Wat my help met covid – prakties

Ek is jammer dat ek julle so verpes met Covid en as julle nie wil lees nie neem ek julle nie kwalik nie. Die doel van hierdie skrywe is om dalk vir iemand anders te help wat deur dieselfde simptome as ek gaan.

Eerstens wil ek sê dat ek besig is met Geestelike Oorlogvoering in hierdie huis in ‘n erge graad. As Gesalfde van die Here, as ouderling in Sy Koninkryk, wat ek oor jare verkry het in diens van Hom, nee,nie ouderling in my kerk nie, ouderling in Sy Koninkryk, het ek die outoriteit om dit te doen. Hy het dit vir my gegee. Hy sê in Sy woord wat ek oopsluit sal oopgesluit bly, en wat ek toesluit sal toegesluit bly. Hy sê as ek die satan weerstaan, móét hy luister. Met Christelike gesag as profeet kan ek met oortuiging sê dat hierdie covidgemors van die duiwel is. Daarom beveg ek hom nie net liggaamlik nie, maar geestelik ook. Ek vervloek hom in baie duidelike terme, terme wat jy nie uit my Christenmond sal verwag nie, maar dis ongelukkig die enigste taal wat hy verstaan. En ek loof en dank God dat Hy my gekies het om deur hierdie siekte, Sy mag, Sy krag, Sy almal te demonstreer. Ek loof Hom vir mense vanoor die hele wêreld wat vir my bid en waarvan ek die krag sonder twyfel voel. So, wat help vir my? My God.

Maar kom ons raak prakties.

Dit is mos so dat hier duisende video’s die rondte doen. Kyk maar na hulle selfs al irriteer dit jou. Berei jouself voor.

  1. Beweeg. Dit was dr Annelie van Struisbaai se raad, oor en oor. Beweeg. As jou liggaam jou toelaat, beweeg. Dit stoot die suurstofvlakke beslis op. Dit bring verligting. Dankie dr Annelie vir jou liefdevolle sorg toe die krisis op die hoogste was, terwyl jy my eintlik van geen kant af ken nie. Jy is kosbaar.
  2. Stoom jouself met kookwater en ‘n handdoek oor jou kop. Sommer as jy vermoed jy dit mag hê. Keer daai kiem betyds.
  3. Nebuliseer. As ek in die oggend opstaan en alles in my liggaam is ontsteld en my hart klop en ek is uitasem, bring dit kalmte.
  4. Haal diep asem. So diep soos jy kan, want dit is seer. En doen longoefeninge. Dankie VirgoC vir jou onuitputlike bron van kennis en liefdevolle raad. Jy het nie ‘n idee hoe ek op jou raad gesteun het nie, veral in daardie opboutyd.
  5. Longoefeninge – Kyk daai videos. Blaas met Seegogga se bamboesstrooitjie in ‘n beker water. Uit, uit uit, en waag dit dan om diep, diep, diep asem te haal tot die hoes jou oorval, hoes, hoes, hoes, vee die sweet af en blaas weer. En Virgo het gesê ek mag haar sulke tye maar slegsê, maar ek belowe, ek het nog nie. Om nie jou longkapasiteit te verloor nie. Dankie, dr Anel Keuck Rademeyer, vir jou ekstra bietjie aanmoediging hierin.
  6. My man se liefdevolle sorg. Hy maak virmy kos. Hy vryf my in met Vics. Hy slaan my opp die rug as die slym vassit en ek nie meer kan hoes nie. Hy gee my fisio op my rug, kap, kap, kap, kap sodat dit kan loskom. Dankie dr de Kock van Struisbaai vir hierdie raad. Dokter het dit twee keer gesê en ek het nie gereageer nie, maar ek het gehoor. Dit verrig wondere.
  7. Vloek daai virus. Skel hom. Sê hom sleg. Wys hom hy kry jou nie onder nie. Skryf daaroor. Bid. Soek hulp by jou vriende. Doen dit op die manier wat vir jou werk, wat vir jou moed gee. Ek is ‘n uitsaaier, so die hele wêreld het onmiddellik geweet. Jy doen dit dalk anders, dis ook reg. Op jou manier, maar beveg hom met alles in jou. Moenie vir hom outoriteit gee nie.
  8. Stort. en nog ‘n keer en nog ‘n keer. Hoeveel keer op ‘n dag. Stort, trek vir jou droog aan. Julle wil nie weet by outfit nommer hoeveel ek al vir vandag trek nie. Jy is net skoon en droog aangetrek, dan is die nuwe stortvloed sweet weer daar.
  9. Lê op jou maag. As al die ander misluk, dit werk. En ja, ek kan nie meer regtig op my maag lê nie, ek het ‘n nekbesering en swak rug. Ek lê sommer so dwars oor die bed met my voete wat eenkan afhang en my kop aan die ander kant. Dit bring geweldige kalmte in my longe. Dan rus ek behoorlik.
  10. Rus. Saam met die beweeg, rus. Slaap as jou liggaam daarvoor vra.
  11. Sonlig. Die son kom nou vir die eerste keer uit, so ek kan nou nog nie getuig dat ek dit gedoen het nie, maar, sonstoep, hier kom ek.
  12. Vriende wat vir my goedjies van die winkel af saambring en dit dan voor my hekkie neersit, nes hulle met die melaatses in die ou dae gedoen het. Dankie Christal. Dankie liefste Seegogga, dis nie die eerste keer wat jy my help nie. Jy is vir my kosbaar.
  13. Die liefde en ondersteuning van elke blogmaat, ek kan nie julle almal nou hier noem nie, elke faceboekvriend, whattsappvriend. Julle aanmoediging doen presies wat dit sê: dit moedig aan.
  14. Staan op jou knieë met jou kop so tussen jou arms terwyl jy hoes. Dankie Perdebytjie, jou video het my gered. Die slym sit soms vas daar waar dit nie moet nie, dit moet uit, maar jy kry dit nie uit nie. Jy moet hoes maar het nie krag nie. Soek daai video, ek kan dit ongelukkig nie hier post nie. Die prentjie is van ‘n man wat so op sy knieë staan. As jy dit nodig het en nie kan kry nie, inboks my op my Faceboek of kry op ‘n manier by my jou Whattsappnommer dat ek dit kan aanstuur.
  15. Ek neem my medikasie soos die dokter sê. Vitamienes, wat ook alles. Ek neem my suurstof gereeld en stuur die lesing deur aan die dokter, ‘n paar keer op ‘n dag. Kortisoon. Dankie dr Erna Visser van Bredaadorp. Dankie vir jou omgee jou liefde jou bel om te hoor hoe dit gaan.

Julle, my vermislagie is mos maar baie min. Covid het dit hou heeltemal afgeskuur. Ek is my ou, reguit self. Vreesloos. Want die bietjie vrees wat ek nog oorgehad het, is nou ook afgeskuur, ek was darem te naby aan die dal van doodskaduwee. Bly veilig, pas jouself mooi op. Neem die vaksien wanneer dit beskikbaar raak. Doen wat die slim mense sê om te doen. Beveg die duiwel met alles in jou. Maar die heel belangrikste, maak seker waar jy staan met God. Die Woord sê dat ons nie hom moet vrees wat ons kan doodmaak nie, maar Hom wat oor ons gees moet besluit. Dis nie bangmaak waarmee ek besig is nie. Maak reg met God terwyl jy nog die kans het. Daardie kans kan vinniger van jou af weggeneem word as wat jy dink en as jy jou keuse gemaak het, is die wonder dat jy regtig niks hoef te vrees nie, ook nie ‘n simpel virus wat dink dat hy die wêreld in sy mag het nie.

Toortsie

Covid is ‘n bliksem

Covid is ‘n bliksem ‘n gemors die vieslikste vieslik wat daar is ‘n gesant van die duiwel ‘n dief in die nag wat kyk wat hy kan inpalm ‘n brullende leeu wat kyk wat hy kan verslind. Covid is al die vieslikste woorde wat ek nie eers ken nie. ‘n Kind van die donker.

Daarom bekruip hy jou in die nag. Laat hy jou wakker lê. Maak jou lyfseer dat jy later nie meer weet hoe om te lê nie. Laat hy jou aanmekaar opstaan om te gaan piepie net sodat jy weer aan die hoes raak as jy in die nagkoue onder die warm kombers uitklim. Maak dat jy bang is om te gaan piepie, want dan kom die hoes weer. Laat jou so sweet dat jy elke twee ure droog moet aantrek, ‘n nuwe handdoek onder jou sit. Laat jou die een oomblik so koud kry net om die volgende oomblik warm te wees. Laat jou wakker stik van jou eie slym, verward terwyl jy nie weet waar jy is nie, want jy het vir die eerste keer die nag diep geslaap. Laat jou stikkend in die huis rondhardloop, moeg en uitgeput na liggaam omdat jy net nie meer kan hoes nie, maar aanhou hoes, die nebuliseerder gryp, kookwater maak en jou te begin stoom. Jou bloedsuurstof oor en oor toets, want dit is op die ‘veilige’ minimum, die geringste uitputting laat dit sak na 88 dan haal jydiep asem, konsentreer, forseer jou om te ontspansodat die metertjie weer begin lig en lig. Covid hou daarvan om jou te ontstel. Bang te maak. Covid is ‘n gemors. Selfs op sy heel beste is hy die grootste gemors denkbaar en is daar vir hom geen goeie woord te sê nie. Covid laat jou huil. Hy laat jou vriende by jou voordeur wegwys en sê hulle kan nie inkom nie. Hy steel. Hy vat wat hy wil hê wanneer hy wil hoeveel hy wil. Hy het geen skaamte, geen simpatie, geen empatie. Hy dink net aan homself. Me, myself, I.

Maar so in die stikkende, benoude hardloop in die huis kom die woorde in my op: Nogtans sal ek in my Here jubel. Selfs al dink hy hy kan my steel, het ek vir hom ‘n surprise: Ek is klaar gemerk. Hy kan my liggaam aftakel. Hy kan my selfs doodmaak as hy so wou, wat ek sterk betwyfel, maar selfs dán is dit ‘n VERLOOR vir hom. Dat alles wat hy my probeer aandoen, my net nader bring aan my Here. Ek is ‘n gesalfde kind van God en niemand kan my uit Sy hand ruk nie. Die oorlog is fel, maar ek veg dit nie alleen nie. My God is saam met my in hierdie geveg. En my man. En ‘n paar wonderlike dokters. En vriende wat vir my bid en bemoedig.

Nogtans sal ek juig (Jannie du Toit) Getoonset deur Chirsta Steyn

Selfs al sou die vye ophou bloei

Selfs al sou die druiwe skaars nog groei

Ook al sou die oes maar weer misluk

storms als verwoes of droogte druk

Selfs al sou my skape ophou lam

nes die water opdroog in die dam

Selfs al word die beeste in my kraal

uitgeteer deur honger weiveld kaal

Dan sal my hart bly jubel in die Here

Dan bly ek juig oor die God van my heil

Hy gee my weer krag om op te staan

nes ‘n ribbok rats my weg te baan

bo-oor die hoogste rots laat die Here my veilig gaan

Wat ookal gebeur as onheil kom

EK VERTROU OP HOM.

Selfs al sou jou vrugte ophou bloei

Selfs al sou jou wingerd skaars nog groei

Ook al dreig die storms rondom jou

Wees verseker Hy bly getrou.

So Covid, die stryd is fel, regtig, maar die Een aan my sy is groter as jy.

(Hierdie is my ervaring van Covid, elke persoon ervaar dit anders, baie ervaar dit nog baie erger as wat ek dit ervaar het. Ek loof die Here dat ek tot nou toe nog die hospitaal gespaar bly en die betervoeltye al hoe meer raak.)

Toortsie

Ek vra verskoning dat ek julle nou aanmekaar met hierdie gemors belas. Ek skryf dit ook om julle te waarsku: Hierdie ding is nié ‘n grap nie. Asseblief, ons moet versigtiger as versigtig wees. Ons moet ons ekstra weerhou daarvan om by mense te kuier. Ons maskers dra. Doen maar wat die president vra, selfs al hou jy nie van hom of van wat hy wil hê nie.

Die willepes

Ewe arrogant het ek gedink: Die willepes gaan my nie vang nie. O nee! I’m not going to take part. Ek drink my Vitamien C, Selenium en sink, gebruik echinaforce, hou my redelik weg van mense af. My kop is reg, hy moenie dink hy gaan vir my inhaal nie.

So kom die Desembervakansie en die hele land stroom see toe, soos die gebruik mos maar is. Ek moet sê, ek dink hulle was minder vanjaar. Die tweede vlaag van die virus kom ook aangewaai. My doktersvriendin sê hoe hard hulle werk, elke tweede persoon het covid. Ek gaan NIE sy naam met ‘n hoofletter skryf nie, hy is dit nie werd nie.

Ons gaan see toe, maar behou die afstand. Ons en ons kinders kuier maar by die huis. Ons eet nie uit nie. Gaan stap daar ver op Struisbaai se plaat waar daar nie ander mense is nie. Stap van Waenhuiskrans af Struisbaai toe, die enigste drie mense op die strand. Saam met die kleinkinders plas ons eenkant in die poeletjies, ver van enige ander mense af. Ons gaan kuier ook nie by ander nie, het wel by een mens gaan kuier vroeg in die vakansie en het buite gesit. En verlede week het ek ‘n boek by iemand gaan haal.

Die hele tyd bou daar vog in my bors op. Ek het my longe drie jaar gelede seergemaak. Dit gebeur van tyt tot tyd, dan moet ek ‘n slag by die dokter uitkom as dit tè erg raak. Verlede Maandag besef ek, ek is siek. Ek onthou an ‘n houertjie antibiotika by die huis, maar voel intussen weer beter, tot kouekoors my tref teen Vrydag. Saterdagoggend besef ek: Ek is regtig siek. Die dokter sê: Longontsteking. Covid.

Ja, ek was dalk tè arrogant. ‘n Vriendin hèt gesê dat covid jou aanval daar waar jou swakplek is. Met longe wat reeds aan die vog opbou was, was die hekke oop …

Ek beveg hom met alles in my. Dink ek het dalk al die draaipunt bereik. Is veilig by my huis, genadiglik mis ek die hospitaal nog rakelings. Ek het wonderlike mense wat na my kyk en my Here is goed vir my.

Al wat ek vir julle wil sê: Neem hom ernstig op asseblief. Dit is geen grap nie.

Toortsie

Willepesbenaming by my skoonsus geleen.

Soms mag jy nie praat nie

Dit is vir my hartseer dat die wêreld só verander het en dat ons dit toegelaat het. Ja, óns het dit toegelaat. Want elke keer as ek en jy iets doen wat teen die wet is, help ons wetteloosheid aan. Selfs die eenvoudige ding soos om op 6 Januarie steeds massiewe klappers te skiet in jou erf, iets wat totaal teen die wet is. Ai tog, julle gaan my dalk nou brandmerk as ‘n spoilsport, of watter ander lelike woord jy ookal wil noem, maar dan is dit reg. Ek is nie meer vandag se kind nie en mag sekerlik al my eie opinie oor dinge hê.

Jy weet, op oujaarsaand byt ek maar op my tande en gun die diertjies hulle plesiertjies, hou ek maar uit en hou my honde rustig terwyl hulle oorlog maak met groot kaliber klappers rondom my erf. Die aand van 1 Januarie gee ek so ‘n ligte fronsie, maar sê niks. 2 Januarie begin ek al liggies in myself grom. 3 Januarie knor ek al effens hier in my huis… Op 5 Januarie maak ek oorlog. Dan is snaaks regtig nie meer snaaks nie.

Sommer net van die wêreld wat verander het en ons dit nie mag waag om iets daaroor te sê nie. Gaan lees ‘n bietjie wat vertel Woordnoot oor dwelmsmokkelary daar in die buurt waar sy werk. Haar storie laat my dink aan ‘n boer wat jare gelede een aand ‘n draaitjie op sy plaas gery het en op ‘n klomp perlemoensmokkelaars afkom wat besig is om perlemoen oor te laai van een voertig na ‘n ander, daar op sy plaas. Al wat hy kon doen, was om sy oë toe te knyp. Want as hy sou grom …

Ek kom nie eintlik meer op die swemstrand nie, ek swem al jare nie meer nie, verkies eerder om lang ente langs die see te stap. Iemand vertel my dat die swemkleertjies al hoe minder raak, soveel so dat die Scope of watter ander tydskrif in daardie afdeling met leep-oë sal staar. Maar dis op die strand en laat hierdie antie maar haar mond styf toehou. Soos ek sê, ons veroorsaak dit self, en die manne gee sekerlik nie om nie, of hoe?

Stap ek gister in ‘n baie besige straat en dog, hallusineer ek nou, of wat? Ek sien net boude voor my. Kan dit wees? Die persoon het seker vleeskleurige klere aan of iets. Maar nee, dit is kaal boude wat ek sien. ‘n Vrou met ‘n bikini, deurtrekker en Scope bostukkie, buk by haar voertuig in om iets uit te haal. Die bukslag is ook nie eintlik preuts nie.

Toe wonder ek: Is dit die nuwe straatdrag? Of is sy só desparaat? Om die waarheid te sê, hoekom nie sommer heeltemal kaal loop nie, dan spaar sy nog ‘n hele klomp geld op ‘n stukkie klere wat nie eers klere is nie. Hulle swembad is ook verhoog sodat as sy met daardie geen kleertjies op die rand daarvan loop, die hele straat ook ‘n lewendige vertoning het. Is sy dalk ingesluit in die produk wat hulle adverteer?

So, dink jy ek is uit die oudedoos? Ja, jy is reg. Praat ek uit my beurt uit? Sekerlik, in vandag se standaarde. Hou jy nie van wat ek hier skryf nie? Ek is regtig jammer om te hoor.

Maar ek kan ongelukkig nie net stilsit en by myself sit en mor oor hoe die wêreld agteruit gaan, ander blameer en niks daaraan doen nie. Al is die stukkie wat ek kan doen dan skryf, dan doen ek dit. Ons ís steeds veronderstel om ‘n Christenland te wees, selfs al vergeet ons dit so maklik.

Toortsie

Introvert? Ekstrovert?

Is ek ‘n introvert of ‘n ekstrovert? Dit maak seker nie regtig saak nie, maar hoekom ek vra, is, ek is mal oor mense, maar geniet my eie tyd verskriklik baie. So lief soos wat ek vir mense is, net so graag wil ek alleen dinge doen, maak mense my moeg. Alhoewel ek oor jare my ekstroverteienskappe baie ontwikkel het, is ek eintlik skaam, glo dit as jy wil.

Skielik kom die gedagte vanoggend in my kop op: Google ‘can an extrovert also be a loner’. Terloops, ek het hierdie vakansie behoorlik baie gegoogle. Google se antwoord?

Of course. A loner? Most definitely. Some of this tendency for certain types of extroverts to also exist as loners can be their draw towards freedom.

Google bring my toe by hierdie artikel deur Jessica Booth uit.

Nege dinge wat ekstroverts graag wil hê dat introverte moet weet. Interessant. Ek hoor gewoonlik die andersom pleidooi, naamlik dit wat introverte wil hê ekstroverte moet weet. Dalk is dit goed om mekaar beter te verstaan en kan dit moontlike misverstande uit die weg ruim.

Mense kan eienskappe van beide ekstrovert sowel as introvert hê. Om ‘n ekstrovert te wees, beteken nie noodwendig dat jy uitgaande, luidrugtig en vriendelik is nie, maar dat jy jou energie kry deur tussen mense te wees. Ekstroverte kan steeds skaam wees. ‘n Ekstrovert is nie áltyd die spil waarom al die aandag draai nie.

‘n Ekstrovert- of introvert benaming moet nooit ‘n persoon in ‘n sekere boksie plaas nie. Mense verskil steeds. Tog is dit goed dat introverte die volgende dinge verstaan van ekstroverte:

  1. Hulle probeer nie om jou uit jou dop te kry omdat hulle nie van jou hou soos wat jy is nie. Hulle probeer eintlik net help. Omdat ekstroverte van nature meer sosiaal is, vind hulle dit moeilik om te verstaan as iemand totaal assosiaal is. Dit sal help as ‘n introvert aan die ekstrovert verduidelik dat hy dit verkies om alleen te wees en dat die introvert dit nie as persoonlik sal opneem wanneer ‘n ekstrovert hom probeer help nie. Sy intensies is regtig goed. (As ekstrovert kan ek sê dat dit my selfs soms gespanne maak, maar ek het al geleer om dit dan te aanvaar en aan te stap.)
  2. Hulle kan nie jou gedagtes lees nie, jy moet dit dalk duideliker kommunikeer. Ekstroverts is nie subtiel nie. Hulle sê duidelik wat hulle dink. Ek, as ekstrovert raak baie verward en gespanne as iemand ‘tussen die lyne’ praat of een iets sê en iets anders bedoel. Dit sal baie help as jy, wanneer jy met ‘n ekstrovert praat, reguit en direk praat. Ekstroverte tel moeilik subtiele woordjies of betekenisse ope en hulle hou niks van gedagtespeletjies nie. Hulle hou van totale eerlikheid.
  3. Hulle kan nie help dat hulle te veel inligting gee nie. Hulle hou van praat! Waar introverte van stilte hou, voel ekstroverte geweldig ongemaklik in stilte. Hulle hou daarvan om te praat en om sosiaal te wees. Hulle praat soms te veel, veral as daar ongemaklike stiltes is. Hulle kan nie daarvoor help nie, dis maar net wie hulle is!
  4. Hulle hou daarvan om tussen ander mense te wees, so as hulle meer mense nooi, is dit nie omdat hulle nie alleen saam met jou wil wees nie. The more the merrier. Moenie dit as persoonlik opneem as ekstroverte meer mense nooi nie, hulle koppe werk net so!
  5. Jy kan enige tyd by hulle aanklop, sonder afspraak en sal altyd welkom wees. En nee, hulle is nie net ordentlik deur jou vriendelik te ontvang nie. Om die waarheid te sê, hulle geniet dit baie! Hulle bedoel dit as hulle sê dat jy kan kom kuier net wanneer jy wil.
  6. Ekstroverte geniet ook alleentyd. Soveel soos wat ekstroverte die geselskap van ander mense geniet, net so hou hulle ook van alleentyd. Dit gee hulle tyd om hulle gedagtes te orden en om te ontspan.
  7. Ekstroverte kan skaam wees. Dit neem soms vir hulle tyd om uit die dop te kom. Hulle kan selfs skaam wees om eerste ‘n hand uit te steek in vriendskap.
  8. Dit is nie dat hulle daarvan hou om oor koeitjies en kalfies te praat nie, dis eintlik dat hulle glad nie van stilte hou nie.
  9. (HIerdie een is ‘n vreemde gedagte.) Ekstroverte is nie altyd aan die ‘flirt’ nie. Soms kry ekstroverte die reputasie dat hulle flirt met almal, maar dit is nie wat hulle altyd doen nie. Omdat hulle baie vriendelik en gesellig is en met ander mense ‘n geselsie kan aanknoop, mag dit lyk of hulle ‘n flirtasie probeer maak, maar dit is nie altyd so nie.

Thank you, Jessica, I really liked this piece of writing of yours.

Toortsie

Ek kan regtig met hierdie feite assosieer, net nie met die flirtasie-een nie. Tog ken ek sulke mense ook.