Van kompetisie tot ondersteuningsgroep

Dit gaan sommer baie goed met die Banting gewigsverlieskompetisie wat reeds op 1 Februarie begin het. 

Twintig mense het aanvanklik ingeskryf en die meeste van hulle is nog op die Banting (Keto)-wa. Hulle doen ongelooflik goed en tussen die 19 van hulle wat weekliks hulle gewig instuur, het hulle al 90 kg verloor! Wow! Ek is so trots op hulle!

Intussen het ons besluit dat ons nie 30 April wanneer die kompetisie amptelik stop, die groep gaan stop nie. Die Whattsappgroepie is ‘n wonderlik ondersteuningsgroep en ons help mekaar behoorlik. Geen kompetisiegesindheid of -atmosfeer word gevoel nie. Eerder ‘n gevoel van samehorigheid. Dit is wonderlik! Saam-saam is ons besig om gesond te raak.

Intussen het nóg ‘n besigheid besluit om deel te word en ‘n prys te borg. Dit is Gracious Bakers wat die lieflikste Keto produkte maak. Ek gebruik al lankal hulle heerlike beskuit, koekies en sadebeskuitjies en toe ek nog ontbyt geëet het, het ek graag hulle ontbytpap geëet. 

Gracious Bakers gaan ‘n geskenkpak saamstel met 6 van hulle gewildste produkte! Wat ‘n heerlike prys! Gaan loer ‘n bietjie op hulle webblad watter heerlike en gesonde produkte vir die Keto-leefstyl of vir almal wat gesond wil eet, hulle het. Fran, met wie ek daar by hulle gesels het, beskryf hulle besigheid as volg: 

Gracious Bakers are passionate and driven to provide customers  with superior health products. They are focused on uplifting and inspiring healthier communities, by connecting people with real food.  Customers are investing in health more than ever before. For some it’s a choice for others it’s the only solution. With the growing disease epidemic, allergies and Intolerances, conscious eating is the only solution. Gracious Bakers are part of that solution. They have developed innovative and unique in-house recipes that cater for Gluten Intolerance, coeliac, diabetics, Low Carb , keto and paleo. All their products are handmade. The products are not only convenient, but ideal for the on the go person. All products are made using only superior ingredients that also taste great and are price competitive. All their products are additive and preservative free, they believe less is more. Where recipes lack in carbs, they are packed in flavor and taste. From traditional buttermilk rusks to penne pasta, you’ll find something to satisfy your everyday craving.

Ondersteun asseblief ons borge om hulle te bedank vir hulle lieflike gebaar.

  1. ‘n Naweek vir 4 persone op Struisbaai in een van Seegogga se lekker vakansiehuise.
  2. ‘n Lekker geskenkpak van Avon produkte geskenk deur Rina van Papendorp.
  3.  Mrs Martins Mikrobes het ook ‘n wonderlike geskenkpak skoonmaakmiddels, die lekkerste produkte denkbaar. 
  4. ‘n Pragtige skildery (blomme) deur Rita Oatway. 
  5. ‘n Boksie wyn van Rooiberg Kelders, geskenk deur een van ons vriende.
  6. ‘n Boksie wyn van Boland Kelders, geskenk deur een van ons vriende.
  7. ‘n Wonderlike geskenkpak saamgestel deur Desiree Kleinhans, eienaar van Suidpunt Potpourri, die mees suidelikste restaurant in Afrika, en ook van Earth, ‘n lieflike restaurant en geskenkwinkel in Struisbaai.
  8. ‘n Geskenkpak met die lieflikste Keto eetgoed geskenk deur Gracious Bakers

Wil u ook deel word van hierdie lekker ondersteuningspan en die Keto leefstyl aanleer? Praat gerus met my. 

Kyk gerus HIER indien u meer van my skrywes oor die keto-leefstyl wil lees.

Hierdie bloginskrywing het oorspronklik verskyn in Toortsie se Ketoblog, ‘n blog waar daar net oor Banting, of Keto, of LCHF, en diabetes geskryf word.

Groete

Toortsie

‘n Italiaanse naweek

Ek was hierdie naweek by twee lieflike Italiaanse funksies wat ek vir geen geld in die wêreld sou wou mis nie. Die wonderlikste atmosfeer in ons ou tronk op Bredasdorp. ‘n Sanger met die mooiste stem. Italiaanse kos. Ja, julle weet wat dit behels …

So, ek vermoed dat my suikervlakke lelik deurmekaar is. My lyf weet nie of hy ketose of insulien moet afskei nie. Of hy ‘n suikerverbrander of vetverbrander moet wees nie. 

Nou ja, ek hét vooraf geweet dat dit ‘n Italiaanse funksie sal wees met Italiaanse kos. En ek verwag beslis nie van enige gasvrou om spesiaal vir my ander kos te maak nie. Of ter wille van my nie. 

Hoe kon ek dit dalk anders gedoen het? 

Vrydagaand was die voorgereg brood en ‘n lieflike mengelslaai. Ek was nog sterk en het die brood oorgeslaan en net die slaai geëet. 

Die hoofgereg was pasta. Wat ek geëet het. En toe is my brein gekaap en het ek die heerlike poeding wat ek nie nodig gehad het nie, ook geëet. Wat ek anders kon doen? Ek kon ongemerk ‘n bakkie met salami en kasies saamgeneem het, die pasta ongemerk eenkant toe geskuif het en my kossies daarby ingeskep het en heerlik geëet het aan my eie kossies en die pasta gelos het. Niemand sou dit eers agtergekom het nie, dit was donker en net lamplig. Dan sou my brein nie gekaap wees nie en ek glad nie lus gekry het vir die poeding nie.

Saterdagaand was ek weer by ‘n Italiaanse aand. ‘n Partytjie van ‘n baie geliefde vriendin. Alles was net te mooi. Op die tafels was loof neergesit en baie vrugte uitgepak. Steeds gekaap het ek begin smul aan die druiwe. En het nie opgehou nie. 

Die voorgereg was die lieflikste eiervrug gereg met ‘n tamatiesous. Een honderd persent Banting. Dit was hemels. En eintlik hoef ek niks meer te geëet het nie. 

Maar toe kom die spaghetti. En ek eet dit alles op. By terugskouing besef ek: Ek moes gevra het of daar nie nog van die eiervrug was nie en dit as hoofgereg geëet het. Of sommer net nie die hoofgereg geëet het nie, want die voorgereg was heeltemal vullend. 

Nagereg was tiramisu, maar ek het daar kop gehou en slegs twee happies geneem.

As ‘n mens ‘n leefstyl soos die Keto doen, mag dit soms moeilik wees om altyd daarby te hou. As jy egter sterk staan, ís daar alternatiewe, al moet jy self daarvoor sorg. Soms voel jy om nie ongesellig te wees nie en dan maak jy maar die beste daarvan, net om te besef dat jy in die week wat voorlê, ekstra skouer aan die wiel te sit om weer na jou eie normaal terug te keer. 

Kyk gerus HIER indien u meer van my skrywes oor die keto-leefstyl wil lees.

Toortsie

Hierdie bloginskrywing het oorspronklik verskyn in Toortsie se Ketoblog, ‘n blog waar daar net oor Banting, of Keto, of LCHF, en diabetes geskryf word.

E-boeke en boeke

Hierdie is ‘n bloginskrywing wat voorheen gepubliseer was, wat ek nou opdateer het. Soos wat daar nog e-boeke van my én ander beskikbaar raak, sal ek hulle hier plaas. Dit is almal boeke wat ek namens my én ander skrywers uitgegee het.

Hou hierdie spasie dop, hier kom gereeld boeke by!

Genade onbeskryflik groot – deur Ansu Malan

Uiteindelik kan ek vir julle vertel van hierdie e-boek. Dit is ‘n moet lees!

In hierdie ware verhaal beskryf Ansu Malan die reis wat sy langs haar man beleef het nadat hy met galpypiekanker gediagnoseer is. Sy vertel van hulle vrese, hulle pyn, maar die sekerheid wat hulle in Jesus Christus gehad het en steeds het. Dit is ‘n geloofspad wat sy met vertroue in haar Skepper loop. Hierdie deernisvolle boek sal beslis enige leser se hart aanraak. 

Laai die gratis e-boek hier af.


Die Groen Mouter & ander kortverhale – deur Frik Stoffberg

Frik Stoffberg is ‘n storieverteller soos min. In hierdie kortverhaalbundel neem Frik Stoffberg ons op ’n komiese wyse terug na die oudae en die oudae se stories. Frik Stoffberg se lekker, informele geselstrant maak hierdie kortverhale ’n plesier om te lees. Beslis lekker leesstof!

Laai die gratis e-boek hier af.

Skoolstories 1969 – 1980 Bredasdorp

Hierdie boek is geskryf deur die groep klasmaats wat in 1969 skool toe is en in 1980 matriek geskryf het. Bredasdorpstories. In hierdie bundel is die onthoustories van ‘n paar van die klasmaats opgeneem. Op ‘n humoristiese manier vertel hulle dinge wat hulle ervaar het en spot hulle baie keer met hulleself. Dit is beslis ‘n lekkerleesboek.

Skrywers: Adri Aggenbach de Kock, Deon Gouws, Jacques Swart, Kosie Blom, Leana van Deventer Smit, Lucy Steyn Brink, Mabeth Knipe Janse van Rensburg, Madelé de Wet Burger, Nicoleen Swart du Plessis, Ronel le Roux Cilliers, Sal Lourens.

Laai die gratis e-boek hier af.

Boeke deur Madelé Burger

  1. Toortsie se Bantingboerekos (Toortsie 1)

Meer as 2 800 boeke verkoop in Afrikaans en Engels!

Toortsie se Bantingboerekos is meer as net ‘n resepteboek. Dit bevat smaaklike, vinnige en maklike resepte wat in gewone huise met gewone bestanddele gemaak kan word. Al hierdie resepte is geskik vir die Bantingleefstyl, vir Keto, Paleo, LCHF. Selfs diabete kan baat vind by hierdie resepte en alle mense wat hou van lekker eet. 

Toortsie vertel ook haar verhaal, haar reis sedert sy in Julie 2014 begin het om die Bantingeetplan te volg. 

Dis ‘n lekker leesboek tesame met ‘n resepteboek. 

Bestel die gedrukte boek direk by Madelé Burger by 082 563 8351 of e-pos na: madeleburger@gmail.com. Die E-boek kan hier afgelaai word in ‘n verskeidenheid formate.

2. Toortsie’s Banting Bash! (English version of Toortsie se Bantingboerekos)

Nearly 500 copies sold in English. 2800 copies sold in Afrikaans and English.

Toortsie’s Banting Bash! is more than just a recipe book. It is full of quick, easy and tasty recipes you can make in an ordinary kitchen using ordinary ingredients. All of the recipes are suitable to the Banting lifestyle. 

Toortsie also tells her story, her journey since starting the Banting eating plan in July 2014.

It’s not just a recipe book, it’s also a great read!

Madelé Burger is a mother, a grandmother and a farmer’s wife. She lives in the Overberg with her husband and they run a mixed farming operation. She is involved in the farm’s administrative work. 

This book is suitable for LCHF, Keto, Banting, Paleo and diabetes that follows the LCHF lifestyle. Also for people who loves nice food. 

Madelé loves people and she lives life to the full. She loves to travel and enjoys being outdoors. She writes about everyday things on her blog, about children, about life, and about her relationship with God. 

Her culinary experience comes from 30 years’ worth of cooking for her family. 

The book is available in print and as an e-book. 

Order the printed book directly from Madelé Burger at 082 563 8351 or e-mail to: madeleburger@gmail.com.

Buy the e-book from Smashwords.com

Farmgirl from South Afrika

3. Hier’s die Toortsie weer! (Toortsie 2)

Toortsie is ‘n liggie en in hierdie boek skyn haar liggie weer eens op die Bantingleefstyl.

Ná die formidabele sukses van haar eerste boek, Toortsie se Bantingboerekos, was ‘n tweede resepteboek die natuurlike uitvloeisel daarvan. Hierdie boek bevat meer as sestig nuwe, maklike en geurige resepte, asook eenvoudige raad om die Bantingleefstyl met gemak te volg. 

Hier’s die Toortsie weer! is ‘n boek wat in elke kombuis sy plekkie sal volstaan. By Banters sowel as nie-Banters. Al die resepte in hierdie boek is geskik vir die LCHF-leefstyl: Banting, Paleo, Keto. Ook vir diabete wat hierdie leefstyl volg. Dit is ook uiters geskik vir almal wat hou daarvan om lekker te eet. 

Bestel die gedrukte boek direk by Madelé Burger by 082 563 8351 of e-pos na: madeleburger@gmail.com. Ook beskikbaar by bidorbuy.co.za.

4. Toortsie 3, is dit nie? (Toortsie 3)

Toortsie is geen onbekende naam meer in die hoëvetlaekoolhidraatkringe nie. Toortsie3, is dit nie? is die derde boek in die baie suksesvolle reeks resepteboeke uit die pen van Madelé Burger. Net soos in die vorige boeke in die reeks, is die kos smaaklik en die resepte eenvoudig en maklik om te maak. Die kos is ryk en lekker en geskik vir enige persoon wat hou van lekker eet en vir al die hoëvetlaekoolhidraatdissiplines soos Banting en Keto. Al Toortsie se resepte is glutenvry. 

Bestel die gedrukte boek direk by Madelé Burger by 082 563 8351 of e-pos na: madeleburger@gmail.com. Ook beskikbaar by bidorbuy.co.za.

5. Toortsie se Soetighede

Madelé Burger, oftewel Toortsie, is ‘n boervrou, ma, ouma. Sy is lief daarvoor om te woel in haar kombuis. Sy volg sedert Julie 2014 die Bantingleefstyl en het reeds twee resepteboeke vir die Lae Koolhidraat Hoë Vet leefstyl suksesvol uitgegee. Hierdie boek bevat die soetighede wat in haar twee boeke voorkom. 

Die resepte is geskik vir LCHF, Banting, Keto, Paleo en vir diabete wat die LCHF-leefstyl volg. Dit is ook ideaal vir almal wat daarvan hou om lekker te eet.

Laai die GRATIS e-boek by Smashwords af.

Bestel die gedrukte boek direk by Madelé Burger by 082 563 8351 of e-pos na: madeleburger@gmail.com. Ook beskikbaar by bidorbuy.co.za

6. My kinderjare met betrekking tot vandag

Madelé Burger, oftewel Toortsie, is ‘n flitsliggie wat oral inskyn. In hierdie boek laat Madelé haar flitsliggie skyn op haar kinderjare en die manier waarop dit betrekking het op haar lewe as volwassene. Op ‘n humoristiese wyse vertel sy dinge wat sy beleef het en spot sy ook met haarself en die res van haar gesin. Is die boek ‘n outobiografie? ‘n Memoir? Besluit self! Wat dit wel is, is eerlik, vinnig en binne karakter. 

Madelé is ‘n dogter van die Overberg, gebore en getoë in Bredasdorp. Sy vertel storietjies uit haar lewe op die plaas, die skool en koshuis en kleur dit in met stories uit haar volwasse lewe. 

Sy het reeds twee resepteboeke, geskik vir die Bantingleefstyl, suksesvol uitgegee, naamlik Toortsie se Bantingboerekos en Hier’s die Toortsie weer. Toortsie se Bantingboerekos is ook in Engels uitgegee onder die naam Toortsie’s Banting Bash!

Madelé Burger is ‘n ma, ouma, huisvrou en boervrou. Sy en haar mna, Kobus, woon in die Overberg. Madelé is lief vir mense en leef die lewe voluit. Sy reis graag en geniet dit baie om in die natuur te wees. sy skryf in haar blog, toortise.com, oor alledaagse dinge, kinders, die lewe en haar verhouding met God. 

Bestel die gedrukte boek direk by Madelé Burger by 082 563 8351 of e-pos na: madeleburger@gmail.com. Ook beskikbaar by bidorbuy.co.za

……………………………..

Die Goue Vroue

‘n Groep vroue, die Goue Vroue, woon regoor die wêreld en skryf in Afrikaans. Hulle skryf saam vervolgverhale en in hulle verbeeldingswêreld leef hulle in die magiese dorpie, Rebusfontein, iewers in Suid-Afrika.

Goue Vroue in Wonderland – deur die Goue Vroue

’n Groepie Towerinne beland in ’n storieboekavontuur. Tydens die ontrafeling van die verhaal ontdek hulle elkeen hulle Goue Eienskap wat van hulle die Goue Vroue maak.

In hierdie verhaal word ‘n groepie van die Towerinne “Goue Vroue”.
‘n Lekkerleesboek vir volwassenes met kinderharte.

Hierdie boek is geskryf deur: Aalsie, Appeltjie, Christa, Positief, Seegogga, Tannie Frannie, Toortsie, Una, Woordnoot.

Laai die gratis e-boek hier af.

Goue Vroue in Jumanji

Die Goue Vroue was weer op een van hulle vele wonderlike avonture – hierdie keer in die oerwoud in Afrika. Soos dit altyd met die Goues die geval is, is hierdie geen uitsondering nie en was dit ’n avontuur gevul met opwinding en gevaar. Adrenalienbelaai. Die dames het soms tuimelend bo-oor mekaar rondgeval, ander kere gillend vasgeklou vir lewe en dood! Op die ou end, soos nog altyd vantevore, het hulle die Jumanji-uitdaging met vlieënde vaandels geslaag.

Skrywers: Antoinnette Goosen, San Dreyer, Anna-Marie Groenewald, Tannie Frannie, Madelé Burger, Hannelie Raath, Una Steenkamp, Carien Steenkamp, Ria Fourie.

‘n Lekkerleesboek vir volwassenes met kinderharte.

Laai die gratis e-boek hier af.

……………..

Kyk ‘n bietjie watter oulike e-boeke alles by Smashwords te koop is.

Toortsie

Eksperiment #5

Het ek nou die afgelope twee dae lekker gespeel met my sonoond! Dat ek vir my ‘n sonoond gekoop het, is eintlik vreemd. Jy sien, ek is nie een vir ‘gadgets’ nie. Ek het my stoof en my oond en my potte en panne wat lekker werk. En as ek dan nou ‘n gadget koop, hoekom nie eerder ‘n ‘air fryer’ soos wat almal koop nie? Nou koop ek ‘n sonoond van alle dinge! En wil ‘n resepteboek daarvoor skryf. Regtig? Maar ja, dis wat ek gedoen het. Want ek maak graag kosse wat lank in ‘n oond kan bly. Die elektrisiteit, sien. En toe bly dit sowaar tot in Desember verlede jaar winter by ons. Vreemd, die kos het wel met die beperkte son en die baie wolke, gaar geword!

Ek het Saterdag ‘n vark rolrib by Checkers gekoop en Sondagoggend dit hanteer asof daar geen geurmiddels op is nie. En Sondagoggend vroeg Toortsie se Varkribresep uit Toortsie 3 gehaal en die Checkers rolrib behoorlik met Toortsieliefde oorlaai. Dit was half 9 toe ek die oondjie buite gesit het, die son het nog nie heeltemal op hom geskyn nie. Een uur het ons die lieflikste, sagste, geurigste rolrib uit die sonoond gehaal.

En gister het ek hom weer so by half tien in die son gesit om ‘n piesangbroodjie te bak. Natuurlik nie met koringmeel nie, maar met amandelmeel en Daar was ‘n paar piesangs wat al baie ryp was en toe het ek die piesangmuffinresep in Toortsie 2 dubbeld gemaak, dit in ‘n oondplaatjie gegooi met nog ‘n oondplaatjie bo-oor en twee uur later het ek my piesangbroodjie uitgehaal! Te lekker!

Terwyl ek hier skryf, voel ek die heeltyd of ek dalk nog iets gaargemaak het oor die naweek, maar kan nou regtig nie onthou nie! Maar van die resepteboek gepraat. Ek is besig om my reseppies een vir een in die sonoond te toets en dit in ‘n e-boek te omskep … vir gewone oonde en sonoonde. Daar is noual so 10 reseppies reg en ek gaan dit binnekort by Smashword oplaai. Die interessantheid daarvan is dat dit ‘n groeiende e-boek gaan wees. Soos wat ek nuwe resepte uittoets, gaan dit by die ander gevoeg word, totdat ek by my standaardhoeveelheid van 60 uitkom. Die lekker daarvan is dat dit nou nog baie goedkoop gaan wees, soveel soos $1, dus omtrent R15,50 en as jy dit eers eenmaal gekoop het, kan jy elke keer die opdatering gratis aflaai. En die kans is goed dat die boek met tyd duurder gaan word soos wat die resepte meer raak.

Ek het sowaar al ‘n voorblad! Dankie Joh-Marie!

Toortsie

Eksperiment #3

Ja-nee, dis al weer Maandag en vandag moes my ou sonoondjie weer uithaal en wys. En ja, ek het beslis te veel van hom verwag, dit het ek van die eerste oomblik af geweet.

Vanoggend 9 uur het ek ‘n bevrore stukkie ‘pork belly’ in my sonoond gesit. Ek weet, ek weet, ‘n mens moet eerder ontdooide kos insit. Ag, en dit lyk toe of die sonnetjie lekker gaan skyn en oondjie sommer warm gaan word en toe sit ek sommer nog twee beessterte ook in. Bevrore, let wel. En skielik raak dit bewolk, sonnetjie bly wegkruip en die oond se temperatuur val tot by 40 grade Celcius. Wel, met ‘n wolk voor die son en 3 bevrore stukke kos, wat anders kan jy verwag? Dit, terwyl ‘n mens eintlik een ding op ‘n slag moet gaarmaak.

Maar Toortsie pendel mos en moet maar die son gebruik wanneer nodig.

Iewers het son weer sy kop uitgesteek en het hy die vark lieflik gaar gekry. Sag, sag, sag. Ek sou dit graag ‘n bietjie wou gebraai hê ook en ek is seker dat as dit al was in die oond en dit nie met ‘n beesstert of twee moes kompeteer nie, dit sou gebraai het ook. Die beesstert was al gaarderig, maar nog ver van sag af.

Die uitslag van my eksperiment? Ek dink dit was geslaag. Vir wat alles van die oondjie verwag is, beslis, want die vark was gaar en daar is baie ure se kooktyd by die beesstert verkort – kooktyd waarvoor die gas betaal moet word. En ek het weer heelwat kos vir die volgende paar dae. Wat meer kan ek vra?

Ek sal nie aanraai dat soveel kos op een slag gemaak wordnie. Mens oorlaai die oond onnodig.

Toortsie se reseppies werk sowaar in enige tipe oond – elektriese oond, gasoond, sonoond …

Toortsie