Ek is aan die leer

Dis al ‘n hele paar jaar wat my vriendin my aanpor om ‘n fasiliteerder te word van ‘Transformation Prayer Ministry’, voorheen bekend as ‘Theophostics Prayer Ministry’. Ek was heeltyd te besig, en dalk ook huiwerig, hoekom, weet ek nie. Maar ek was regtig besig.

Tot verlede jaar wat die pawpaw die fan strike, die kalf in die put beland, en ek besef: Nou is die tyd wat ek self TPM nodig het. Ná ‘n intensiewe TPM sessie was ek ‘n nuwe mens. Ek het waarheid ontvang by die Here en Hy het vir my sekere foutiewe kernoortuigings uitgewys wat veroorsaak dat ek foute maak en onnodig pyn verduur.

Daarvandaan glo ek aan TPM soos nog nooit tevore nie en is ek self besig om dit te bestudeer. Ek wil graag ander mense help soos ek ook gehelp is.

Die wonder van TPM is dat jy dit juis op jouself ook kan toepas. Soos wat ek meer en meer daarvan leer, kom vrae in my kop op: Hoekom maak hierdie persoon my so kwaad? Hoekom kan ek hierdie muur nie afbreek nie? Wat keer my om sekere goed te doen? Dan pas ek TPM op myself toe en kom by die verrassendste onthullings oor myself uit, leuens wat ek oor myself glo al sedert kleintyd, goed wat ek die waarheid al lankal in my kop weet, maar diep in my hart die teenoorgestelde glo en dus nie vry kan kom nie.

Danksy die waarheid wat ek van die Here ontvang, raak ek stukkie vir stukkie vry en laat die die Gees toe om Sy vrug al meer in my sigbaar te maak.

Die lekker van TPM is dat jy dit op jou eie kan bestudeer. Opleiding is gratis hier beskikbaar. Ek wil dit regtig aanbeveel. Doen dit vir jouself, kom vry van die bande wat jou vashou. Of, as jy nie een is om so iets deur selfstudie te doen nie, kom by ‘n TPM fasiliteerder uit wat jou kan help, dis regtig bevrydend. Vra vir Google vir ‘n TPM fasiliteerder in jou omgewing.

Wat gaan ek met my TPM doen as ek klaar opgelei is so met my gependel deur? Ek weet nie! Ek weet nie wat die Here beplan nie, maar Hy is beslis besig met my, op pad met my in een of ander rigting waarvan Hy die eindbestemming weet. Al wat ek weet, is dat ek dit nou moet doen en gou moet doen, dat Hy my nodig het om ‘n sekere taak vir Hom uit te voer. Ek sien met opwinding uit na wat kom!

Groetnis

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Finesse: Het julle al gehoor van ‘n vreugdevas?

Toortsie by Pinterest

Plaasakkomodasie by Riversdal, Wes-Kaap

 

Ons almal het issues

Of ons dit nou wil erken of nie, of ons daaraan werk of nie, ons almal loop met bagasie rond. Ook ek!

Selfs ek, wat soveel hieroor lees. Selfs ek wat baie met myself praat, konsentreer op positiwiteit. Selfs ek wat met die Here saamloop, ja selfs ek loop met bagasie. En weet julle wat is die ergste? Ek WEET al hierdie goed, ek VERSTAAN dit, ek KRY DIT REG om my kop reg te praat, tot die krisis regtig kom en dan is die ou gewaarwording maar weer daar, die een wat al vir jare saam met my loop, die een wat ek al erken het.

In ‘n driewekejoernaal met ‘n spesifieke doel raak ek van baie dinge bewus, maar ook dat ek na my vriendin, die Theophostics berader moet gaan. My lyf, my siel, my wese skree vir ‘n gebedsberading. Tydens die berading moet ek mooi konsentreer, luister, want ek ken mos die regte antwoorde, ek weet mos hierdie dinge, ek is gewoond om vinnig te antwoord, maar my beradervriendin vra my, ‘Is dit wat die Here vir jou sê of probeer jy Hom ‘n bietjie help?’ In ‘n baie lang gebedsberadingsessie kom die aanvanklike probleem, die een wat my by haar gebring het, ter sprake, maar nee, wanneer het jy nóg presies so gevoel, wanneer vóór dit, en nog voor dit, en nog voor dit, tot ons uitkom in Sub A! In Sub A is hierdie spesifieke verkeerde gevoel al in my hart gevestig, en in my later jare, wanneer ek weer hierdie selfde gevoel ervaar het om presies dieselfde rede, maar net in ‘n ander baadjie, het ek daardie mense begin wantrou, onbewus daarvan dat die duiwel al toe ek sewe jaar oud was, sy voet in die deur gekry het.

Maar in die gebedsessie wys God vir my nog baie meer: Hy wys my dat Hy altyd vir my die oplossing byderhand gehad het, die uitkomkans, iets anders wat vir my meer werd was en Hy wys my ook dat ek dit altyd gebruik het, dat dit eintlik deel is van my lewensmotto, dat ek dit mag glo. Want dís waar die eintlike storie lê, ek het hierdie goed al in my kop verwerk en weet dit in normale omstandighede, maar het dit nie noodwendig diep, diep, diep in my hart geglo nie.  En hier kom sê God self vir my wat ek so graag wil hoor en hoe kan ek nou nie anders as om dit te moet glo nie, dit kom dan van God self af?

En toe ek die OORSPRONG van daardie gevoel besef, kon ek al die eintlik onskuldige insidente wat my deur die res van my lewe gepla het, ook verstaan en besef dat dit eintlik nie so erg was nie.

Dra jy swaar aan jou issues? Dalk moet jy uitkyk vir ‘n Theophostics gebedsberader.

Groetnis

Toortsie

Toortsie se Facebookpage

Toortsie se Bantingboerekosboek faceboekpage

Toortsie by Finesse: Malgas se pont

Toortsie’s Banting Bash Blog