NaNoWriMo2019 Op die wa

English follows below the Afrikaans.

Ek is op die wa! Ja! Ek het opgeklim! Darem hopelik nie voor op die wa nie!

My uitdaging is om 1667 woorde per dag te skryf. Ek sal natuurlik baie graag meer wil skryf, veral in die begin. Ek moet die yster smee terwyl hy nog warm is en woorde wen vir die dae wat ek nie hierby gaan uitkom nie. Dit is ‘n behoorlike skryfmarathon.

Ek het geskryf. Tans staan my woorde vir die dag op 1813. Ek het dit gemaak! 🙂 Sjoe! Om die waarheid te sê dink ek dat ek dalk later in die dag nog ‘n skryfsessie sal kan inwerk, vandag se program gee ruimte daarvoor. Ek hoop ek sal kan, maar werk dit nie, sal dit nie saakmaak nie. Ek gaan my nie onnodig druk nie.

Die boek wat ek skryf handel oor my kinderjare met toepassing op vandag. Ek wil graag stories uit my kinderjare vertel, maar terselfdertyd deurtrek na vandag en hoe ek vandag optree en glo.

Vanoggend het ek myself voorgestel. Wie is ek? Waar kom ek vandaan? Wie was in ons gesin? Met wie is ek getroud? Wie is my kinders? Waar het ek skoolgegaan? Waar het ek gewoon as kind. Sommer net algemene agtergrond.

My plan is om dan nou met die volgende hoofstuk te begin met my stories.

Maar nou is ek vir eers klaar ge #NaNoWriMo vir die dag, my lewe moet darem ook seker gebeur. Wie weet, dalk kom daar nog ‘n tydjie.

Terloops, as ek gister kon skryf en so vinnig kan tik soos die gedagtes en woorde deur my kop gestroom het, was ek nou al klaar. Ongelukkig werk dit nou nie so nie en is daardie woorde rivier af!

Mooi loop!

Toortsie

I’m on the NaNoWriMo wagon! I did it! My challenge is to write 1667 word per day, every day for the Month of November.

I want to try and write more than 1667 words per day, especially in the beginning of this challenge, for there will be days when I won’t get the time to do it. It is like doing a writing marathon!

This morning I wrote 1813 words. I did it! I hope to get another writing session today and write a few more words.

I write in my home language, Afrikaans, about stories from my childhood. Today I introduced myself and I plan to start writing the stories from tomorrow.

Best wishes

Toortsie

For my English Blog posts, click HERE.

Hoe ek NaNoWriMo2019 wil aanpak

My kop werk behoorlik oortyd. Sonder om te dink daaroor, het ek my ingeskryf vir #NaNoWriMo2019.

Ek moet bysê dat dit nie ’n vreemde iets is dat ek, sonder om te dink, sulke groot spronge doen nie. Ek het heeltemal binne karakter opgetree. In ‘n kwessie van sekondes het ek so twee jaar gelede ingeskryf vir die Desember Capital Singers. Mense, julle verstaan nie, van Oktober af tot die einde van die jaar is dit chaos by my en moet ek dinge afhandel, nie nuwe goed oplaai nie! Ek het minstens ‘n uur per dag georfen vir Capital Singers. Ek het dit gemaak.

So, ek het ingeskryf en ek gaan my bes doen om dit te voltooi: 50 000 woorde skryf oor een onderwerp in een maand. 😳 Vyftigduisend. 1667 per dag.

Sluk

Dís die groot uitdaging vir my, om 1700 woorde per dag te skryf oor een onderwerp. Onthou, ek skryf gewoonlik 400 woorde op my blogs en dan moes ek al my sê gesê het en klaarkry. Dis die ekwivalent van vier bloginskrywings per dag.

Dis dis vir my ‘n massiewe uitdaging om langer te skryf, meer te skryf, uit te brei sonder ‘n spul byvoeglike naamwoorde, maar sinvol te skryf wat die leser se aandag sal probeer behou.

My tweede uitdaging is om dit elke dag reg te kry. Elke dag te sit en skryf. Onthou, ek is ‘n lekker loskop en roetine is nie aldag vir my maklik nie. Ek is ‘n bietjie aandagafleibaar ook, so die uitdaging sal wees om te fokus.

Hoe wil ek dit aanpak? Wat ek hier skryf, is wat ek dink hoe ek dit wil doen, dis nie te sê dis hoe dit gaan gebeur nie.

Soggens is gewoonlik my beste kreatiewe tyd, dis ook soggens wat ek gewoonlik ‘me-time’ het. Ek hou daarvan om laat te lê en goed te kan doen wat ek nog op my bed kan doen, soos rekenaarwerk, borduur, stiltetyd hou, blogs lees en skryf. Ek dink dus dat ek soggens op my bed heelwat sal skryf.

Ek dink ek sal ook saans, wat ek gewoonlik boeke lees, tik, tik, tik in die bed as ek nog woorde kort.

Ek beplan om in Google Docs te skryf en dit het ek nogal op ‘n NiNaWriMo video ook gesien is wat ‘n ander skrywer ook doen. Die lekker van Google Docs is dat dit op my foon ook is. Ek is dus nie rekenaargebonde nie. Sou ek dus deur die dag aan iets dink en ek het net my selfoon by my, kan ek steeds daarop werk. Terloops, die meeste van my blogs word sommer op my selfoon getik. Dit neem wel stadiger, maar dis woorde wat getik word wanneer ek die geleentheid het om dit te doen, maar nie noodwendig by my rekenaar is nie.

Ek sal my rekenaar by die huis altyd byderhand hou. Maak ek kos en dink aan iets, kan ek dit bysit. Al probleem is dat internetverbinding nodig is as jy Google Docs gebruik.

Ek vermoed dat daar baie woorde op die pendelpad getik sal word. Op my selfoon met een vingertjie.

Ek beplan om stories uit my kinderdae te skryf wat ek dalk wil vermeng met nou se dae. Dit mag dan ook gebeur dat ek aan meer as een storie gelyk gaan werk, alhoewel dit nie aan te bevele is nie en ek eerder net op een moet fokus. As ek egter, terwyl ek met een werk aan iets anders dink, hoekom dit nie gaan byskryf nie? Dalk maar eerder fokus op die een waaraan ek werk en ‘n notaboekie byderhand hou vir sulke dwaalgedagtes?

Ek gaan my bes doen om dit te voltooi, maar ek gun myself ook die ruimte dat as dinge te dol raak en ek dit nie heeltemal klaar kry nie, dit nie die einde van die wêreld is nie. Dis immers skryfwerk wat dan wel gedoen is en ek kan mos later weer daaraan werk. Intussen sal ek regtig hard probeer.

Mooi loop

Toortsie

Hierdie bloginskrywing het 664 woorde, drie van hulle sal doen vir ‘n dag.

Ek het ‘n vreeslike ding gedoen

Ek het gedink om stil te bly daaroor. Vir niemand sê daarvan nie.

fluister <ek het in ‘n oomblik van waansin ingeskryf vir Nanowrimo2019>

Toortsie! Vir WAT het jy dit gestaan en doen? Hoekom? Jy HET NIE TYD NIE! AG tog, Toortsie! Nee man!

Ek weet nie hoekom nie.

Ek is skaam dat ek dit gedoen het.

Ek is bang ek maak ‘n ‘fool’ van myself.

Ek kan nie so baie op ‘n slag skryf nie.

Ek het regtig nie tyd nie.

Ek het glad nie voorberei nie, dit lyk my ‘n mens moet omtrent ses weke voor die tyd voorberei.

Ek gaan dit probeer doen soos iemand wat ek ken wat die Argus loop ry het en die oggend van die Argus, toe die skoot afgaan, begin oefen het daarvoor. Ja, hy hét klaargekry. Baie seer in die lyf, maar hy het.

Ek het soms ‘n uitdaging nodig wat ek aan myself maak.

Dus, Toortsie, ek daag jou uit om deel te neem aan die Nanowrimo. Probeer om 1700 – 2000 woorde per dag te skryf. (sug) Skryf stories uit jou kinderdae. (ek kan niks onthou nie) Komaan, man! Jy het niks om te verloor nie (net ‘n bietjie ego). As jy dalk nie klaarkry nie, is dit nie die einde van die wêreld nie (sê jy!). Probeer net. Kyk hoe ver jy kom. Ek is seker jy gaan baie daaruit leer. (oraait)

Ek is bang. Het ek dit al gesê? Ek is bang. Vrek bang. Jollie bang. O, genade!

Ek wonder nou net, mag ‘n mens eers op 1 November begin? Kan ek nie maar solank begin nie? (nee, Toortsie, nee!)

Julle, vir iemand met ‘n skoenlapperpersoonlikheid is hierdie verskriklik erg.

Waarvoor het ek my ingelaat? Ai toggie!

sug

Wanneer begin dit? 1 November? Laat ek eers loop kyk watter dag is dit. Vrydag. VRYDAG!!! NOU VRYDAG! Amper sê ek ‘n lelike woord. Ek het nie gedink wat ek doen nie. Glad nie.

Ek het nie. hi-i. Aikona. Nie gedink nie.

Auch

………………………

So ‘n nagedagte nadat heelwat blogmaats al gereageer het en Kameel bekommerd is dat die blogs doodstil gaan wees: Ek daag al die Towerinne uit om ook deel te neem aan Namowrimo2019. Komaan, hoe lyk dit? Dit gaan pret wees! Skryf sommer net vir jouself en as jy voel om van die goed op jou blog te sit, hoekom nie? Of dalk is dit die boek wat jy nog altyd wou publiseer?