle troeteldiere? Wat is dit? Wie se hond/kat/budjie is dit? Wie versorg dit?

Is daar dalk iets wat nie lekker is in julle familie nie, wat jy voel om te vertel? Iets wat jy van jou hart af wil kry? Dalk is daar nie ‘n pappa of ‘n mamma in julle gesin nie. Dalk moet julle kinders alleen regkom? Dalk moet jy as kind jou ouma versorg? Self kosmaak vir julle gesin? Vertel ons daarvan.

Nou toe! Nou is dit jou beurt. Gaan teken ‘n prentjie van almal in jou familie en dink ‘n bietjie wat jy oor elkeen wil vertel. Onthou, dit is JOU storie. Geniet dit om jou storie te vertel. Dis ‘n unieke storie en niemand anders kan presies dieselfde storie as jy vertel nie.

Groetnis

Toortsie

 

Skryf ‘n opstel: Dis ek

Hier is nou die ideale geleentheid om ‘n bietjie oor jouself te dink en jouself voor te stel. Wie is jy? Wie is jy regtig?

Jy kan begin deur van jou gesin te vertel en waar jy in jou gesin inpas. Is jy die oudste kind of die jongste? Hoeveel kinders is julle in die gesin?

Die belangrikste is dat jy vertel wie jy is. Is jy ‘n geselserige persoon, of eerder stiller van geaardheid? Hou jy van mense, selfs al is jy stil, of hou jy glad nie van mense nie? Is jy die grapmaker in die gesin, die een wie se stem dalk altyd gehoor word?

Is jy ‘n handige persoon wat sorg dat stukkende goed reggemaak word? Of hou jy daarvan om goed uitmekaar te haal en te kyk hoe dit werk? Hou jy daarvan om te help met takies in die huis en watter van die takies is vir jou lekker?

Is jy ‘n drukkiemens? Of een wat graag geskenkies uitdeel? Een wat hou daarvan om vir ander mense mooi dinge te sê? Is dit vir jou lekker om mooi dinge van jouself te hoor? Hou jy daarvan as ander mense met jou tyd spandeer? Is dit vir jou lekker om goed vir mense te doen? (Let wel: moet nou nie net skryf: Ek hou daarvan om vir mense goed te doen nie. Brei ‘n bietjie uit en vertel sommer wat jy vir mense doen.)

Wat is jou stokperdjies? Is dit iets wat jy by die skool kan doen, soos rugby of hokkie, of is dit iets wat niemand eintlik van weet nie? Doen jy dalk iets verskriklik interessant, maar kon nog nooit vir iemand vertel nie? Is jy byvoorbeeld ‘n kranige skut en gaan jag saam met jou pa? Of ry jy graag perd? Speel jy dalk ‘n musiekinstrument? (Weer eens, brei uit daaroor. Vertel bv waar jy en jou pa gaan jag. Doen julle dit te voet of met ‘n bakkie? Wat het jy al geskiet?) Jou stokperdjie is mos iets wat vir jou lekker is, so vertel sommer lekker daarvan.

Is daar dalk iets waarin jy baie belangstel, en waarvan jy inligting versamel en oplees in boeke en op die internet, ens?

Neem jy deel aan olimpiades? Is jy dalk gestremd en wat is jou beperkinge?

Wat is jou droom vir die toekoms? Wat wil jy graag word? Wat wil jy graag bereik? Wat is nodig om dit te bereik, wat sal jy moet doen?

Lekker skryf. Die maklikste om oor te praat of te skryf, is jyself. Gee jouself ‘ goeie geleentheid!

Nog opstelonderwerpe.

Groetnis

Toortsie