My Facebook is gehack

Nee! Gelukkig is myne nie gehack nie, of eerder, ek hoop nie so nie! Dit is egter iets wat ‘n mens deesdae baie hoor. Of, dat die Messenger gehack is.

Dis dan wat mense sommer hulle Facebook of Messenger toemaak.

Wat ek nou hier skryf, is dalk heeltemal verkeerd en ver van die waarheid en julle moet my asb nie volg nie, ook nie vervolg nie. Dis egter my mening oor hierdie hele storie.

Ek dink dat jou Facebook NIE gehack is nie, maar dat die skelms ‘n kopié maak van jou Facebook. Hulle skep ‘n heel nuwe profiel met jou naam en jou foto. Sover ek weet, is ‘n mens se vriende nie ‘n geheim nie en kan enige persoon sien wie iemand se fb vriende is.

Dus, nadat hulle jou profielfoto en selfs die foto bo-aan jou bladsy gekopieer het, begin hulle jou vriendelys een vir een uitnooi om vriende te wees. (Dis wanneer mense dan begin onraad vermoed en vir die persoon sal sê haar fb is gehack, wat nie die geval is nie.)

Dieselfde gebeur met messenger. Hulle begin dan vir jou boodskappe stuur waarin jou ‘vriend’ vertel sy het ‘n klomp geld gewen en glo jy my dan nie, dink jy ek lieg, ens.

Persoonlik dink ek nie dit is nodig om jou fb profiel en jou messenger toe te maak nie as hulle jou gekopieer het nie. Dis dalk goed om soms jou wagwoord te verander.

Wat ons egter wel kan doen, is om nie ‘n tweede uitnodiging van dieselfde persoon te aanvaar nie, veral as die persoon net een of twee vriende het nie, dis dalk ‘n lokval. Weet jy redelik seker dat dit ‘n skelm is, sê nee vir die versoek. Is daar ‘n plekkie wat jy kan sê hoekom nie, kliek dan dat dit ‘n skelm is wat probeer om iemand anders na te maak. (Hierdie opsie is beslis by Messenger.) Wees versigtig met wie jy as fb vriende aanvaar en gaan soms deur jou vriendelys en bedink hulle. (Dis ook iets wat ek ‘n slag moet ernstig opneem!)

En verder, oppas wat ons op fb deel. Ook ék moet hierna kyk. Ons kan so maklik gevang word.

Toortsie

Advertisements

Lê jou eier: Ontrommel my elektroniese wêreld

In opdrag van Hester.

Ek is maar ‘n sentimentele een en al gooi ek ook maklik goed weg, maak ek maar graag bymekaar ook. Dis vir my moeilik om waardevolle goed sommer net weg te gooi, net môre kry ek dit weer nodig. Of nie.

Ons elektroniese dinge kan maklik ons lewens oorneem, en daarom moet ons nogal strenger wees met dit as met ander dinge. Hierdie bloginskrywing mag dalk negatief oorkom, maar dis ongelukkig hoe ek my elektroniese wêreld ontrommel. Verskoon my as hier ‘n paar Engelse woorde ook deurglip.

Hoe ontrommel ek my elektroniese wêreld? Danksy die tegnologie dring mense ons lewens ongenooid en ongevraagd binne.

  1. Blogs en Facebook:

Ek stel alle kennisgewings per e-pos af. Ek lees net blogs wat vir my lekker is en as ‘n blogger op ‘n gereelde basis vir my ‘n wrang smaak in die mond gee, verkies ek om dit nie te lees nie, net soos ander weer nie by my lees omdat ek nie skryf waarvan hulle hou nie.

Om mee te begin, is my foon se klank af. Dit is permanent op ‘silent’. So min mense bel deesdae nog en ‘n mens raak nogal gewoond aan die stilte, dat jy hoor as iemand bel.

Besliste nee’s by blogs en Facebook:

  • Mense wat my God onteer deur hulle inskrywings of kommentare.
  • Mense wat my Christenmaats op my FB verkleineer oor ons geloof.
  • Mense wat disrespekvol teenoor die ander mede-gebruikers is.
  • Mense wat keer op keer kla oor reën. Onthou, my lewe hang af van reën. Dit maak seer. Baie seer. (Ek kla nie oor jou salaris nie!)
  • Mense wat my keer op keer op FB ‘reghelp’ op ‘n ongeskikte manier. Jammer, as ek dan so pateties is, kan jy my bel en ons praat dit uit, maaar nie in die openbaar nie. (Dit het darem nog net een keer gebeur.)

Nee’s op Facebook:

Ek geniet FB baie, veral as mense lekker lawwe en geselsgoedjies opsit, waarmee ‘n mens kan saamkuier. Selfs lawwe foto’s is ook pret.

  • Mense wat die meerderheid van tyd negatiewe goed opsit.
  • Mense wat van my Facebookmuur misbruik maak om hulle advertensies op te sit.
  • As ek agterkom dat ek wel jou FB maatjie is, maar ek kan niks van jou goed en foto’s sien nie, dan wonder ek …
  • Ek sit baie gou die kennisgewings van kommentare af wanneer ek by iemand kommentaar gelewer het.

2. Nee’s op E-pos:

  • Alle gemorspos is uit. Ek blokkeer dit onmiddellik.
  • Ek wil nie graag al die mooie video’s wat mense so graag van die een persoon na die ander aanstuur, ontvang nie.
  • Slegs een e-posadres. My werk het vir twee jaar van my vereis om ‘n tweede e-posadres te hê, dit is gelukkig nou weer gekanselleer.

3. Nee’s op Whattsapp

Voor ek die nee’s skryf, wil ek eers sê: Ek is mal oor whattsapp. Om te gesels op WA. Dis vir my HEERLIK as jy vir my laat weet hoe dit met jou gaan en ons gesels sommer ‘n lang stuk. Met regte woorde. Maar …

  • Hierdie is ‘n moeilike een, omdat die persone wat twee keer per dag vir jou ‘n mooi prentjie aanstuur, gewoonlik die hand van vriendskap nodig het.
  • Video’s per whattsapp is uit. Dit is ook my boodskappie op Whattsapp: ‘Asseblief, geen video’s. Dankie’. Dis lelik, maar ek het nie tyd óf genoeg data om almal se video’s te kyk nie, en as dieselfde video al die tiende of twintigste keer vir my gestuur word, wil ek skree, selfs al is dit ‘n baie mooi video.

4. SMSse en oproepe

Jammer, Foschini, Solidariteit, die DA, ATKV, en wie nog almal vir my promosie-smsse stuur. Julle nommer word summier geblok. Ook as julle my bel en ‘n rekenaarstem begin met my praat. ‘Call-centres’ is UIT. Julle bel my net EEN keer, dan word julle geBLOK. Ek is GOED met nommers blok.

Ek is die baas van my elektronika, nie die elektronika die baas van my nie. Laat ek dit so hou!

Nou het ek heeltemal te veel geskryf en sal nog hierdie bloginskrywing ook moet ontrommel!

Groete

Toortsie

Kyk wat skryf die ander blogmaats oor ontrommeling. 

Facebook is ook nie meer Facebook nie

Kinders was nog kinders toe ons nog kinders was

Ja, alles verander voortdurend. Ook Facebook. Die nuutjie is oor. Daar is nog net ‘n paar lawwes, soos ek, wat gereeld goed op Facebook publiseer.

Iewers in die verlede was FB ‘n lewendige platvorm wat my van totale vereensaming gered het. Dit was ‘n plek waar ek met ander regte, lewendige mense gekommunikeer het. Dit was lekker. Ons was laf. Ons het grappe gemaak. Soms selfs moeilikheid opgetel.

Maar dinge het verander.

Die deelnemers het totaal verminder. Daar is min wat iets oorspronkliks opsit, die meeste is goed wat ge’share’ word.

Op ‘n stadium het dit begin gebeur dat ‘n mens nie meer almal se goed sien wat publiseer nie, net ‘n paar mense se goed word gewys.

Vir my beteken Facebook geweldig baie vir my boek en ook vir my blog. Facebook het baie mense na my blog gebring en ek is seker hy doen dit steeds, alhoewel ek vermoed dat Google nou die hoofbron van klieke raak op my blog. My boeke sou nie die sukses wees wat dit was as dit nie vir Facebook was nie. Daarom is dit vir my ‘n bekommernis as daar iets met FB gebeur!

Waar FB veral baie vir my boek beteken het, was dat ek ‘n page kon maak net daarvoor. Mense wat my fb vriende is, maar nie belangstel in Banting nie, hoef nie die goed te sien wat ek opsit nie. En ek het my ook getroos daaraan dat die mense wat die page volg, dit WIL volg, niemand is gedwing nie.

Wat ook lekker was, was dat ek tot soveel as drie maande vooruit goed kon skeduleer. Ek sou een aand amper deurnag werk en sommer die volgende drie maande se posts doen. Of, terwyl ek kosmaak en raak geïnspireerd, kon ek sommer 5 of 6 posts vooruit doen. Die woorde vir ‘n advertensie kom vinnig en gou en dan moet ek dit neerskryf, of dis verby! Dit help nie ek wag tot môre nie! (En toe het Sonell my iets geleer: Die skeduleerfunksie is steeds daar, dit het net geskuif! Dankie, dankie, dankie!)

Skielik kan ek nie meer skeduleer met my foon nie, en dit lyk vir my of dit ook nie meer op my rekenaar gedoen kan word nie.

Nou wonder ek: Hoekom? Hoekom verander FB voortdurend aan die goed en maak dit minder gebruikersvriendelik? Wil hulle dalk hê dat ons moet aanbeweeg?

So, Toortsie, dit lyk vir my dis tyd dat jy jou vlerke wyer sprei. Dalk Instagram? Ek sal nog lank by FB bly en my blaaie aan die gang hou, maar dis tyd om iets nuuts te probeer.

Maar wat? Waar is die nuutste en beste bemarkingsplekke?

Ek raak te oud!

Uitnodiging: Soek toortsiebooks by Instagram as jy wil.

Toortsie

Die wolk

Kyk, sommige van die dinge wat vandag gebeur, is net te groot en onverstaanbaar vir hierdie ou kop. Ek het eintlik mos al jare gelede besluit, ek gaan nie probeer byhou nie, ek sit net op my boude, tel my voete op en laat die dinge maar gebeur waar en hoe en wanneer dit wil, en dan, wanneer ek kans sien, sit ek my voete neer vir ‘n rukkie en probeer dit wat rondom my is te verstaan, net om weer voete in die lug te sit tot tyd en wyl.

Dis nou oor al die elektroniese veranderinge wat gebeur rondom ons. Nooit as te nimmer kan ek bybly nie en dis skoon belaglik om te probeer! Ek doen wat ek kan, leer soveel ek kan of nodig vind, en laat die res maar voorthol.

Nou ja, die wolk. Of ons nou wil of nie, dis iets wat ons al hoe meer gebruik. Ons stoor ons goedjies op WordPress, iewers in die wolk, waar die wolk ook al is. Ons bêre ons belangrike inligting in Dropbox of Google Drive of waar ook al, omdat dit glo ‘veiliger’ is om dit daar te bêre as op jou rekenaar wat enige oomblik kan ingee. Want sien, rekenaars hou ook nie meer lewenslank nie, hulle wil kort-kort vervang word.

En dan is dit mos darem tog te lekker as ek daar in Koekenaap is en manlief vra my gou iets van die besigheid, om sommer op my selfountjie te loer wat die antwoord is. Alles danksy die wolk!

En danksy die wolk kan ek vir Jannie betaal wat hy betaal moet word, waar ek ook al is, solank daar net sein is. Tog te wonderlik!

Ons stoor en ons stoor onse goedjies in daai wolk, nes ons in die ou dae ons rakke voller en voller gepak het. Nee ek jok! Ek sien dit mos nou: Nes ons nog steeds ons rakke tot oorlopens volpak, stoor ons nou die wolk ook tot oorlopens toe vol!

En ek is kleintyd op skool geleer, wolke raak vol. Mnr Potgieter het in standerd 4 die wonderlikste ding gehad wat hy vir ons gewys het oor die watersiklus. Man, hy kon dit nog so 6 keer vir my gewys het, ek was mal daaroor! Dis dieselfde water wat ons drink, wat ons piepie, wat oor drie klippies loop en weer skoon kom, wat in ondergrondse riviere beland, wat weer in mere of boorgate beland, wat in die see beland, wat verdamp, wat wolke volmaak en dan reën dit!

Nou wonder ek, hoe lank voor hierdie wolke hier bo ons kop, hierdie inligtingswolke vol raak en begin reën? WAT WORD DAN VAN DIE GOED WAT ONS GESTOOR HET? Wat word van my 1000+ bloginskrywings wat ek reeds gemaak het? Gaan dit sommer net verdamp soos sommige reëndruppeltjies verdamp?

Toortsie

Toortsie se Bantingboerekosboek Facebook page

Toortsie se  Facebook page

Finesse Blogger of the week

Finesse: Hoe raak my verswakte moeders my?

Toortsie by Pinterest

 

Wat sit ‘n mens alles op sosiale media?

Hester het ‘n goed deurdinkte bloginskrywing gemaak oor fundamentele egtheid. Wat onthul jy op sosiale media en wat nie?

Kyk, misverstande ontstaan vinnig, of dit nou in persoon is, per sms, e-pos, alle vorme van sosiale media. Soms plaas mense doelbewus goed met ‘n byt in omdat hulle iemand wil bykom, soms word iets doodonskuldig geplaas, maar iemand het lang tone wat graag getrap wil word, wat soek om getrap te word. Soveel keer kry Facebook dan die skuld. Dan word Facebook as die duiwel self afgemaak.

Persoonlik voel ek Facebook of blog of wat ook al is net ‘n verlengstuk van my sitkamer. Soos ek in my sitkamer met vriende kuier, netso doen ek dit op faceboek of my blog. Lees julle op my blog, kuier julle in mý sitkamer. Lees ek by jou, is dit so goed dat ek in jou sitkamer by jou kuier. Dieselfde respek wat ek in jou huis teenoor jou betoon, behoort ek op jou blog of ander sosiale media te betoon.

Ekself verkies om positiewe goed te skryf. Ek het genoeg tjollas in my lewe om my blog en faceboek ook nog te kom besoedel! Sou ek wel iets oor my negatiewe ervarings skryf, sal dit ten doel hê om iemand anders wat ook in die afvoerpype ronddwaal, te probeer ophelp en moed gee.

Sommige van ons hou daarvan om al die wasgoed op die draad uit te hang, ander nie. Soos Hester sê, net soos in die gewone lewe ook. Ons kies mos in ons gewone lewe ook wat ons vir die buitewêreld wil wys en wat nie!

En as daar van ons is wat ‘n fiktiewe, fantastiese omgewing op ons sosiale media wil skep, hoekom nie? Dis dalk vir daardie persoon ‘n heerlike ontvlugting.

Die lekkerte is mos dat ons mag kies wat ons lees of nie!

Toortsie

Toortsie se Bantingboerekos Facebook page

Toortsie se Facebook page

Finesse Blogger van die week

Toortsie by Finesse: Doen dit vandag nog

Toortsie’s LCHF Journey 

Toortsie op Pinterest