Wanneer die wilskrag laag is

Ek praat nou nie hier van mense met sterk wilskrag wie se lywe soos wilgerlatte lyk nie. Ek praat met mense soos ek wat soms sukkel met ons gewig. Mense wat lief is vir eet. Eintlik praat ek met mense wat die Bantingleefstyl volg, omdat dit mos maar is waar ek die ondervinding opgedoen het. Tog kan jy baie van hierdie raad dalk in ander eetprogramme navolg.

Wanneer is my wilskrag laag? Eerstens wil ek sê dat ek ‘n weidier is en heeldag lus kry vir wei. Saans 6 nm is ek honger en lus vir iets. Sou ek ‘n middagslapie geneem het en ek raak dan wakker, wil ek alles eet wat voorkom. Ek is eterig as ek gespanne voel, moeg is of ontsteld is, en as ek lone doen. Ek kry lus vir soetgoed as almal om my vir ‘n hele naweek aan die een lekkerny na die ander peusel.

Wat werk vir my? Dit help vir my dat ek amper nie meer ‘verbode’ kosse in my huis het nie. Ek maak ook nie verbode kosse nie, dit help vir my. Ek sorg dat daar iets in die huis is om aan te kou, soos kaas en neute. Ek maak graag ‘n groot bak koolslaai of broccolislaai en laai dit behoorlik met kase en ander lekker goed en voel ek honger, kan ek dan ‘n groot bord daarvan eet. ‘n Lekker pot groentesop verrig wondere. Raak my soetlus te erg, maak ek vir my ‘n Bantingsoetigheid. Dit werk ook vir my dat my man dieselfde kos as ek eet. Dit werk om in groot maat te kook en die oorskiet te vries of in die yskas te hou vir daardie oomblikke van swakheid.

‘n Baie waar les is dat jy nie moet winkel toe gaan as jy honger is nie, dis ‘n groot slaggat om in te trap. Wanneer ek honger of moeg is, sien ek allerhande goed in die winkel raak wat ek ander tye nie eers van weet nie. MOENIE verbode goed koop nie, los dit daar in die winkel. Regtig, moenie.

Dat dit nie altyd maklik is nie, is waar. Dat dit moontlik is om sterk te staan, is ook waar.

Groete

Toortsie

Advertisements

Vetsugtigheid

Vetsugtigheid het ook amper ‘n vloekwoord geword en ‘n mens moet baie versigtig wees wat jy daaroor sê om tog nie op iemand se tone te trap nie. As ek hier skryf, is my doel ook beslis nie om op enige persoon se tone te trap nie.

‘n Mens word nie gedefinieer deur hoe vet of hoe maer jy is nie. Tog, al wil ons baklei daarteen, speel ons gewig en hoe ons lyk ‘n baie groot rol in hoe ons voel, of ons dit wil erken, of nie.

My ma het haar lewe lank erg gesukkel met haar gewig. Sies tog, vandag is sy net ‘n klein hopie vel en been. Ek weet watter effek dit op haar gemoed gehad het en nie net op hare nie, op ons almal s’n in die huis. Dit was ‘n lewenslange stryd teen die vet. Ek wil nie eers vir julle vertel wát sy fisies moes deurgaan net om netjies te lyk nie, want haar voorkoms was vir haar altyd baie belangrik.

Ek, daarenteen, was op skool hierdie lang, maer, ondergewig graatjie riet. Dít het sy eie reperkussies gehad omdat my ma my dan altyd uit die modeboeke wou aantrek en ek geen sin daarin gehad het nie, ek was ‘n kaalvoet plaaskind met deurmekaar krulhare. Meer rabbedoe as modepop.

Ongelukkig het die vetsugtigheid ook vir my beetgekry en het ek ook al hoe meer verslaaf aan kos geraak en veral verslaaf aan suiker en kon myself later nie meer keer nie. Ek het leefstylsiektes begin ontwikkel. Pre-diabetes, hoë cholesterol, selfs soms hoë bloeddruk. Metaboliese sindroom.

Ek het begin bid dat God my sal help, ek het geen beheer meer oor my etery, my skaal, klere wat sleg sit, ens gehad nie.

Toe kom Prof Tim Noakes en stel weer die Bantingdieet bekend. Hy verkondig: Los die suikers en die stysels, eet meer vet! Ek dink by myself dat dít nou nonsens is, ‘n mens moet net gebalanseerd eet. Ek word net vetter en vetter met my gebalanseerd etery.

Op 27 Julie 2014 neem ek die drastiese stap en slaan oor na Banting en verloor 16-18 kg. Vyf jaar later kyk ek nie een oomblik terug nie. Ek is steeds ‘n kilo of twee oorgewig, maar vetsugtigheid en die klomp leefstylsiektes is uit die weg geruim.

Die wêreld se mense is besig om vetter en vetter te word. As my inligting reg is, is Amerika bo-aan die lys met Suid-Afrika tweede. Mense eet al hoe meer verwerkte kosse, kitskos, kos wat vinnig gaargemaak word, stysel vorm die hoofbestanddeel van hulle dieet en suiker word mildelik bygevoeg.

Hier is ‘n klompie foto’s wat ek op Instagram by Ditch the carbs leen. Dit is hoe vetsugtigheid toeneem in Amerika, en met SA kort op hulle hakke, kon dit maar netsowel SA se kaarte wees:

Ek het nie al die kaarte gewys nie, maar tans vererger dit jaarliks. Besef julle dat in die hele Amerika 25-30 persent van mense vetsugtig is? Let wel, vetsugtig, nie oorgewig nie. In die helfte van Amerika is 30-34% mense vetsugtig. Een uit drie mense! En die state waar meer as 35% van mense vetsugtig is, raak jaarliks meer. Dit is skokkend. Kommerwekkend.

Nee, ons word nie gedefinieer deur ons lywe nie. En elke mens mag kies of hy sy liggaam wil oppas of nie. Maar ons moet mooi dink, wil ons dit régtig aan onsself doen?

Banting werk vir my. Ongelukkig kan ek dit nie waarborg dat dit vir iemand anders sal werk nie, maar ek voel gesonder en lewenslustiger as ooit. Ek kan jou wel probeer help as jy sou wou en jou dokter sê dis reg.

Toortsie

Is ‘n lae koolhidraat dieet gevaarlik?

O, nee, ek weet glad nie! Ek is mos nie ‘n dokter nie! Hierdie foto het Ditchthecarbs op Instagram gesit en na aanleiding van dit skryf ek hierdie bloginskrywing.

Genadiglik is daardie debatte verby, of Banting volhoubaar is, of dit gesond is, ens. Of dalkies kry ek net nie meer met dit te doen nie. Ek sien ook nie meer vreeslik artikels om die gesondheid daarvan te bewys nie, ek het dit nie meer nodig nie.

Toe ek destyds op my blog aangekondig het dat ek die Bantingleefstyl volg, het iemand vir my gesê: ‘Jy is seker nie ernstig nie.’

Ek het baie dinge aangehoor, dat, as jy Banting doen, jy nie eintlik moet oefen nie, of, dat jy juis baie moet oefen en jy nie die dieet kan volg as jy min oefening kry nie. Banting sou jou na ses maande inhaal, dis ook in my gesig gesê deur ‘n kenner, eerstens dat jou cholesterol jou iewers gaan inhaal, en aan die anderkant, deur dieselfde kenner, met ekstra groot oë, dat as jy Banting begin, jy dit nooit weer sal kan stop nie, want dán gaan jou cholesterol jou probleme gee. Ag, daar was nog doemstories. Party het gesê, probeer dit maar vir ‘n rukkie. ‘n Goedbedoelende het vir my ‘n e-pos gestuur van ‘n tweeling wat die toets gedoen het, een het gebant, die ander een nie. Al verskil aan die einde was dat die Banter ‘n slegte asem gehad het.

Wel, ná vyf jaar van Banting moet ek bieg: Ek het nie na die doemprofete geluister nie. Ouch! Ek was sowaar ernstig toe ek gesê het ek doen dit nou. Ek het sowaar aangehou en dit nie na ‘n rukkie gelos nie. Soms het ek, terwyl ek die leefstyl volg, minder geoefen en ander kere meer. My cholesterol het my sowaar nie na ses maande ingehaal nie. Ag, die metaboliese sindroom wat ek gehad het, het ook saggies die wyk geneem. My bloedsuiker word deesdae nie eers meer getoets nie! Ek kry komplimente vir my vel wat mooi is, my hare groei teen ‘n spoed, ag, daar is te veel om op te noem.

Maar die lekkerste lekker was hierdie week toe die narkotiseur opgewonde vir my gesê het hoe lekker dit is om vir ‘n ‘gesonde’ mens narkose te gee, en weer, toe ek so aan die slaap raak, was die laaste wat ek hoor toe hy dit in die teater herhaal. Ek het sommer met ‘n glimlag weggesweef.

Banting, jou lekker ding!

Of dit gesond is vir jou wat hier lees, weet ek nie, dis iets wat net jy en jou dokter oor kan besluit, maar vir my het dit beslis gewerk, werk dit steeds. Ek stap lag-lag apteek toe, want my voorskrif is aansienlik ligter as wat dit voorheen was.

Toortsie

Beskerm: Toortsie se lieflike gebakte kaaskoek

Hierdie inhoud word deur ‘n wagwoord beskerm. Gee asseblief die wagwoord om die inhoud the besigtig.

Gaan ek gewig verloor?

Ek kry interessante navrae en geniet elkeen van hulle. Gereeld vra iemand vir my in hoe ‘n lang (of kort) tyd ek die gewig verloor het wat ek met Banting verloor het. Dit voel soms vir my asof dit vir die mense ‘n aanduiding is of hulle ‘reg’ verloor.

Nee, mense! Daar is GEEN ooreenkoms tussen twee mense se gewigsverlies nie. Ons almal verskil. Ook wat Banting aanbetref.

Ons liggame reageer almal verskillend op dit wat ons inneem, en, terloops, ek kry soveel keer ‘lesings’ hieroor van goedbedoelde mense wat net vir my wil laat besef dat ons almal verskil. Ek weet ons almal verskil.

As ek dit reg verstaan, is Banting nie in die eerste plek ‘n gewigsverliesprogram nie, maar ‘n gesondheidsprogram. Baie mense doen dit om gewig te verloor, met goeie resultate, maar ander het weer nie dieselfde resultate nie, dit hang van persoon tot persoon af.

Wanneer ons ons eetplan so drasties verander soos met Banting, gebeur daar baie dinge in ons liggaam. Ons metabolisme verander totaal, veral as ons voorheen ‘n koolhidraatryke laevet dieet gevolg het. Ons liggame begin om ander hormone af te skei. Dit moet aanpas by die nuwe eetplan.

Sommige mense tel selfs gewig op in die begin.

Dit is ook nie ‘n uiters maerword dieet nie. Ek het met Weigh Less en Weight Watchers baie maerder geword as wat ek met Banting geword het. Die verskil is, met Banting kon ek nou al vir 4 jaar en 9 maande daarmee volhou, wat ek nie met die ander eetplanne kon doen nie. (Ek het 18 kg verloor.)

My gewig het nie soos ‘n glyplank die heeltyd afgekom nie. Inteendeel, ek was met Banting al maerder as wat ek tans is. Daar is maar altyd ‘n twee kilogram speling wat my gewig op- en afgaan. My gewig stabiliseer altyd op ‘n sekere plek. Verlede jaar, egter, het ek skielik ‘n paar kilogramme opgetel wat veroorsaak het dat my klere nie so gemaklik gesit het nie, ek dra nou al vir jare dieselfde nommer.

Ek vermoed dat die gewigstoename te wyte was aan ‘n reeks kortisooninspuitings wat ek gekry het. Dit was of ek pofferig was. Ewe skielik, uit die bloute, verloor ek daardie ekstra kilogramme amper oornag en nou het ek weer ‘n kortisooninspuiting gekry, en my gewig het dieselfde gebly. Vreemd.

Ek het nie die antwoorde nie. Al wat ek weet en waarvoor ek dankbaar is, is dat ek volgehou het met my eetplan soos altyd. Ek het niks verander nie en steur my nie daaraan as ek ‘n kilogram of wat optel nie, iewers verloor ek dit weer.

Vir my gaan dit nie net oor die gewig wat ek verloor het en af hou nie, dit gaan daaroor dat my cholesterol en bloedsuiker heeltemal onder beheer is, dat ek voorheen Metaboliese Sindroom gehad het, wat nou nie meer die geval is nie.

Vir my werk Banting, soos ek al hoeveel keer gesê het. Ek kan egter nie waarborg of dit vir jou ook sal werk nie, maar as jy totaal oorgewig is, vetsugtig, ‘morbidly obese’, aan suiker verslaaf is, alles wat jy sien in jou mond wil druk, aan kos verslaaf is, mag Banting dalk net vir jou ook die antwoord wees. En soos ek altyd sê, praat net eers met jou huisdokter hieroor as jy oorweeg om dit te volg.

Groete

Toortsie