Ek, Ursula mag toe mos nie saam met die Toortsie Aussieland toe toer nie, nee, ek moes agterbly! Maar tipies Toortsie het sy lankal vergeet watter opdrag sy vir my gegee het!

Vir Awethentiq vertel sy ek moet agterbly om te werk, want iémand moet werk! Gmf! En toe sy terug is, verklaar sy dat ek haar verlaat het! Asof ek dít kan waag! Sjoe! Haar kop is deurmekaar! Sy het wraggies vergeet dat sy my opdrag gegee het om vir Nicodémus te loop soek!

Nou, as julle nie weet wie Nicodémus is nie, laat ek verduidelik: Eerstens is ons nie seker of daar wel ‘n Nicodémus is nie! Sy, Toortsie het net een dag gewonder of haar broer ook ‘n Aler Ego het, en sý, Toortsie, het sommer beslúít dat, indien hy bestaan, sy naam Nicodémus sal wees.

Ek het al voorheen órals gesoek, orals waar die boeta al gewerk en gewoon het, en tot die slotsom gekom dat hy sekerlik iewers op reis sal wees, dis nou te sê, ás hy bestaan!

So, terwyl ou Toortsie en haar manlief gaan honeymoon hou het, moes ek behoorlik die wêreld deurkruis, want wáár kan hy tog wees? Wáár begin ‘n mens soek? So ek is Europa toe, deur groot dele van Oos- en Wes-Europa. Mensig dis mooi! Daar is net iets ánders aan Europa! Ek moes so konsentreer op my missie, want die mooiheid van alles het my soms laat vergeet wat ek eintlik daar doen. Ek was by parke, by die besienswaardighede, in kroeë … orals, maar nêrens het ek vir Nicodémus raakgeloop nie! Ja man, ek hét Nicodemusse raakgeloop, maar nie ONS Nicodemus nie!

Genade! Julle wil nie weet hóé lyk party van die Nicodémusse wat ek gesien het nie. Hoe gril ek nou! Olierige hare, fyn snorretjie, ore wat so puntjies maak. Gladde mannetjies. Nee dankie! Ons Nicodemus sal nie só lyk nie! Hy sal ordentlik wees en oulik en vol pret!

By die Eiffeltoring, op die derde vloer, dog ek, hier is hy! Weet julle hoe bang was ek? Die derde vloer van die Eiffel is hoog! Erg hoog! Dáár staan toe sowaar ‘n Nicodémus, een wat lyk of hy óns Nicodémus kan wees! En hy praat sowaar Afrikaans! Sjoe, ek het hom amper om die nek gegryp en gesoen! Maar nee, hy is nie Toortsie se boeta se Nicodémus nie. Hy woon in Kaapstad. Nie ons man nie.

Intussen hoor ek toe ou Toortsie is terug by die huis en sy vang allerhande onverantwoordelikhede aan, so ek moes inderhaas terug. Ook nét betyds, want toe ek daar opdaag, staan sy met haar ou kitaartjie voor in die kerk en die ‘tweede stem’ wil net nie kom nie! Ek kon darem help en het so stilweg gelag toe sy verlig vir die dame langs haar sê: “Ursula is terug!”

Ek dink nogals ou Toortsie waardeer my!

Ursula

Toortsie se Bantingboerekos Facebook page

Toortsie se Facebook page

Finesse Blogger van die week

Toortsie by Finesse: Doen dit vandag nog!

Toortsie’s LCHF Journey 

Toortsie op Pinterest

Kyk, as ou Toortsie ‘n idee in haar kop kry, moet jy net koes. So was Scrapydo se laaste bloguitdaging mos oor broers, en Toortsie wonder of haar broer ook ‘n Alter Ego het, en sy besluit sommer sy naam sal Nicodémus wees. Nicodémus! Genade! Wie gee so ‘n naam vir jou Alter Ego? Sy stuur my toe op ‘n soektog na Nicodémus. Wat ‘n werk! Glo my!

Het julle geweet hoeveel verwaarloosde Alter Ego’s daar in die wêreld is? My mond het oopgehang! Sien, ek weet eintlik nie van die ander Alter Ego’s nie omdat Toortsie my so besig hou.

Ek moes loop soek in al die ou kantore wat Toortsie se broer gewerk het. In die kluise. Sjoe! Het ek hooikoors gekry! En sowaar, daar tussen die rakke en rakke lêers het ek op ‘n hele paar verstokte Alter Ego’s afgekom. Uitgeteer. Verwaarloos. Maar ONINTERESSANT! 😦 Mens kan mos ook niks anders verwag van ‘n Alter Ego wat al vir jare in ‘n kluis toegesluit is nie! Daar’s mans en vrouens, maar dit wil vir my al lyk of dit al die beheervrate is wat hulle Alter Ego’s so wegsluit. Dis eintlik jammer want ons is mos eintlik gemaak om ons mens te help!

Maar Nicodémus? Ek kon hom nêrens kry nie. Nie in die kluise nie, nie in die stoorkamers nie, nie in die pakkamers wat vol verfblikke staan nie. Nêrens. Om die waarheid te sê, die ander Alter Ego’s wat daar is, kan nie eintlik onthou of hulle hom al gesien het nie. Party sê dat hulle so vaagweg dalk so iemand onthou, maar hulle is ook nie seker daarvan nie.

Dít kon ek natuurlik al voor die tyd gesê het: Toortsie se broer se Nicodémus sal nie in ‘n kluis toegesluit sit nie! Nee man! As Nicodémus net ‘n bietjie na die boeta aard, is hy iewers op reis. Die reisgogga is mos in hulle gene! Nou vra ek jou, waar op hierdie grote aarde sal ek hom vind as hy permanent op reis is? Sal hy daar wees waar die boeta al getoer het of loop hy sy eie draaie? Hoe lank sal ek na hom moet soek?

Ek gee moed op! Ek kan nie nog verder tyd met Nicodémus mors nie, weet julle wat van Toortsie intussen alles aan as ek nie daar is om te help nie?

Ursula

Toortsie by Finesse:Toe vang die angs my

Toortsie se Faceboekpage

Toortsie se Bantingboerekos faceboekpage

Toortsie’s LCHF Journey

Finesse Blogger van die week. 

Toortsie op die radio