Etiket: geestelike boeke

My 2020 NaNoWriMo-projek

~ Toortsie ~ 18 Kommentaar

Ja, ek hét ingeskryf. Ja, is is nog glad nie klaar met alles wat moes klaar wees voor ek mag inskryf nie.

My derde resepteboek se resepte is nog nie klaar getik nie, maar dit lyk darem of ek genoeg resepte bymekaar het. Ek is steeds besig met my Septembervissie, maar as alles goed gaan, behoort ek dit betyds klaar te kry. My NaNo2019-boek is in die hande van die drukkers, so daardie deel is op datum. Ek werk behoorlik daaraan om ’n gratis e-resepteboek die lig te laat sien en hoop om dit nog in hierdie week te voltooi. Dan kan ek begin om die ander boeke ook op e-boek te sit.

Ek het my ingeskryf, soos reeds genoem. Die naam van my projek is Trauma tot Triomf. Dit sal ‘n geestelike boek wees waarin ek na verskillende persone in die Bybel gaan kyk wat van erge trauma na triomf geloop het met God se hulp. Ek glo dat as jy jou trauma met God deurloop, dit in jou grootste triomf kan verander. Natuurlik sal ek dit op ‘n informele, meer persoonlike manier doen soos ek mos maar tipies skryf. Dit is ‘n onderwerp wat my baie ná aan die hart lê omdat ons wêreld so stukkend is deesdae. Niemand loop teleurstellings, seerkry, trauma vry nie. Met God se hulp kan ons egter heling kry.

Toortsie

Love comes softly – Janette Oke

~ Toortsie ~ 5 Kommentaar

Love comes softly is ‘n boek wat reeds in 1979 gepubliseer was, maar nou weer uitgegee is.

Dis ‘n pragtige storie van Marty en haar man, Clem, wat ‘n nuwe lewe wou begin op ‘n plaas in die Wilde Weste. ‘n Tragiese ongeluk laat haar alleen agter sommer nog met hulle aankoms daar.

Op haar man se begrafnis kry sy ‘n huweliksaanbod van ‘n wildvreemde man met ‘n klein dogtertjie.

In hierdie boek ervaar ek saam met Marty hoe sy haar pyn oor haar verlore man verwerk, hoe sy aanpas op die plaas, hoe sy en haar nuwe man mekaar begin leer ken, verstaan, krisisse verwerk en mekaar liefkry.

Ek leer ken ook vir Clark, ‘n saggeaarde Christenman met sy klein dogtertjie, Missy, wat net goeie bedoelings het, hardwerkend is en binne sy vermoë die beste vir sy gesin wil doen.

Dis ‘n boek waarmee ek kon assosieer. Ek verstaan van plaaslewe, van afhanklik wees van die natuur, van planne moet maak wanneer die krisis kom, van liefhê.

Ek het die boek baie geniet. Ek het nog nie voorheen een van Janette Oke se boeke gelees nie, maar sal beslis in die toekoms uitkyk vir nog van haar boeke.

Gaan lees gerus wat Seegogga oor hierdie selfde boek geskryf het.

Toortsie

Vir nog boekbesprekings, kliek HIER, of volg my by Pinterest.

‘n Lig van Hoop – Connilyn Cossette

~ Toortsie ~ 2 Kommentaar

‘n Lig van Hoop is die eerste boek van Connilyn Cossette wat ek lees en wat ‘n lekkerte was dit nie! Die boek het my aandag gegryp van die eerste bladsy af en dit behou tot die end.

Dis ‘n pragtige liefdesverhaal wat afspeel in die tyd van Josua. Op daardie stadium het die Israeliete al ‘n groot deel van Kanaän verower en die grond was verdeel tussen die stamme. Daar was egter nog ‘n groot gebied wat verower moes word. Gevaarlike tye.

Moriyah was ‘n Israeliese dogter, haar pa was ‘n Egiptenaar. Sy is gebore tydens die tyd van die Eksodus terwyl die Israeliete nog in die woestyn was. Sy moes al ‘n paar uitdagings in haar lewe oorkom en soos haar lewenspad verloop, het daar ook nuwes gekom. Het sy besef dat haar manier van oplossings dalk op daardie stadium die regtes gevoel, maar dat dit nie noodwendig altyd so reg was nie.

In hierdie boek lees ek verwerping, haat, woede, skaamte, maar ook opregtheid, liefde, getrouheid, lojaliteit. Moed. Waagmoed.

Connilyn Coseete kry dit reg om die spanningslyn tot aan die einde van die storie te behou. Sy hou die storie interessant en vol verrassings wat ‘n mens nie vooraf voorspel nie. Sy verlig die Israelitiese gebruik van asielstede, hoe dit werk, die reëls daaromtrent, die genade daaromtrent. Ons kry ook ‘n kykie oor gebruike van die Kanaäniete. Sonder dat dit in jou keel opgedruk word, sien jy ook Moriyah se verhouding met God raak, haar twyfel soms, die tye wanneer sy meer verwyderd is van Hom, maar ook hoe ‘n innige en diep verhouding met Hom groei.

Die boek is vertaal uit Engels, A Light on the Hill. Dis ‘n uitstekende vertaling.

Ek sal graag nog boeke van Connilyn Cossette wil lees. Ek beveel hierdie boek met ‘n oop gemoed aan.

Toortsie

Vir nog boekbesprekings, kliek HIER, of volg my by Pinterest.

‘n Boksvol kinderboeke

~ Toortsie ~ 7 Kommentaar

Sjoe! Wat ‘n lekker verrassing toe ek die CUM-boksie oopmaak! Kinderboeke galore!

Bybelstories vir GROOT kinders is ‘n pragboek. Kleurvol. Oulik. Met die mooiste tekeninge by. ‘n Kort storietjie op die een bladsy met die prentjie langsaan. Dis beslis ‘n boek wat kinders oor en oor sal deurblaai.

Gebede vir my dogtertjie en gebede vir my seuntjie is twee oulike boekies vir pappas en mammas, of oupas en oumas. Op elke dubbelblad is ‘n pragtige gebed vir jou kind en ‘n bybelvers daarmee saam. Ons kan nooit genoeg vir ons kinders bid nie en hierdie boekies gee vir ons leiding om wyer te bid as net ons normale versoeke.

God het ‘n antwoord daarvoor is ‘n dagstukkieboek om jou te help om alledaagse probleme op te los. Ek dink dis ‘n boek vir jong tieners. Vroeë hoërskool. Baie oulik. Die probleem word eers geskets. Dan kom die soeke na die oplossing deur ‘n bybelvers en ‘n paar vragies.

Oordenkings vir kinders is ook ‘n oulike dagstukkieboek, na my mening, vir hoërskoolleerders. Dit is geskoei op die normale dagstukkieboek wat bestaan uit ‘n bybelversie, bespreking en gebed. Aan die einde is daar ‘n ‘onthou die volgende’ wat so ‘n laaste gedagte gee, soos: ‘Alles wat ek het, kom van God af. Hy deel dit met my sodat ek dit met ander kan deel.’

My Lullabybel vir seuns en My Lullabybel vir dogters is twee hardebladboeke vir jonger laerskoolkinders. Dit bevat oulike gediggies, ‘n bybelversie en ook ‘n kort gebedjie op elke dubbelblad. Pragtige illustrasies.

Toortsie

The Timepiece – Beverly Lewis

~ Toortsie ~ 7 Kommentaar

Hoe meer boeke ek van Beverly Lewis lees, hoe meer geniet ek dit. Jare gelede het ek heelwat van haar boeke oor die Amish-gemeenskap gelees en was mal daaroor. Toe ek verlede jaar weer uit die bloute een lees, het dit vir my aanvanklik erg omslagtig gevoel. Dit was egter ‘n vertaling. Intussen het ek weer reeds twee van haar boeke gelees in Engels en dit is beslis die moeite werd. Dis uitstekend geskryf en ek het nou al weer gewoond geraak aan die rustiger pas van die Amish.

The Timepiece is die tweede boek in ‘n reeks en volg op The Tinderbox. In The Timepiece word die Miller-gesin gedwing om buite hulle gemaksone op te tree. ‘n Dogter uit die pa van die huis se vorige huwelik daag onverwags op.

Eerstens het niemand geweet dat hy voorheen getroud was nie, gelukkig het dié geheim darem ‘n rukkie tevore in The Timepiece uitgekom en kon die Amish-gemeenskap darem intussen oor die skok daarvan kom. Die bestaan van ‘n kind uit sy vorige huwelik was egter vir almal iets nuuts.

In hierdie boek sien ek hoe die ma, die stiefma, onmiddellik liefde en gasvryheid betoon en haar innooi. Hoe die hele gesin haar mettertyd leer ken en liefkry. Hoe die liefde tussen twee halfsusters ontwikkel tot iets baie spesiaals.

Ek sien ook hoe vooroordele verhoudings kan beïnvloed, terwyl ander wat dit nié het nie, soveel anders optree. Ek sien liefde, vergifnis.En ek sien hoe mense se lewens verander wanneer hulle ‘n pad met God begin stap.

Ek het die boek baie geniet en sal dit beslis aanbeveel. Die stadige spoed van die Amish-gemeenskap, hulle dtadige manier van doen en leef, die eenvoud en opregtheid waarin hulle leef, dwing die leser om ook rustiger te raak, te ontspan en jou eie gejaagde lewe te oordink.

Toortsie

Vir nog boekbesprekings, kliek HIER, of volg my by Pinterest.