Kwaad – prakties

Ja, ons ken daardie gevoel. Iemand het ons verkeerd hanteer, iets aangedoen wat hulle nie moes nie. Eintlik kan ons nie daardie kwaad laat gaan nie, want die persoon verdien dit nie. Hy het nie eers om verskoning kom vra nie en sou jy hom daaroor konfronteer, sal hy dit ontken of homself regverdig. Daar is geen berou van sy kant af nie. Of dalk weet die persoon nie eers dat hy jou geaffronteer het nie. Maar jy dra die kwaad in jou hart. Soms selfs sonder dat jy dit besef. Jy sê selfs dat jy hom vergewe het, maar het jy? Die waarheid is, eintlik verdien hy glad nie daardie vergifnis nie.

Maar raak ‘n bietjie stil. Begin dink ‘n bietjie oor die situasie. Wat voel jy? Wat het gebeur? Teenoor wie voel jy kwaad/teleurgesteld/woedend/bitter of watter woord jy ookal wil noem? Dalk jouself?

Hoekom is jy kwaad vir die persoon? Wat het hy gedoen? Wat het hy ALLES gedoen? Skryf dit neer. Wat het hy nie gedoen nie? Wat moes hy gedoen het? Nog redes?

Ervaar jy huiwering om die kwaad te laat gaan? Wat dink jy gaan gebeur as jy die kwaad gaan laat gaan?

Die waarheid is dat jy nie die ander persoon gevange hou met jou kwaad nie, maar eerder jouself. Dat as jy die kwaad aanhou koester, jy self nie vorentoe kan beweeg nie. Dat jy nie regtig die ander persoon se gedrag met jou kwaad kan regkry of verander nie. Dat die ander persoon sy eie issues moet uitsorteer. Sy eie probleme. Dit waarmee hy sukkel. En dat ons, solank ons ons kwaad koester, aanhou kwaad bly, ons die doringboompies in ons brein toelaat om te groei, groter te word en skade toe doen aan ons eie liggaam en siel. En nee, die verkeerd wat die ander persoon doen of gedoen het, gaan nie reggestel word as ons nie meer kwaad is vir die persoon nie. Dit is sy dinge waarmee hy self moet regmaak in sy hart. Die verkeerd wat hy doen is nie nou skielik reg net omdat ons ons kwaad laat gaan nie.

Gestel jy voel om wel die kwaad wat jy voel teenoor die ander persoon (of jouself) te laat gaan, kan jy hierdie gebed bid:

Here, ek is baie kwaad vir (sy naam) omdat hy (noem op wat hy alles genoem het). Dit was verkeerd van hom om dit te doen, maar ek wil nie meer die kwaad dra nie. Ek kies om dit te laat gaan sodat ek vorentoe kan beweeg.

Gee jouself kans. Sien jy hoe jy die kwaad laat gaan? Voel jy dit?

En hoe voel dit nou daar? Daar waar die kwaad was? Voel jy steeds die kwaad? Voel jy beter?

Onthou om nou vir die Here te dank dat Hy jou hiermee gehelp het. Gee aan Hom die eer, want sonder Hom is geen vergifnis moontlik nie.

Deur dit te doen, het jy ‘n toksiese doringboompie in jou brein uitgeskoffel en dit vervang met ‘n pragtige, gesonde, groeiende stuik. En aan jou siel goed gedoen.

Toortsie

Met erkenning aan die Prosesgids van TPM Kaap. (Transformation Prayer Ministry – Transformasie Gebedsbediening)

Breinboompies

Ek lees nou ‘n wonderlike boek wat ‘n vriendin lank gelede vir my aanbeveel het. Healing begins with the sanctification of the heart. – Deur Dr MK Strydom. Dr Strydom is ‘n mediese dokter, maar ook ‘n Christen, ‘n gelowige. Een wat God soek in Sy Woord. Een wat graag wil hoor wat Hy sê. Sy haal dus gereeld die Bybel aan in om haar punt te staaf. In hierdie boek verwys sy ook baie keer na Dr Caroline Leaf se nuutste navorsing oor die menslike brein.

Ons almal weet tog dat ons gedagtes ons siek kan maak. Geestelik siek. Dit is nie ‘n nuwe gedagte nie, maar wat ek nie soveel besef het nie, is dat ons gedagtes ook ons liggaamlik siek kan maak. Ja, toe ek so swaar gedra het aan emosionele dinge, hét ek gesê dat ek dit in my liggaam voel. Tog sou ek dit nie regtig waag om dit sommer te verkondig nie.

Dr Leaf sê in Maak ‘n Kopskuif – Elke Dag dat 75-98% van alle siektes wat ons ervaar, ‘n direkte gevolg is van wat ons dink! Dat dit wat ons dink, ons beide fisies en emosioneel raak.

Dr Strydom beskryf ons dit wat ons dink as boompies wat in ons brein vorm. Wanneer ons goeie gedagtes dink, mediteer oor die Woord, word gesonde, digte boompies gevorm in jou brein (letterlik), maar wanneer ons negatiewe dagtes oordink en bedink, word meer doringagtige boompies gevorm (ook letterlik). Deur te mediteer oor positiewe of negatiewe gedagtes, word die herinneringe gebou en ervaar jy ‘n emosie. Wanneer ons egter ‘n positiewe of negatiewe gedagte kry en dit dadelik laat vaar, word dit net ‘n warm lug wat uitgeskei word en bou dit nie aan die emosie nie. (Ek hoop ek dra dit nou korrek en verstaanbaar oor.)

Negatiewe denke, soos woede, haat, bitterheid groei soos onkruid en neem spasie op in jou brein. Elke keer wat jy weer oor dieselfde negatiewe gedagte kry, groei daardie doringboompie en maak dit jou op die ou end siek. Sy noem dat bitterheid byvoorbeeld aanleiding kan gee tot borskanker. Vrees en angstigheid tot hoë bloeddruk, angina, allergië en asma. Woede tot aneurisme, beroerte en aambeie. Jaloesie mag osteoporose tot gevolg hê. ‘n Lae selfbeeld en skuldgevoel kan depressie, verslawing, megrain en ander outo-imuunsiektes veroorsaak. Skrikwekkend!

Dit is daarom dat ons negatiewe gedagtes wat so maklik insluip, moet beveg met alle mag. Ons moenie toelaat dat kwaadwees wortel skiet in ons harte en oorgaan tot woede en bitterheid nie. Al is dit vir ons moeilik, moet ons probeer om te vergewe, of soos ek in TPM geleer is, die kwaad te laat gaan. Doelbewus die kwaad te laat gaan. Want, die kwaad wat ek in my dra, selfs al het ek alle rede daartoe, maak vir my siek. Dis ék wat die las daarvan dra, nie die ou wat die kwaad gedoen het nie. En dan glo ek ook meer as ooit dat as ons so ‘n slegte emosie in ons hart dra wat aanmekaar sy kop uitsteek, dit goed sal wees om die wortel daarvan te loop soek. En by die Here waarheid daaromtrent te kry. Want baie keer dra ons swaar aan iets omdat daar ‘n leuengebaseerde oortuiging is wat ons in ons eie harte dra, iets soos dat ek nie goed genoeg is nie, of dat ek ‘n nikswerd is, of dom is, of wat ookal.

Dit is nie voorspoedsteologie wat ek verkondig nie. Alle genesing moet steeds gebeur deur God se genade. Maar ons moet let op ons gedagtes, dit staan ook in die Woord.

Toortsie

Tpm – Kinder-TPM

Soos baie mense wat hier lees mos noual weet, is dat ek ‘n fasiliteerder (ek sien dat dr Ed Smith, hoof van TPM, eerder die woord ‘Mentor’ verkies) vir TPM is. Transformation Prayer Ministry. Transformasie Gebedsbediening.

Jare gelede het ‘n baie goeie vriendin van my vertel dat sy betrokke is by Theophostic Prayer Ministry. Ek was op daardie stadium besig met ‘n Christelike Nood- en Traumaberadingskursus by die Hugenote Bybelinstituut op Wellington. En daarná het ek by dieselfde kollege hulle Bybel- en godsdienskundekursus gedoen.

Anél het dit duidelik laat deurskemer dat ek dit moet oorweeg om Theophostics ook te doen. Wat my egter afgesit het, was dat die kursus oor ‘n uitgestrekte tyd oor naweke in die Kaap aangebied word en dat ek nie regtig kans sien om vir ‘n lang tyd gereeld vir naweke Kaap toe te moes gaan nie. Ek is nogal heilig op my naweke en die afstand en die koste daarvan het in my pad gestaan.

Tot ek self trauma beleef het. Erge trauma wat ek nie met my eie meganismes kon verwerk nie. Ek het hulp nodig gehad en natuurlik vir Anél geraadpleeg. Wat daardie dag met my in die TPM-kamer gebeur het, is onbeskryflik. God werk op wonderlike maniere! Ek het soveel heling ontvang. Ek het dit vir ander ook gegun. Ek wou TPM aanleer, want hier is soveel mense wat onverwerkte trauma beleef, mense wat dit dalk nie kan bekostig om Kaap toe te moet ry vir so iets nie. Mense wat nie ‘n sielkundige nodig het nie, maar sommer net met God kontak moet maak.

Op ‘n stadium vra ek haar of daar nie ‘n ander manier is om die kursus te doen nie. Dalk kan ek die boeke by my huis lees of so iets? Sy vertel toe dat Theophostics heeltemal verander het. Dit is vereenvoudig, word nou Transformation Prayer Ministry genoem en die kursus kan gratis aanlyn gedoen word. Dadelik het ek belanggestel en het ek die kursusmateriaal begin deurwerk. (Intussen is dit ook al baie meer vaartbelyn gemaak op die rekenaar.)

Net mooi toe ek die internet-kursusmateriaal klaar deurgewerk het, het die boodskap gekom: Daar word ‘n TPM-kursus in die Kaap aangebied. ‘n Verkorte kursus oor twee naweke. ‘n Intensiewe kursus. Ek het gegaan!

Ek doen nie TPM voltyds nie. Hier staan nie rye en rye mense wat wag vir ‘n afspraak nie. Ek wil dit ook nie voltyds doen nie, want ek is al op aftreeouderdom. Maar ek wil graag mense help wat my kontak. Sedertdien het ek al in my eie TPM-sessies met myself en ook met ander soveel wonderwerke beleef, ek staan elke keer net verstom. Om te sien hoe iemand se liggaamstaal verander tydens ‘n TPM-sessie van vrees na vryheid, kan jy nie beskryf nie. Soms sit ek net in verwondering as ek die transformasie wat plaasvind, beleef. En ek kan nie ophou om vir God te dank dat ek dit mag beleef nie, dat ek deel daarvan mag wees, net ‘n stukkie toerusting in Sy hand om mense se harte heel te maak nie.

Alhoewel die gewone TPM heeltemal doenbaar is vir alle ouderdomme, verkies ons om dit slegs vanaf hoërskoolouderdom met mense te doen, tot natuurlik op ‘n baie hoë ouderdom. Kinders praat deur speel en speelgoed is hulle taal, daarom dat ons kinder-TPM deur speel verkies. Want ‘n kind vertel meer deur speel as wat hy altyd die woorde voor het. Of hy weet nie hoe om sy gevoelens in woorde om te sit nie.

Ek is baie opgewonde, want ek is tans intensief besig met die Kinder-TPM kursus. En ek is besig om die speelkamer in te rig. En hierdie ouma hou van speel. Saamspeel. So, as God dit so wil hê en kinders vir my stuur, gaan ons speel!

Dit bring my by die vrae in my hart: My eerste vraag, of ek steeds moet aangaan met TPM, het God baie hard en duidelik vir my verlede naweek geantwoord: Beslis ja. Of ek die koste moet aangaan om ‘n speelkamer in te rig? Sal ek dit ooit soveel benut? En ek wil dit dan nie heeldag en aldag doen nie? Is dit die moeite werd? Is dit die koste werd? Die antwoord: ‘n Besliste ja. Dit is die moeite werd. Al sien ek in my leeftyd NET EEN kind, al kan ek net een kind help om sy seerkry te verwerk, dit wat hom pla ligter te maak, vir hom sy lewenspad vorentoe makliker te maak, is dit beslis oor en oor die moeite werd. Want een kind se lewe is meer werd as die koste van ‘n paar speelgoedjies. Oor en oor baie meer weer werd.

So, vriende, hierdie tannie is besig om allerhande goetertjies bymekaar te maak: ‘n Sandbak, karretjies, poppies, diere, wilde diere, trekkers en plaasimplemente … alles sodat ‘n kindertjie iewers dalk vir my ‘n storie in die sand kan vertel … en ek is baie opgewonde daaroor.

Aan God alleen al die eer. Dit gaan nie oor my nie. Dit gaan oor Hom en die persoon wat Hy vir my stuur.

Toortsie

Ns. TPM is 100% Bybelgefundeerd. By TPM glo ons aan die Drie-Enige God. Ons aanvaar dat God ‘n Persoon in die TPM-kamer is en direk betrokke is by die proses. Ek is slegs die mentor/fasiliteerder tussen die kliënt en God. Ons gebruik geen vreemde tegnieke nie, ons maak nie kontak met dooies nie, ons gee nie raad nie, gebruik nie vreemde okkulte nie, roep nie geeste op nie, voorspel nie die toekoms nie. Dit is nie New Age nie. Dit is suiwer ‘n gebedsessie waar ek eenvoudige vrae vra soos: Hoe voel jy, hoekom voel jy so, is jy kwaad vir iemand, ens.

……..

Intussen het dinge baie hier by my verander. Lees ‘declutter‘.

Klippe ry en TPM

Vandat ek kan onthou, is klippe ry ‘n jaarlikse instelling aan die begin van die jaar hier in die Rûens. Jaar vir jaar word groot klippe van die lande af gery, net om dit volgende jaar weer te doen.

In my kinderjare is die klippe op kliphope gery sommer daar in die land, maar soos wat implimente groter en sterker geraak het, het die kliphope ‘n oorlas geword en moes daardie hope verwyder word. Klippe is dan in klowe ingery.

Ek het kleintyd al vir my pa gevra hoekom daar dan elke jaar weer klippe gery moet word? Die klippe is dan al verlede jaar verwyder. Waar kom die klippe dan elke keer vandaan?

Die ding is dat ons wêreld in die eerste plek klipperig is. Hier is baie klippe! Die ding is, aanvanklik word die groot, ooglopende klippe verwyder. Maar met die gewoel rondom daardie klip, kom daar ander klippies ook los. Ook, soos wat die grond bewerk word, kom nog klippies los. Dalk kleiner klippe wat nie so maklik raakgesien word nie, maar die implenente erg kan beskadig as hulle op ‘n verkeerde plek beland.

Dit is baie hoe Transformation Prayer Ministry (TPM) ook werk. Eers word die ooglopende ‘klippe’ verwyder, maar mettertyd, met die gefroetel aan die klippe, kom ander klippies ook los. Klippies wat soms amper onsigbaar klein is, klippies wat ons nie eers weet wat bestaan nie, maar ‘n erge klippie in die skoen kan wees. ‘n Klippie wat ongemerk groot skade of ongemak kan verrig.

Soos Dr Ed Smith, stigter van TPM ook sê, dat dit amper ‘n daaglikse proses raak om al die ongemakkies te verwyder, by God die waarheid hoor sodat die Heilige Gees ons kan reinig en ons al meer die vrug van die Gees sal dra.

Dat dit nie altyd ‘n maklike proses is nie, is gewis. Dit is amper soos om ‘n tand te laat stop. Geen lekker proses nie, maar die verligting daarná kan net op geen manier met die ongemak vooraf vergelyk word nie.

Die groot genade is dat Jesus Christus self betrokke is hierby. Dat Hy saam met jou in die boot is. Hy, die Seun van God, wat stormwater kan stilmaak. Jy is nie alleen nie. Hy help jou. En saam met Hom kan enige klip uit die pad gerol word. Kan ek en jy gereinig word. Kan ons meer vrug dra.

Toortsie

Scrapy se wasdag uitdaging: Vreugde

Ná verlede week se frustrasieblog, wat ‘n vreugde om oor vreugde te skryf! (Weeklikse bloguitdaging deur Scrapy.) Ek glo, dat selfs in die slegste van slegte omstandighede, wanneer jy voel of die aarde op jou omval, jy, as jy mooi kyk, dalk tog iewers ‘n ietsie kan kry waaroor jy bly kan wees. ‘n Stukkie hoop. Dalk is dit net ‘n sonstraal wat op iets skyn wat vir jou waardevol is. Of ‘n mooi sonsopkoms. ‘n Mooi wolk. Iemand in die skare wat vir jou glimlag. ‘n Hoopvolle SMS of Whattsapp uit die bloute …

Vreugde

Die vrug van die Gees is liefde, VREUGDE … In ‘n ry van omtrent 9 woorde wat die vrug van die Gees beskryf, word vreugde tweede genoem in Galasiërs 5:22.

Vreugde as ‘n kleinkind gebore raak. Vreugde as daar herstel in ‘n verhouding kom. Vreugde oor ‘n bui reën.

Die vreugde in die kelner se gesig toe hy die vrou wat alreeds vir twee jaar oorsee woon, by die restaurant sien instap. “Oh, my goodness! Are you here?”, en hy kom om haar ‘n drukkie te gee. En toe hy hoor dat sy terug is om te bly … v r e u g d e ! Opregte vreugde. 🙂

Vreugde wat jou selfs laat huil, so oorweldigend is dit.

Vreugde, elke keer wat jy in jou presenthuisie instap. Elke keer wat jy die see sien en dit raak jou hart. Vreugderoepe wanneer die munisipaliteit se dromskoonmakers ‘n houertjie vol lekkers op die drom sien staan.

Vreugde wanneer twee lewenslange vriende mekaar raakloop. Vreugde as jou kinders kom kuier. Jou kleinkinders kom kuier. Vreugde om kinderstemmetjies te hoor, kindervoetjies op houtvloere.

Vreugde wanneer twee mense wat mekaar liefhet, trou.

Vreugde is om my erg bejaarde ma ná ‘n hele klompie maande op ‘n afstand te sien en te sien dat sy positief is, ontspanne is en goed versorg word.

Vreugde wanneer iemand sy hart vir die Here gee. Na Hom draai. Sy sondes bely en wegdraai daarvan en regtig ‘n nuwe lewe begin.

Vreugde wanneer iemand deur Transformasie Gebedsbediening – Transformation Prayer Ministry (TPM) verligting kry van iets wat hulle al hulle lewe lank swaar dra. Vreugde dat God vir hulle waarheid bring. Vreugde dat hulle totaal bevry mag wees. Nie net die vreugde in die kliënt se hart nie, maar die vreugde ook in die fasiliteerder s’n, om die deel te mag wees van hierdie wonderwerk wat voor jou oë gebeur, die oorwinning. Hoe kan jy dit beskryf? Dit gee jou vlerke, vir jou as fasiliteerder asook vir die kliënt.

Vreugde om God se kind te mag wees. Gered. Verlos. Vergewe. Vir altyd.

Toortsie