Gawie, Gideon, en andere

Gawie is ‘n vriendelike man, en gaaf, soos sy naam aandui. Mense het baie maklik misbruik gemaak van hom, juis omdat hy so ‘n goeie mens is. Die gesegde, alte goed is buurmansgek, kon op Gawie van toepassing wees. Keer op keer moes hy alleen die gelag betaal, terwyl hy baie keer nie eers die skuldige was nie. Een dag het Gawie gesê, genoeg is genoeg. Tot hiertoe en nie verder nie. Hy het besluit om geen gras onder sy voete te laat groei nie en sommer dadelik dit duidelik gestel dat hy nou nie meer die een gaan wees wat almal misbruik nie.

Gideon was egter ‘n ander kalant, met ‘n kort humeur. Hy het gal afgegaan oor enige ding. Hy was nie ‘n ou wat sommer gras onder sy voete laat groei nie, en dinge moes sommer gou gebeur. Joe! As iemand ‘n fout begaan het, sou Gideon behoorlik met sy gal werk. Eintlik moet jy wakker wees in sy geselskap, hy mag hom dalk vir jou vererg en jou sommer van die gras af maak!

Geraldine was weer ‘n ander een, ‘n manipuleerder van formaat. Op die oog af lyk sy goed en gaaf, vriendelik, iemand wat nie ‘n vlieg kwaad sal aandoen nie, maar wees versigtig, voor jy jou kom kry, het sy ‘n gat in jou kop gepraat en doen jy dinge wat jy glad nie van plan was om te doen nie, dinge wat jy onder normale omstandighede nooit sou doen nie. Jy besef daar is ‘n slang in die gras, maar jy kan net nie jou vinger daarop lê nie. Sy dink ook dat geld wat stom is, regmaak wat krom is en sou jy enigsins mor, sal sy jou met ‘n geskenk stilmaak. ‘n Mens mag mos nie ‘n gegewe perd in die bek kyk nie, of hoe? Vir my is dit egter Grieks as iemand so optree, ek verstaan dit glad nie.

Intussen is daar soveel mense wat van genadebrood lewe, wat nie noodwendig keuses het nie en soms maar, uit nood, goed van swak gehalte koop, omdat hulle nie ander kan bekostig nie. Ongelukkig is goedkoop koop mos duur koop, en moet hulle dan die items so gou weer vervang.

Maar wag, alle grappies op ‘n stokkie, hierdie deurmekaar gebabbel was maar net nog ‘n poging om die Afrikaanse idiome neer te pen. Onthou net, mense wat in glashuise woon, mag nie klippe gooi nie. Van mense in glashuise, as kind was die grappie altyd dat People who lives in glass houses, should not undress themselves. Dis nogal iets wat ek moet onthou! 🙂

G-idiome met die hulp van Mieliestronk.

Afrikaans is lekker! Afrikaans is mooi! Kom ons koester ons taal. Kom ons praat ons taal met trots. Ons hartstaal. #Afrikaans

Toortsie

Alle persone genoem is fiktief en sou u die ooreenkoms met iemand raaksien, is dit bloot toevallig.

Advertisements

Nog eende en al daardie derglike dinge

Terwyl ek nou oor eende praat en probeer om nie die dam onder die eend uit te ruk nie, voel ek wel om so te doen. ‘n Mens kan praat en praat en praat, maar vir party ouens is jou gepratery net soos water op ‘n eend se rug, maar na die tyd sal hulle hulle skouers in onskuld ophaal en die skuld op iemand anders plaas. Plaas dat hulle besin eer hulle begin, maar luister sal hulle nie.

Dis soos om jou geboortereg vir ‘n pot lensiesop te verkoop, sinneloos, as ek my opinie mag gee, maar soms het jy eenvoudig nie ‘n keuse nie en moet jy eerder tevrede wees met ‘n halwe eier as ‘n hele dop. Dit is natuurlik so dat erfgeld swerfgeld is, en as jy nou nog die elmboog lig so saam met die swerwery, mag dit gou wees dat Jy net mooi met niks sit nie en begin terughunker na die vleispotte van Egipte, maar soos almal maar baie goed weet, is dit dan heeltemal te laat.

Die probleem is, skoonheid vergaan, maar deug bly staan en al is jy nou ‘n lelike eentjie, maar jou verstand gebruik, kan jy baie ver in die lewe kom as jy wil, want sukses het niks met skoonheid te doen nie. Natuurlik kan die mooies onder ons ook suksesvol wees, veral as hulle hulle verstand gebruik.

Maar so van die os op die jas, in hierdie eeu van korrupsie en moeilike ekonomie, moet ‘n mens wakker wees en jou talente behoorlik benut, mooi werk met jou geld, en soms selfs die eierdans uitvoer, en as jy jou kant gebring het, goeie besluite geneem het, na goeie raad geluister het en as die natuur en die genade met jou was, kan jy dalk tog heelhuids anderkant uitkom.

Terloops, as jy dalk net wonder hoekom die Toortsie nou weer sulke nonsens babbel wat glad nie sin maak nie, dit was deel van haar poging om idiome met ‘n E te gebruik. Genadiglik was Mieliestronk byderhand om haar te help. Persoonlik dink ek dit sal tog dalk maar goed wees as Toortsie wel besluit om haar kop te laat lees.

Groete

Toortsie

Skoene wat pas en groot voete

Hester het ons gedagtes behoorlik op hol met haar idiome. Ek wou al oor nog geskryf het, en het gedink ek is nou oordadig.

Ons het op skool geleer dat, as die skoen jou pas, trek hom aan. Later het ek gehoor, as die skoen jou pas, trek die riempie vas. Ek hou baie meer van hierdie een!

Deesdae moet ‘n mens so versigtig wees met wat jy sê, jy kan net dalkies op iemand se tone trap en dan is die gort gaar. Die probleem is juis dat pap wat te dik aangemaak is, maklik aanbrand!

Mense is so sensitief deesdae en neem jou vreeslik kwalik as jy dalk ‘n sensitiewe snaar aanraak. Soms wonder ek of dit nie pleinweg onvolwassenheid is wat dit aanhelp nie. Ai, en hier trap ek al weer op tone, maar sommige voete is groot en party tone soek om getrap te word.

So, my vriend, as die skoen jou pas, trek die riempie vas. Kyk na daardie sensitiwiteit wat jou so diep raak, oordink dit en werk daaraan. Bou ‘n brug en kom daaroor. Wanneer daardie seer toon gesond is, kom jy dalk as ‘n sterker en beter mens anderkant uit. Komaan, trek jou sokkies op en werk aan daardie goedjies wat vir jou pla. Werk aan jouself en jou volwassenheid.

Pas hierdie skoen jou dalk? Dan is Ally Shoes in Hermanus net die plek vir jou! (Kliek op die foto om by Ally Shoes uit te kom)

 

Groetnis

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Finesse: Tot seën van ander

Toortsie by Pinterest

Plaasakkomodasie by Riversdal, Wes-Kaap

“Om die inskrywings van verskillende bloggers in Lê-Jou-Eier te geniet of om self ‘n eier te kom lê wat ons kan uitbroei en grootmaak, kliek op die volgende InLinkz skakel:

 

Vir die reëls van hierdie eier-boerdery, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke.

Nuwe onderwerpe word aangekondig elke Donderdag om 12:00 en sluit outomaties na een week.”