Gasvryheid

Nadat ons so heerlik gekuier het by die see die afgelope naweek het ek die heeltyd die behoefte om te skryf oor gasvryheid. Ek sê altyd ons volg ‘n oopdeurbeleid waar enige iemand wat lus het om te kom hello sê, welkom is. Op so ‘n manier het Sondag absoluut ontwikkel in ‘n kuierdag toe mense net ingeloer het en ons heerlik saamgekuier het. Onbepland. Heerlik. Heilsaam.

Gasvryheid.

Met die heerlike kuier steeds in my agterkop, die gedagte aan al die goedvoelhormone wat afgeskei is, die gevoel van behoort, van saamwees, lees ek vanoggend in die Leefstylbybel vir Vroue by 2 Johannes. Het julle geweet dat hierdie boek aan ‘n vrou geskryf is? Die Uitverkore Vrou? Natuurlik is hulle nie seker of dit wel ‘n vrou was aan wie die brief gerig was nie, maar dalk ‘n gemeente was wat ‘n vrou voorgestel het.

Onderaan die brief staan daar in my Leestylbybel ‘n stukkie: ‘n Mite oor vroue, dat ‘n vrou se werk nie juis belangrik is nie. Natuurlik is ‘n vrou se werk in die huis belangrik. Hul noem dat dit gewoonlik die huisvrou se taak is om gaste te ontvang, dat sy ‘n atmosfeer in haar huis skep waarin al die huismense tuis en belangrik voel, dat haar huis ‘n plek vir geselligheid en waarde is, ‘n plek waar die Here hoort.

Gasvryheid is ‘n Bybelse beginsel, ‘n Bybelse opdrag en daardie opdrag word op baie plekke in die Bybel beskryf. God hou daarvan as ons gasvry is en mense ontvang en dit vir hulle lekker maak om by ons te kuier. Natuurlik verhoog die lekkerte as die gaste positief reageer op die gebaar van gasvryheid.

Wanneer ons gasvry was en die mense dit met liefde ontvang en daarop reageer het, dan is nie net hulle geseën deur jou optrede nie, maar voel ook jy geseënd daarná.

Toortsie

Bybels

Ons almal hou van verskillende weergawes van die Bybel. Party verkies Afrikaans, ander Engels. Sommige verkies die ou 1933 vertaling, ander verkies ‘n heel moderne weergawe. Dit maak regtig nie saak nie.

Ek verkies die 1983-weergawe, al het ek ook ander weergawes wat ek soms raadpleeg. Die rede hoekom ek die een weergawe verkies, is dat, deur dieselfde teks op ‘n gereelde basis te lees, ek later dele daarvan uit my kop begin onthou. As ek elke keer ‘n ander weergawe lees, kan ek later niks meer onthou nie. Ps 23 is ‘n tipiese voorbeeld hiervan. Ek het dit uit my kop geleer uit die 1933 vertaling, en later het ek die 1983 weergawe daarvan probeer leer. Nou het ek ‘n mengelmoes van die twee vertalings in my kop.

Soms lees ek net in my gewone Bybel, maar ek hou baie van die Bybel in Praktyk. Dit het ‘n vers-vir-vers verduideliking op dieselfde bladsy as wat die stukkie in die Bybel is. Dit gebruik die 1983-vertaling as teks.

Tans lees ek in die Leefstylbybel vir Vroue en wil dit ook regtig aanbeveel. Natuurlik is dit gemik op vroue en sal hulle die vroue wat betrokke is in ‘n stukkie, bespreek. Dit gebruik ook die 1983 vertaling as teks.

Hulle het ook bybelstudiestukkies oral in die boek, soos Ma-wees en gesinsake, Geloofswaarhede, Persoonlike behoeftes, Die ongetroude vrou, die getroude vrou, ens.

Die Leefstylbybel vir Vroue is deur Lux Verbi uitgegee.

Is jy ‘n dieperdelwer? Kry vir jou so ‘n verklarende Bybel.

Groete

Toortsie