Bybelstudiegroepe

Ja, ek het op skool aan bybelstudiegroepe behoort. Om die waarheid te sê het ons in Standerd 5 reeds aan die ACVV behoort omdat daar so ‘n oulike onderwyseres in die koshuis was wat gevoel het dat ons Standerd 5’s maar ook ‘n groep mag hê. En op Universiteit het ek altyd aan ACVV kringe behoort.

In 1992 bel ‘n buurvrou op die plaas vir my. Hulle wil ‘n groep behoort en stel ek en my man belang daarin om deel te neem. Ja ek stel belang, maar in my agterkop weet ek nie of my man sal wil nie. By etenstyd sê hy dat hulle hom ook gekontak het en ja, ons moet ook deel wees van daardie groep. Dit was nadat Ds Stan daardie Pinkstertyd bidure by ons plaaswyk gehou het en bybelstudiegroepe wat deur die lede self bedryf word in plaas van die predikant, aangemoedig. Daardie tyd was hier ‘n baie groot beweging van bybelstudiegroepe op ons dorp.

Maandagaand vir Maandagaand het ons groep bymekaargekom. Deur die jaar, maar nie tydens skoolvakansies nie. Ons het beurte gemaak van huis tot huis en die een by wie dit was, het dit ook sommer aangebied. Ons het gesing, bybelstudie gehou en gekuier tot laataand. Deurdie jare het die groep soms gegroei, soms kleinder geraak totdat dit net voor Covid uiteindelik doodgeloop het.

Ek het vir lank die groep gelei en het tydens Covid verskriklik daarna verlang. Want as jy so ‘n groep lei leer jy so baie. Jy doen intens voorbereiding. Is besig met die Here.

Toe Covid begin ligter raak het en mense weer stilletjies by mekaar gekom het, het die Here vir my ‘n groep toegewyde vroue gegee en ons kom op ‘n gereelde basis bymekaar. Ons bestudeer Openbaring, leer geweldig daaruit, leer by mekaar. En dalk verstaan ons Openbaring nie presies soos wat dit veronderstel is om te wees nie, maak dit nie saak nie. Ons leer van God, van Sy Woord, van vandag.

In Januarie terwyl ek vinnig by Spar inhardloop – onthou ek is altyd op ‘n galop – vra ‘n tannie my of ek nie asseblief by die Dienssentrum ‘n bybelstudiegroep sal lei nie. Ek sê dat ek graag wil, maar ek eintlik glad nie tyd het nie en Maandae al is wanneer ek dit kan doen. O, sê sy, Maandae sal perfek wees. Dis eintlik wanneer hulle dit gedoen wil hê. Ek wonder by myself: Wie is die gehoor? En ek besef: dit sal mense wees wat die Here ken, want self al ‘n pad met Hom geloop het. Mense wat ‘n behoefte het aan so iets.

En daar, in die harwar, in ‘n uiters besige Januarie 2022 begin ‘n wonderlike belewenis. ‘n Geskenk reg vanuit die hemel, net soos die ander twee groepe ook geskenke uit die hemel is. Ons gaan steeds voort met ons Openbaringgroep en geniet dit geweldig. Maar in albei die groepe het ek mentors gevind. Mense by wie ek maar mag leer. Ek is slegs die fasiliteerder. Dit is iets ongeloofliks. Ek het nie net mentors gevind nie, maar nuwe vriendinne. Vriendinne met wie ek die pad in vertroue en veiligheid kan stap.

Wat ‘n voorreg! Wat ‘n geskenk! Soos nog altyd kan ek net wens dat elke persoon op aarde aan so ‘n groep kan behoort. En as jy dalk die behoefte het aan so iets, steek jou voelers uit tussen jou vriende. Dalk kan julle ook so iets begin. ‘n Groep wat gedoen word volgens julle persoonlikheid, julle behoefte. Kry ‘n boekie by CUM of Bybelkor wat julle kan deurwerk. Dit is beslis die moeite werd.

Toortsie

Jakobus: Hoe nou gemaak?

Ons doen tans die boek, ‘Jakobus: Hoe nou gemaak’, deur Annene Mullens en Kobus Myburgh, in ons bybelstudiegroep. Die boek is uitgegee deur Bybelmedia en ek kan dit regtig aanbeveel.

Die boek het 10 lesse waarvan ons weekliks een deurwerk, maar dis regtig aktueel en gepas vir die tyd waarin ons tans leef. Die groep gesels baie lekker en lewendig saam oor al die onderwerpe en ons leer so baie hieruit.

Onderwerpe wat behandel word, is:

Aan wie en vir wie is die boek Jakobus geskryf; God gee goeie gawes; Wysheid in die Woord; Hoe ons God se liefde beantwoord; Voeg die daad by die woord (ons geloof moet in ons dade sigbaar raak); Wie vrede saai, sal vrede oes (die stuk oor die tong); Onderwerp julle aan God; Dink eers, praat dan; Hemel en aarde ontmoet; In God se hande.

Jakobus is regtig geskryf vir ‘n tyd soos hierdie, die tyd waarin ons nou leef.

Hierdie boek is geskik vir persoonlike bybelstudie, maar ook vir bybelstudiegroepe.

Groete

Toortsie

U kan my boekbeskrywings volg op Pinterest. Kliek HIER.

Romeine – Hartklop van die Evangelie

In Februarie 2006 het ek voorin die boek, Beleef God se genade, deur Andrie du Toit, as volg geskryf:

Nadat ek die boeke ‘Beleef God’, deur Blackaby en ‘Algehele Oorgawe‘, deur Andrew Murray gedoen het en ‘n wonderlike nabyheid met God gevoel en ervaar het, het ek hierdie boek begin doen.

Dit was ‘n wonderlike boek wat ek woord vir woord geniet het en vir ons bybelstudiegroep ook voorgestel het om te doen. Dit is ‘n vers vir vers verduideliking van die boek, Romeine, die Bybelboek wat vir ons as gelowiges so baie beteken, die boek wat handel oor die genade. Oor Jesus se genade wat vir ons so groot is.

Tydens die deurwerk van die boek het ek geloofsgroei ervaar, het God met my persoonlik gepraat, het ek weer eens geleer dat ek moet waak teen geestelike hoogmoed, maar God in nederigheid moet dien. Ek moes weer eens herinner word dat die lewe nie oor MY gaan nie, maar oor God.

Wat ‘n wonderlike boek!

Hier is die goeie nuus nou:

Hierdie boek is hersien en is nuut uitgegee met die naam: Romeine: Hartklop van die Evangelie. Dis nuut en vars gemaak en steeds ‘n uitstekende bybelstudieboek om te doen. ‘n In diepte en deeglike studie oor Romeine, wat veroorsaak het dat Romeine nou een van my gunstelingboeke in die Bybel geraak het.

Groetnis

Toortsie

Gladgestryk

Nee, ek is nie mal oor stryk, soos iemand gelees het uit ‘n opmerking wat ek gemaak het nie. 🙂 Daar is ‘n klompie goed wat ‘n vrou mos maar moet doen, tensy sy iemand het wat dit vir haar doen, soos bed opmaak, skottelgoed was en afdroog, wasgoed ophang, stryk, huis skoonmaak. Ek stryk eerder voor ek huis skoonmaak en ek verkies om eerder die skottelgoed te was as af te droog. Maar dis van daardie goed wat ek net doen, ek dink nie eintlik daaroor nie.

Tog kry ek die laaste tyd aanmekaar hierdie prentjie in my kop wanneer ek klere opvou en stryk, wanneer die bondel onnet klere onder my hand, een vir een netjies opgevou raak, dat onder God se Hand, my verfrommelde lewe netjies raak. Soos wat ek die voue en kreukels met my hand, of met die strykyster wegvee, net so vee God met Sy hand die voue en kreukels in my lewe weg as ek Hom toelaat.

En ek hét baie voue en kreukels in my lewe, by party van hulle moet die stykyster sommer op WARM gestel word om dit weg te kry.

Net soos met ons wasgoed wat opgevou word, hoef party goed in ons lewe sommer net liggies met die hand gevee en opgevou te word, terwyl ander ‘n strykyster nodig het en partykeer moet die strykyster lank op ‘n sekere plek vee voor die merk heeltemal uitgestryk is. Dis sulke tye wanneer dit nie so maklik is nie en ons dalk sommer swaarkry en wonder wat aangaan.

Ek is tans baie onder die indruk van Jakobus. Ek het ‘n bybelstudieboek oor hom gedoen en hom letterlik vers vir vers oordink.

Jakobus Hoe nou gemaak? Annene Mullins en Kobus Myburgh

Agterop staan dat Jakobus nié uit ‘n reeks sedelessies, lang lyste wettiese voorskrifte of bolangse troos bestaan nie maar ‘n wysheidsboek is waarin Jakobus vir gelowiges riglyne gee hoe om in moeilike omstandighede voor God te leef.

Jakobus is ‘n boek wat vandag nog net so relevant is en dis of ek net nie genoeg van hom kan kry nie, en ontdek toe sowaar nog hierdie boek ook op my boekrak, wat ek nou ook sommer gaan doen:

Geloof vir ‘n tyd soos hierdie – Johan Smit

Soos die Spreuke so graag sê: ‘Wysheid begin by die dien van die Here.’ Laat ons tyd voor Sy troon deurbring, by Sy voete sit, tyd met Hom spandeer, en Hom toelaat om die kreukels in ons lewens uit te stryk met Sy liefdevolle hand.

Toortsie