‘n Lang pad

Meer as tien jaar gelede het ek op ‘n dag ‘n blog begin, nadat ek die fliek, Julie, Julia gesien het. Die oorspronklike blog het ek een nag afgevee. Daarná is Toortsie gebore. Ek het oor enige ding geskryf: my geloof, sommer hier en daar ‘n resep gedeel, laf gewees, die opheffingswerk wat ek met die plaaskinders doen, ens. Vóór ek my blog begin het, het ek reeds in my bidboek geskryf. ‘n A4 blad op ‘n keer. Sodat ek kan fokus. Ek glo dat dit daar is wat ek leer skryf het, aan God se voete. Hy het my geleer om my gedagtes neer te skryf.

Toe begin ek Bant. Want ek was moedeloos van wipplank ry tussen vetsugtig en brandmaer. Moedeloos van ‘n kas vol klere waarvan niks pas nie. Toe vra ek God een oggend om my te help en Hy wys vir my van Banting. Dis ook al geskiedenis. Omdat ek nie aan ‘n verslankingsgroep behoort het nie, het ek sommer hier op my blog kom vertel hoe dit gaan, sommer net om my aanspreeklik te hou. In my eie lewe het ek reseppies verander om dit Bantingvriendelik te maak en dit sommer in ‘n swart A4-boek geskryf om dit vir myself bymekaar te hê.

‘n Jaar nadat ek begin Bant het, het ek my eerste resepteboekie vrygestel: Toortsie se Bantingboerekos. Bang, onkundig, waagmoedig het ek dit gedoen. God het my gelei. Hy het die meeste ‘toevallighede’ laat gebeur. Ek moes net die pad stap. Ek het letterlik niks geweet van boeke publiseer nie. Ek was te bang om my poginkie vir ‘n publiseerder te stuur, want ek was te bang vir enige iets wat my sou ontmoedig. Die bloggers het my aangemoedig. Seegogga het raad gegee. My skoondogter het aangebied om die boek se uitleg te doen.

Een dag wat ek die radio aansit op pad terug van Ladismith af, sê die aanbieder: “Goeiemôre. Ons praat vandag met xx oor die skryf van resepteboeke.” Daardie oggend kry ek die heelpad terug ‘n wonderlike lesing wat ek soos ‘n spons opsuig. Toe ek ‘n sekere boek gesoek het, beland ek by Smashwords. Voor ek egter die e-boek wat ek wou hê, kon aflaai, moes ek egter ‘n ander boek aflaai. Daardie boek se naam was Secrets to E book publishing success.

Secrets to E book publishing success – Mark Coker.

Hierdie boek het ek woord vir woord gelees, ingedrink, deurdink, nagevolg tot die letter. Toe ek op my blog terloops noem dat ek ‘n resepteboek wil uitgee, was die bloggers vuur en vlam en ondersteunend, net soos ons hulle mos maar ken. Seegogga sê ek moet ‘n goeie fotograaf kry en ek skrik my boeglam. Fotograaf? Net daar vra ek ‘n oulike vriendin en haar fotograafdogter om my te help met die stilering van die kos. Iemand bel my uit die bloute en daar kry ek hulp met die befondsing van die boek. Om ‘n boek self uit te gee is duuuuuurrrrrrr. Alle kostes is joune.

Ná baie harde werk, nagte se wakkerlê, hare wat letterlik regop gestaan het vir elke ietsie wat gebeur, bangwees, skaamwees, want wie is ék nou om ‘n boek te wil uitgee?, het Toortsie se Bantingboerekos op 16 Desember 2015 die lig gesien. Die Here was so goed vir my! Sy trek al by die sesde druk. Dit het uitstekend verkoop en verkoop steeds. Weekliks stuur ek boeke uit. Sy is nou al naby topverkoperstatus. Ek staan verstom. Ek doen die bemarking, die verspreiding, alles self. Heerlik. Ek geniet dit. Intussen het boek 2, Hier’s die Toortsie Weer! en Toortsie’s Banting Bash! ook die lig gesien en is My Kinderjare met betrekking tot vandag tans by die drukkers. U kan na voorlesings uit my kinderjareboek HIER luister.

Daardie tyd wou ek graag die boek ook as e-boek uitgee, maar hy was te groot om net as e-boek opgelaai te word. Ek was te moeg om regtig te bestudeer hoe om dit te doen en die lewe het gebeur. Aanvanklik wou ek dit by Smashwords uitgee, maar het besluit om eerder Amazon te probeer. Tog het ek nooit regtig tyd gekry om dit behoorlik in te studeer nie. Tot Scrapydo vir my sê dat sy beter by Smashwords regkom. Sy het vir my ‘n wonderlike artikel aangestuur oor selfpublikasie en net daar het die gogga my weer gebyt. Ek het KM Weiland se raad gevolg en dadelik aan die werk gespring om ‘n gratis e-boek te skryf. Daarin is al die Banting soetighede wat in my eerste twee boeke is. Sonder foto’s, want foto’s maak dit onnodig groot. Net die resepte.

Vir dae bestudeer en volg ek die Smashwords Style Guide woord vir woord. Ek maak presies soos wat hy voorstel. ‘n Uitstekende boek. Duidelik geskryf. Regtig aanbevelenswaardig.

Joh-Mari van Heerden het weer eens gesorg vir die voor- en agterblad.

Uiteindelik kon ek by Smashwords ‘publish’ druk. Ná een of twee klein veranderings kry ek toe die boodskap: Congratulations! My e-boek is gepubliseer! Ek het dit reggekry. En vir my is dit mos die groot uitdaging: Om iets reg te kry en te voltooi.

So, dames en here, hier is vir jou ‘n gratis e-boek! Vertel vir jou vriende. Deel dit uit. Maak die lekker soetgoedjies en dink aan Toortsie: https://www.smashwords.com/books/view/1043640

Jy kan dit in enige formaat aflaai by Smashwords.

Die biek is gratis by Smashwords. Die ander webwerwe mag wel ‘n paar rand vra.

Groete

Toortsie

Voorlesings uit My kinderjare met betrekking tot vandag.

Wordless Wednesday – Food

Aletta Nowathome

Foto’s deur Lize V Photography

Stilering deur Lizelle du Toit

27 Julie 2020

Vir die afgelope paar jare noual het ek dieselfde skrywe op hierdie dag. Vandag is my Bantingverjaarsdag. Vandag, 6 jaar gelede, het ek die groot stap in my lewe gemaak om die Bantingleefstyl te volg. Om alle stysel en suiker uit my dieet te verwyder. Om vrugte en sekere groentes met oorleg te eet. Om baie meer vet in my dieet toe te laat. Om meer natuurlike kos te eet. Botter in plaas van nagemaakte margarien. Dubbelroomjoghurt in plaas van laevet. Geen geprosesseerde kaas. Baie neute. Geen tjips. Wegneemetes as absolute minimum.

En soos ek so baie hoor, dat ander mense eerder ‘gebalanseerd’ eet, dink ek ek eet steeds baie gebalanseerd, selfs meer gebalanseerd as voorheen. Want tóé sou my etes sommer baie keer net uit brood en vleis bestaan. Ek sou vergeet om groente of slaai te maak. Ek eet beslis baie meer gebalanseerd en gesond as voorheen. Ek ky nooit honger nie. Ek het baie energie.

Ses jaar gelede, toe my skaal wipplank gery het, ek nie een stel klere van een seisoen na die volgende kon oordra nie, soms selfs nie eers in dieselfde seisoen end-uit kon dra nie, het ek in moedeloosheid gebid dat God my moes help. Ek glo dit met my hele hart dat Hy my daardie dag gehelp het. Dis vir my ‘n uitvoerbare en volhoubare leefstyl. Dis maklik, al was dit in die begin ‘n vreemde konsep. Ek is gesonder as ooit.

Ek hoop dat ek dit die res van my lewe sal kan doen.

Toortsie

Kos

Ek is mal oor kos. Oor eet. Kos is vir my lekker. Ek geniet dit om kos te maak. Nie spesiale kos nie, sommer net gewone boerekos. Huiskos. Kos wat maklik is om te maak. Vinnig en maklik en gesond daarby. Baie keer is ek lui, dan braai manlief, want hy hou daarvan. Sommer net tjops en wors of sosaties. Niks vreemde goed soos braaipaai nie. Gewone braaivleis. Want dis vir ons lekker. Want ons hou daarvan. Ons hou van eet. Ons is goed daarmee.

Natuurlik is alles Bantingvriendelik. Lchf. Keto. Paleo. Gesond, ryk en lekker.

Toortsie

Sommer oor eet en kos en sulke dinge

‘n Vrou met wie ek voorheen baie te doen gekry het, vra my waarmee ek my deesdae besig hou. Ek vertel haar dat ek steeds by die boerdery se administrasie betrokke is en dat ek kosboeke skryf met gewigsverlies en gesondheid as doelwit.

Dadelik stel sy belang, want, soos met soveel die geval is en ook met my die geval was, het die kilogramme oor die jare hulle sit kom neem by haar. Sy wil dadelik weet waar ek my boeke verkoop en vra nog ‘n bietjie uit.

Ek noem aan haar dat sy stysel moet vermy, waarop sy antwoord dat sy nie eintlik baie stysel eet nie.

Ek vra haar hoe haar daaglikse kospatroon lyk. Wat eet sy bedags?

Dit was elf voormiddag wat ek met haar gesels het. Sy het nog niks geëet nie. Sy drink wel koffie met melk en twee lepels suiker in. Middagete sal sy vier perskes eet. By vyf namiddag eet sy drie eiers en laataand is sy doodhonger en eet van die vleis wat oor was van die vorige dag.

Ek sê dat sy eintlik al op die regte pad is deur stysel uit te los. Die vleis en eiers is ook nie verkeerd nie.

Persoonlik dink ek sy eet te min, iets wat baie van ons doen as ons gewig wil verloor. Ons honger onsself uit. Dit werk vir ‘n dag of twee, en dan vergryp ons ons aan die eerste die beste ding. Ons verstadig ook ons metabolisme as ons so min eet. Ons verlaag ons weerstand en iewers kan ons onsself nie meer beheer nie

Ek beveel vir haar aan dat sy die melk in die koffie met room sal vervang en die suiker los wat sy in haar koffie gooi. Verder moet sy in die oggend sommer drie eiers eet sodat sy energie het vir die dag wat voorlê. In plaas daarvan om middagete vir haar vier perskes te koop, kan sy eerder ‘n hoenderdy of twee koop. Sy mag maar die vetjies aan die vleis eet. Wat ek vergeet het om te noem, is die groentetjie by elke ete. En nee, lae GI-brood is NIE aan te bevele as jy ‘n lae koolhidraatdieet wil volg nie.

Hoë vet lae koolhidrate werk vir my. Ek kan ongelukkig nie waarborg dat dit vir ander ook gaan werk nie.

Toortsie