Kategorie: Ursula

Analiseer? Hoe bedoel mevrou dan nou?

~ Toortsie ~ 19 Kommentaar

Ai, jai jai, ek moes my darem nou die dag inhou om nie kliphard uit te bars van die lag nie! Ou Toortsie doen toe weer ‘n persoonlikheidstoets, die HOEVEELSTE een al. Ag, eintlik het sy nie besef dis waarvoor sy haar inlaat nie, sy het net ‘n geleentheid gesoek om tee te drink, toe loop sy in hierdie persoonlikheidstoets in.

Ons almal weet mos sy is ‘n ekstrovert, maar weet julle wat, sy is amper net soveel introvert ook. Iewers het iemand nou die dag daaroor geskryf, dat tussen mense is jy soos ‘n ekstrovert, maar op jou eie is jy eerder introvert. Watse soort vert is dit nou weer?

Wel, met ou Toorts weet mens mos nooit. Om die waarheid te sê, ek dink ook nie sý weet eintlik nie! Al verskil is, op hierdie stadium wonder ons nie meer daaroor nie.

Maar hoekom ek toe so lekker lag? Kyk, ons weet mos ook dat ou Toortsie instorm in ‘n ding in, lank voordat sy dink, en dat die dink eers lank ná die tyd inskop, wanneer dit heeltemal te laat is. Die dame wat die kursus aanbied, sê toe dat Toortsie wel sou moes ‘analiseer’, anders sou sy nie die boek kon skryf nie, en ek dog so by myself: ‘Hoe bedoel mevrou dan nou?’ Hê? Analiseer? Bedoel mevrou óns Toortsie het geanaliseer? Hoe nou? Verstaan ek die woord reg?

Ek het maar toe vir Google loop vra wat ‘analiseer’ beteken, en hulle sê: ‘to examine something in detail to find out what it means or is made of‘. Analiseer? Ons Stormtoortsie?

Wel, dít moet ek erken, sy hét baie opgelees oor Banting en resepte, maar is dit analiseer? Sy was juis so opgewonde toe Seegogga een dag vir haar gesê het dis ‘navorsing‘, sies tog, sy het nog altyd so minderwaardig gevoel omdat sy nie eintlik navorsing doen soos regte skrywers nie, toe red die dierbare Seegogga haar sowaar! Sy het vir twee weke op die wolke gedans net omdat sy dan wel navorsing doen en sy het dit nie eens geweet nie!

En ja, sy dink nogals effens oor die resepte. Kyk, party goed maak sy letterlik 20 keer en verander elke keer ietsie tot dit uiteindelik na haar smaak is. ‘n Bietjie van dit by, ‘n bietjie van daai minder, maar is dít analiseer? As dit wel só is, hóé gaan ons weer vir Toortsie daar bo uit die wolke uit kry? As sy nou moet weet sy doen navorsing én sy analiseer?

Groetnis

Ursula

Toortsie by Finesse: Toe kom die reën

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif

Transformation Prayer Ministry: Bredasdorp en Riversdal

Toortsie maak skandes!

~ Toortsie ~ 35 Kommentaar

Ek het julle gesê Toortsie moes eerder by die huis gebly het, maar julle wou mos nie hoor nie!

Toortsie het mos ‘n ou probleempie. Die wasters in haar oogkraantjies sluit nie meer so dig nie, en op die onmoontlikste tye begin die kraantjies lek. Die oogkraantjies, bedoel ek.

Nou ja, vanaand, of was dit al weer gisteraand, dis 12 oor 12, sien ek, was dit toe die eerste vertoning van Capital Singers Jingle All the Way.

Ai tog, Liezel het so mooi gebid voor ons op die verhoog gaan dat ons mooi sal sing en tog nie huil nie, maar toe die gordyn lig en Toortsie sien al die mense, toe trek haar keel toe en die oogkraantjies se wasters lek. Gelukkig net ‘n rukkie, maar wie tjank nou op ‘n verhoog terwyl die saal vol mense sit? Skande op die huis!

Weet julle, né, die verhoog staan vol gestapel met sangers en die orkes en dirigent en Corlia, omtrent 683 van ons, en daar waar die verhoog stop, begin die gehoor, blykbaar 1380 mense, dit lyk soos ‘n see van mense. Golwe vol mense. Kan julle julle indink hoe dit klink as al daardie 2063 mense as my somme reg is, mens maak nie hierdie tyd van die aand meer somme nie, almal saam, uit volle bors, ‘Kom alle getroues‘ sing, terwyl ‘n simfonie-orkes die begeleiding doen? Nee, ek dink nie julle kan julle indink nie en as ek julle vertel, gaan julle my in elk geval nie glo nie! Al wat ek weet, oogwasters werk nie sulke tye nie, in elk geval nie by die Toortsie nie!

En, terloops, as jy nog sou wou kom luister, maar jy het nie ‘n kaartjie nie, is jy klaar te laat, daar was nog net een plek oor en hy is seker ook al opgeraap. Ek hét julle gewaarsku!

Al wat ek wil sê is, behalwe vir die trane, was daar nog ‘n skande! Toortsie se woorde het opgeraak! Dit was só fantasties, ongelooflik, uit ‘n ander wêreld, hemels, Toortsie het nie woorde gehad om dit te beskryf nie, so julle kan net dink!

Groetnis

Ursula

Foto geleen by Capital Singers se Facebook blad.

#capitalsingers

Ek het drooggemaak!

~ Toortsie ~ 5 Kommentaar

Eintlik wil ek sê, ek het opgeslip, maar Toortsie hou nie van woorde soos ‘opgeslip’ nie, so ek sal dan maar sê, ek het drooggemaak. Behoorlik drooggemaak.

Ná haar dogter se troue was ek só kwaad vir Toortsie! Die kamtige Sarel het daardie hele week aandag gekry, terwyl sy my amper blatant geïgnoreer het. Dit, terwyl ek maar altyd agter die skerms dinge moes reghou.

Toe die troue verby is, pak sy op, Struisbaai toe, en dáár het sy haar so besig gehou met die familie wat daar gekuier het, sy het my skoon vergeet.

Die tóé wat ek besluit het, ek gaan die pad vat. So op my eie het ek die land deur getoer, my kop vol woede vir ou Toortsie.

Maar, op’n stadium het my gedagtes oor haar verander. Eers was ek woedend, toe skaam-kwaad, later net skaam, want ek het besef dat ek haar regtig lelik in die steek gelaat het. Ek was ‘n afgedwaalde Alter Ego! Dis nie eintlik iets om op trots te wees nie!

Eers was ek te skaam om terug te kom, maar later het ek tog my moed bymekaar geskraap. 

Toe ek op die plaas aankom, is daar geen mens nie. Dooiemansdeur. Die huis staan leeg. Ek het die groot trek gemis!

Toe maar dorp toe, maar ek was nie seker van die adres nie. Hul sou eers in ‘n ander huis bly en het toe van besluit verander. Verder nog was sy deurmekaar met die straatname ook. Én die nommers! Ek dog Toortsie raak nie deurmekaar met nommers nie!

Ek het gaan klop by die adres wat sy soveel keer genoem het, maar daar het vreemde mense gebly. Ek het op en af in die straat gedwaal en toe by ‘n huis bekende goed raakgesien. Die huis was toe.

Een dag het ek verby die kerk gestap en hoor toe die orkes oefen. Sowaar, daar staan Toortsie ook! Ek het saggies saamgesing en sy het my gehoor!

Nou het ek julle raad nodig: Hoe kan ek Toortsie nader en om verskoning vra?

En dan wil ek ook net sê, Alter Ego’s trou nie! Die grappies oor Sarel is nie snaaks nie!

Ursula

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Om te pendel saam met jou man

Toortsie by Pinterest

Plaasakkomodasie by Riversdal, Wes-Kaap

My rooi helikopter

~ Toortsie ~ 19 Kommentaar

Kyk, ek het mos nou al lankal die idee om vir my ‘n rooi helikopter te koop. ‘n Tweesitplek, ek wil mos nie die hele dorp op een slag vervoer nie! Dis omdat ek soveel tyd op die pad deurbring, ek kan dit netsowel in die lug deurbring. Die paaie is juis so gevaarlik deesdae. Dis eintlik net vir my en my koffer.

Die erf wat ons het, het juis so ‘n ekstra driehoek aan. Dis nét die plek waar ek die rooi helikopter gaan parkeer. Anders moes ek dit op die huis se dak parkeer, dan hou die hele dorp my dop en sê, die eksentrieke vrou is terug of weg. Eksentriek. Verbeel jou!

En ja, ek wil hom sommer self bestuur ook! Ek kan darem regtig nie iemand voltyds aanhou nét om my af en toe rond te vlieg nie, weet julle hoeveel kos dit? En dan is daar nog al die rompslomp van arbeidswette ook nog! Nee wat, ek bestuur hom sommer self!

Ursula sal my help, dis te sê as ek haar net kan vind! Ek en sy hét mos al ‘n keer met ‘n helikopter gevlieg. 😁

Nou vertel mense dis moeilik om ‘n helikopter te vlieg. Dink hulle ek is dom? Iemand sê ek moet eers ‘n bietjie op die rekenaar oefen met ‘n simulasie. Wie het nou tyd vir rekenaarspeletjies?

Iemand vertel my dat as die masjien skielik besluit om te vrek, jy .78% van ‘n sekonde het om een of ander pen in te druk. Ek dink nie ek moet my bekommer oor die pen nie, ek moet eerder net my kop vashou en skree, ‘Oeeee …!’

Intussen moet julle nie te veel stres nie, ek sal julle laat weet as ek hom het! 😁😜🤡 Julle moet onthou om vir my te sê as julle ‘n draaitjie saam met my wil vlieg. Onthou, ek kan net een op ‘n slag saamneem. Ek wil nou darem nie my helikopter oorlaai nie!

Groetnis

Ag, julle weet mos wie!

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Om te pendel saam met jou man

Toortsie by Pinterest

Plaasakkomodasie by Riversdal, Wes-Kaap

Ek is bekommerd oor Ursula

~ Toortsie ~ 27 Kommentaar

Vandat ek begin inpak het, eintlik van die begin van die jaar af, het ek Ursula nog glad nie gewaar nie. Dis ietwat lank, hoor! Ek kan dit glad nie verstaan nie. Maar om die waarheid te sê, ek was nog die heeltyd so besig, ek het ook nie eintlik veel aan haar gedink nie.

Kyk, sy het haar mos vreeslik vererg omdat ek soveel aandag aan die kamtige Sarel gegee het en sy heeltemal te min aandag gekry het met my dogter se troue, maar regtig, dit raak nou ‘n bietjie lank!

Sy is mos ook baie fyngevoelig en dalk voel sy ongemaklik oor ‘n sekere persoon se bekommernis oor my assosiasie met haar. Dalk het sy besluit om maar eerder iemand anders se Alter Ego te word!

Ek is natuurlik ook bekommerd dat sy my by ons plaashuis gaan soek. Sal sy weet waar om my te kry?

Toe het iemand gewonder of sy nie dalk gevange geneem is op ‘n seerowerskip toe ons Desember by Struisbaai was nie. Hoe sal ons weet? Dalk is Sarel ‘n seerower! Ontstellend!

Ek het ook gehoor van ‘n trekkery in Durban waarby ‘n Ursula betrokke is en my hart het amper gaan staan! Is dit dalk my Ursula?

Maar weet julle wat, toe ons orkes Donderdagaand die begeleiding oefen vir Sondag se diens, hoor ek so hier en daar so ‘n yl stemmetjie uitkom wat vir my baie na hare klink. Dit was ietwat vreemderig, maar ek wil al dink dat dit sy is. So vir al wat jy weet, is Sarel ‘n kerkmuis! Dalk is sy iewers in ‘n kamertjie in die kerk versteek! Maar as dit die geval is, glo ek, sal ons mekaar weer kan opspoor as ons musiek maak!

Groetnis

Toortsie

(Suiwer verbeelding van Toortsie)

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Wat maak die verskil?

Toortsie by Pinterest