En toe was daar Marilyn

Ek bewonder enige persoon wat ‘n kortverhaal kan skryf. Wat nog nie te sê ‘n hele storieboek nie! Maar ‘n reeks! Hoe beskryf ‘n mens daardie bewondering vir die persoon wat dit regkry om vier boeke in ‘n ry te skryf en die leser se belangstelling te behou tot by die laaste woord? Channette Paul, ek bewonder jou! Hartlik geluk! Dit is natuurlik nie die eerste reeks wat ek van haar lees nie, elkeen was uitstekend.

Die eerste boek in hierdie reeks was Lira. Ag, ek het die storie van die Vywervroue geniet. Elke woord. Hulle kreatiwiteit. Lira wat uit niks uit iets kan skep. Haar vriendinne: Mirre, Corali en Marilyn. Mirre wat moet wegkruip vir haar emosioneel siek man. Corali, die kunstige bont ene.

En dan Marilyn. Marilyn. Anders as die ander. Amper hardgebak? Kom nie met haar kleindogter reg nie, maar wel, so verward die kleindogter in daardie tyd was sou ek dalk ook nie met haar reggekom het nie. Die Marilyn wat jy in die vorige drie boeke ontmoet, is een met losse sedes. Een wat haar eie ding doen. Maar een met ‘n hart van goud. Die een wat nie sal skroom om die ander Vywervroue te help nie.

En dan val die kollig op Marilyn in die laaste boek. Wat ‘n verhaal! En jy besef net weer eens dat elke persoon ‘n storie het en voor jy nie sy storie gehoor het nie, jy nie ‘n opinie kan gee nie. Want Marilyn het haar lewe geleef as gevolg van ander mense se misstappe wat haar lewe op ‘n spoor gegooi het wat sy nie self kon kies nie. En op haar manier het sy die beste daarvan gemaak. Het sy oorleef. Het sy die keuses gemaak wat op daardie stadium vir haar die beste gelyk het.

Sjoe! dit is ‘n wonderlike boek. As ek na die hele reeks kyk, het ek gevoel dat Mirre ietwat ‘n herhaling was van die storie wat ons reeds in Lira gelees het. Tog moet jy dit ook lees omdat daar soveel meer is. En dan Corali. Ek was mal oor Corali die mens, maar ook Corali die boek. Marilyn is regtig die toppunt en ‘n wonderlike manier om die hele reeks af te sluit. Gaan kry asseblief al vier die boeke, dit is beslis die moeite werd.

Dankie, Chanette, dankie! Mag daar nog baie wonderlike boeke uit jou pen kom.

Toortsie

Corali

Corali is die derde boek in die Vyvervrou Trilogie wat deur Chanette Paul geskryf is. Deur die hele reeks al trek Corali my aandag. Voel dit vir my of ek na haar aard.

Ek het Corali geniet van die eerste woord af dwarsdeur tot die einde. Nee, ek dink nie ons aard na mekaar nie, maar daar is baie raakpunte. As Corali ‘n regte mens was, kon ons maats wees.

Corali bied ‘n goeie oor vir haar vriende. Sy is kreatief. Sy kan haarself goed besig hou op haar eie, maar geniet dit baie saam met haar maats. Sy is uitstekend in haar kuns, ongeag watter kunsvorm sy beoefen. Sy praat ‘n bietjie baie lelik. Sy het haar huis PERS geverf en het haar trap met die mooiste mosaïek versier. Sy het beslis baie meer gutz as ek!

Aangesien dit ‘n reeks is wat in dieselfde tyd afspeel, is daar weer eens gebeure uit boek 1 en 2 wat herhaal, maar nie té veel nie. Daar is spanning teenwoordig, maar ook nie te veel nie. Ek het haar en Thomas se stories baie geniet en dit was veral heerlik vars om vir Thomas, ‘n nuwe karakter, te ontmoet.

Ek beveel hierdie boek beslis aan. Ek kon dit net nie neersit nie.

Toortsie

Mirre

Dit was in Junie 2019 wat ek vir Lira deur Chanette Paul gelees het. Lira is deel van ‘n reeks van vier boeke oor die vier Vywervroue van Vywerbaai. Voor ek nou vir Mirre begin lees het, het ek eers weer vir Lira ook gelees. Dis wonderlik hoeveel ander detail ek nou daarin raakgelees het.

Wat ek natuurlik baie van Chanette Paul se boeke geniet, en veral ook van die Vywervroue is dat dit in my bekende omgewing afspeel. Selfs al is dit ‘n geskepte strandplekkie, is dit vir my bekend en kan ek dit vir my voorstel in my geestesoog.

Mirre is die Vywervrou wat vir haar lewe moet vlug. Wat die hele tyd in vrees leef vir haar vervreemde man en nie weet wanneer hy weer sy opwagting gaan maak nie. Dis heerlik om die susterskap van die vier Vywervroue te ervaar, hoe hulle mekaar ondersteun, mekaar oplig. Vroue wat elkeen haar eie storie het wat mekaar in liefde tot hoër hoogtes aanspoor.

Mirre speel in redelik dieselfde tyd af as wat Lira afspeel en baie van die gebeure oorvleuel, maar ‘n mens sien dit nou uit die ander persone se oë. In hierdie boek is die klem meestal op Mirre en Boeta, haar jeugliefde.

Die spanningslyn is end-uit uitstekend en Chanette Paul kry dit reg om ‘n mens se aandag tot aan die einde te behou. Die leser kry ‘n kykie in die lewe saam met ‘n psigopaat (of iemand met een of ander geestesiekte), en beleef ook manipulasie en onsekerheid wat ‘n ongelukkige huwelik bring, nie net by Mirre en haar man nie, maar ook by van die ander sleutelspelers in die boek.

Natuurlik het die boek ‘n mooi einde, en is daar nie nog oop gate in die storie wat opgelos moes word nie. Ek sou natuurlik baie daarvan gehou het as Mirre op die end ‘n klomp geld erf of so iets.

Ek het die boek baie geniet en gaan sommer nou dadelik met die derde een in die reeks, nl Corali begin.

Toortsie

Die storie se lyf

Ek lees tans Lira van Chanette Paul. Ek dink dit is haar nuutste boek en dis die eerste boek in ‘n trilogie van Vywervroue. Julle kan maar self lees wat vywervroue is en hoekom Vywervroue hulle nie laat opeet nie. Terloops, die Vywervroue laat my baie aan die Towerinne dink, wat elkeen haar eie ding doen, maar mekaar ondersteun en opbou en regop hou. Dit speel af in die Overberg en alhoewel dit ‘n fiktiewe strandjie is, voel dit vir my baie bekend en kan ek sekere bakens herken.

Soos altyd, geniet ek Chanette se boeke geweldig baie. Die storie loop lekker en ‘n mens raak nooit verveeld nie. Wat my baie interesseer, is hoe sy die storie ‘lyf’ gee, hoe sy dit relevant maak, hoe sy die boek meer maak as net ‘n storie wat jy in vyf bladsye lees. Die boek speel presies in ‘nou’ se tyd af, die politieke gebeure, die vrees rondom grondonteiening, die waterbeperkings in die Kaap, word terloops ingeskryf op die regte plek.

Tussendeur ontrafel sy die storie van elkeen van die karakters, en leer ons sommer ook meer oor die lewe, oor verhoudings, oor die chemiese werking tussen man en vrou, die pa-tienerdogterverhouding, sommer sielkunde ook.

Alhoewel hierdie boek meer oor vroue gaan, en nee, dit is ook nie so nie, eintlik is dit Lira se storie en Fynn, ‘n man s’n. Nou het ek myself in die rede geval. Die vier Vywervroue het elkeen al iewers swaar in hulle lewe gehad, maar dit oorheers nie die storie nie. Dis ‘n gebalanseerde storie waar daar goeie mans en goeie vroue is, mense wat ook foute gemaak het, maar waar daar ook nare mans en vroue is, mense met nie sulke goeie karakters nie. Dis tog hoe die lewe is, ons het alle soorte mense hier en goed en sleg kan nie net aan ‘n sekere ras of geslag toegeken word nie.

Lira is meer as ‘n dun vrystorie wat ‘n mens in ‘n middag se tyd deurlees. Dis ‘n weldeurdagte, goedgeskryfde boek wat ek regtig wil aanbeveel. ‘n Boek waar die lewe gebeur.

Toortsie

Kyk gerus HIER vir nog boekbeskrywings, of volg my boekbesprekings by Pinterest.

Meetsnoer

“Meetsnoer”, ‘n boek geskryf deur Chanette Paul, is deel van die Gys Niemand reeks. Elkeen van die boeke in die reeks kan op sy eie gelees word, tog is dit goed om dit in volgorde te lees omdat daar verwys word na gebeure en mense uit die vorige boeke. Sy gee die volgorde van die reeks aan op haar blog.

‘n Vrou, wie deur mense erg benadeel is, koop ‘n stukkie grond waarop ‘n oerwoud is. Dit voel vir haar soos ‘n “tuiskoms” om daar te wees.

Maar ongelukkig weet sy nie van al die onderstrominge nie, van ander mense wat ook graag die stukkie grond wil besit nie,  van geheime wat die grond dra nie, van mense wie bereid is om moord te pleeg om dit te kan kry nie.

Sy kry te doen met ‘n kerk met totaal verdraaide opvattings, met mense met totale siek lewensopvattings, mense wie geïndoktrineer word deur ‘n absolute opportunis met ‘n verskuilde agenda.

Meetsnoer is ‘n fantastiese boek. Die vingers wys na een verdagte,  tog kan jy nooit seker wees nie,  en elke keer word daar net nóg ‘n veer uit die hoed getrek sodat dit spannend bly tot op die laaste bladsy. Dis ‘n boek wat ek met graagte aanbeveel.

Toortsie

Ek sit skakels na al my boekbesprekings op Pinterest.