Lê jou eier – Toortsie se Woordsnoere 1

Ek wil vir julle ‘n storie vertel, eintlik is dit ‘n komedie, en as jy dit lees, mag jy dalk dink ek is kens, maar jy moet oppas om in daardie slaggat te trap, met die Towerinne weet ‘n mens nooit waar hulle hulle kleims afsteek nie.

Die Towerinne is so vol lewenslus, ek sal julle met graagte ‘n ietsie daarvan wil vertel, maar ek weet nou al dat as ek eers begin, dit moontlik tot chaos kan lei of selfs ‘n hewige reaksie uitlok. As jy hulle, die Towerinne, bymekaargooi, kan jy maar weet dat jy ‘n resep het vir iets totaal onverwags, makaber selfs.

‘n Mens kan hulle ook glad nie isoleer nie, of hulle met enge oë bekyk nie, om die waarheid te sê sal dit goed wees as jy die lens wat jy gebruik, selfs ‘n bietjie tint om die regte beeld te kry. Weet net dat dit wat jy gaan aanskou, fenomenaal sal wees, moedermooi, amper soos ‘n engelekoor, of ‘n oerangoetang in die wildernis. Die kans is goed dat jy selfs 14 dames sal sien wat kleurvol gesmeer is met oker, wat enige skuinste in hulle lewens sal gebruik as ‘n geleentheid om af te gly.

Dus, maak ‘n memo, teken aan, want weet, die Towerinne is al weer besig met ‘n nuwe uitdaging.

En net indien jy, soos ek aan die begin voorspel het, dink ek is kens ná jy hierdie gelees het, wil ek net sê dat die rede vir hierdie gegorrel is dat Lekkervurig ons uitgedaag het om hierdie woorde wat almal in swart gedruk is, op ‘n manier te gebruik. Ek gebruik graag die Towerinne as onderwerp omdat hulle my na aan die hart lê, ons is eintlik soos een soma, een liggaam, as ek die woord reg verstaan.

Dit is my bede dat die Towerinne dalk eendag op ‘n reëndag tog te lekker sal saamkuier. Wie weet, dalk gebeur dit tog.

Het jy ook lus vir saamspeel? Skryf dit op jou blog. Gebruik een of meer van die woorde as inspirasie en onthou om die skakel te gaan plak by INLINKZ, waar jy ook sommer al die ander blogs kan lees.

Toortsie

My tyd in die towerpaleis -uitdaging

Lê Jou Eier Musical Chairs: Uitdaging 

……………………………………………..

Hier het ons nou sowaar ‘n koningin in die midde! Onse koningin Camilla bevind haar in haar towerpaleis, in die pragtige Oostenryk, anders as haar naamgenoot wat in Brittanje bly.

Die liewe Camilla met haar hart van goud het, soos ek in die vorige bloginskrywing gesê het, ons almal genooi om by haar in die paleis te kom bly. Daar is regtig plek vir ons almal, selfs al was jy nie by die Toweropstal betrokke nie.

Ons kan elkeen self besluit hoe ons ons gaan besig hou, maar ons hoef ons regtig nie dood te werk nie, daar is heeltemal genoeg bekwame personeel om die werk te doen.

Terwyl Hester die aflosstokkie in my hand gesit het om die nuwe uitdaging daar te stel, is dit as volg:

Skryf van jou tyd in die towerpaleis daar in Oostenryk. Watter tyd van die jaar is dit? Wat doen jy alles? Waarvoor is jy verantwoordelik? Skryf dit op jou eie blog, jy mag skryf net soveel keer jy wil. Onthou net om elke keer na hierdie bloginskrywing te verwys en dit te tag en ook om die paddatjie onderaan te sit. Jy mag selfs, as jy nie ‘n blog het nie, jou verhaal op jou Facebook skryf, maar steeds met dieselfde reël: Tag hierdie bloginskrywing. Jy het kans tot volgende Donderdag, wanneer die uitdaging sluit en die volgende persoon aangekondig word om die uitdaging te stel.

Komaan, trek los die brieke, trek aan die tabberts, dis nie aldag dat ons die voorreg het om in ‘n paleis te bly nie. Julle moet julle gedra, hoor! Ons kan nie vir Camilla in die skande steek nie!

Groetnis

Toortsie

Om die inskrywings van verskillende bloggers in die Lê-Jou-Eier uitdaging te geniet of om self ‘n eier te kom lê wat ons kan uitbroei en grootmaak, klik op die InLinkz skakel net onder die paddatjie:

http://www.inlinkz.com/new/view.php?id=776174

Toortsie by Finesse: Op die spore van die meesters met Uber

Toortsie se Facebook Page

Toortsie se Bantingresepteboeke Facebook page

Toortsie’s English Blog Posts

Kruinsig Plaasakkommodasie, Riversdal

Toortsie by Finesse voelgoed tydskrif

Radio Tygerberg resensie

Blogspeletjie

Lank, lank gelede, het ons graag blogspeletjies gespeel. Toe het dit doodgeloop. Hierdie een was my gunsteling.

Julle mag vir my iets vra, en ek moet dit met ‘n liedjie antwoord. Jy mag meer as een vragie ook vra, maar elkeen in sy eie kommentaar, want hoe gaan ek anders vir jou antwoord. Moenie moeilike vrae vra nie! Ek is al ‘n ouma en my kop is spierwitgrys!

Let’s go! Vra die vragie. Skoon vrages, né! Ek hoop ek kan julle antwoord! 😱 Bang is ek nou!

En dan daag ek julle uit, sit dit by julle ook op sodat ons vir julle ook kan vra.

Toortsie

Moeilikheid!

Ek is in GROOT moeilikheid! Laviga, die mooiste en slimste heksie in Blogland, het verjaar, ag askies, vervel, en ek… het eerstens nie vir haar op die regte dag geluk gewens nie, en en het nie vir haar ‘n geskenk gegee nie! Die vriendskap is in GROOT GEVAAR!

So, eerstens, liewe Laviga, ek is jammer ek is JAMMER EK IS JAMMER!!

Omdat ek nou klaar die koek en koeldrank gemis het, sal ek seker my eie moet gee…

 

Dan weet ek Viga is BAIE lief vir lekkers… Hierdie, Viga is net vir jou!

Maar die spesiale geskenk wat ek net vir Viga uitgesoek het…

… ‘n Splinternuwe besem!! Hoop hy vlieg lekker! 🙂

Liefdetjies…

O ja, ek wil nog altyd jou maatjie wees, hoor jy!

Tannie Tossel

Gee fantasie vrye teuels

My liewe blogmaat, Kameel, floreer op ‘n uitdaging. Sy hou daarvan as jy vir haar ‘n onderwerp gee om oor te skryf. So vra ek haar uit die bloute om oor hierdie onderwerp te skryf: “Gee fantasie vrye teuels.” Goed en getrou soos sy is, skryf sy toe dadelik. 🙂 Oulike ding!

So in die gesels op my blog, daag ek ook vir Scrapydo uit om ook hieroor te skryf, en raai wat, sy is NET so oulik en skryf haar stuk.

Toe ek vir Kameel uitgedaag het, het ek sommer daar by die kommentare vir Seegogga ook uitgedaag. Ek dink nie sy het dit gesien nie, maar as ek aan haar dink, dink ek aan feetjies en kabouters. So Seegogga, hier daag ek jou nou amptelik uit: Gee fantasie vrye teuels.

Ek weet Rondomtaliedraai het op Litnet elke week ‘n bloguitdaging gesit. Ek weet nie of dit nog gebeur of voortgaan nie? Ek het so hier en daar van die uitdagings aanvaar, en ek weet my Kameel maat het gereeld geskryf oor van die uitdagings.

My bloguitdaging aan julle, aan almal wat lus het, is: “Gee fantasie vrye teuels.” Skryf daaroor op jou blog, onthou om hierdie bloginskrywing te tag, en as jy wil, gaan plak dit op ons faceboekblad ook.

As jy lus het vir saamspeel, sê ek baie dankie. Kom ons maak van blogland ‘n fantasieparadys!

(Die soekenjinterm wat die heel meeste mense na hierdie blog bring, is “mondeling onderwerpe”. Sal dit nie ‘n lekker mondeling onderwerp wees nie?)

Groete

Toorts