Intermittent Fasting/Banting vordering

Ek wil optimisties begin sê: Dit lyk my ek begin kry die Intermittent Fasting onder beheer. Ek doen mos darem al vir meer as 7 jaar Banting, soos almal weet, maar kombineer dit nou met Intermittent Fasting.

Hoekom Intermittent Fasting?

Omdat ek Pre-diabetes was en Metaboliese sindroom gehad het, wat ek alreeds kon omswaai danksy Banting … maar pre-diabetes beteken ook dat ek insulienweerstandig was en as ek nie my hand daarop hou nie, kan dit weer sy kop uitsteek. Daarom is dit uiters belangrik dat ek in die eerste plek koolhidrate tot ‘n minimum beperk. Want koolhidrate veroorsaak ‘n groter afskeiding van insulien. En as jy te veel en te gereeld insulien afskei raak jou liggaam insulienweerstandig. En as jy insulienweerstandig is neem jou selle nie die insulien op wat hy nodig het om die suikers in die bloed te verwerk nie en kry jy suikersiekte. Wat meer insulien vra. Wat jou meer laat eet. Wat jou selle nie opneem nie omdat jy insulienweerstandig is. Wat maak dat jy insulienaanvullings moet kry.

Nou ja, my vastende suikervlakke was destyds .1 (punt een) onder diabetes. NET PUNT EEN SUIKER MEER IN MY BLOED HET BETEKEN DAT EK ‘N DIABEET SOU WEES! Die Here het my beskerm. Ek het soveel waarskuwings gekry wat ek nie besef het nie. Selfs nie daardie tyd hoe ‘n verskriklike siekte diabetes is nie … mense raak blind daarvan, verloor ledemate … dis een van die top 5 indien nie top 3 gevaarlikste siektes in die wêreld.

So, my Banting het beslis gehelp dat my pre-diabetes en metabolises sindroom omgeswaai is.

Maar ek is steeds ‘n weidier wat heeldag loop en knaag en die gevaar daarin lê steeds dat dit te gereelde insulienafskeidings kan veroorsaak.

Daarom probeer ek nou slegs twee keer op ‘n dag eet met my eerste ete middagete en dan saans aandete. Beide redelike groot borde kos. En ek drink die hele oggend baie water en tee sonder melk of suiker om my te help.

Dit gaan al baie beter. Ek word nie meer regtig honger nie. Ja, my lyf vra nog vir kos en ek moet maar nog wakker wees om nie onbewustelik iets in my mond te druk nie. Tog lyk dit of daar lig in die tonnel is. En natuurlik, Bantingkos hou jou beslis langer versadig. Beslis LowGI, Glutenvry, wat is al die ander buzzwords? Die ding is, geen verandering is maklik nie, ‘n mens moet net begin. Een treetjie op ‘n slag. Een dag op ‘n slag. En as jy val, staan net weer op en beur vorentoe.

Toortsie

Kreatief in die kombuis

Sjoe, was ek nou woelig in die kombuis, ek is skoon opgewonde!

Ek doen mos die Banting Coach kursus by Nutrition Network en elke keer praat hulle van vleisaftreksel (broth). Ja, ek weet, toe ek sewe jaar gelede Tim Noakes se rooi boek gelees het toe ek begin Bant het, hét hy gesé ek moet my eie vleisaftreksel maak, maar dit het net na so baie moeite gelyk. Terloops, ek dink dat ek ‘n slag deur die resepte in daardie boek ook moet blaai, want ek het mos darem ook al intussen ‘n paar ‘nuwe’ bestanddele begin gebruik.

En net soos dit moes wees, kom vleisaftreksel nou die dag op ons Goue Vroue se Whattsappgroepie ook ter sprake. Ek loop soek oom Tim se resep en ons eie gesondheidskenner, VirgoC bevestig dat dit regtig ‘n gesonde iets is om te eet. Ek onthou nog as kind het ons sulke beesvleisblokkies in kookwater gegooi en dit was heerlik. Nie die beesvleisblokkies wat ‘n mens deesdae koop nie en eintlik is dit op die rooi lys …

So maak ek toe ‘n klomp bene bymekaar, gaar bene en ek wonder by myself of die voedingswaarde nie al uitgekook het nie. Onder andere ook ‘n skaapboudbeen. Bedek dit met water, laat dit vir twaalf ure uiters stadig prut op die stoof, dit moet eintlik nie kook nie, voeg daarby ‘n ui, ‘n geelwortel en ‘n handvol vars pietersielie en laat dit prut en prut en prut en … Dan moet dit blykbaar deur ‘n sif gedruk word, maar ek dink nie ek was heeltemal suksesvol daarmee nie en gooi dit toe in klein bakkies om te vries. Al wat ek kan sê, mense, dit is heerlik! Ek drink nou elke dag so ‘n halwe koppie daarvan. Sommer vir die lekker. Dit smaak soos sop. Lekker sop. Sies tog, die hond het sy neus opgetrek vir daai bene, daar was niks meer geur in nadat sy noi daarmee klaar was nie!

My man het mos ‘n groentetuin. Vandag staan die mandjievol grenadellas en die mandjievol soetrissies vir my en kyk. Sjoe, ek kan dit maar weer eens uitdeel, maar my man doen soveel moeite daarmee. Toe probeer ek sommer grenadella-soetrissieblajang. Natuurlik met xylitol sodat ek dit kan gebruik. Wat ‘n fonds! Ek het sommer die blatjangresep in my Toortsie 3, is dit nie? gebruik. En terloops, die drukkers het laat weet die boeke is klaar! Dit word môre verpak en gekoerier … hiehaaaa! As alles goed gaan het ek hulle DV Vrydag!

En asof dit nie genoeg is nie, het ek sommer ‘n heerlike nuwe koolresep ook gemaak vir die tweede keer … so ‘n klein bietjie verander sedert die eerste een, maar dit is mos wat ek my hele lewe lank doen – verander aan reseppies.

O, die Intermittent Fasting raak al makliker, hoor! Ek probeer om nie meer ontbyt te eet nie en eers middagete vir die eerste keer te eet. En dan eet ek weer aandete. Toe ons nou ‘n bietjie rondgery het, het ek van die wa af geval, maar nou is dit al amper ‘n gewoonte. Saam met Banting werk dit wonderlik, want jy raak mos nie so gou honger nie.

Julle moet ‘n mooi dag hê.

Toortsie

Die lieflike blatjangresep soos dit in Toortsie 3 is dit nie, verskyn. Tamatieblatjang, wat ek al met soveel ander vrugte of groente gemaak het.

Ek en Intermittent Fasting

Ons twee sukkel nog om mekaar te vind. Ek, en Intermittent Fasting.

Die ding is, ek is ‘n weidier. Beslis familie van die skaap. Ek hou daarvan om hierdie bossie te proe, aan daardie grassie, en as die baas die voer bring, my behoorlik vol te eet daaraan ook. Net om netnou weer ‘n bietjie aan ietsie te knibbel.

Dit het nog altyd vir my gewerk, ek het maar net gesorg dat ek aan Bantinggoedjies knibbel, soos kaas of salami of ‘n neut of twee. En ja, ek knibbel beslis minder as die tyd toe ek stysel en baaaaie suiker geëet het. Toe was ek permanent honger. Nou is ek sommer net lus vir kou. Gewoonte, jy weet.

Maar dit gaan oor insulien wat elke keer wat jy koolhidrate inneem, afgeskei word en later weet die selle nie meer wat om met al die insulien te maak nie en raak weerstandig.

Nou ja, ‘n geloofsvas af en toe vir ‘n spesifieke rede is iets heeltemal anders. Dan eet ek die hele dag niks tot vanaand 6 uur. Banting werk natuurlik uitstekend met Intermittent fasting omdat jy soveel langer versadig bly. Dis net dat ek regtig sukkel met hierdie kopskuif.

Ek kry dit soms reg. Net soms.

Toortsie

So, wat is volgende?

Wel, tot op hede het die volgende items alles gebeur die afgelope vier jaar:

Toortsie 3 Skedule (Sedert 2017):

1. Verwerk en toets van resepte, rofwerk resepte, resepte oor en nogmaals oormaak en oorskryf en tik in rekenaar.  – AFGEHANDEL

2. Resepte tik op rekenaar, druk. – AFGEHANDEL

3. Kosmaak van gedrukte kopié, foute regmaak. – AFGEHANDEL

4. Proeflees deur koskenner. – AFGEHANDEL

5. Foto’s en weer eens resepte toets. – AFGEHANDEL.

6. Resepte waar onsekerheid is, verander en weer eens toets. – AFGEHANDEL.

7. Alle foute regstel op rekenaar. – AFGEHANDEL.

8. Foto’s merk met resepname, verseker dat elke resep ‘n foto het, elke foto ‘n naam. – AFGEHANDEL.

9. Alle ander aantekeninge, ens wat nog in die boek moet kom, skryf. – AFGEHANDEL.

10. Konsepboek ingestuur vir proeflees. – AFGEHANDEL

11. Voorblad kies – wat ‘n storie! – AFGEHANDEL

12. Eerste proefleesresultaat terugontvang, voorstelle deurgegaan, weer geproeflees, terug ontvang. – AFGEHANDEL.

13. Alles nog ‘n keer deurgaan en verseker dat daar nie iewers iets met ‘n hoeveelheid of bestanddeel of metode verlore gegaan het nie. – AFGEHANDEL

14. Teks stuur vir die uiteensetting van die boek. – AFGEHANDEL

15. Uiteensetting saam met haar deurgaan. – AFGEHANDEL

16. Boek terugkry, dit weer eens woord vir woord deurgaan om te soek vir moontlike foute wat deurgeglip het. – AFGEHANDEL. Weer eens en weer eens en weer eens woord vir woord deurgegaan, drukkersduiwelfoute reggestel. AFGEHANDEL.

…………………………………..

17. Finale boek na drukkers stuur.

18. Proefkopié ontvang, deurgaan en goedkeur.

19. Die finale druk! 

20. Die groot bemarkingstorie. Want ‘n mens koop ‘n boek net een keer, dan het hy hom. Nie elke maand weer een nie, tensy hy vir iemand anders ook die boek wil koop.

Ja! Ek is nou daar wat ek wag vir verskillende drukkers om vir my kwotasies te stuur. Die bladuitleg is klaar. Alles is klaar. Dis berge oor tot hier, maar hier is ons nou! En ek is opgewonde, want dit gaan mooi mooi mooi wees.

Toortsie 3, is dit nie? Lekker kos vir Banting, Keto, Intermittent fasting, diabete en sommer vir almal wat hou van lekker eet.

Groete

Toortsie