Konsep, skeduleer, publiseer

Ek het gedink ek het die antwoord, maar by verdere ondersoek was ek toe glad nie so slim soos ek dink nie. Hoekom gebeur dit dat ‘n storie nie wys op die leser nie? Mag dit dalk wees dat die leser nie noodwendig alles wys nie? Ek vermoed so. Ek het ook al agtergekom dat die selfoon app ook nie al die kommentare wys en as ek later op die rekenaar kyk, vind ek kommentare wat ek nooit raakgesien het nie.

Wat ek wel al agtergekom het en gedink het dat dít die antwoord is:

Wanneer ek ‘n bloginskrywing as ‘n konsep stoor (save as draft), onthou die rekenaar daardie datum en tyd as die tyd vir publikasie. Wanneer ek dit dan wel dalk baie later publiseer en ‘publish now’ kies, word dit gepubliseer op die oorspronklike tyd wat dit die eerste keer as konsep gestoor is. Dit bring mee dat die bloginskrywing dan nie noodwendig as ‘n nuwe een verskyn nie.

Om dit te verhoed stel ek voor dat jy, net voor jy publiseer nou druk, die datum en tyd van die bloginskrywing fisies gaan verander na die huidige tyd. Jy doen dit by ‘post settings’ en dan ‘publish on’. Die foto hieronder is van een wat reeds gepubliseer is.

Sou jy ‘n bloginskrywing wil skeduleer om in die toekoms gepubliseer te word, gebruik jy presies dieselfde funksie, maar vul die datum en tyd in wanneer dit moet verskyn.

Terloops, vandag het my blog die 600 000 klieke perk verbygegaan. Dis sommer net vir interessantheid.

Toortsie

Stel jouself bekend

Hierdie het ek al ‘n hele paar keer geskryf, maar daar kom altyd nuwe blogmaats op die horison en daarom is dit nodig om dit soms te herhaal.

Die beste raad wat ek ooit oor blogging gekry het, het ek by Xena gekry: Stel jouself bekend deur by ander blogs kommentaar te lewer. Hoe moet ons van jou weet as jy nie jouself bekendstel nie? Ek het dit ook geleer op ‘n blogkursus wat ek op ‘n tyd gedoen het, dat ons moet probeer om daagliks by 5 blogs kommentaar te lewer.

Ons skryf tog in die hoop dat iemand dit gaan lees, of hoe? Anders kan ons dit mos maar in ‘n boek skryf wat ons in ons onderste laai toesluit?

Terwyl ek nou van Xena gepraat het en haar getag het (kyk, haar naam is in ‘n ander kleur, sodat jy daarop kan kliek en by haar blog uitkom), dis iets wat ek ook in daardie jare geleer het, dat, sou jy na ‘n ander blog verwys, of van enige van die blogmaats praat, jy die persoon moet tag. Dis net goeie maniere. Soveel keer kom ek toevallig op ‘n blog af wat iemand iets van my blog of van my skryf, iets waarvoor ek die persoon sou bedank, maar ek het nie geweet hulle het van my geskryf nie.

Met tag is daar ‘n baie goue reël: Kliek op die naam van ‘n bloginskrywing, nie op die naam van die blog nie. Dan kleur jy die URL (adreslyn) van daardie bloginskrywing in, regskliek, copy. Dan kleur jy in jou skryfsel die woord wat jy wil beklemtoon, in, regskliek en paste.

Die lekker daarvan is dat WordPress dan die persoon laat weet as iemand hom getag het.

En onthou, tag trek baie mense na jou blog toe, want hulle lees die ander persoon se blog en sien dan jou skakel en kom lees dan by jou.

Blogging is lekker. Dis lekker as ons blogmaats saamkuier. En bloggers hou daarvan as mense lekker kommentaar by hulle skryf en saamgesels.

Maar ons moet van jou weet.

Toortsie

Help!

Seegogga bel my sodat ek haar moet help en daar val ek sowaar ook in die sloot!

Sy (en nou ook ek) het die nuwe formaat van ‘skep nuwe artikel’ op ons rekenaars. 

Ek het nog die ou formaat gehad, wat wonderlik werk, en om te kyk wat aangaan, kliek ek toe op die nuwe formaat en HOE KAN EK WEER TERUGGAAN?

Daar is net geen manier nie en die nuwe manier is simpel. Hoé kry ‘n mens al hierdie akuutklemme en ander tekens gedoen? Nou ja, ék kon dit gelukkig nou regkry omdat, as ek die e inhou op my rekenaar, dan kom die lettertjies op waaruit ek kan kies. Maar hoe doen ek dit op die ander rekenaars waarvan ek nie altyd die kodes ken nie?

Het iemand anders dit ook oorgekom? Hoe maak mens? Hoe gaan jy weer terug? Asseblief! Help! 

En dan verskyn ‘n ding sommer in ‘n blok en ek weet nie wat alles nie. 

Toortsie

Hoe weet mense van my nuwe blog?

Jy het nou ‘n nuwe blog begin, hoe weet mense van hom? Hoe kry jy mense sover om jou blog te lees?

Ongelukkig móét jy jouself bekendstel as jy wil hê mense moet jou blog lees.

Die heel maklikste manier is natuurlik om elke keer wat jy skryf, dit op jou eie facebook te plaas, maar baie mense wil graag anoniem skryf.

Stel jouself bekend aan ander bloggers deur hulle blogs te lees en daarop kommentaar te lewer.

Hoe weet jy waar om ander bloggers te vind? As jy reeds iemand se blog lees, is dit ‘n goeie idee om by die kommentare te kyk of daar nie ander bloggers is wat kommentaar gelewer het nie. Kliek op hulle icons en dan kom jy by hulle blogs uit. Lees dit en lewer positiewe kommentaar, jy wil nie sommer dadelik almal die josie in maak nie, of hoe? 🙂

As jy op jou rekenaar werk, kyk bo, tweede van links af, staan leser. Begin om blogs te volg wat jy lees, teken in op hulle, stel WordPress se e-poskennisgewings af, en al die nuwe bloginskrywings van mense wat jy volg, kom in die leser. As jy in jou leser lees op die rekenaar, is daar onderaan die bloginskrywings verwysings na ander bloginskrywings. Kliek daarop en …

Die heel belangrikste ding wat soveel mense verkeerd doen en dan kom mense nie by hulle uit nie, is om nie hulle blogadres (URL) reg in te tik nie. Kyk bo-aan jou blog, copy en die adres. Myne lyk so: https://toortsie.com

As jy kommentaar lewer, moet jy die URL reg invul. ‘n Mens doen dit net een keer, dan bly dit so, of dis veronderstel om so te bly. As voorbeeld wys ek hoe dit by my blog lyk:

Nou staan daar: Toortsie: Jy lewer kommentaar met jou rekening by WordPress (Log Out/Verander).

Kies VERANDER. Nou lyk die prentjie so:

Vul die besonderhede in. E-posadres. By Naam is jou naam soos wat jy wil hê dit moet by die kommentaar verskyn. Nou kom die belangrikste deel: Webwerf. Regskliek in die blokkie en paste die webadres wat jy by jou gecopy het. Moet niks anders daar inskryf nie. Dit moet presies reg wees soos dit bo-aan jou blog staan. Weer eens, myne lyk so: https://toortsie.com.  Die volledige adres.

Dan publiseer jy die kommentaar. En die bloggers sien: Aha! Hier is ‘n nuwe blog, en hulle is NUUSKIERIG en gaan kyk wat daar aangaan en jou sommer gou in die blogginggemeenskap intrek. Onthou om te reageer op hulle kommentare, hoor.

Benodig jy nog blograad? Kliek HIER. Daar is sowaar al 100 blograadinskrywings! En wil jy ook begin blog? Kyk HIER hoe om dit te doen.

Groetnis

Toortsie

 

 

Waaroor kan ek skryf?

Ons almal gaan soms deur ‘n woorddroogte, so waar kry ‘n mens altyd iets om oor te skryf?

Ons raak almal sekerlik geïnspireer deur verskillende goed. Iets gebeur, wat die woorde in jou kop laat uitspring, en daar het jy ‘n storie! Jy kyk wat rondom jou gebeur en dit gee jou die idee om iets te skryf. Dalk wil jy sommer net die storie vertel, of dalk wil jy ‘n lessie gee, of skinder, of hoe dit ook al vir jou pas.

Goed wat op Facebook en ander sosiale netwerke gebeur, kan dien as inspirasie.

Ander blogs kan ook as uitstekende inspirasie dien. Jy lees by iemand en jy het dalk lus om sommer ‘n hele bloginskrywing oor dieselfde onderwerp te skryf, of dalk antwoord daarop, jou opinie gee. Dan moet jy mos altyd die ander bloginskrywing waarna jy verwys, ‘tag’.

‘n Heerlike bron van idees is die ‘Daily Post‘ en ‘Weekly post’, wat ‘n woord gee waaroor jy kan skryf. Jy mag dit natuurlik hanteer net soos wat jy enigsins wil. Skryf oor die woord, of waaroor die woord jou laat dink, of skryf oor heeltemal iets anders wat dalk deur hierdie woord in jou kop wakker gemaak is. Deur aan die Daily Post of Weekly Post deel te neem en altyd daardie bloginskrywing te ‘tag’, gee jy jou blog ‘n bietjie wyer blootstelling en maak jy jou blog bekend.

Tans maak ek nogals heelwat gebruik van die woorde wat mense intik by Google en dan kom hulle by my uit. ‘n Voorbeeld hiervan is die ‘opstelhulp‘ wat ek gee, omdat soveel mense by ons blog uitkom as gevolg van die woord, ‘opstel’. Soms tik iemand ‘n frase in, wat ek dink ek kan beantwoord op my eenvoudige manier, soos ‘Hoe kan jy jou man laat glo jy het hom lief?’

Op die ou end maak dit regtig nie saak hoe en waaroor jy skryf nie, solank jy net dit geniet! Dis tog waaroor dit gaan, ons skryf omdat dit vir ons lekker is.

Groetnis

Toortsie

Toortsie by Finesse: Het jy ‘n stilwordplekkie?

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif

Transformation Prayer Ministry: Bredasdorp en Riversdal