Etiket: gewigsverlies

Toespraak by Damestee

~ Toortsie ~ 16 Kommentaar

Weer eens hello en baie dankie vir ‘n wonderlike voorreg om hier te kan kom praat vandag. Ek voel regtig geëerd!

Dit was nooit in my wildste drome een van die goed wat ek gevisualiseer het dat ek by plekke sal praat nie. Ek bedoel, praat kan ek baie, maar om toesprake te lewer nie. Maar dis ook deel van hierdie verrassende reis waarmee ek besig is. 

Hierdie Bantingding het ek nie loop soek nie, dit het oor my pad gekom. En ek is soos ‘n klein dogtertjie wat huppel in ‘n bospaadjie – gelukkig en onspanne. Ek en my ouers het kom piekniek maak en terwyl hulle rus kan ek ‘n bietjie rondkyk en lekker verrassings om elke hoek en draai kry in die wete dat ek veilig is, want hulle is naby. Geen beplande, uitgewerkte pad nie, maar ‘n pad wat ek net móét huppel en dit wat ek sien en wat gebeur, net geniet. 

In 2014 was ek moedeloos. 

Ek het al geweighless en geweight watchers en ongelooflik maer geword, net om die oomblik wat ek beheer verloor, alles op te tel en met rente. 

Toé was ek obese. Vetsugtig. En my gewig het daagliks toegeneem. Ek het alles geëet wat voorkom en het nie opgehou voor ek nie voel of ek bars nie. Al my klere het ongemaklik gesit. Niks het gepas nie. Dit het my behoorlik gewurg. 

Toe bid ek dat God my moes help, want ek weet nie meer nie. 

En Hy stuur vir my die Saterdagaand vriende wat by ons kom eet, wat daardie week begin Bant het. Ek het hulle daardie aand alles uitgevra en nadat hulle weg is, Tim Noakes se boek gekoop en die Sondagoggend het ek begin Bant op Struisbaai met letterlik niks bantingkos in my huis nie. Daar was ‘n stukkie ouerige botter, twee eiers wat nie meer so vars was nie en swak kwaliteit wors wat iemand in my vrieskas vergeet het. 

My hele lewe het verander daarvandaan. 

So het die een boek na die ander gekom. Want op daardie stadium was daar nie oulike bantingresepte op die internet nie. Of dit wat daar was, was eintlik onuitvoerbaar of nie lekker nie. Oorsese resepte.Ook nie eintlik hulp en raad nie. Of ek het nie geweet waar om te soek nie. Dit was of ek in ‘n oerwoud was en my pad moes oopsukkel. 

Ek het verlede jaar die Banting Coach kursus by Nutrition Network gedoen. Nie omdat ek ‘n coach wil wees nie, maar eintlik net vir die tjap ter wille van my boeke. Sodat ek kan sê dat ek ‘n coach is. Vir kredietwaardigheid. 

Ek wou my nie laat bind deur ‘n groep hier op die dorp te begin nie, ek is net te veel weg. 

Maar in Januarie vanjaar kry ek eensklaps die idee om ‘n Bantingkompetisie te hou. In die kwessie van ‘n minuut het ek presies geweet wat ek moes doen en hoe dit moes wees. So asof dit in my kop neergesit is. Volledig uitgewerk. Dit sou ‘n whattsappgroep wees, so dit maak nie saak waar ek is of ek direkte kontak met die mense het nie. 

Ek het gehoop dat daar 3 sou deelneem. Ek is tog nie ‘n tydskrif of TV-persoonlikheid nie, waarom sal mense by my inskryf? Maar hulle het, en op 1 Februarie vanjaar het 25 mense begin en die leefstyl begin aanleer, mekaar bemoedig, mekaar help, gewig verloor, gesond word. 

Ek kyk nie net na die mens se gewig nie, maar is by die volle mens betrokke – liggaam, siel en gees. Mense vertel vir my hulle stories. Ons vat mekaar se hand en trek mekaar op. 

Intussen is die kompetisie al lankal verby, maar die groep hou steeds aan. Daar kom amper weekliks mense by en daar is noual omtrent 50 deelnemers. Ons ondersteun mekaar, gee raad, deel resepte uit. 

Vandat ek die groep het, het ek geweldig baie geleer en gesien. Behalwe natuurlik die gewig wat die mense verloor, is vir my die grootste geskenk die gesondheid wat hulle herwin. Mense raak gesond van siektes wat ek nie eers geweet het bestaan nie. ‘n Vrou wie se lewe deur pyn beheer is as gevolg van ‘n outo-immuunsiekte, het binne ‘n week nie meer pyn gehad nie. Mense se bloedsuiker is skielik onder beheer, hulle bloeddruk normaliseer. Dis net ongelooflik!

Dit bring my by diabetes. Nutrition Network spesialiseer in diabetes. Die kursusse wat ek by hulle doen, se hooffokus is diabetes. 

Want vandat die dieetriglyne in die 1960’s verander het van ‘n hoë vet na ‘n lae vet dieet en meer koolhidrate, het diabetes wêreldwyd met rasse skrede toegeneem. 

Diabetes is ‘n krisis en mense kry dit op ‘n al hoe jonger ouderdom. Kinders is oorgewig en word op ‘n vroeër ouderdom siek. 

Kyk ‘n bietjie na foto’s van die 1970’s, vroeg 1980’s. Daar was nie eintlik vet mense nie!

Die ding is, ons het regtig nie suiker en stysel in ons dieet nodig nie. Dit is ‘n DRUG, is uiters verslawend en dit maak ons siek. Dis meer verslawend as kokaïn. 

Elke keer wat ons koolhidrate inneem, skei ons pankreas insulien af. En as ons koolhidrate eet, word ons baie gouer weer honger. Dan eet ons weer. En dan skei ons pankreas weer insulien af. 

Op die ou end raak ons insulienweerstandig, want ons liggame kan nie al die insulien wat ons afskei hanteer nie. So, die selle koes letterlik vir die insulien en neem dan nie die insulien op wat nodig is om die oormaat suiker in ons bloed te verwerk nie. 

Ons kry hyperinsulemia – ‘n geval van te veel insulien in ons bloed. 

En ons bloedsuiker styg en ons kry diabetes. 

En diabetes lei tot hartaanvalle. 

Diabetes steel van ons. Dit beïnvloed ons oë. Dit laat ons ledemate verloor.

Insulien stoor ook die oormaat energie in die vorm van vet. En hierdie vetlaag om ons lyf is eintlik ‘n insulientjoepie. 

Wanneer ons dan soos met Banting ophou om suiker en stysel te eet, skei ons nie meer die baie insulien af nie. Ons verhoog ons vetinname en eet lekker ryk kosse. 

Ons begin om Ketose af te skei. En ketose weet wat om met vet te maak. 

Ons raak vetverbranders in plaas van suikerverbranders. 

Ons bloedsuiker normaliseer en ons raak maer, energiek, gesond. En minder honger. 

Sedert ek met Banting begin het 8 jaar gelede, het my hele lewe verander. Ek is meer energiek as ooit. Ek is gesond. Ek het nie besef hoe siek ek was nie, ek was reeds ‘n diabeet. Ek was insulienweerstandig. Het Metaboliese Sindroom gehad. Ek is aan suiker verslaaf, maar beheer die verslawing. Vandag is ek gesonder as ooit. 

Alles danksy ‘n kopskuif rondom kos. 

Suiker hijack jou brein. 

As jy oorgewig is, vetsugtig, obese, maak dit nie van jou ‘n slegte mens nie. Nee, jy is steeds die wonderlike mens wat God jou gemaak het. Al probleem wat jy het, is dat jy dalk verkeerde koskeuses maak. 

Dalk weet jy nie beter nie, want die verkeerde koskeuses word aan jou verkoop deur die media en al wat leef en beef. Dalk het jy net iemand nodig wat jou kan help om die regte koskeuses te maak. Dalk het jy net nodig om by my groep aan te sluit as jy sou wou. Sodat ander jou kan help as jy struikel.  

Maar dit is jou lewe, jou keuse. Elke persoon doen dit vir homself en as jy verkies om dit nie te doen nie, is dit heeltemal reg met my. Ook as jy verkies om eerder suiker te eet. 

Die groep kos R750 eenmalig en dan kry jy die 3 Toortsies daarmee saam.

Intussen huppel hierdie dogtertjie voort op die onbekende paadjie en is sy opgewonde oor elke verrassing wat God nog op haar pad gaan bring. Soos hierdie verrassing om genooi te word om ‘n groep mense toe te spreek. Ek weet nie wat voorlê nie, maar Hy weet en dít is vir my genoeg. Al wat ek moet doen is om hierdie pad in gehoorsaamheid en vertroue te stap. Doelgerig, om Sy Naam te eer. 

Nogmaals dankie vir hierdie geleentheid. 

Mag dit met elkeen van julle baie goed gaan.

Toortsie

Wat maak ons keto-groep uniek?

~ Toortsie ~ 2 Kommentaar

Wat maak ons Keto gewigsverliesgroep uniek?

Wel, ons kommunikeer in Afrikaans.

Ons kommunikeer per Whattsapp Groep.

Ons het weeklikse inligtingsessies met nog baie inligting en raad en bystand tussenin.

Ons lede ken nie mekaar noodwendig in persoon nie, en geen deelnemer weet hoeveel enige van die ander deelnemers weeg of hoeveel gewig hulle verloor het nie. Dít is konfidensiële inligting wat tussen die groepleier en groeplid persoonlik gedeel word. 

Ons ondersteun mekaar, help mekaar en as iemand moedeloos voel of van die wa afgeval het, word hy liefdevol opgehelp en nie gestenig nie. Almal van ons weet hoe dit voel om soms die pad byster te raak of verlore te raak of te val. Ons glo dat dit nie saakmaak hoeveel keer jy val nie, maar hoeveel keer jy opstaan.

Ons volg die Keto (Banting) leefstyl en dit is waarop ons fokus: Om hierdie gesonde leefstyl aan te leer en vir die res van ons lewens daarby te hou. 

Dit maak nie saak waar in die wêreld jy woon nie, jy kan deel wees van hierdie groep. 

In ons groep geniet ons kos. Ons hou daarvan om daaroor te gesels en voel nie skuldig as ons eet nie, solank ons natuurlik die regte en toelaatbare kosse eet. Ons leer om anders te dink oor kos, dat kos ‘n wonderlike gawe is om te geniet. 

Saam beveg ons ons oorgewig, diabetes en ander leefstylsiektes wat ontstaan het as gevolg van ons leefstyl van tevore. 

Die groepleier is ‘n gekwalifiseerde Bantingafrigter.

Die groeplede sê:

Hierdie groep het heel eerste die regte en volhoubare eetplan. Ons leidster het ondervinding en ‘n hart wat omgee. Die groeplede is super ondersteunend. Die groep hou ons accountable.

Die groep hou my ook accountable. Ek het dit nodig. Ek is elke keer verbaas as ek dit regkry om nee te sê vir soetgoed en stysel. Ek kan dit nog nie glo ek kon so ‘n kopskuif maak nie. 

Wat die groep anders maak is beslis die tiepe kos wat ons eet, die leidster wat die kennis het om ons op die regte manier te kan motiveer en omdat sy reeds en steeds die journey stap kan sy ons attent maak op die slaggate. Hier was nog nooit ‘n harde woord of teregwysings nie. Reghelp word in liefde en deernis gedoen. Ons almal besef ons het ‘n verslawing van een of ander vorm en wil dit oorwin en dis hoekom dit werk. Ons is ‘n AA vir wat jou poison ookal is. 

Wat hierdie groep vir my suksesvol maak is: die eetplan bestaan uit gewone kosse. Ons kry ongelooflike raad en leiding. Ons vordering word gemonitor. Dit is vir my ‘n wenresep! Dankbaar om deel hiervan te wees en my eetgewoontes te verander!

Jy kan ook deel word van hierdie groep. 

Kyk gerus HIER indien u meer van my skrywes oor die keto-leefstyl wil lees.

Hierdie bloginskrywing het oorspronklik verskyn in Toortsie se Ketoblog, ‘n blog waar daar net oor Banting, of Keto, of LCHF, en diabetes geskryf word.

Toortsie

Van kompetisie tot ondersteuningsgroep

~ Toortsie ~ 18 Kommentaar

Dit gaan sommer baie goed met die Banting gewigsverlieskompetisie wat reeds op 1 Februarie begin het. 

Twintig mense het aanvanklik ingeskryf en die meeste van hulle is nog op die Banting (Keto)-wa. Hulle doen ongelooflik goed en tussen die 19 van hulle wat weekliks hulle gewig instuur, het hulle al 90 kg verloor! Wow! Ek is so trots op hulle!

Intussen het ons besluit dat ons nie 30 April wanneer die kompetisie amptelik stop, die groep gaan stop nie. Die Whattsappgroepie is ‘n wonderlik ondersteuningsgroep en ons help mekaar behoorlik. Geen kompetisiegesindheid of -atmosfeer word gevoel nie. Eerder ‘n gevoel van samehorigheid. Dit is wonderlik! Saam-saam is ons besig om gesond te raak.

Intussen het nóg ‘n besigheid besluit om deel te word en ‘n prys te borg. Dit is Gracious Bakers wat die lieflikste Keto produkte maak. Ek gebruik al lankal hulle heerlike beskuit, koekies en sadebeskuitjies en toe ek nog ontbyt geëet het, het ek graag hulle ontbytpap geëet. 

Gracious Bakers gaan ‘n geskenkpak saamstel met 6 van hulle gewildste produkte! Wat ‘n heerlike prys! Gaan loer ‘n bietjie op hulle webblad watter heerlike en gesonde produkte vir die Keto-leefstyl of vir almal wat gesond wil eet, hulle het. Fran, met wie ek daar by hulle gesels het, beskryf hulle besigheid as volg: 

Gracious Bakers are passionate and driven to provide customers  with superior health products. They are focused on uplifting and inspiring healthier communities, by connecting people with real food.  Customers are investing in health more than ever before. For some it’s a choice for others it’s the only solution. With the growing disease epidemic, allergies and Intolerances, conscious eating is the only solution. Gracious Bakers are part of that solution. They have developed innovative and unique in-house recipes that cater for Gluten Intolerance, coeliac, diabetics, Low Carb , keto and paleo. All their products are handmade. The products are not only convenient, but ideal for the on the go person. All products are made using only superior ingredients that also taste great and are price competitive. All their products are additive and preservative free, they believe less is more. Where recipes lack in carbs, they are packed in flavor and taste. From traditional buttermilk rusks to penne pasta, you’ll find something to satisfy your everyday craving.

Ondersteun asseblief ons borge om hulle te bedank vir hulle lieflike gebaar.

  1. ‘n Naweek vir 4 persone op Struisbaai in een van Seegogga se lekker vakansiehuise.
  2. ‘n Lekker geskenkpak van Avon produkte geskenk deur Rina van Papendorp.
  3.  Mrs Martins Mikrobes het ook ‘n wonderlike geskenkpak skoonmaakmiddels, die lekkerste produkte denkbaar. 
  4. ‘n Pragtige skildery (blomme) deur Rita Oatway. 
  5. ‘n Boksie wyn van Rooiberg Kelders, geskenk deur een van ons vriende.
  6. ‘n Boksie wyn van Boland Kelders, geskenk deur een van ons vriende.
  7. ‘n Wonderlike geskenkpak saamgestel deur Desiree Kleinhans, eienaar van Suidpunt Potpourri, die mees suidelikste restaurant in Afrika, en ook van Earth, ‘n lieflike restaurant en geskenkwinkel in Struisbaai.
  8. ‘n Geskenkpak met die lieflikste Keto eetgoed geskenk deur Gracious Bakers. 

Wil u ook deel word van hierdie lekker ondersteuningspan en die Keto leefstyl aanleer? Praat gerus met my. 

Kyk gerus HIER indien u meer van my skrywes oor die keto-leefstyl wil lees.

Hierdie bloginskrywing het oorspronklik verskyn in Toortsie se Ketoblog, ‘n blog waar daar net oor Banting, of Keto, of LCHF, en diabetes geskryf word.

Groete

Toortsie

Hoe gaan dit met die gewigsverlieskompetisie?

~ Toortsie ~ 13 Kommentaar

Die span van 20 deelnemers is goed op dreef! Ek is sommer trots op hulle! 

Ek dink die meeste van hulle het al vergeet dat dit eintlik ‘n kompetisie is. Hulle ondersteun mekaar. Gee mekaar raad. Deel resepte uit. Moedig mekaar aan. Vertel van iets lekkers wat hulle gaarmaak. 

Sommige is erg geraak deur die Carb Flu, maar op hierdie stadium is almal al lankal deur daardie nare tonnel van koolhidraatonttrekking. Dis ongelooflik hoe sout en water dit ligter maak, en in erge gevalle, Rehidrate! 

Elkeen van die persone is op sy/haar eie pad van herstel. Ek begin terugvoer kry van oorwinnings wat behaal word, ook in sommige valle teleurstellings. Iemand vertel my dat die alomteenwoordige pyn wat sy altyd gehad het, weg is. Ek probeer om ‘n verhouding met elkeen te bou en minstens een keer per week in persoon met elkeen te gesels. Hoe gaan dit met jou? Liggaamlik? Geestelik? Ons gesels oor meer as net gewigsverlies en kos en dieet. Ons vat hande waar iemand die behoefte het daaraan. 

Ek glo dat hierdie lawwe idee wat ek een aand ná 9 gekry het, nie sommer net ‘n lawwe idee was nie. Ek glo dat dit van God af gekom het, anders sou dit al van die eerste oomblik af gedoem wees. Ek sien ‘n wonderlike groep mense op pad na ‘n nuwe leefstyl met gesonder liggame. 

En die gewigsverlies? Ag, dis wonderlik. Saam het hulle binne die eerste 10 dae al 50 kg verloor … dit is 100 pakke botter! Ons sal binnekort ‘n bakkie én ‘n Venterwaentjie nodig hê om al die pakke botter wat langs die pad verloor raak, op te tel. 

En die pryse? Daar is ‘n wonderlike naweek vir ‘n gesin van 4 in een van Seegogga se vakansiehuise by Struisbaai. Daar is ook ‘n heerlike geskenkpak van Avon-produkte wat Rina van Papendorp geskenk het. Mrs Martins Mikrobes het ook ‘n wonderlike pak skoonmaakmiddels geskenk, dis die lekkerste produkte denkbaar. Rita Oatway het ‘n pragtige skildery geskenk, ons het besluit op die een met die blomme. En dan kry ons ook ‘n heerlike boksie wyn by Rooiberg Kelders, wat mos al vir jare bekend is vir hulle wenwyne. Desiree Kleinhans, eienaar van Suidpunt Potpourri, die mees suidelikste restaurant in Afrika, en ook van Earth, ‘n lieflike restaurant en geskenkwinkel in Struisbaai, het ‘n wonderlike geskenkpak saamgestel. 

So, daar gaan meer as een wenner wees! Ek is so opgewonde!

Kyk gerus HIER indien u meer van my skrywes oor die keto-leefstyl wil lees.

Toortsie

Hierdie bloginskrywing het oorspronklik verskyn in Toortsie se Ketoblog, ‘n blog waar daar net oor Banting, of Keto, of LCHF, en diabetes geskryf word.

Gewigsverlieskompetisie – nog ‘n prys!

~ Toortsie ~ 2 Kommentaar

Die wiel is behoorlik aan die rol om alles in plek te kry vir die gewigsverlieskompetiesie wat op 1 Februarie begin en loop tot 30 April 2022. Meer mense begin navraag doen om deel te neem en al hoe meer pryse kom ter sprake. Hou gerus hierdie spasie dop! En skryf in! Dit gaan ‘n heerlike reis wees waar deelnemers nie net gaan kompeteer met mekaar nie, maar mekaar gaan ondersteun en aanmoedig en ophelp as hulle val. 

Desiree Kleinhans het vir ons ‘n wonderlike geskenkpak saamgestel wat bestaan uit ‘n Kamino, ‘n serp, handsak, oorbelle, ‘n lekkerruik ietsie en ‘n inspirasie geestelike boek! Is dit nie wonderlik nie? Baie, baie dankie, Desiree!

Desiree skryf oor hulle besighede op Struisbaai en Agulhas:

SUIDPUNT POTPOURRI is jou mees suidelike décor winkel en restaurant aan die Suidpunt van Afrika.

Hierdie besigheid het  begin, met slegs die eienaar en een personeellid.  Vandag, 20 jaar later, is ons geseënd met 30 personeellede en 4 eienaars.  Dit is nou ‘n heerlike familiebesigheid en ons kon aan die begin van 2021 nog so ‘n besigheid oopmaak, ‘Earth Restaurant en Décor’.  Hierdie besigheid is op ‘n kleinhoewe, vlak voor Struisbaai met miniatuur perdjies, donkies, bokkies en ganse as groot aantrekkingskrag vir kinders en ook groot speelplek vir kinders.

Albei winkels bied iets vir elke smaak en ouderdom.  Ons probeer sover moontlik om smaakvolle, bekostigbare geskenke en décor items aan te hou.  Behalwe ons unieke décor items, is daar ook speelgoed vir die kinders (of mans!), geestelike boeke en Bybels, klere, kombuisware, juwele, lekkerruikgoed vir hom en haar.  Letterlik iets van alles.

Ons twee restaurante bied ‘n groot verskeidenheid op die spyskaart.  By Earth het ons  ook tradisionele disse soos bobotie, waterblommetjiebredie, skilpadjies, tuisgebakte brood en koeksisters op die spyskaart.  

Suidpunt Potpourri het ‘n wye verskeidenheid van ontbyte, ligte middagetes en ‘n groot verskeidenheid koeke.

Ons het ook by albei besigheide ‘n dranklisensie, dus kan jy jou verjaardag of enige dag wat jy wil vier, by ons kom hou!

Kom kuier gerus by ons, ons vriendelike personeel is ‘n waarborg dat jy met ‘n warm gevoel in jou hart, by ons deure sal uitstap.

Ondersteun asseblief ons borge. Dit is regtig ‘n plesier om by Suidpunt Potpourri en ook Earth in te stap. Hulle diens is puik en produkte van hoogstaande gehalte. Beslis die moeite werd om daar in te loer. 

Kyk gerus HIER vir die inskrywingsvorm! Komaan! Waag dit! Word deel van ‘n wen-wen situasie. 

Groete,

Toortsie

Vir meer inligting rakende die kompetisie en die inskrywingsvorm, kliek op die gemerkte woorde. 

Kyk gerus HIER indien u meer van my skrywes oor die keto-leefstyl wil lees.

Hierdie bloginskrywing het oorspronklik verskyn in Toortsie se Ketoblog, ‘n blog waar daar net oor Banting, of Keto, of LCHF, en diabetes geskryf word.