Of ek nog ‘n boek gaan skryf?

‘n Baie algemene vraag toe mense hoor dat ek vir ‘n histerektomie sou gaan en dus vir ses weke op siekverlof sou wees, was of ek dan sommer nog ‘n kookboek gaan skryf. Dan het ek die simpel antwoord gegee dat ek vir minstens vier weke nie sal kan kook nie.

Want sien, om ‘n kookboek uit te gee, moet ‘n mens KOOK. Jy moet staan voor ‘n stoof. Resepte uitdink, uittoets, oor en oor maak totdat hy die toets slaag wat smaak, tekstuur en nog ‘n hele klomp ander dinge aanbetref. En daardie gekookte goed moet geëet word ook, mens kan nie net kook nie. 😊

Net as voorbeeld: Ek is nou al ‘n geruime tyd besig om ‘n spesifieke koek te ontwikkel. Ek het begin met ‘n resep wat ek van die internet afgehaal het. En toe begin die fynskawery. Elke keer verander ek ietsie. Nou, nadat ek hom al vyf keer gebak en opgeëet het, voel hy vir my reg. Hierdie resep gaan nou ‘n rukkie rus totdat ek hom op ‘n stadium weer aanpak. Op hierdie oomblik wil ek nou nie meer daardie soort koek in die oë kyk nie!

Nou ja, ek dink die vraagstellers was sommer net vriendelik en het dit goed bedoel. En ja, ek hét verlede jaar gesê dat ek in hierdie jaar weer ernstig wil werk aan ‘n boek drie. Terloops, ek het in daardie bloginskrywing ook genoem dat ek vanjaar graag die Camino wil gaan stap en ook in Capital Singers wil sing. Nie een van hierdie planne het gerealiseer tot nou toe nie, maar dit maak ook nie saak nie. 😊

Intussen is ek steeds besig om kos te maak op die vreemdste tye van die dag of nag, resepte te ontwikkel en neer te skryf en wie weet, dalk kom daar tog op ‘n stadium ‘n derde boek. Of nie. Net die tyd sal leer.

21:30 op ‘n Donderdagaand

Groete

Toortsie

Advertisements

Sy’s hier!

Hier’s die Toortsie weer! Sy is jonk, sy is vars, sy is nuut, sy is mooi! Sy sal haar plek volstaan langs haar ousus, Toortsie se Bantingboerekos.

Om die eerste kopié vas te hou, is onbeskryflik. Ek is skoon bewerig! Jy het so hard gewerk, moes soveel keer jouself moed inpraat, moes ander mense motiveer, dis die bladuitlêer, fotograaf, stilis, drukkers, en dan nog jyself ook met al jou bagasie! En dan, skielik, na moedverloor se vlakte en anderkant uit, hou jy hom in jou hande vas! Wat ‘n voorreg! Wat ‘n lekkerte! Wat ‘n genade!

Dit voel soos die eerste vrag graan wat die graanboer vir die seisoen lewer, of die eerste tenk melk wat ‘n boer lewer, dalk soos die eerste kliënt wat ‘n nuwe praktyk kry. Dit voel wonderlik, groter as myself!

Mag hierdie boek ook goed ontvang word. Ek het regtig my beste gegee. Ook die medewerkers, ook hulle het hulke beste gegee. Dankie aan elkeen van hulle. Dankie vir elke woord van aanmoediging, raad, emosionele ondersteuning. Dit was ‘n spanpoging.

Dankie aan my Here vir nóg ‘n seën uit Sy hand.

Groetnis

Toortsie

Net 15 m oor

Net 15 meter oor van ‘n 2 jaar ultra-marathon! Sug van verligting, sug van dankbaarheid. Tonekrul van lekkerkry.

Dis KLAAR! Of, so te sê klaar!

Op hierdie oomblik is Toortsie met ‘n spoed op pad drukkers toe. As alles goed gaan, word die proef môre gedruk. Nog, as alles goed gaan, kry ek dit Vrydag. Dan moet dit iewers goedgekeur word wat ek nie weet wanneer dit sal wees nie, en dan d r u k !

Maar ons is HIER. Klaar ge-edit. Behalwe van AL die kere wat dit reeds vooraf deurgegaan was, dink ek, het net ek dit seker 4 keer deurgegaan hierdie week, en DM ook omtrent soveel en dan nog Joh-Mari ook!

Joh-Mari het wonders verrig die afgelope 10 dae. Saam met dit, die hele span: Lizelle du Toit, Lize Venter, DM Jansen van Vuuren, ekke, die Toortsie, my man wat alles moes verduur en soms moed inpraat, my kinders, my vriendinne, facebookvriende, ondersteuners wat aangemoedig het, mense wat ek selfs nie eers ken nie wat boodskappe van aanmoediging gestuur het.

Ons is hier. Sug.

 En al hierdie dinge sou nooit gebeur het as ek nie begin blog het nie!

Alle eer aan my Here!

Die voorafbestellings is nou beskikbaar. Die boeke se rakprys sal R195 wees, maar tot 29 Oktober 2017 sal dit by Bidorbuy beskikbaar wees teen R160. Onthou net dat die boeke nog in druk is, so dit sal ‘n tydjie neem voor u dit ontvang.

Hier’s die Toortsie Weer Pre Launch OfferKliek Hier

Toortsie Combo (Hier’s die Toortsie weer en Toortsie se Bantingboerekos) Pre Launch OfferKliek Hier.

Mooi loop

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Finesse: Toe haal ons die maskers af

Toortsie by Pinterest

Plaasakkomodasie by Riversdal, Wes-Kaap

Hierdie week het daar soveel goed in LCHF-wêreld gebeur

Hierdie week het daar soveel goed in die LCHF-wêreld gebeur, of moet ek eerder sê, my LCHF wêreld.

Ek hét mos nou al vertel dat ek my tweede ‘Bantingversary‘ gehad het, ek het verjaar, ek volg die Bantingleefstyl vir twee volle jare!

Capture‘n Ander baie groot opwinding is dat daar ‘n splinternuwe E-Tydskrif vir LCHF uitgegee is! Toe ek gisteroggend wakker word, het dit in my inboksie gelê en ek het nog vir ‘n hele uur heerlik daarin rondgeblaai. Dis vol van voedingsfeite wat ons net móét lees en hoor, oor diabetes, oor metaboliese sindroom en nog vele meer. Dis kleurvol en mooi. Kliek op hierdie skakel om die tydskrif af te laai en op hierdie een om in te skryf daarvoor en sodoende te verseker dat jy dit elke maand kry.  Persoonlik voel ek dat jy op hierdie tydskrif behoort in te skryf, selfs al doen jy nie LCHF nie, omdat dit soveel belangrike inligting bevat.

Nóg opwindende nuus is dat die Engelse Toortsie, Toortsie’s Banting Bash!, by die drukkers is en die proef goedgekeur is, so hulle gaan nou begin DRUK! Nou is dit net daggies voor hulle by my is! Ek is so opgewonde! Net om te wys dat ek nie jok nie, hier is ‘n foto waar die REGTE BOEK in ‘n hand vasgehou word! toortsie's Banting Bash Proef Mensdom! Ek het gedink dis mos nou maar net ‘n vertaling, die opwinding kan nie weer so groot wees nie, maar julle sal nie kan raai hóé my tone krul nie! Ek is net so verskriklik opgewonde!

Nóg opwinding is dat die bestellings so saggies begin inkom. Daar is mos ‘n Pre-Launch Offer by BIDORBUY waar die boek, wat teen R209 verkoop gaan word, bestel kan word teen R180. Dis ‘n eenmalige aanbod en geld tot 2 Augustus 2016. So, as julle vriende het wat graag die Engelse weergawe van die boek sal wil hê, is dit nou jou, en hulle kans om dit vir ietwat goedkoper te kan kry. Kliek net op hierdie skakel. En natuurlik is die Afrikaanse Toortsie se Bantingboerekos steeds beskikbaar deur op hierdie skakel te kliek.

Jammer as ek julle hierdie week soveel gepla het met LCHF. Dit was maar net ‘n opwindende week! Mooi loop!

Toortsie

Ai tog! Hierdie moes eers môre verskyn! Sorrie!

Toortsie se Bantingboerekos faceboekblad

Toortsie se Faceboekblad

Toortsie by Finesse: Malgas se pont