Transformasie Gebedsbediening TPM

Jare gelede was ek in ‘n krisis en het ek te doen gekry met Transformasie Gebedsbediening (TPM Transformation Prayer Ministry). Op daardie stadium was dit bekend as Theophostic Prayer Ministry. Wat dit aan my siel en gees gedoen het, kan ek nie beskryf nie. Dit was fantasties. Intussen is ek ook opgelei as TPM Fasiliteerder en sien ek hier en daar kliënte terwyl ek dit ook steeds op myself toepas.

Ek sien wonderwerke voor my oë gebeur. Ek sien hoe mense met swaar harte by ‘n TPM sessie opdaag en verlig en verlos van jarelange vragte wat hulle saamgedra het, daar wegstap.

TPM is ‘n gebedsbediening waar ek slegs as fasiliteerder optree tussen die kliënt en God. Ek vra slegs vrae soos vasgestel deur TPM self en gee nie raad nie. Deur baie spesifieke vrae kom ons gewoonlik uit by die wortel van die probleem, by iets wat dalk in die persoon se kinderdae gebeur het, baie keer iets wat die persoon al lankal vergeet het. Dit word dan na God uitgehou en Sy waarheid word gevra. Hy wys die persoon die waarheid op ‘n unieke manier wat daardie persoon sal verstaan. Gewoonlik, wanneer die persoon waarheid ontvang het, is daardie probleem opgelos.

Tydens TPM kry die kliënt ook die geleentheid om wrokke, woede of kwaadwees wat hy mag hê teenoor iemand anders, te vergewe. Natuurlik is dit vrywillig, maar wanneer iemand sy kwaadwees teenoor ‘n persoon, God, of iets laat gaan, is sy hart baie ligter en word sy eie probleme ook sommer makliker opgelos.

Ons werk op hoe die persoon oor iets voel en vir baie mense is dit die eerste keer vreemd omdat hulle nog nooit hulleself die voorreg gegun het om te dink oor hoe hulle voel nie. Of die gevoel is dalk nog al die jare doodgedruk omdat dit te seer is daar. Ons gee die seer lug en dit is nie altyd maklik nie, net soos dit nie maklik en lekker is om aan ‘n seer tand te laat boor nie. Tog weet ons dat as daardie tand geboor is, dit skoongemaak is en nuut opgevul is, dit aansienlik beter voel as om met die seer tand te loop.

Ek bied TPM aan op Struisbaai omdat dit so rustig en mooi is daar en ook privaat sodat die persoon ongesteurd kontak met God kan maak en sy probleme in die oë kyk.

Groete

Toortsie

Soms het ons TPM nodig

Soms het ons almal TPM (Transformation Prayer Ministry – Transformasie Gebedsbediening) nodig. Soms het ons nodig om te kyk wat ons ontstel. Nie net wat nie, maar ook sommer hoekom dit ons so ontstel. Soms het ons sommer net die ‘tender loving care’ van die Here nodig. Soms het ons sommer net nodig om ons hart uit te huil voor Hom.

Soms het ons nodig om te waag en dieper in ons eie lewens in te kyk, na daardie dinge wat ons al lankal ‘verwerk’ het en ver en diep weggepak het in laaitjies waar niemand anders ooit sal kyk nie. Soms kom ons af op onbenullige gebeurlikheidjies in ons kinderdae wat regtig niks beteken nie, maar wat vir ons as kinders, in ons kindergemoedjies, leuens oor onsself gefluister het wat ons ons hele lewe lank glo.

Soms het ons nodig om die kwaadwees te laat gaan. Kwaadwees vir God, kwaadwees vir ander mense, kwaadwees vir onsself. Soms het ons nodig om te besef dat ons kwaadwees nie ons beskerm of regop hou nie, maar dat dit God is wat ons beskerm. Soms het ons nodig om dit by Homself te hoor dat Hy ons beskerm en dat Hy veg vir ons.

Soms het ons sommer net nodig om by Hom self te hoor dat Hy lief is vir ons, net soos ons is omdat Hy ons juis so gemaak het, of dat Hy ‘n doel met ons het, ‘n plan, of wat Hy ookal vir ons wil sê. Dat ons kosbaar is vir Hom, dat Hy ons uitgesoek het as Sy kinders. Soms het ons sommer net nodig om by Sy voete sit en gekoester te word.

Ons almal het dit soms nodig. Waag dit!

Toortsie

‘n Bolletjie wol

Baie jare gelede het ons dominee verduidelik van die bolletjie wol van ons lewe. Dat ons slegte gewoontes, sondes, bakleie, noem maar op oor tyd oprol en die bolletjie wol raak met tyd net groter.

Nou kom daar ‘n draaipunt in ons lewe. Ons besluit om te stop met ‘n sekere slegte gewoonte, of ons wil ‘n verhoudibg regmaak. Vir ‘n rukkie gaan dit goed, maar keer op keer struikel ons. Ons kry dit net nie reg om dit sommer net perfek te hê van die begin af nie. En amper gee ons tou op, verloor ons moed.

Maar die bolletjie wol moet ons nie vergeet nie. Net soos ons dit oor jare opgerol het, is die bolletjie wol nie nou sommer weg nie. Dis steeds daar, en net soos hy oor tyd groter geraak het, moet ons nou doelbewus dit begin afrol, stukkie vir stukkie, totdat ons weer eendag die hele bolletjie afgerol het.

Ek sien dit ook in TPM as ‘n persoon gereeld kom. Stukkie vir stukkie word die bolletjie afgerol. Of, as ek aan Kameel se ui dink, lagie vir lagie word die ui geskil, dieper en dieper, tot eendag, wanneer ons voel dat ons die lewe in die oë kan kyk. 😊

Toortsie

Bevryding van angs en bekommernis

Die lewe is onseker. Ons weet nie wat ons toekoms inhou nie. Verhoudings is onseker. Dit gaan swaar met ons geldsake. Die reën bly weg. Ons kry skielik slegte nuus van die dokter af.

Of ons nou daarvan hou, of nie, die lewe is nie aldag maklik nie. Uitdagings wag om elke hoek en draai. Ons weet nie altyd watter kant toe nie. Ons raak bang. Angstig. Ons begin twyfel in onsself, oor onsself, oor ons omstandinghede, oor God.

Bevryding van Angs en Bekommernis is ‘n oulike boek om aan te skaf. Bruce Wilkinson, ‘n baie dinamiese geestelike skrywer van Amerika, hanteer in hierdie boek situasies soos gesondheidsprobleme, finansiële probleme, geestes- en emosionele gesondheid, werksekerheid, persoonlike veiligheid, en vele meer.

By elke onderwerp gesels hy eers in die algemeen daaroor. Hy probeer om vir jou ‘n bietjie perspektief te gee. Kopkennis. Dan volg ‘n paar teksgedeeltes, met ‘n gebed waar jy vir God nader en jou probleem aan Hom stel. Hartskennis.

Agter in die boek is ‘n lys van Skrifgedeeltes wat jou sal help om jou bekommernis te oorwin.

Dit is regtig ‘n oulike boek om te lees.

Terselfdertyd wil ek jou aanmoedig om, as jy regtig ernstig deur angs geteister word, erns daarvan te maak. Gaan sien iemand wat jou daarmee kan help. Vir baie mense is so iets ‘n skrikwekkende gedagte, maar jy voel soveel beter as jy van daardie bekommernisse kan afgooi. Nee, die probleem gaan nie noodwendig weg nie, maar die manier waarop jy daarna kyk en die invloed wat dit op jou gees het, kan wel verander. Het jy dalk ‘n TPM-fasiliteerder (Transformation Prayer Ministry) in jou omgewing? Waag dit en gaan besoek daardie persoon. Jy sal aangenaam verras wees.

Intussen, lekker lees aan Bevryding van Angs en Bekommernis deur Bruce Wilkinson.

Toortsie

Loer gerus by Pinterest en ook HIER vir my boekbesprekings.

Betrokke

Vir ‘n hele klompie dae draai die gedagte om God se betrokkenheid in ons lewens in my kop. Dit voel of dit by my mond wil uitborrel, ek wens ek weet wat om te maak dat mense sal besef hoé betrokke Hy elke sekond in ons lewens is. Hier skryf Woordnoot sowaar oor hoe God vir haar in woorde kom vertel het hoe Hy by haar betrokke is, die verhouding wat Hy en sy het.

Gisteraand was die woorde in my kop: ‘Ek wens ek mag vir julle vertel hoe God tydens TPM-sessies met ons praat, nie net met die kliënt nie, maar ook met my, hoe Hy met elkeen op Sy besonderse manier praat soos wat dit by elke persoon pas. Ek wens ek kan vir julle vertel hoe Hy vir die verwerpte persoon vertel hoe kosbaar sy vir Hom is. Vir die een wat voel sy het geleenthede deur haar vingers laat glip, wys Hy dat daar nog baie ander geleenthede is, dat Hy groot planne vir haar het. Hoe Hy, soms deur dit wat Hy vir die kliënt sê, ook vir my dinge bevestig. Hoe ek ná elke TPM-sessie waar ek kon sien hoe ‘n persoon vorentoe beweeg, voel of ek wil vlieg. ‘

Ongelukkig mag ek nie daardie stories vertel soos dit regtig gebeur nie omdat dit nie my stories is nie, maar ander mense s’n.

Ek mag wel vertel hoe God vir die Toortsie wat met haar kop weet sy is nie dom nie, maar diep in haar hart dit glo omdat sy dinge sê wat ander nie van hou nie, soveel keer anders optree en dink as ander mense, dat God self vir haar tydens ‘n TPM-sessie kom vertel het dat dit nie domheid is nie, maar juis is dat sy haar verstand gebruik en dat sy juis daaroor soms anders gaan dink en doen as ander mense. En skielik verander Hy kopkennis in hartskennis en glo die Toortsie dit nou diep in haar hart ook, daar waar net God ons kan oortuig van die waarheid.

God is betrokke by ons, in goeie én in slegte tye, of ons dit wil erken, of nie. Hy is betrokke en as ons ons oë en harte daarvoor oopstel, sal ons al hoe meer bewus raak daarvan en keer op keer in verwondering staan.

Hê ‘n mooi dag. Mag God jou vandag seën en mag jy vandag Sy betrokkenheid in jou lewe beleef.

Toortsie