Beskerm jou huwelik

Geen reëls in die lewe is in yster gegiet nie, geen reël is gewaarborg nie, veral nie die reëls rondom huwelike nie. Verder loop die vyand ook nog rond soos ‘n brullende leeu en kyk wie hy kan verslind, watter huwelik hy kan vernietig.

Die huwelik is ‘n instelling van God en die duiwel sal alles in sy vermoë doen om huwelike te vernietig, want as hy die huwelik vernietig kry, gee hy sommer die gesin en veral die kinders ook op die koop toe moeilikheid.

Ons weet dat ons alles 100% reg kan doen en steeds werk dit nie. Dalk wil jou huweliksmaat nie probeer nie, om watter rede ook al. Dalk probeer jy regtig jou bes, maar kry net nie die resultate nie.

Ek kry die e-posse van intiem.co.za en elkeen van hulle is so spesiaal, maar soms is ek ook te lui, te moeg, te beduiweld, sommer net nie lus om dit te lees en te probeer wat daarin staan nie. Tog kan ek, danksy eie ondervinding en 33 jaar getroud wees, getuig dat wanneer ek positiewe boeke, kommentare, e-posse, stories oor huwelike lees, dit my aanspoor om harder te werk aan my eie huwelik.

Hierdie artikel gee raad oor hoe om jou huwelik te beskerm en ek wil jou aanmoedig om dit te gaan lees. Moenie dit net lees nie, pas dit ook toe. Probeer dit. Die kans dat jy gaan resultate kry, is goed.

Hulle noem die volgende:

  • Dat jy daagliks tyd moet spandeer met God.
  • Dat dit nie altyd veilig is om iemand van die teenoorgestelde geslag as vriend/vriendin te hê nie en jy moet mooi dink wat jy alles vir hierdie persoon vertel. Jy moet dit eerder vir jou huweliksmaat vertel.
  • Dat jy defnitiewe grense in die werksplek moet stel.
  • Dat ons ons huwelike opwindend moet hou.
  • Deursigtigheid, veral wat ons selfone en rekenaars aanbetref. Huweliksmaats behoort nie geheime te hê nie.
  • Ekstra versigtigheid in weerlose tye.
  • Goeie kommunikasie tussen huweliksmaats, ook oor verleiding.
  • Moenie naïef wees en die krag van ‘n verleier onderskat nie.

Ook ek het nodig om aan ‘n paar van hierdie sakies aandag te gee, ‘n mens verval so maklik in ‘n groef.

Ek daag vir ons uit: Kom ons maak 2019 ‘n uitsonderlike jaar waarin ons ekstra hard werk aan ons huwelike. Kom ons maak ons swak huwelike goed, ons goeie huwelike beter en ons baie goeie huwelike uitsonderlik. Kom ons versamel memento’s, goeie herinneringe van saamwees en plesier tussen ons en ons huweliksmaats. Dis die grootste geskenk wat ons aan onsself en ook ons kinders, ons ouers, ons familie en vriende kan gee. Kom ons bou huwelike wat God eer.

Groetnis

Toortsie

#Jusjojan

memento

Advertisements

Vir wie bring Google hier aan?

Dit bly vir my interessant wat mense by soekenjins intik en dan by Toortsie se blog uitkom.

Kyk hierdie een: ‘Paddaboudjies‘. Nou hoe op aarde het Google besluit hierdie persoon moet by Toortsie kom aanklop? Ek dink nogals by my 21e verjaarsdagpartytjie was daar paddaboudjies, maar ek het nie daaroor geskryf nie. O! wag! Nou onthou ek! Ek het vertel van die paddaboudjies en slakke in Parys, en weet julle wat? Ek het dit verkeerd gespel!

Om ‘n hondesalon te begin‘. Hellooooo? Hoe bedoel meneer dan nou? Toortsie? ‘n Hondesalon?

Rassehaat bybel‘. Genade tog! Ek sal alles in my vermoë doen om rassehaat weg te kry in ons land. Interessant genoeg het ek nogals rassehaat al in drie bloginskrywings genoem, maar vir die ou wat ‘n rassehaat bybel soek, sou dit teleurstellend wees, glad nie wat hy soek nie! Sorrie, hoor! Nee man, kry vir jou ‘n ander bril.

Ons gesels het opgeraak.’ Ai, jai, jai, dit gebeur in huwelike. Dit gebeur dat daar tye is wat daar nie meer gesels is nie, en vir iemand wat lief is vir gesels, kan dit baie moeilik wees. Dis sulke tye wat ‘n mens dalk sommer ‘n boek moet lees oor die liefdestale en jou huweliksmaat se liefdestaal soek, innoverend begin dink, intimiteit soek, dinge doen wat jy lankal vergeet het, net om weer nuwe asem in jou huwelik te blaas. Dalk moet julle sommer by kerslig bad, of in die maanlig gaan stap. Ek is seker jy sal weet wat om te doen om nuwe vuur in jou huwelik te blaas. Lees ‘n Romanse boek.

Die opstelbrigade is natuurlik besig om toe te neem. Dis nogal interessant, my vriendin wat ‘n onderwyseres is, sê die benadering het heeltemal verander. Dis nie meer soos in ons tyd dat ‘n onderwerp gegee word en die kinders gaan skryf by die huis nie. Nee, die onderwerp word in die klas bespreek, die kinders gee idees, skryf die opstel in die klas en merk mekaar s’n sodat die vrees vir die rooipen minder raak. Tog soek die mense steeds opstelle. Sal dit die kinders wees? Of dalk die juffrouens wat idees soek?

Here help asseblief.’ Ai, die nood bly hoog. Ek wens so ek kan help!

Aansoekbrief‘ en ‘Tweede inkomste‘ en ‘Werk van die huis af.’ Dit gaan swaar met ons mense.

Daar is ‘n ander klompie wat altyd maatjies soek saam met wie hulle naaldwerk wil doen. Flukse lotjie, moet ek sê. Maar ongelukkig brei en hekel ek net en kry nou glad nie meer tyd vir knope aanwerk en some insit nie.

Groetnis

Toortsie

Onperfekte huweliksmaats

Huwelike kry swaar. Wêreldwyd. Ek sien dit op die blogs en in die normale wêreld. Dis mos darem eintlik nie nuwe nuus nie.

Ek is ‘n voorstander vir die huwelik, ‘n vegter vir die huwelik en sou iemand my hulp of raad of oor inroep, sal ek altyd eers kyk of daar nie tóg ‘n manier is waarop die huwelik gered kan word nie. Dit word nie altyd positief ontvang nie, om verskillende redes, maar mý werk is altyd eerstens om oplossings te soek, om perspektief te probeer bring.

Iewers op ‘n blog het ek die volgende kommentaar gelewer: Ek het nie ‘n antwoord vir jou nie. Soms raak ons moedeloos. Soms voel dit of alles op ons intuimel. Soms voel dit of ons wêreld uitmekaar skeur. Soms is dit seker beter om aan te beweeg, maar ek is mos ‘n vegter vir die huwelik. Soms help dit om net ‘n bietjie terug te sit en te dink, waarmee is ons besig? Wat kan ek dalk anders doen (omdat ek gewoonlik nie die ander persoon kan verander nie), wat is hier in my cluttered lewe wat ek dalk eerder moet los? Waaraan gee ek nie meer aandag nie, wat my aandag verdien? En soms, net soms skyn daar weer ‘n sonstraal deur die donker wolke. Ek bid dat die sonstraal ook vir jou sal deurskyn en dat jy weer ‘n manier vind om voort te gaan. Sterkte.

Ek is jammer om te moet sê dat ons almal onperfekte huweliksmaats het, want ons is getroud met gewone mense, mense met foute.

En nou kom nóg skokkender nuus: Ons huweliksmaats is óók getroud met onperfekte mense! Ja! Ook óns is gewone mense met foute, nes hulle.

Die een man is hardwerkend en sorg goed vir sy gesin, maar is dalk onbetrokke by die kinders. Die ander een help weer geweldig baie in die huis, speel heeldag met die kinders, maar frustreer sy vrou omdat hy nie vir haar ruimte gee om haar eie ding te doen nie. Die vrou is dalk ‘n uitstekende kok, maar alles is deurmekaar en in chaos rondom haar. Of sy bestuur haar huishouding uitstekend, maar in die proses raak die ‘leef’ruimte minder vir almal in die huis. Miskien is die persoon die goedheid en vriendelikheid vanself, maar haar woord is onbetroubaar.

Die punt wat ek wil maak, is dat ons almal ons goeie punte het, maar ook ons swak punte en in die meeste van die gevalle is dit die goeie punte wat ons dalk na die ander persoon getrek het, wat gemaak het dat die ander persoon in ons begin belangstel. Dalk het julle sommer net gekliek. Sommer net verlief geraak met die eerste oogopslag.

Een of ander tyd het julle besluit om te trou, en soos baie mense dink hulle kan regkry, gehoop om die persoon oor tyd te verander. Miskien het jy, in jou verliefdheid, selfs die persoon se slegte punte geïgnoreer.

Klein dingetjies wat ek en jy doen, kan ‘n groot verskil in ons huwelik maak. Soos Pam jare gelede vir my gesê het: ‘Hou op om jou te bekommer oor wat jou man doen, doen jý die regte ding.’ Ek wil graag hierdie facebookblad aanbeveel: My huwelik in praktyk. Ons kan regtig ‘n verskil maak!

Groetnis

Toortsie

32 jaar

Vir die oom wat nou die dag op die radio gepraat het en 65 jaar getroud is, is 32 jaar van getroude lewe ‘n kuikentjie, vir ander is die gedagte aan 32 jaar van getroud wees ‘n onwerklikheid.


Vandag, 32 jaar gelede, het ek met sterre in die oë en met die confetti dogtertjie se blommekransie in my hare, die kerkpaadjie afgestap. Intussen het baie water die see ingeloop, is ons berge en dale oor en skielik is dit 32 jaar later.

Saam het ons wonderlike ervarings gehad, die wêreld deurkruis, groot uitdagings aanvaar en aangepak, krisisse hanteer.

Dit was beslis nie elke dag maanskyn en rose nie, ons kom uit verskillende agtergronde en omstandighede, maar as ek die pad kan oorstap, doen ek dit beslis.

Daar word baie oor die huwelik geskryf, positief én negatief. Kinders beleef hul ouers se huwelike, of gebrek aan huwelike in hulle eie huise en raak bang of opgewonde daaroor. Kinders kry die idee van sprokieshuwelike in storieboeke en word dan ontnugter as hul eie huwelik nié die sprokieshuwelik is wat hul gedink het dit moet wees nie.

Net soos wat ‘n mens jou beste moet gee vir jou beroep om dit suksesvol te maak, moet jy ook jou beste in jou huwelik gee. ‘n Huwelik hou baie vreugde en genot in, maar verwag van jou jou beste.

Seks, kommunikasie, konflikhantering, mekaar dra deur swaarkrytye, liefdevolle aandag en tyd aan mekaar gee, en nog 70 ander dinge speel alles ‘n rol om dit te maak werk, want die huwelik is deel van die lewe. ‘n Huwelik wat werk, bring stabiliteit, dit help om gebalanseerde kinders groot te maak, is die ruggraat van ‘n gesonde samelewing.

Seks word soms oorbeklemtoon, ander kere as niks afgemaak. In ‘n huwelik waar gesonde seks is, speel seks amper geen rol nie, maar in ‘n sekslose huwelik, dra seks by tot 90 persent van die probleme wat daar gebeur. Wanneer die seks gesond en in plek is, kom die kommunikasie en die gelukkige samesyn en al die 70 ander goed outomaties in plek. En as God in jou huwelik is, is hou huwelik ook al halfpad gewen.

Nou ja toe, al wat ek wou sê, is, ek en my ou manlief is reg vir die volgende 32 jaar. Ons sal ons bes doen, oor berge en deur dale, deur die mooi en ook deur die swaarkry. Mag God ons huwelik beskerm soos wat Hy alreeds 32 jaar lank doen. Soms het Hy maar ‘n handvol met ons! 😱

The challenge of this week, is delta, and we have to place a picture of something that shows transition or change. To stay married for 32 years, there have to be love, life and also continuous change, transition, to get stronger in each other and to face the challenges of life.

Groetnis

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Pinterest

Plaasakkomodasie by Riversdal, Wes-Kaap

Christenhuwelike

Word Christenhuwelike bedreig? Of is Christenhuwelike ‘n bedreiging vir Satan?

Ek dink beide!

Ek is tans besig met 31 Days of praying for your pastor’s wife van Revive our Hearts deur Nancy leigh De Moss.

Day 9
Pray that God will build a hedge of protection around her marriage, and that she and her husband will be aware of the potential of any improper relationships.
Pray that their family time will be protected.
Matt 19:6; Prov 31:11a; 2 Kor 10:4-5

Satan doen alles in sy vermoë om Christenhuwelike te kelder. Hy weet dat God die huwelik en die gesin geskep het as die basis, die beginpunt van alles en dat die gesin die sterkste band is wat daar is. As hy gesinne kan opbreek, wen hy groot in die afbreek van die Koninkryk. Daardeur skep hy onsekerheid wat maak dat mense op ander dinge as God fokus en in die proses mag hulle geloofslewe selfs verwater.

Predikante, pastore, sendelinge, werkers van God se huwelike is selfs meer in die spervuur. As Satan predikante se huwelike kan opbreek, wen hy net nog baie meer. Mense kyk op na hul predikante. Predikante is gesante van God. As hy ‘n predikant se huwelik kan afbreek, breek hy ‘n klomp gesag in die gemeente ook af.

Daarom kry predikantgesinne dit baie feller en moet hul baie sterker staan.

Voel jy as predikantsvrou vasgevang in jou gemeente, vasgevang in jou huwelik, vasgevang in jou man se beroep? Nee, ek is nie ‘n predikantsvrou en was dit nog nooit, daarom kan ek nie praat uit ‘n predikantsvrou oogpunt nie. Ek is wel al vir meer as 30 jaar getroud en oor 30 jaar is my huwelik ook al deur ‘n hele paar stampe en stote, net soos enige ander huwelik van 30 jaar! Enige persoon voel soms vasgevang in sy/haar omstandighede. Enige persoon mag dalk baie keer aan uitkomkans dink. Dis normaal!

Iemand stuur vir my ‘n stukkie uit ‘n boek. Dit gaan daaroor dat langlewendheid een van die mooiste dinge in ‘n huwelik is, iets is om te koester, iets om na te streef. Die persoon skryf so mooi dat daar tye kom dat ons uithouvermoë ons liefde oortref, dat ons voel of die liefde nie meer daar is nie, maar dat die uithouvermoë, die wil om dit te maak werk, dan die deurslag gee. Ongelukkig weet ek nie wie die skrywer is nie, maar hy skryf:

In marriage we must burn the ships – back-up plans don’t exist. 

Gaan jou huwelik deur ‘n storm? Voel jy na moed opgee? Bid daaroor. Fokus daarop. Fokus op dit wat jou na hom/haar toe trek, wat jou nog altyd by hom/haar gehou het. Onthou dat dit die storms is wat ons sterk maak, al is dit regtig nie lekker wanneer jy in die storm is nie. Maar as jy deur die storm byt, wil God juis vir jóú gebruik as getuie vir Hom, om ook ander wat in krisissituasies is, te help.

Staan by jou huweliksmaat soos nog nooit tevore nie. Hy/sy het jou nodig, meer as ooit. Ja, hy/sy is nie altyd maklik nie, maar hy/sy is goed vir jou. Bid die volgende 30 dae spesifiek dat God jou hart weer sag sal maak vir hom/haar. Konsentreer op sy/haar goeie punte, daar is baie. Bedien en dien die ander een in liefde en sien hoe word hy/sy weer klei in jou hande. Hy/sy is dalk ook onseker en weet tans nie waar hy/sy net jou staan nie. Verseker hom/haar onvoorwaardelik van jou liefde. Belê in jou huwelik soos nog nooit tevore nie. Ek belowe jy sal die vrugte daarvan pluk. Lees huwelikboeke, sommer vrystories ook, dit doen wondere.

Kom ons pas ons huwelike op soos nog nooit tevore nie.

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse:  Koop tyd

Toortsie by Pinterest

Plaasakkomodasie by Riversdal, Wes-Kaap