Boekeverslag

Iemand het een keer vir my gesê dat as ‘n Afrikaanse skrywer 500 boeke verkoop, hy deur die dak spring. Iemand anders het destyds my goedbedoeld voorberei dat ek ‘n onbekende skrywer is, dis hoe ek ook gevoel het, wie sal nou my ou boekies wil koop?

Wat ek nou hier skryf, skryf ek in nederige dankbaarheid, met nie ‘n tikkie selfvoldaanheid nie. Steve Hofmeyer het nou die dag op TV gesê dat hy steeds dankbaar is vir elke persoon wat sy optredes kyk of ‘n cd of dvd koop, hy aanvaar dit nie as vanselfsprekend nie. Hy sê as die gordyn lig, sien hy oupas en oumas en oom en tannies, regte mense en hulle maak hom bly. Dis in dieselfde gesindheid wat ek hier vertel, want ek is opreg dankbaar vir elke boek wat verkoop, elkeen wat kontak maak en terugvoer en selfs raad gee. Hierdie ding is nie myne alleen nie. Ek is omarm deur vriende en familie en bloggers en Banters wat vir my net goed is, en ‘n God wat my nog alpad lei en ondersteun.

Wel, boek 1 se verkope staan by 2300, waarvan 400 Engels is. Ek jubel en dans en juig elke keer as ‘n Engelse boek my huis verlaat, want ek weet glad nie hoe om dit te bemark nie. Daar is nog so 90 oor.

Boek 2 trek by 400 verkoop.

Nou ja, resepteboeke is anders en ons voorste resepteboekskrywers verkoop blykbaar 20 000, en ek is bly vir hulle. Ek is ook bly vir die TV-en radiodekking wat hulle kry, maar ek het mos gekies om self te publiseer, daarom is daar sekere geleenthede wat dalk nie oor my pad sal kom nie en ek is heeltemal gemaklik daarmee.

Nee, ek het nog nie geld gemaak hiermee nie, net ingeval iemand begin sommetjies maak. Dit kan nogals ‘n mooi bedraggie wees. Die rede? Ek moes alles self befonds. Die proeflesers, die stilis, fotograaf, vertaler, bladuitlêer, en self die drukkoste betaal, wat astronomies baie is. Maar geld maak was mos in elk geval nie die rede hoekom ek dit doen nie, ek doen dit vir my eie persoonlike groei en elke mens wat ek daardeur kan help, is soos manna uit die hemel, ‘n bonus.

Maar ek voel dankbaar. Trots. Vervuld. Bly om dit te kan kom vertel.

Of ek dit weer sal doen? Net die tyd sal my leer. God sal my wys wat my volgende tree moet wees. Tans bemark ek boeke vir ‘n vale en toets nuwe resepte uit vir ‘n moontlike boek drie, maar ek sal beslis nie in hierdie jaar nog ‘n boek uitgee nie.

Dankie vir elkeen van julle vir raad, bystand, aanmoediging, ondersteuning. Dankie dat julle my boekies gekoop het.

Toortsie

Toortsie by Finesse: Elke dogtertjie se droom.

Toortsie se Facebook Page

Toortsie se Bantingresepteboeke Facebook page

TPM Transformasie Gebedsbediening Bredasdorp en Riversdal Facebook Page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif

Radio Tygerberg resensie

 

Advertisements

Verwag groot verrassings met Toortsie 2!

Terwyl Cindy-Lee dag en nag werk om die bladuitleg van Toortsie se tweede Bantingresepteboek, Hier’s die Toortsie weer!te voltooi, het ek begin met die finale goedkeuring van die bladsye. Mense! Dis iets uit ‘n ander wêreld! Dis nuut. Dis vars. Dis besig. Dis verfrissend.

Ek wil dit waag om te sê dat Hier’s die Toortsie weer! regtig iets spesiaals gaan wees met lekker, nuwe, ryk resepte wat geskik is vir die Banting leefstyl, of al die ander LCHF generasies, maar wat deur elke persoon wat daarvan hou om lekker te eet, geniet sal word.

Ek is SUPER opgewonde! As alles volgens plan verloop, hoop ons om die boek teen die einde van Oktober bekend te stel. Dis opwindend! My tone krul behoorlik! Net betyds vir die kersseisoen!

Hier’s die Toortsie weer! is geen kompetisie of herhaling van Toortsie se Bantingboerekos nie. Die twee sussies vul mekaar aan en kan regtig goed saam gebruik word om jou spyskaart interessant te maak. Onthou, dis nie óf Toortsie se Bantingboerekos, óf  Hier’s die Toortsie weer! nie, dis Toortsie se Bantingboerekos én Hier’s die Toortsie weer!

Hier is solank ‘n voorsmakie van wat om te verwag. 🙂

Man! Nou is ek opgewonde!

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Finesse: Die kleinkinders

Toortsie by Pinterest

Plaasakkomodasie by Riversdal, Wes-Kaap

127 bloginskrywings

Hoe vorder boek 2? Hoe lank voor boek 2 uitkom? Wanneer kom boek 2 uit? Dis die vrae wat ek nou gereeld kry. Ag, dis lekker vrae, dit voel of die mense belangstel.

So, hoe vorder die boek?

Daar gebeur ‘n klomp goed tegelyk. Die resepte is mos al ‘n geruime tydjie klaar, dis hope kere getoets, geproe, aangepas, weer geproe en neergeskryf. Daar is seker gemaak dat elke bestanddeel wat genoem is, wel by die metode ook genoem word, en dat dit wat by die metode genoem is, by die bestanddele genoem word. Verskeie kere is dit vergelyk met die brondokument, om seker te maak dat die hoeveelhede ooreenstem. Lizelle het met ‘n arendsoog elke resep deurgelees. Waar nodig is die metodes herskryf om dit so gebruikersvriendelik as moontlik gemaak. Baie keer is verduidelik dat ekstra stappe nie nodig is nie, dat dit so in die metodes beskryf word soos ek dit doen en dat die doel is om dit so eenvoudig en maklik as moontlik te maak.

Bakke en borde is die wêreld vol geleen, ek het weer eens elke liewe dis in die beplande boek gemaak teen rekordspoed, Lizelle het dit kom stileer terwyl Lize die foto’s geneem het. Net die fotografie het 3 volle dae geneem. Die Villet Fynproewers het gekom en die kos kom proe en goedkeur. (Fluister – Hulle het nie ‘n keuse gehad nie, geen negatiewe kommentaar is geduld nie! )  Ag, ek spot sommer, hulle het héérlik geëet, veral die dag wat die vleise gemaak was. 🙂

Lize het die foto’s vervolmaak by haar huis en vir my gestuur en ek het foto’s gekyk en gekyk, en gekyk. 380 van hulle! Wag, ek wys gou vir julle ‘n paar, ek is so opgewonde. Om die waarheid te sê, ek is MAL daaroor! Kyk, as julle die boek nie vir die resepte wil koop nie, koop dit dan vir die mooi foto’s. Toemaar, ek spot al weer!

 

Intussen is die foto’s met ‘n groot gesukkel met die hulp van Dropbox vir Cindy-Lee gestuur, en sy het nou die groot werk om die boek aanmekaar te sit, om die reeds mooi foto’s in iets heeltemal besonders te verander.

Maar ek is nog nie klaar geskryf nie. Die tweede deel van die boek gee mos Bantingraad. Eintlik dink ek ek het dit al klaar geskryf, maar ek is tans besig om die 127 bloginskrywings wat ek oor Banting gemaak het die afgelope drie jaar, te onttrek van die internet en deur te lees, net om seker te maak daar is nie iets wat ek nog moet insit nie.

O, die papier is al bestel en die drukkers sit in die wegspringblokke, gereed om te begin druk sodra ons reg is. En DM moet so tussendeur die proefleeswerk doen en regstellings maak waar nodig. Ongelukkig verander ek nog te veel aan die teks, ek dink sy wag maar so ‘n bietjie.

So, dis waar die boek tans is. Ek hoop om binne 2 maande iets in die hand te hê. ‘n Nuwe Toortsie. Hier’s die Toortsie weer! 

Groetnis

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Finesse: Koop tyd

Toortsie by Pinterest

Plaasakkomodasie by Riversdal, Wes-Kaap