My vrese

Ek deel graag ‘n bybelstudie wat ek aangebied het oor my vrese. Dit was ‘n groepstudie, maar ‘n mens kan dit ook op jou eie doen. Dis my wens dat ons almal iets hieruit sal kry, dat ons sal groei in ons geloof in God.

In ‘n groep wil ek graag hê dat mense spontaan sal saampraat en sê wat in jou hart opkom. Daar is nie ‘n verkeerde en ‘n regte antwoord nie. Dis die Heilige Gees wat die woorde in ons gedagtes laat opkom en deur dit vir ons ander te sê, word ons almal daardeur gevoed en groei ons.

(Die vrae is in gewone skrif, my eie antwoord in ITALIC.)

  1. Raak julle ook soms bang? Raak julle ook angstig? Vang die gejaagdheid van die lewe julle ook soms? Voel dit soms of julle net nie weet watter kant toe nie? Dis hier vat en daar los, maar dit wil net nie reg werk nie? (Ek is aandagafleibaar en laai heeltemal te veel hooi op my vurk. Ek jaag van punt A na punt B en soms kan ek net nie by myself byhou nie.)
  2. Vertel ‘n bietjie. Wat maak julle dan? Wat werk vir jou as jy bang is? Hoe kan jy dit vir jouself rustiger maak? Wat moet jy vermy? Wat moet jy eerder doen? Wat werk vir jou? (Gaan stap langs die see, draf, kuier saam met iemand. Die grootste fout wat ek kan maak, is om my stiltetyd sulke tye af te skeep. Al wat vir my werk is ‘n goeie stiltetyd waar ek net rustig raak by die Here.)
  3. Kom ons praat oor stiltetyd. Hoe hou julle stiltetyd? Wat werk vir jou? Watter tyd van die dag? Vir hoe lank? Wat doen jy tydens jou stiltetyd? (Vir my werk dit nie om net gou vinnig ‘n paar sinne te bid en Bybel te lees nie. Ja, ek doen dit baie keer, maar dit is eintlik maar oneffektief. Wat vir my werk is om iewers deur die dag, later in die dag wanneer al die ander goed wat my aandag aftrek, uitgesorteer is, rustig te raak by die Here. Dan bid ek ‘n paar sinne en skryf ‘n A4 bladsy in my joernaal vol. Ek skryf daar alles wat in my hart aangaan. Dit help my om te fokus en soms skryf ek daar dinge wat ek nooit gedink het in my hart is nie, net omdat ek rustiger raak. Ek bid vir my gesin en ons predikante. Dan lees ek ‘n stuk uit die Bybel, daar waar my merk is. En as daar tyd is, doen ek ‘n stukkie bybelstudie uit ‘n boekie.) Ek raak net stil wanneer ek stil raak by God. Net Hy kan my rustig maak. As ek onrustig raak, het ek ‘n ‘goeie stiltetyd’ nodig. Dis ál manier wat ek deur ‘n dag sal kom.
  4. Terug by bang. Wil enige van julle vertel van ‘n keer wat julle bang was/moedeloos was/met jou rug teen die muur, wat julle met God deurloop het? Wat het julle gemaak? Wat het God gedoen? Hoe het jy daardeur gekom? (Die afgelope tyd het God weer behoorlik ‘n pad met my geloop. Hierdie Swart Maandag ding het my geruk. Ek het dit ondersteun, maar nie gedink daaraan dat die veglustiges aan beide kante van die spektrum dit weer sal misbruik nie. Daardeur is ons boere net weer baie meer blootgestel as voorheen. Ek is bang!)  Ek wil dit baie sterk beklemtoon dat hierdie studie nie gaan oor ras of geslag of enige so iets nie. Dit gaan oor my verhouding met God en ook Sy verhouding met Sy kinders, ongeag wie en wat hulle is. 
  5. (Lees saam met my deur Jesaja en kyk ‘n bietjie hoe God met my gepraat het. Neem ook die verse vir jou daar in jou onsekerhede. )

Jes 16:4(b)-5

Jes 17:7

Jes 19:19-22 (God wil hê dat almal Hom moet ken, ook hulle wat Sy vyande is)

Jes 22:11(b) (God praat ook met ons as Christene. Ons moet ons bekeer. Nie net die Here aanneem as ons Saligmaker nie, maar ons werklik bekeer van dit wat ons verkeerd doen. God wil hê ons moet ons lewens ondersoek en kyk waar ons steeds sondig en ons moet regmaak. Ons moet ophou sonde doen en nie maar net dink dit is okay nie.)

Jes 25:1, 4 (Ja, God is vir ons ‘n toevlug in ons nood, en dit is Hy wat my bang hart gehoor het. Dit is Hy wat my elke dag wat die bang maar weer wil kom, kom kalmeer en troos.)

Jes 26:2-7 (God kyk na Sy kinders. En hier wil ek baie duidelik sê, ongeag ras of kleur of nasie. Hy kyk na Sy kinders wat Hom ken en dien. Dit beteken natuurlik nie dat ons dit altyd maklik sal hê of dat daar nie iets met ons kan gebeur nie, ons leef immers in ‘n sondige wêreld. Maar ek weet dat, maak nie saak wat met my gebeur nie, selfs al gebeur die dinge waarvoor ek bang is met my, kan niemand my uit Sy hand ruk nie. En ek WEET dat Hy my soveel keer beskerm wat ek nie eers daarvan bewus is nie. Hy doen dit sommer net. Hy doen dit ook vir jou.)

Jes 27:2-3 (Dink ‘n bietjie, hoe sorg God elke dag vir ons? Sommer in die klein dingetjies, waarin sien jy God se sorg raak? Waarin het jy VANDAG Sy sorg gesien?)

Jes 28:26, 29 (God gee ons kennis. Hy rus ons toe. Deur tyd met Hom te spandeer, rus Hy ons toe vir Sy werk.)

Jes 29:13 (Weer spreek God ons aan. Ons moet Hom ernstig opneem.)

Jes 30:15 (b) (Ons moet stil raak en vertroue in Hom hê. Hier dink ek sommer aan die opswepery wat in die media en veral op Facebook en ander sosiale media gebeur. Dis nie vir ons goed om alles te post wat die mense waarvan ons nie hou nie. Daardeur gee ons vir hulle mag en help ons hulle in hulle veldtog teen ons. Ons saai vrees. Dis beter om daardie posts te blok sodat ons dit nie sien nie. Moenie daarop reageer nie. Ons weet mos daar is mense wat ons haat, ons hoef dit nie by onsself in te vryf nie.)

Jes 30:18-19

Jes 35:3-4 (Dis ons roeping. Ons moet mekaar bemoedig. Ons moet mekaar ophelp.)

God is ons redding. By God kan ons skuil. Nee, ons het nie mag oor mense wat wil verwoes en verniel nie, maar ons weet dat, ongeag wat, ons veilig is in Hom, en sou ons iets oorkom, ons dan vir ewig by Hom sal wees.

Groetnis

Toortsie

 

Advertisements

As ‘n deel van die liggaam swaarkry

Of ons nou praat van die kerk, of die gemeente, of selgroep, of dorp of stad of gemeenskap, noem maar op, saam maak die ‘groep’ ‘n liggaam.

In 1 Kor 12 beskryf Paulus die liggaam met sy baie dele, elkeen van ons ‘n besonderse deeltjie. Elkeen van ons het sy eie gawes en doel. Sommige van die deeltjies of lede van die liggaam is meer prominent as ander, maar die liggaam kan nie optimaal funksioneer as al die dele nie daar is nie.

Ek lees iewers van ‘n persoon wat gebreek het met haar familie. Ek is nie hier om te oordeel nie, ons het elkeen ons redes hoekom ons goed doen. Ek kan net vir en namens myself praat.

In elke familie gaan dit nie aldag goed nie. Soms raak dinge maar erg warm onder die kiewe, ons is immers verskillende mense met verskillende persoonlikhede wat saam ‘n lewe probeer maak.

‘n Mens is geneig om makliker te haak met die kind of ouer wie se persoonlikheid met joune ooreenstem. So het ek en my ma in ons lewe baie vasgesit. Erg vasgesit. Rof vasgesit. Soms, in my jonger dae, het ek ook gevoel om eerder die afstand te handhaaf, ek glo sy het ook so oor my gevoel. Maar bloed is dikker as water en elke keer is ons terug na mekaar, soms met groter sukses as ander tye.

Vandag kyk ek met dankbaarheid terug dat ons elke keer weer probeer het, dat ons nooit ons probleme groter gestel het as ons verhouding nie. Vandag is sy broos, afhanklik en het sy my goedheid nodig en is ek dankbaar om vir haar op ‘n manier te kan help.

1 Kor 14:26: ‘As een lid ly, ly die hele liggaam. ‘

Skeuring in ‘n gesin bring ontroosbare hartseer. Dit bring ‘n pyn wat mens nie kan wegdink, wegwens of wegredeneer nie.

Vanoggend het ons dominee Corney so mooi gesê: ‘Op die ou end maak elkeen van ons ons eie keuses, is ons verantwoordelik vir ons eie keuses en kan ons nie ons ouers die res van ons lewens vir ons eie verkeerde keuses blameer nie. ‘

Mag God ons help om ons gesinne te beskerm. Die duiwel loop rond soos ‘n brullende leeu en kyk wie hy kan verslind.

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Toortsie by Pinterest

Plaasakkomodasie by Riversdal, Wes-Kaap

 

‘n Lieflike geur

Fil 4:18: ‘Julle gawe is voor God ‘n offer met lieflike geur, vir Hom aanneemlik en welgevallig. ‘

Wanneer ons die boodskap van God vir ander uitdra en hulle die Goeie Nuus hoor, is dit soos wanneer ‘n mens parfuum spuit, dis ‘n lieflike geur wat versprei. Enige iets wat ons doen tot opbou van die Koninkryk, elke gawe, elke goeie daad, versprei die geur.

Die lieflike geur wat die oorwinning in Christus bring, het ook ‘n teenoorgestelde kant: die doodsreuk wat die dood bring.

In 2 Kor 2 word geskryf dat as ons die kennis van Christus versprei, dit soos wierook is wat gebrand word en ‘n aangename geur versprei vir almal wat gered word.

Ons kan nie dié nuus net vir onsself hou nie, ons kan nie net sit en ontvang en dit nooit oorgee vir ‘n volgende persoon nie, dan is ons soos die Dooie See wat net ontvang en ontvang en al hoe souter word en niks kan daar lewe nie. Nee, dit was ‘n opdrag van Jesus dat ons dit moet uitdra, gaan vertel, en dan word ons verspreiders van ‘n lieflike geur.

Juis daarom is dit ook belangrik dat ons sendelinge en uitreikaksies moet ondersteun, plaaslik sowel as internasionaal. Die oes is groot, die arbeiders min en al manier wat mense van God kan hoor, is as iemand vir hulle dit vertel. God verwag dit van ons.

So, my uitdaging aan my en jou is, kom ons begin dink hoe onsself botteltjies parfuum kan word wat die Goeie Nuus van Jesus kan versprei.

Telling people about Jesus is like spraying perfume with a wonderful scent. 

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Om te pendel saam met jou man

Toortsie by Pinterest

Plaasakkomodasie by Riversdal, Wes-Kaap

Die vreugde van die Opstanding

Paulus skryf, dat as Jesus nie opgestaan het nie, ons geloof niks beteken nie. Alles gaan oor die Opstanding!

Jesus is gekruisig, Hy het ‘n onmenslike lyding deurgegaan. Ek dink nie ons kan ons enigsins indink wat dit behels het nie, want terwyl Hy besig was om hierdie pad te loop, het Satan alles in sy vermoë gedoen om dit te keer. Ja, die verhaal speel af waar dit lyk of dit deur Satan georkestreer is, maar hy sou alles in sy vermoë doen om Jesus van daardie kruis te hou, want hy het die ware omvang daarvan besef. Hoeveel keer het hy Jesus probeer verlei om te sondig, om van besluit te verander, maar Jesus het die pad geloop. Tot op die end.

Die Sondag het Hy opgestaan! En DIS waaroor ons geloof gaan. Dís wat ons geloof waarde gee, want Hy beloof in die Bybel dat, deur in Hom te glo, ons nou dieselfde krag in ons het wat die opstanding bewerkstellig het, dat onsself groot dinge kan doen in gebed!

Ek vang myself dat ek nie altyd gelowig bid nie, dat sekere dinge net vir my onmoontlik lyk, dat ek moed verloor. Hierdie naweek het hierdie gedagte keer op keer by my opgekom, dat dinge dalk onmoontlik lyk, maar ons nié moet opgee nie! Ons moet vasklou aan die Een wat opgestaan het.

In my soeke na die regte teksvers, ‘n keuse van twee, naamlik die een wat sê dat ons geloof niks beteken as die nie vir die opstanding was nie (1Kor 15:14), en ook die vers dat dieselfde krag wat die opstanding te weeg gebring het, nou in ons werk, kry ek toe hierdie een:

1 Kor 4:20: ‘Die koninkryk van God is immers nie ‘n saak van praatjies nie, maar van krag. ‘

Mag ons God se krag in ons lewe ervaar, mag ons dit gebruik tot eer van die koninkryk en tot opbou van onsself en van ander. Mag ons in geloof bid, daar is immers geen kragtiger wapen as gebed nie!

Groetnis

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Om te pendel saam met jou man

Toortsie by Pinterest

Plaasakkomodasie by Riversdal, Wes-Kaap

Wat as?

Ek het twee fobies: ‘n Spinnekopfobie en ‘n vuurfobie. Die spinnekopfobie weet ek nie waarvandaan sy oorsprong is nie, die vuurfobie wel.

Ek was vyf jaar oud toe ons bure hulle grond verkoop het. Die aand ná hulle trek weggelaai is, het hulle by ons kom slaap. Daardie aand het ek in my ouers se bed gaan lê solank die grootmense kuier. Toe ek die lig afskakel, het dit nie kliek gemaak nie.

Die volgende oggend toe ek wakker word, was daar konsternasie. Gelukkig het my ma iets in die kamer kom haal en toe die rook gesien: Daar was ‘n kortsluiting en al die elektriese drade het gesmeul. Ek kon versmoor het.

Net daar het ‘n fobie ontstaan en soos ek ouer word, het dit groter en groter geword, alhoewel ek dit deesdae met my gesonde verstand beheer. Maar ek raak steeds angstig naby ‘n groot vuur. Ek hou nie van donderweer nie omdat dit dit veld aan die brand steek, en ‘n kar wat omval op TV slaan altyd aan die brand!

Ek lees in die wonderlike boek,  Taste Life, Healing the Wounded, deur Francois Mostert, van leuens wat ons glo as gevolg van ons foutiewe interpretasie van gebeure.

As ek nou eerlik daaroor dink, het ek rustig geslaap terwyl dit gebeur het. Sekerlik was my onderbewussyn daarvan bewus, maar ekself weet niks daarvan nie, tot die oggend toe ek op die konsternasie afkom en hoor wat gebeur het en hoor wat kon gebeur het, dat ek kon versmoor het in die rook as my ma nie daar opgedaag het nie. 

En danksy hierdie boek wat sekere situasies as voorbeelde gebruik, wys God skielik vir my: Hy was daar! Hy was daar toe die kortsluiting gekom het. Hy was 100% in beheer. Hy het gesorg dat my ma iets in haar kamer wou gaan haal en sodoende op die rook afkom. Hy het ook gesorg dat die hele huis nie afbrand nie. Hy het my die hele tyd beskerm! Die ‘wat as’ dra nie gewig nie, want die ‘wat as’ het nie gebeur nie.

Die duiwel het hierdie geleentheid vasgegryp om ‘wat as’ in ‘n fobie te verander, maar danksy die waarheid wat God my nou gewys het, kan die fobie teengewerk word. Want dit gaan nie oor dit wat kón gebeur het nie, maar dit wat wel gebeur het: God het voorsien. Ek was beskerm. Hy het my ma betyds gestuur om my te kom red.

Ps 40:5-6: ‘Dit gaan goed met die mens wat sy vertroue in die Here stel en hom nie wend tot duister magte en tot mense wat hulle met skyngode ophou nie. Here my God, U het baie wonderlike dinge gedoen; U dink altyd aan ons; daar is niemand soos U nie.’

Believing in God is not MEANINGLESS at all, in fact, it has all the meaning in the world!

Groetnis

Toortsie

English Blog Posts

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Wat maak die verskil?

Toortsie by Pinterest