Die nommer twee opsie

Sjoe, ek moet mos nou kies tussen meer as een opsie vir die voorblad van my nuwe boek. Dit voel of ek wil verdrink! Want die een wat die meerderheid kies, roep my nie. Kan jy glo. Soos soveel maal in my lewe foeter my lyf in ‘n ander rigting! Dit maak my mal! Want hoekom werk dit altyd so?

Hierdie is die logiese opsie. Die een wat 90% kies. Dit is pragtig. Perfek. Mooi. Sag. Besonders. Dit kan dalk werk. Alles is eintlik reg aan hom.

Maar die ander een laat my tone krul. Onthou hulle die fliek, Pretville? Google dit ‘n bietjie dan kyk julle die foto’s. En veral die kleur.

Hierdie prentjie kort nog ‘n bietjie aandag. ‘n Bietjie rondskuif van woorde. Maar hy sê vir my iets. Ek het vandag die verkskillende foto’s laat druk. A5 grootte soos wat die boek gaan wees. Die donker turkoois en die rooi en die wit staan uit. Skoon, helder lyne. Sterk kleure. Jy kan dit nie miskyk nie. Hy sê: “Hey! Jy! Moenie verby loop nie! Tel my op! Vat my! Asb!”

En dit is mos die werk van die voorblad. Die enigste werk, dink ek. Om die koper te roep. Om sy aandag te trek. Dit moenie sommer net nog ‘n boek tussen ‘n klomp ander wees nie. Dit moet op ‘n 2 x 2 cm piekiekiekie uitstaan tussen al die ander op ‘n groot rekenaarskerm. Dit moet die aandag trek.

Daarom dink ek, gaan ek stroomop hierdie een kies, maar soos ek reeds gesê het, kort hy nog ‘n bietjie liefde en aandag.

Iets tussen hierdie laaste twee, dink ek.

Ek waardeer so almal se insette, want dit help my, selfs al kies ek anders.

Toortsie

Wat is verkeerd met nou?

Vanmiddag tydens etenstyd dink ek daaraan dat dit binnekort vier jaar is sedert ek besluit het om die Bantingleefstyl te volg. Vier jaar wat soos ‘n gedagte omgegaan het. Vier haar wat sekerlik nie altyd maklik was nie, maar beslis nie onmoontlik of onuitvoerbaar was nie.

Onwillekeurig dink ek toe aan die doemprofete van daardie tyd en wat van hulle geword het. Met soveel oortuiging het hulle die leefwyse verdoem, het hulle ‘navorsing’ geskree, dat dit ‘nie volhoubaar is nie’, dat ons lewer en niere gaan oppak, ‘dat ek sekerlik nie ernstig is nie’, dat ek dom is, dat ‘n mens ‘moet oefen’ en ‘nie moet oefen’ as jy Bant nie. Die een was slimmer as die ander en het mekaar weerspreek, die ergste was ‘n dieetkundige wat my regtig ernstig aangespreek het, en haarself weerspreek het in die twee sinne wat sy gesê het. Ek het haar net gevra of sy Tim Noakes se boek gelees het.

Maar dit nou daar gelaat. Waaroor ek ook gedink het, was dat ek op ‘n Saterdagaand besluit het om dit die volgende dag te begin. ‘n Besluit wat oornag geneem is.

En ek het begin met letterlik niks in my huis nie. Al wat ek gehad het, was twee ouerige eiers, ‘n stukkie botter en swak gehalte wors wat iemand in my strandhuis se vrieskas vergeet het.

Ek noem dit om ‘n baie defnitiewe rede: Jy hoef nie winkel toe te gaan en duisende rande se vreemde items te gaan koop nie. Kyk wat jy in jou koskaste het, daar is dalk baie meer as wat jy dink!

Die ander rede is: Begin NOU. Vandag. Selfs al het jy al vanoggend stysel geëet, dit maak nie saak nie. As jy wil Bant, doen dit nou. Die grootste tree wat jy moet neem, is die eerste tree. Neem dit. En die eerste tree sal jou die moed gee vir tree nommer twee.

Steeds bly my raad: Ken jou dokter hierin en onthou, jy doen dit op eie risiko. Ek dwing jou nie om dit te doen nie. Ek belowe ook nie resultate nie.

Maar, as jy dit doen, doen dit voluit. Dit het vir my gewerk, ek hoop dat jy ook suksesvol is daarmee.

Groete

Toortsie

Tyd vir nuwe begin

Orals lees ek dit raak: ‘Ek gaan weer begin’, ‘Ek klim weer op die wa’.

Dis die tyd van die jaar wat mense oor begin, die tyd wanneer jy hard werk aan jou nuwejaarsvoorneme, wanneer jy weer probeer. Dit geld vir baie dinge: ‘n Nuwe stokperdjie, jou verhouding met jou geliefde, jou werk, jou geloof, jou gewig, wat ookal. Dis die tyd vir weer begin.

Veral ons wat maar met ons gewig sukkel, is ook lief om die nuwe jaar weer met nuwe moed aan te pak. Ons wil weer begin. Ons gaan weer probeer.

Banting werk vir my. Dit werk al 3 en ‘n halwe jaar vir my. Dis uitvoervaar. Dis leefbaar. Dis volhoubaar. Dis lekker. Dis maklik. Dis gesond. Dis goed. Dis selfs volhoubaar oor vakansies.

Ongelukkig kan ek nie waarborg dat dit vir jou ook sal werk nie en ek beveel altyd aan dat jy dit in samewerking met jou dokter moet doen. Ek wil jou graag help, as jy wil.

Before:

   After:  After

By Toortsie eet ons nét lekker kos, want Toortsie glo aan lekker eet.

Probeer is die beste geweer! 😁

Groetnis

Toortsie

My vermoede is reg

My vermoede is reg. Hier is ‘n dringendheidjie in die lug, want dit is mos nou weer daai tyd van die jaar.

Daai tyd is wanneer die vakansietyd verby is en die werklikheid weer inskop. Wanneer braaivleis, rugby, sonneskyn en Chevrolet sy tol geëis het. Wanneer krismis en nuwe jaar en alles wat daarmee saamgaan, verby is en ons weer ‘n slag in die spieël kyk. Of, eintlik hoef ons nie eers in die spieël te kyk nie, ons klere wys dit vir ons. Klere wat mooi en netjies gesit het, bult en trek en span nou op allerhande plekke.

Ons is moedeloos met onsself. Ons het geen beheer oor wat ons eet nie en wil alles wat voorkom, in ons monde druk. Ons voel ongemaklik. Ons voel sleg. Aaklig. Wil nie ander mense in die oë kyk nie.

Nee! Só kan dit nie aangaan nie! Ons moet drasties iets doen!

😱

Toortsie het op Facebook gevra hoekom mense van haar resepteboeke sal wil hê. My vermoede was reg oor hoekom, ek was mos vir lank in daardie selfde bootjie. Dit was nou vóór Banting.

Kyk wat sê die mense:

Een skryf dat sy wens Toortsie wil nou terugkom van oorsee af sodat sy die boeke kan koop voordat sy rol en nie meer loop nie.

Iemand anders skryf: My man is ‘n diabeet en ek het jare lank met spastiese derm simptome gesukkel. Banting werk uitstekend vir ons albei! En ek is mal oor Toortsie se blog!

En hierdie een: Omdat ek myself vanoggend in die spieël gesien het! Al die ander diëte het nie lank gehou nie! So baie gehoor van jou Banting boek dat ek dink dis nou n goeie begin vir die nuwejaar!

Kyk hier: Omdat ek van die 20kg wat ek in 2017 wou verloor, nog net 30 oor het…en omdat my cholesterol hemelhoog is en pre-diabetes nie juis help nie…

Toortsie kan niks belowe nie, maar Toortsie wil jou graag help. Ry jy ook in daardie bootjie?

<<
s dalk net die moeite werd om te probeer. Wat kan jy verloor?

Kyk by Bidorbuy.

Groete

Toortsie

Terloops, Toortsie Bant reeds 3 en 'n halwe jaar en behou haar gewig. Geen resultate kan egter gewaarborg word nie, dit verskil van persoon tot persoon. Raadpleeg ook asseblief jou dokter voor jy die drastiese stap oorweeg.

‘n Goeie vraag

Die fotograaf se foto’s van die boekbekendstelling wat al in Desember gehou was, het gekom. Sy het dit blykbaar al lankal vir my gestuur, maar iewers het dit verlore geraak in die wolk. Sies tog, sy kon seker nie verstaan dat ek só ondankbaar is nie en die foto’s ís so mooi! Geen dankie van enige aard nie!

Ek het die foto’s op my faceboekblad geplaas, waarop iemand, dalk ‘n blogmaat vir al wat jy weet, gevra het hoekom ék dan enigsins op ‘n dieet is! Dankie! Wat ‘n kompliment! 🙂 Ek het haar geantwoord dat sy die produk sien van amper twee jaar se Banting, dat ek ook vetsugtig was en reeds sowat 14 kg verloor het en steeds 5 kg het om te verloor. Lengte steek baie weg.

Intussen bly die vraag in my kop draai. Hoekom steeds aanhou met Banting?

Omdat ek nog gewig het om te verloor. Op hierdie stadium neem dit baie lank maar ek gee regtig nie om nie, die wipplankryery van die afgelope 30 jaar is ten minste gestuit. Wat ‘n verligting!

Die belangrikste antwoord op die vraag, is dat dit regtig ‘n leefstyl geword het. In die begin het ek vir mense gesê dis nie ‘n dieet nie, maar ‘n leefstyl, terwyl dit eintlik maar ‘n dieet was. Nou is dit ‘n leefstyl. Ons het aangepas. Dis die kos wat ek maak. As ek ‘n resep sien, is die eerste besluit of dit Banting is of nie, of ek dit kan aanpas en of ek dit heeltemal moet los.

Die grootste rede hoekom ek sal aanhou met hierdie leefstyl is dat dit maklik is en lekker. Ons eet lekker. Ryk en lekker. Ons geniet ons kos voluit. Volroom. Nie afgewaterde kos waarvan al die voedingswaarde verwyder is nie, wat lyk soos kos maar nie kos is nie. Ons geniet die kos soos wat dit bedoel is om te eet. Ja, ek moes ‘n prys vir my vetsugtigheid betaal, ek sou graag álle kosse wou eet, maar die lewe het my gewys dat dit vir my, Toortsie, beter is om maar sekere kosse te vermy.

Ek hoop ek sal lewenslank hiermee volhou en kan volhou, selfs wanneer ek al in die ouetehuis is, want hierdie leefstyl werk vir my. Ek is gesond, vol energie en is stadig maar seker om my kroniese medisyne wat ek moes neem as gevolg van ‘n foutiewe leefstyl, te los. Wat meer kan jy vra? Banting is bobaas!

Fotograaf: Photography by Lize

image

image

image

image

image

image

image

image

image

image

image

image

Groetnis,
Toortsie

Toortsie se Bantingboerekos faceboekblad.

Bestel Toortsie se Bantingboerekos HIER.