Kategorie: Toortsie se voelgoedstories

Toortsie se voelgoedstorie 25 – Google is ‘n dame

~ Toortsie ~ 22 Kommentaar

Soos wat dit ongeveer twee jaar gelede verskyn het by Finesse se Voelgoedblogs.

Google is ‘n dame! 

Ja! Dit weet ek nou! Google is ‘n dame! Nie dat ‘n mens ooit anders sou kon dink nie, want daar is niemand wat soveel goed gelyk kan doen as Google nie!  

Maar hóé weet ek sy is ‘n dame? Omdat ek nou op my oudag geleer het van ‘Okay Google’. Ag, wat ‘n plesiertjie vir ‘n ou antietjie soos ek! Mensig! Dis nou te sê die keer wat ek onthou dit moet ‘Okay Google’ wees en nie ‘Hello Google’ nie.

Dít besef ek nou ook: Sy het ‘n bietjie van ‘n ingewikkelde temperament ook nog. Ek moet duidelik sê, ‘Okay Google’, nie op haar skree nie, nie met ‘n singerige stem nie. Eers wanneer sy voel ek sê dit reg, dán reageer sy.  

“Okay Google, navigate me to Artscape” … tjieng … en dan begin sy praat! “Okay Google, call Annie Pretorius” … tjieng … en daar lui die foon! “Okay Google, Raindrops keep falling on my head” … tjieng … en daar sing my foon die liedjie. Dis soos ‘n nuwe speelding!  

Maar voor ek dít kon leer, moes ek ook leer dat dit glad nie meer nodig is om adresse en GPS koördinate in te tik nie. Nee, ek tik net ‘Radio Tygerberg’ en daar gaan ons! Nou vra die mense vir my, waar is Radio Tygerberg, en al wat ek kan antwoord, ‘on your left’! ‘Your destination is on your left!’ Sowaar!

Behalwe dat Google vroulik is, was sy sowaar die hele wêreld vol en help sy hierdie plaastannie om die hele Kaap plat te ry. Hoe is dit dan dat ek dit nog nie besef het destyds toe ek die hele Gauteng platgery het op soek na Unisa nie? 

Maar waaroor ek steeds die mees opgewonde is, is dat Google vroulik is, dit beteken, ons kan haar vertrou! 

Groetnis 

Tong-in-die-kies-Toortsie 

 

Toortsie se voelgoedstorie 24

~ Toortsie ~ 40 Kommentaar

Soos wat dit verskyn het op Finesse se Voelgoedblogs in Augustus 2016. Ek wéns vir so ‘n pannekoekbakdag! Ons het reën baie baie nodig.

Toortsie se voelgoedstorie 23 – Die groenteboer van Suurbraak

~ Toortsie ~ 7 Kommentaar

Soos dit verskyn het op Finesse se Voelgoedblogs ‘n jaar of meer gelede.

Die groenteboer van Suurbraak

Elke keer as ek deur Suurbraak ry, dink ek aan my skoonpa.

Hy was ‘n groenteboer en het, behalwe die groente wat hy verbou het, ook verskeie vrugtebome gehad. Selfs nadat hy afgetree het en in die dorpshuis op De Rust gaan bly het, het hy aangehou om groente te plant en het hy ‘n groot verskeidenheid vrugtebome gehad. Behalwe die pampoene en aartappels en uie en wat ook nog, kon ons perskes, avokado’s, nartjies, lemoene en vele ander vrugte direk van hul bome af pluk en eet. Hulle was so te sê selfversorgend en het die minimum goed in ‘n winkel gekoop. Die hele erf was uitgelê met sementslootjies wat sy waterbeurt vergemaklik het.

‘n Mooi groentetuin het nie sommer ongemerk by skoonpa verby gegaan nie en een spesifieke tuin in Suurbraak het gou sy aandag getrek. Kort voor lank het hy by die groenteboer gestop en heerlik groentetuin gesels. Hy kon by hierdie man patatranke koop en ek glo dat skoonpa hom weer met ander groentesaad sou help. Hulle het mekaar se taal verstaan en lank nadat my skoonouers op Bredasdorp afgetree het, het skoonpa, wanneer hulle aartappels nodig gehad het, dit by sy groenteboervriend op Suurbraak gaan koop.

Toe ons die dag ná skoonpa se begrafnis deur Suurbraak ry, staan die groenteboer toe sowaar in sy groentetuin en kon ons vir hom ‘n begrafnisbriefie in sy hand gee. “O, is hy dood?”

Die Suurbraak-ryloper wat ons nou die dag oplaai vertel vir dat daar ‘n hele klomp denominasies van kerke is, dis VGK, Ou Apostels, AGS, nog ‘n hele paar kerke waarvan ek nie die name ken nie. Daar is ook ‘n paar Moslems, dis regte Moslems, mevrou. En ja mevrou, daardie oom, die groenteboer, is al ‘n hele paar jaar oorlede. Sy kinders woon nou daar in sy huis.

In hierdie bloginskrywing bring ek eer aan my skoonpa wat ons so mildelik geseën het met die groente wat hyself geplant het, maar ook aan die groenteboer van Suurbraak wat vir hom oor grense heen ‘n vriend was.

Groetnis

Toortsie

Toortsie by Finesse: Stel jou voor!

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif

Radio Tygerberg resensie

 

Toortsie se voelgoedstorie 22 – Malgas se pont

~ Toortsie ~ 8 Kommentaar

Soos gepubliseer by die Finesse Goedvoel Blogs lank gelede.

Toe ons by die pont stop, is my eerste gedagte: ‘In my kinderjare het oom Moksie Dunn hierdie pont alleen getrek, deesdae is daar drie manne wat die werk doen.’

Malgas se pont het nog altyd ‘n besonderse plek in my lewe. Kleintyd as daar mense kom kuier het, het ons klomp kinders ‘n draai gaan ry, en gewoonlik het dit ‘n rit oor die pont ingesluit. By Malgas is die enigste manier om oor die Breërivier te gaan ná al die jare steeds ‘n pont wat met mensekrag gesleep word.

Elke keer is dit ‘n belewenis. Drie manne bring die pont in beweging en sleep hom tot aan die ander kant met kettings. Dag in en dag uit, drie motors op ‘n slag. Ons wag vir die pont wat sy vrag van die ander kant af sleep, en toe ons weer aan die ander kant kom, staan die volgende drie motors alreeds en wag.

Maar hierdie drie manne besoedel nie hulle gedagtes met verkeerdhede nie. Hulle gesels met die kliënte, vertel ‘n grappie, beantwoord die vrae. Dit kan voorwaar nie ‘n maklike werk wees nie, maar hulle doen dit met ‘n glimlag op die gesig, hanteer elke persoon beleefd.

Net een rit met die pont is nodig om te besef: Ek het die wêreldse respek gehad vir oom Moksie wat dit man-alleen gedoen het, maar ek het ook die wêreldse respek vir hierdie drie manne wat hulle dagtaak met soveel vreugde verrig.

Wát ‘n les om te leer: Dit maak nie saak wat ons doen nie, solank ons dit met vreugde, asof vir die Here doen, maak ons ‘n verskil. En daardie drie manne maak beslis ‘n verskil. Nie net ten opsigte van die gerief van soveel mense nie, maar ook aan gesindhede. Hulle is beslis ‘n voorbeeld! ‘Do what you do, do well, boy.’

Mooi loop

Toortsie

Toortsie by Finesse: Toe kom die reën

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif

Transformation Prayer Ministry: Bredasdorp en Riversdal

Toortsie se voelgoedstorie nr 21 – Elim

~ Toortsie ~ 5 Kommentaar

Soos gepubliseer by Finesse Goedvoelblogs iewers ‘n jaar of wat gelede.

Ek en my dogter het in die motor voor Elim se kerk sit en wag dat die orkes moet kom oefen, half 8 die aand.

Elim is ‘n Morawiese sendingstasie. Dit was donker en doodstil, net hier en daar het ‘n straatlig gebrand. Al stemme wat ons hoor was dié uit ‘n klein kafeetjie daar naby. Drie seuns kom speel-speel met ‘n bal verby. Die rustigheid en vreedsaamheid was voelbaar.

Saam met die orkesleier het ons in die groot, wit kerk met die spierwit houtbankies gaan sit en gesels. Ek kon nie anders as om terug te dink aan een aand toe ‘n Elimiet ons genooi het na die Paasnagmaal nie. Die hele week voor Paasfees word voorbereidings getref vir die Paasfees. Een dag stap die hele dorp na die begraafplaas en gaan sit blomme op die grafte. Alle Elimiete wat in die afgelope jaar gesterf het, word onthou. Die huisies word wit geverf vir die Paasfees. Vis word ingelê.

Donderdagoggend voor Paasfees is die kerkdiens en die aand word die nagmaal bedien. Toe ons sterk skemer die dorpie inry, is die strate vol mense op pad kerk toe, die dames in wit geklee, die mans in swart. Kan jy jou die gesig voorstel?

In die kerk sit die dames en mans apart. Een deel van die kerk gevul met spierwit geklede dames, die ander helfte die mans in die swart pakke.
Daar is baie gesing, die een lied ná die ander, terwyl die brood en die wyn bedien word. Hou die lied op, stop die bediening. Sodra die sang weer aangaan, gaan die bediening voort. Op ‘n stadium, in die middel van ‘n lied, staan almal op en begin mekaar groet, en aan die einde van die diens, weer so!

Almal drink uit dieselfde beker wat van persoon na persoon aangegee word. Daar is darem ‘n paar bekers om die bediening te bespoedig.

Wat ‘n belewenis! God is hier teenwoordig!

Toortsie

Toortsie by Finesse: Ek wou so graag groot dinge vir die Here doen.

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal