Leierskap 101

Ek skryf graag oor ‘n boek terwyl ek nog besig is om hom te lees. Terwyl ek nog ‘in’ die boek is. Wanneer ek hom klaar gelees het, weet ek soms nie meer hoe en wat om te sê nie, behalwe dat ek dit aanbeveel.

Ek is tans besig met Leierskap 101, deur Stephan Joubert en Johan Smith. Dit het vir my ‘n rukkie geneem om ‘in’ die boek te kom, dalk omdat dit kort stukkies is oor ‘n onderwerp, gewoonlik net een tot twee bladsye. Hoe meer ek egter aan hom lees, hoe meer geniet ek hom.

Joubert en Smith kyk na leierskap vanuit die Christenoogpunt. Ons almal is leiers. Wat ons ookal doen, is daar die kans dat iemand ons gaan volg. Dieselfde beginsels geld of ons die bestuurder van ‘n groot maatskappy is, of die ma in die huis.

By Christelike leierskap is die ou, outoritêre vorm van leierskap, waar die baas bo-aan al die sê het en die Klaas moet net spring so hoog soos die baas sê, nie hoe dit gedoen word nie. Christelike leierskap is ‘n kwessie van diens.

By Christelike leierskap begin dit by Jesus, dat ons Sy volgelinge word en sal wees. Dit gaan ook oor invloed, nie om mense te manipuleer nie, maar eerder om in te koop in hulle drome.

Leiers is dienaars wat afstand doen van hulle ego en trone en opkyk na Jesus en ook na ander mense, wat nie meer die belangrikste persoon hoef te wees nie, wat bereid is om die agterste plekke in te neem. Dit laat my onwillekeurig dink aan mnr du Plessis, my rekeningkundeonderwyser, wat so ‘n wonderlike persoon was, wat ons ‘n besonderse liefde vir rekeningkunde geleer het, soveel so dat baie Bredasdorpkinders juis is rekeningunde gaan studeer het ná skool. Wanneer mense vir hom hande geklap het as hy iewers as spreker optree, het hy sy hande in die lug gesteek en gevra dat die mense nie aan hom moet eer bring nie, maar eerder aan God. Nederig. Dienend.

Ware leiers lei met ‘n herderhart. Sy mense het omgee, liefde, begrip en sensitiwiteit nodig.

Leiers kort integriteit en om integriteit te hê, kos karakter, om reg te leef voor God en tussen mense. Om nee te sê vir oneerlikheid, valsheid en selfverheffing.

Kry vir jou hierdie boek. Daar is beslis iets te leer vir elkeen van ons.

Toortsie

Vir nog van my boekbesprekings, kliek HIER, of volg my by Pinterest.

Dis ‘n present

Ek besef net al hoe meer dat die CUM-boksies wat so by my huis opdaag, ‘n present van die Here is. Behalwe dat dit wonderlike boeke inhet, bring dit soveel seën, nie net vir my nie, maar vir ons hele gemeenskap omdat ek die boeke uitdeel as ek daarmee klaar is.

Wat vir my heerlik is, is dat my man ook loer in die boksie en graag daaruit lees. Ek geniet dit as hy ‘n boek gelees het en vir ander mans daarvan vertel en selfs vir hulle die boeke uitleen om ook te lees. 😁 Soms is dit ‘n boek wat ek nog nie eers gelees het nie en wíl lees, dan moet ek mooi kophou dat die boek terugkom. 😊

Ons lees dinge raak en al hoe meer is iets wat ons gelees het, ‘n gesprekspunt tussen ons. Ons blaai daardeur en vertel vir mekaar wat ons raakgelees het.

Baie keer is daar ‘n boek wat ons albei se aandag trek. Hy sit solank die boek voor sy bedkassie om te lees as hy met ‘n ander boek klaar is, maar intussen vat ek dit, want my vorige boek is reeds klaar, en dan lees hy weer daaraan. Dit klink deurmekaar, né?

Só ‘n boek wat ons gelyk gegryp het, is Leierskap 101, deur Stephan Joubert en Johan Smith.

Ek moet dit nog lees, die boek het nou al behoorlik gesweef tussen ons.

Hoekom hierdie boek my oog trek:

  1. Ek hou van sy formaat.
  2. Dis nie ‘n dik, ingewikkelde boek nie, maar kort stukkies, net meer as ‘n bladsy per onderwerp.
  3. Hulle gebruik interessante onderwerpe, soos: Wat leierskap nié is nie, God roep die verkeerde mense, Suksesvolle mense is swak, Leiers beskik oor GTI -Geestelike tyd-intelligensie, Uitbranding is nie verpligtend nie.
  4. Baie keer is daar ‘n oulike aanhaling groter gedruk by, sommer net om die punt te bevestig.

Ek kan nie wag om hierdie boek self te lees nie!

Toortsie

Vir nog van my boekbesprekings, kliek HIER, of volg my by Pinterest.