Seisoen van genade

Alhoewel ek ‘Seisoen van Genade’ ‘n paar jaar gelede gekoop en gelees het, was dit weer vir my heeltemal nuut toe ek dit nou weer lees.

Soos gewoonlik klim ek in die karakter se vel in en beleef ek dit wat sy beleef. Ek word kwaad vir die dinge waarvoor sy kwaad word, maar ook dié in my eie lewe.

Saam met haar ontdek ek dinge waarvoor ek onskuldig die skuld dra, leer ek die waarheid ken, maak ek vrede in my eie hart, vergewe ek myself.

Saam met haar vloei genade in my hart vir myself en ook vir hulle wat dalk nie gewillig is om hulle eie pla-goed in die oë te kyk nie en eerder maar verkies om te skuil, omdat dit hulle dalk beter laat voel.

In ‘n vorige bloginskrywing het ek die beskryf as ‘n goedvoelboek. Nou wil ek dit beskryf as ‘n heelwordboek.

Al wat ek kan sê, is, waag dit, kyk jou duiwels in die oë, neem tyd en haal hulle uit daardie laaitjies waar hulle weggebêre is. Die proses is dalk nie so maklik nie, maar die bevrydende resultaat is prysloos.

Toortsie

Ek en my eie worstelinge

As daar iets is waarvoor ek regtig dankbaar is, is dit TPM (Transformation Prayer Ministry) wat God oor my pad gebring het. Ek is dankbaar vir die wonderlike verandering wat dit in ander mense se lewens bring, maar ook dat ek dit op myself kan toepas en dit dan totale veranderinge in my eie hart bring.

In die afgelope tyd het ek ‘n paar keer by kruispaaie te staan gekom. Wat moet ek maak? Terwyl ek totaal onseker staan en dink wat ek moet doen, ‘tag’ iemand my op FB, ‘Follow the Shephard, not the flock.’ Net daar gaan doen ek TPM op myself waar God vir my direkte antwoorde gee. Prysenswaardig.

Nog ‘n keer word ek na die TPM-tafel geroep. Ek voel so onseker, my lewe lank praat ek op verkeerde tye, en hou mense nie daarvan nie, word ek dan van lelike goed beskuldig. Dit maak my onseker, steel my borrelende persoonlikheid, laat my onttrek van mense uit vrees dat ek sê wat iemand nie WIL hoor nie.

God wys my deur TPM dat daardie gevoel spruit uit my kinderdae, toe ek as kind hardop gevra het wat al die volwassenes agter hulle hande gefluistervra het. 😱

Ek moes geweet het om stil te bly!

Ek is DOM!

God wys my dat ek nie dom is nie, maar gedoen het waarvoor ek geroep is: Om die waarheid te praat. As dit nie moes uitkom nie, moes die grootmense mos stilgebly het!

Dis vir God kosbaar dat ek die waarheid praat en dis juis waarvoor ek geroep is omdat mense nie meer die waarheid praat nie en ook nie daarvan hou as iemand die waarheid praat nie. En dis okay, want ek moet God gehoorsaam, nie mense nie.

Skielik voel ek nie meer dom nie, want ek is eerlik en gehoorsaam en praat die waarheid soos wat God my geroep het om te doen.

Op ander vrae wat ek ook gehad het oor moeilike dinge wat God van my verwag om te doen, het Hy ook geantwoord, dat Hy my kan vertrou daarmee, daarom moet ek dit doen, al is dit vir my moeilik.

Ek voel verlig en vry om weer my borrelende self te mag wees, want dán is mense gemaklik rondom my, wat hulle nie is as ek gespanne is en elke woord eers tien maal moet tel nie.

God het vir ons ons persoonlikhede gegee en ons moet dit lééf, dis al wat Hy van ons verwag.

Toortsie

TPM Riversdal en Bredasdorp