God beskerm nie net nie

Vir só lank al konsentreer ek daarop, bid ek daarvoor, dat God my vreesloos moet maak om Sy Woord te verkondig, selfs al is daar dalk die gevaar van verwerping, vervolging, wat ook al. Ek konsentreer daarop dat God my moet versterk sodat, sou ek OOIT voor ‘n keuse vir of teen Hom te staan kom, ek Hom sal kies. Vreesloos.

Veral verlede jaar het Hy my keer op keer gewys: Hy beskerm my. Ek moet doen wat ek moet doen, selfs al is dit baie moeilik, Hy sal my beskerm. Ek hoef nie die Midianiete en Fariseërs en wie nog almal te vrees nie, Hy sal my beskerm.

Beskerm, beskerm, beskerm.

Tot ek iets raaklees wat ek tog eintlik weet, maar iewers ver weggebêre het: God vertroos! Natuurlik vertroos God. Hy wíl ons graag vertroos. Hy wil graag hê dat ons oor ons pyn en ons hartseer wat ons lewe so kan versuur, moet kom. Hy vertroos!

Francois Mostert skryf in Taste Life dat ons nie net vir God met die dinge wat ons pla, dinge wat ons reggemaak wil hê in ons lewe, dinge wat ons graag wil uitsorteer of antwoorde nodig het, kan vertrou nie, ons kan Hom ook vertrou om ons te vertroos. Ons kan met ons diepste pyn na Hom gaan en in plaas van net vir beskerming of antwoorde, vir Hom vra om ons te troos!

Daar is dinge wat ek al verwerk het in my lewe, ek het al geleer om dit te aanvaar, tog, as ek daaraan dink, is die pyn steeds daar. Hoe wonderlik dat ek nou, in plaas van beskerming, kan bid: “Here, vertroos my. Maak die seer nie net gesond nie, maar vertroos ook. Laat my in U vertroostende arms sit, nie net beskermende arms wat my teen gevare beskerm nie, maar vertroostende arms wat my gees en siel gesond sal maak.”

En dís my boodskap vandag vir elkeen wat hier lees: God vertroos! Vra Hom om jou te help om die dinge reg te maak in jou lewe, vra Hom om jou te beskerm, vra Hom om jou op die regte pad te help, maar vra Hom ook om vir jou te vertroos. Hy sal jou graag help om ‘n nuwe nuut te skep, Hy sal jou graag help om die ou dinge agter jou te sit, maar Hy wil jou net so graag vertroos in jou hartseer.

Mooi loop!

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Om te pendel saam met jou man

Toortsie by Pinterest

Plaasakkomodasie by Riversdal, Wes-Kaap

Advertisements

Wat tik mense by die soekenjins in om by hierdie blog uit te kom?

Wat tik mense in om by ons blog uit te kom?

“Mondelinge onderwerpe”. Lank gelede het ek geskryf oor onderwerpe waaroor ek as kind moes praat. 40 Jaar later het dit sekerlik baie verander. Ek voel mondelingonderwerpe moet op laerskoolvlak binne die kind se ervaringswêreld wees. In die hoërskool, dink ek, kan dit meer uitdagend raak sodat die kinders ‘n bietjie navorsing kan doen. My groot pleidooi bly steeds: Mammas, dis nie JULLE taak om die mondeling te skryf nie, dis jou KIND se taak en as JY dit skryf, ontneem jy jou kind ‘n geleentheid om sy eie verstand te gebruik en ontwikkel. Moenie van jou kind ‘n papegaai maak deur net te herhaal wat jy sê nie. Klaar gepreek! Watter voorstelle het julle vir mondelingonderwerpe?

Taste Life - Healing the Wounded
Taste Life – Healing the Wounded
“Here, help my“. Hier is groot nood in ons ou wêreld! Mense weet nie meer watter kant toe nie. Ek hoop en bid dat die persone wel by iets of iemand uitkom wat hulle kan help. Tans lees ek hierdie fantastiese boek van Francois Mostert, Taste Life – Healing the wounded Ek besef net al hoe meer dat ons onsself sal móét bemagtig. Eerstens doen ons dit deur daagliks by God aan te klop, maar dit help ook om boeke te lees wat ons van lewenshantering leer.

Iemand vra: “Hoe begin jy ‘n nuwe blog?” Toortsie het jare gelede al hieroor geskryf. Maar Toortsie het nie net hieroor geskryf nie, so met die tyd het sy verskillende blograad uitgedeel. Kliek ‘n bietjie HIER. Ek sien daar is alreeds 80 bloginskrywings wat blograad bevat. Genade, Toortsie!?

Raad vir muise in jou huis.” Muise en rotte bly maar net ‘n probleem, en ekself het regtig nie raad nie! Maar al wat ek weet, hulle is NIE die liewe diertjies wat kinderboeke probeer voorstel nie. Muise en rotte dra siektes aan en verniel jou goed. So, as hulle in jou huis is, moet hulle uitgeroei word! Klankmasjientjies? Gif? Katte? Peppermentgeursel op watte? Valletjies, lyk my, werk nog die heel beste, want ‘n dooie muis is ‘n dooie muis is ‘n dooie muis. Lok uile na jou tuin toe! Watter raad het julle?

Hoe werk jongmense se koppe?” Ek weet nie, ek het ook nie al die antwoorde nie, maar hulle wil graag erken word as mens, te midde van al hulle onsekerhede en vrese. Maak ‘n tiener jou vriend, dis die moeite werd!

Het julle raad vir hierdie een? “Hoe kry jy kinders uit die huis wat nie werk nie en klaar is met skool?” 

Daily prompt: Overwhelming. Sometines, keeping up your blogging may be overwhelming, but most times it is pure pleasure. 

Groete

Toortsie

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Op jou merke!

Toortsie by Pinterest

Toortsie by LCHF E-zine: Oorvol, maar steeds honger

 

 

 

Ja, ek was al daar

Op ‘n bloginskrywing vra ek: “Was jy al só moedeloos dat jy nie weet watter kant toe nie, dat die enigste iets wat jy oor het, is om op jou knieë, huilend, voor God te buig?” Hierdie bloginskrywing trek nogals baie mense, dit laat my besef dat die nood maar orals soms hoog is.

Ja, ek was al daar. Meermale. Ek was presies daar toe ek die vraag gevra het. Ek het dit geskryf nadat ek klaar voor God gehuil het en van my knieë af opgestaan het en tog beter gevoel het.

Dis omdat ons, en soveel ander, al presies daar was, dat ons met oortuiging kan sê dat God op die éingste Een is wat jou deur jou krisis kan help. Dit gaan dalk nie kitsantwoorde wees nie, jou antwoorde gaan dalk nie eers wees wat jý graag wil hê nie. Dit gaan dalk tyd neem, bloedsweet, maar uit eie ondervinding, herhaaldelike ondervinding kan ek sê: “As ek nie vir God gehad het om my deur my krisisse te trek nie, sou ek níé daardeur kon kom nie.”

God sélf is die Een wat blywende herstel kan gee, maar ook die Een wat jou regop kan hou wanneer jy wraggies nie meer die moed of krag het om selfs regop te kan staan nie.

Nie te kort gelede nie het ek ervaar hoe God my letterlik aan my groottone uit die modder gesleep het, toe ek net op ‘n hopie wou lê, my hele liggaam gepyn het omdat ek in my hart so swaar gekry het, maar God het die krag gegee, die hulp, sodat ek nie daar bly lê het nie, vorentoe móés gaan om op ‘n punt te kom wat ek weer stewiger kon staan.

Hoe kom ek by Hom uit? Op baie maniere, maar veral om net stil te sit by Hom, met Sy Woord in my hand en in my hart. Om sommer net vir Hom te sê, “Here ek weet nie meer nie, ek weet nie watter kant toe nie. Here, help my asseblief!” Om sommer net in die Bybel te lees en dit wat Hy daar vir jou sê en gee aan te gryp, dit vir jou te vat. Om tyd met Hom te spandeer, daagliks. Om te besef dat jy nou by Hom krag nodig het en dit dan by Hom persoonlik gaan soek. Om deur die dag aan God se beloftes te dink en Hom daaraan te herinner. Deur, as jy in die dag aan ‘n stukkie in die Bybel dink wat vir jou moed gee, dit op te sê, selfs al is die woorde nie 100% reg nie, deur sommer deur die dag ook met God te praat en vir Hom te sê help. Deur te sê, “Dankie Here”, elke keer wat jy vir ‘n rukkie beter voel.

God was nog elke keer my antwoord. Selfs al kom daar terugslae, is die enigste Een wat my ook daardeur sal trek, net God. Hy alleen.

Sterkte vir jou.

Toortsie

Toortsie se Faceboekpage

Toortsie by Finesse: Die wonderlike versekering