Verklaring oor my taal…

Aangesien dit vandag Internasionale Moedertaaldag is, pos ek graag weer hierdie bloginskrywing wat ek baie lank gelede geskryf het. Hierdie bloginskrywing word steeds daagliks gelees en, van al my skryfwerk, die een wat die tweede meeste gelees word. Soos Wolfie sê, kom ons wees trots op ons taal!

Afrikaans is my taal. My Moedertaal. Die taal waarvoor ek lief is. Die taal wat ek nog my lewe lank in die huis praat, waarin ek skool gegaan het en waarin ek onderrig is op universiteit. Ek is NIE ‘n taalkundige nie en is baie meer syfervaardig en musikaal as taalvaardig. Maar dis my taal. Dis die taal waarin ek blog. Ek lees wel soms Engels en praat dit ook as dit nodig is sonder verset, maar ek verkies beslis ‘n Afrikaanse boek. As ‘n boek oorspronklik in ‘n ander taal geskryf is, en oorvertaal is na Afrikaans, verkies ek die Afrikaanse weergawe. Dis die taal waarin ek gemaklik is.

Al kry ek al die kritiek in die wêreld, al dink ander dalk dis ‘n kombuistaal, sal ek, sover moontlik, vir die res van my lewe Afrikaans praat en dit probeer bevorder op alle terreine binne my bereik. Ek kan met trots sê dat ons plaaskinders se taalgebruik verbeter danksy my betrokkenheid. Ek het al ‘n Xhosa-sprekende kind op ‘n eistedfodd laat sing: “So ry die trein.” Pragtig!

Ek GUN elke persoon in die wêreld om die taal van sy keuse te praat. Ek dink nie Afrikaans is ‘n beter taal as ander tale nie. Maar ek verkies Afrikaans!!

Wie weet wat op die maagkant van hierdie T-hemp staan??? 😀

Groete

Toortsie

Toortsie by Finesse: Toe kom die reën

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif

Transformation Prayer Ministry: Bredasdorp en Riversdal

Advertisements

Lê jou eier: As Afrikaans sou uitsterf

Hester se uitdaging hierdie week het betrekking op my eie skrywe van verlede week. Wat gaan ek mis as Afrikaans sou uitsterf? Ek het al so baie oor Afrikaans geskryf, maar ek wil nou skryf oor ietsie waaroor ons almal grom, maar saamdoen. Ek ook! Ek grom ook en doen saam.

Daai ding van die hele saal sit vol Afrikaanssprekendes en EEN Engelssprekendes en dan is ons so ORDENTLIK en doen ALLES IN ENGELS sodat die Engelssprekende kan verstaan, intussen sukkel die res van die gehoor om te verstaan! Het julle dit al ervaar?

Ja, ja, ek verstaan. Ons is so BEVOORREG om meer as een taal te kan praat, daarom is ons NET TE GEWILLIG om elke keer terug te staan en maar die helfte van die praatjie/kursus/gesprek te verloor omdat ons dalk nie vinnig genoeg volg nie. By ‘n kursus moet ek dan in Engels luister, vinnig vertaal en in Afrikaans aantekeninge maak. Of in Engels aantekeninge maak. Of in Minglish.

Hierdie een kan ek nog verduur, omdat ek regtig nie die een persoon die voorreg misgun om ook die kursus by te woon nie. Maar dis sommer nonsens dat die Engelssprekendes sommer net aanvaar dat dit in Engels sal gebeur omdat hulle daar is! Net soos ons Engels moes leer op skool, moes hulle mos Afrikaans leer, of is dit nie meer die geval nie?

Maar daar is vir my iets nog erger: Wanneer ALMAL in die gehoor Afrikaanssprekend is en die spreker ook ‘n Afrikaanssprekende, en die lesing/toespraak/kursus word in ENGELS aangebied. Ja, dit gebeur! En dan is dit nie noodwendig altyd ‘n aanvaarbare Engels nie. HOEKOM DOEN ONS DIT AAN ONSSELF? HOEKOM DOEN ONS DIT AAN ONS TAAL? Hoekom vermoor ons ons taal? Ons doen dit SELF, nie ander mense nie!

Toemaar, ontspan, ek gaan NIE my speelgoed uit die kot gooi wanneer dit die volgende keer weer gebeur nie. Ek sal my gedra, want ek is mos so bevoorreg om Engels ook op ‘n manier te verstaan, so hoekom sal ek nou nie wil hê dat die arme Engelse persoon wat nou nie ons mooie taal kan verstaan nie, nie die verrigtinge kan volg nie?

Ek wou nou die dag in ons kerk opstaan en hande klap vir ons predikant. Hy het begin deur te sê dat hier ‘n Engelssprekende in die gehoor is (en ek dog: hier kom dit!), maar hy sê toe: Sy verstaan dat as hy begin Engels praat, NIEMAND ANDERS HOM SAL VERSTAAN NIE. Sy is baie welkom vandag, maar hy sal voortgaan in Afrikaans. BRAVO!

Sjoe! Positiewe Toorts! Nou was jy darem NEGATIEF!

Groetnis

Toortsie

Om die inskrywings van verskillende bloggers in Lê-Jou-Eier te geniet of om self ‘n eier te kom lê wat ons kan uitbroei en grootmaak, klik op die volgende InLinkz skakel:

Vir die reëls van hierdie eier-boerdery, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke. Onder hierdie kategorie, kyk na die blogposte Lê-Jou-Eier: Reëls (2017-08-22) en Lê-Jou-Eier: Hoe neem ek deel? (2017-08-22). 

As Afrikaans sou uitsterf – lê jou eier oor jou erfenis

Hul vra ons om ‘n bietjie te dink: as Afrikaans sou uitsterf, wat sal jy mis?

My hele lewe is Afrikaans. My huistaal is Afrikaans, my gesin is Afrikaans. Ek bly in ‘n dorp waar ons Afrikaans praat. Ek kan my nie indink hoe ons mense sal regkom sonder Afrikaans nie.

Ons straatname is Afrikaans. Wat word van Breëstraat, Parkstraat, Rivierstraat, Kerkstraat? En plaasname? Uitkyk. Gaan Boschfontein, wat eintlik Hollands is, Bush Fountain word? Karsrivier Kars River? Dan praat ons nie eers van dorpsname nie! Riviersonderend. Putsonderwater. Verlorenfontein. Bredasdorp. Dit is Afrikaanse name wat ons net op geen manier kan verEngels of verwatookal nie!

Ek vry in Afrikaans. Ek kan my net nie indink om vir my man in enige ander taal as Afrikaans te sê hoe ek oor hom voel en dat dit dieselfde sal wees nie.

Afrikaanse humor. Het julle al probeer om ‘n Afrikaanse grap in Engels te vertel? Dit wérk net nie? Soos die destydse Minister van Landbou, wat gesê het die Kapenaars het nie bogrond nie, nie ondergrond nie, maar darem ‘n bietjie agtergrond. Vertaal dit gou ‘n bietjie na Engels! Toe!

Ek kan nie kosmaak in Engels nie. Ek het een Engelse resepteboek iewers gekry en hy het lankal op die ashoop beland. Daarteenoor het ek ‘n stapelvol Afrikaanses. Geen vergelyking nie.

Toortsie probeer soms in Engels blog. Mensdom! Wát ‘n gesukkel!

Ek dink ek het my punt gemaak. Ek droom in Afrikaans, lag in Afrikaans, speel in Afrikaans, het lief in Afrikaans, word kwaad in Afrikaans, gaan kerk in Afrikaans, dien God in Afrikaans. Afrikaans is my taal. Ek is lief vir Afrikaans.

Wat van jou? Sou Afrikaans uitsterf, wat sou jy mis? Skryf dit op jou blog. Skryf elke dag iets anders op jou Facebook. Op Instagram. Op Twitter. Vertel dit om die braaivleisvuur. Wat is Afrikaans vir jou? Sê dit. Maak Afrikaanssprekendes bewus van ons mooi taal en dat ons dit moet oppas en liefhê en versorg sodat dit kan groei en ons nageslag ook nog die voordeel daarvan kan hê. Merk dit elke keer #Afrikaans #Onmisbaar

En terwyl ek dan nou my eier kan lë oor erfgoed, Afrikaans is my erfenis, en soos die res van my erfgoed, probeer ek mooi kyk na my taal. If you are Afrikaans speaking, be loyal to your ancesters: Speak Afrikaans! 😁

Ek daag jou uit!

Toortsie

Lees ook: Verklaring oor my taal.


Om die inskrywings van verskillende bloggers in Lê-Jou-Eier te geniet of om self ‘n eier te kom lê wat ons kan uitbroei en grootmaak, klik op die volgende InLinkz skakel:

Vir die reëls van hierdie eier-boerdery, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke. Onder hierdie kategorie, kyk na die blogposte Lê-Jou-Eier: Reëls (2017-08-22) en Lê-Jou-Eier: Hoe neem ek deel? (2017-08-22). 

Afrikaans is Groot

Ons kon Saterdagaand die laaste Afrikaans is Groot van die seisoen gaan kyk. Wat ‘n voorreg! Dit was fantasties! Luisterryk! Mooi! Uitstekend! Net die beste! Elke oomblik genot. Die sangers was uistekend, die dansers fantasties. Elke item was ‘n vertoning op sy eie. Alles was van uitstaande gehalte en ek is trots dat hulle ‘n skoon konsert gehou het, sonder ‘n gevloek en ander vulgêriteit wat soveel kere op verhoë gebeur nie.

Maar weet julle wie het my gedagtes vasgevang? Steve Hofmeyer. Ja, ou Steve.

Steve is een van daardie mense oor wie ‘n mens nie neutraal kan voel nie. Of jy haat hom, of jy hang hom aan. Dis net die tipe persoon wat hy is! Hy hou van reaksie en lok dit uit hoe ver hy kan, en hy gee regtig nie om waar jy teenoor hom staan nie. Hy weet wie hy is, waarin hy glo, is ‘n uitstekende sanger en sê en doen wat hy wil. Aspris. Om reaksie uit te lok.

Ek weet hierdie bloginskrywing gaan nou ook reaksie wil uitlok, en dis nie my bedoeling dat Steve nou hier uitmekaar getrek gaan word nie. Ek vra dat u dit nie sal doen nie. Mense wat my blog volg, sal weet dat dit nie my manier van doen is om mense hier te verskeur en vernietig nie.

Ek is nie die tipe persoon wat mense aanhang nie, so ek hang hom ook nie aan nie. Ek haat hom ook nie. Wat ek hier skryf, het niks met sy persoonlike lewe te doen en hoe hy sy lewe leef nie, ek stem nie noodwendig daarmee saam nie. MAAR ek dink hy is ‘n uitstekende kunstenaar. Wanneer hy die verhoog betree, eien hy dit. Hy is meester van die verhoog. Hy maak goeie musiek. Baie goeie musiek met goeie melodie en harmonie. Musiek wat tydloos is wat oor jare nog goeie musiek sal wees. Daarvoor kan ek nie anders as om hom te eer nie.

Nou ja, Afrikaans ís groot. Baie groot. Groot, groot, groot! Ek is trots op ons Afrikaanssprekendes wat nog lief is vir ons taal. Ek is trots op RSG en die FAK en soveel ander instansies wat moeite doen om ons taal te bevorder. Ek is trots op elke persoon wat probeer om ‘n mooi Afrikaans te praat wat nie deurtrek is met anglisismes en sommer enige Engelse woord wat mode is nie.

Ek is lief vir Afrikaans. Ek is lief vir my taal. Mag Afrikaans nog lank voortleef in ons monde, ons harte, ons skryfwerk. Persoonlik voel ek dat dit die minste is wat ons kan doen (minimal), om as Afrikaanssprekendes eienaarskap oor ons taal te aanvaar.

Groete

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Wat maak die verskil?

Toortsie by Pinterest

My taal, o my taal

Eendag, lank gelede, op ‘n nuwejaarsoggend, het ‘n trol wie ‘n sleg oujaar beleef het, my erg beledig oor my taal, oor ek opgewonde is oor mense wat in Afrikaans skryf op hul blogs, oor Suid-Afrikaners wat in die buiteland steeds my taal praat en dit selfs in die buiteland probeer bevorder. My taal bly steeds my taal, die taal waarvoor ek lief is, die taal waarin ek met my kinders en kleinkinders praat, waarin ek bid, waarin ek vry.

Ek is nie een wat eintlik aan protesoptogte en veldtogte, boikotaksies en petisies deelneem nie. Die ouens wat lief is vir sulke maniere van aksies, sal sê ek is ‘n draadsitter, wat ek beslis nie is nie. Ek weet presies waar ek staan, waarin ek glo, daar is net verskillende maniere van doen.

So lief soos ek vir my taal is, besef ek dat Afrikaans maar een van 11 tale in ons land is, en seker nie die taal wat deur die meeste mense gepraat word nie. Ons kan dus seker nie aandring dat Afrikaans spesiale behandeling moet geniet nie.

Op ‘n stadium het afrikaanse advertensies erg verminder en afgeskeep geword, maar dit voel tog of daaraan aandag gegee word. Ek was nog altyd gewoond dat daar darem op my kruideniersware Afrikaans ook verskyn, tot ek vanaand my koskas deurgekyk het en behoorlik ontnugter is! 😦 Stilletjies, sonder dat ek besef het, het die afrikaanse woorde by die agterdeur uitgesluip.

Ek het eers by myself gedink dat ‘n mens dalk die handelsmerke wat nog Afrikaans op het, moet ondersteun, maar helaas, dán gaan ons honger ly.

Ná baie gesoek, was Selati suiker darem daar met Afrikaans op. Waar bruismeel altyd aan die een kant Engels was en aan die ander kant van die pakkie Afrikaans, is dit nou weerskante Engels. All Gold tamatiesous praat nog Afrikaans. Rooibos tee se enigste afrikaanse woord, is “rooibos”. My bakkie neute het ook een afrikaanse woord op, en dit is die handelsmerk, “Padkos”. Die slaghuis se boks sê Excelsior plaasvars vleis. Mrs Balls het my nie teleurgestel nie, haar afrikaanse klante is nog belangrik vir haar. Marina Braaisout is nog Afrikaans en Cartwrights Kerriepoeier het selfs ‘n afrikaanse hoenderkerrieresep op! En dit, dames en here, is die somtotaal van Afrikaans in my koskas.

Dis sulke tye wat ek maar net meer en meer besef: Niemand anders gaan ons taal vir ons beskerm nie, net ons kan dit doen. Ons kan aggressief daarop aandring en dalk nog meer mense afsit, of, ons kan sorg dat die Afrikaans wat ons praat en skryf, van goeie gehalte is. Ons kan ook goeie afrikaanse musiek ondersteun en afrikaanse boeke, tydskrifte en koerante koop. En skryf op blogs! Solank ons Afrikaans praat en sing en skryf, sal dit nie sommer uitsterf nie.

Intussen, lyk dit my, kry ons Engels sommer saam met ons oggendkoffie in.

Lekker slaap! Toortsie

So ‘n nágedagte: Ek is só dankbaar WordPress se base weet dat Afrikaans vir ons belangrik is en dat ons ons blogging in Afrikaans mag doen. Dankie, WP, julle is bobaas! 🙂

%d bloggers like this: