Terugspieël

September 28, 2021September 28, 2021 ~ Toortsie ~ 29 Kommentaar

Terugspieël. Is dit die Afrikaanse woord vir ‘Backtracking’? Om, in ‘n gesprek ‘n woord of twee uit die ander persoon se gesprek te herhaal?

In huweliksverrykinskursusse wat ons al bygewoon het, het ek daarmee te doen gekry, maar dis elke keer net terloops in die lesing genoem. Ek kan nie onthou of ons dit regtig toegepas het nie. Ek het ook daarmee te doen gekry in boeke wat ek gelees het oor verhoudings, ens. Ek weet daarvan, maar moet erken dat ek dit nog nooit regtig toegepas het in my lewe nie. Dalk doen ons dit in TPM. Ja! Ons doen dit in TPM! Ons vra die baie spesifieke vrae volgens die prosesgids, maar gebruik altyd van die persoon se presiese woorde in ons vraag. Hoe voel jy daar waar … Hoekom is jy kwaad/vies/hartseer/watter-woord-die-persoon-ookal-gebruik.

In my Banting Coach kursus by Nutrition Network is ons nou klaar met die wetenskaplike gedeelte waar dokters, spesialiste, wetenskaplikes, dieetkundiges ons geleer het van diabetes, obesiteit en natuurlik die voordele van die Ketogeniese leefstyl. Nou is ons by die coaching gedeelte. Dis mos maklik, ek is mos ‘n juffrou? Toe nie heeltemal so maklik nie.

Colleen-Joy Page lei ons op in gesprekvoering. Om ware ‘coaches’ te word. En sy laat ons die vaardighede oefen. Vyf dae lank aan elkeen. Die eerste vaardigheid wat ons moet leer is Terugspieëling. Op dag een moet ons op ‘n positiewe manier terugspieël op minstens vyf verskillende plekke. Ons moet leer om behoorlik te luister wanneer die ander persoon praat. Watter woorde word beklemtoon, is deel van die oplossing? Maar ons moet ook ons natuurlike self wees. Én opreg geinteresseerd en aandag gee aan die persoon. Net 1-2 woorde op ‘n slag wat ons terugreflekteer na die persoon. Elke dag raak die opdrag ‘n bietjie ingewikkelder vir vyf dae. Wraggies interessant, hoor!

Nou ja, waar ek op die plaas sit, voer ek nie eintlik gesprekke nie. Dan onthou ek: Blogs!

So, dames, as ek dalk vreemde antwoorde gegee het die laaste paar dae op julle blogs of kommentare, onthou, ek het my ‘backtracking’ geoefen. Jammer as ek julle misbruik het, maar waar anders moes ek dit doen? Gelukkig kon ek dag 2 reageer op RSG, die nuus, op liedjies.

Toortsie

Oeps. Op dag vyf is die uitdaging toe dat jy moet reageer op whattsapp, Facebook, e-posse. Ek het nog die hele tyd dáár geskuil terwyl ek dit nie in regte gesprekke gewaag het nie. Of onthou het nie!

Hoe weet jy?

Mei 14, 2021Mei 14, 2021 ~ Toortsie ~ 12 Kommentaar

Marileen van Die Venster vra: Hoe weet jy dat dit die regte lewensmaat is wat jy kies? Ja, hoe weet jy? En selfs al weet hy hy is reg, kan dinge tóg iewers in die latere lewe skeef loop. Hoe op aarde weet jy?

Hierdie is my eie mening en na aanleiding van wat ek in my matriekjaar in Bybelonderrig by Die Skim geleer het.

O, hy móét jou hart laat vinnig klop, jou oë laat blink. Jy moet na hom verlang as jy nie by hom is nie en dit geniet saam met hom wanneer julle by mekaar is.

Moenie dinge te vinnig vat nie. Vat dit stadig. Leer eers die persoon ken. Moenie sommer met hom in die bed spring nie, hou dit vir die huwelik.

Ek glo steeds aan die ou reël van twee jaar. Dat julle vir minstens twee jaar moet uitgaan voor jy aan trou dink. Sodat julle oor die aanvanklike verliefdheid kom en sien hoe julle probleme en verskille hanteer. En sien of julle steeds opgewonde voel oor mekaar.

Is sy belangstellings vir jou belangrik? Gun jy hom dit? Is jou belangstellings vir hom belangrik? Gun hy jou dit om dit te beoefen?

Hoe pas jy by sy familie in en hy by joune? Onthou, jy trou nie net met hom nie, maar met die familie.

Kultuurverskille, taalverskille, geloofsverskille is GROOT goed. As dit verskil, plaas jy groot stremming op jou verhouding en dit mag dalk nou vir jou oulik en opwindend wees dat hy uit ‘n ander kultuur, taal of geloof kom, maar ek belowe jou, dit gáán steurnisse veroorsaak en dán moet die liefde groot genoeg wees om dit te kan hanteer.

As jy so na hom kyk, is jy regtig gewillig om jou hele lewe met hom saam te loop? Oor berge, deur dale, deur storms, deur opwindende tye? Is jy bereid om baie keer die minste te wees, om terug te staan, om selfs soms stil te bly, toe te gee? Want ‘n huwelik gaan oor gee én neem, oor jou 100 persent te gee selfs al gee jou huweliksmaat dit nie noodwendig nie. Dit gaan oor harde werk vir jou liefde, om baie te veg om jou liefde en geliefde te voed en te behou.

Het jy al gebid hieroor? Baie gebid? Tyd met God spandeer? Vir Hom gevra wat Hy hiervan dink en hoe Hy hieroor voel? Het julle al saam gebid?

Hoe is sy geestesgesondheid? En joune?

En dan, as daar genoeg tyd verloop het, hy jou steeds geweldig opgewonde maak, jy voel jy kan nie sonder hom lewe nie, dat jy regtig jou hele lewe net hom wil deurbring, jy in jou hart seker is dat dit is wat jy wil doen, dan doen jy dit. Dan vat jy die geloofsprong en gaan voluit daarin. Dan gee jy jou alles om hierdie verhouding te maak werk en maak jy álle agterdeure wat moontlik nog op skrefies staan, toe. En dan wens ek jou geluk toe.

Dit skryf ek ná 4 jaar se uitgaan met my geliefde en 35 jaar se huwelik, na goeie én swaar tye, berge én dale, rykdom én armoede, siekte én voorspoed en ek kyk terug en is dankbaar vir ‘n vol lewe saam met my man en my kinders en ek gee aan God die eer wat ons tot hier gebring het.

Toortsie

Kwaad – prakties

April 17, 2021April 22, 2021 ~ Toortsie ~ 16 Kommentaar

Ja, ons ken daardie gevoel. Iemand het ons verkeerd hanteer, iets aangedoen wat hulle nie moes nie. Eintlik kan ons nie daardie kwaad laat gaan nie, want die persoon verdien dit nie. Hy het nie eers om verskoning kom vra nie en sou jy hom daaroor konfronteer, sal hy dit ontken of homself regverdig. Daar is geen berou van sy kant af nie. Of dalk weet die persoon nie eers dat hy jou geaffronteer het nie. Maar jy dra die kwaad in jou hart. Soms selfs sonder dat jy dit besef. Jy sê selfs dat jy hom vergewe het, maar het jy? Die waarheid is, eintlik verdien hy glad nie daardie vergifnis nie.

Maar raak ‘n bietjie stil. Begin dink ‘n bietjie oor die situasie. Wat voel jy? Wat het gebeur? Teenoor wie voel jy kwaad/teleurgesteld/woedend/bitter of watter woord jy ookal wil noem? Dalk jouself?

Hoekom is jy kwaad vir die persoon? Wat het hy gedoen? Wat het hy ALLES gedoen? Skryf dit neer. Wat het hy nie gedoen nie? Wat moes hy gedoen het? Nog redes?

Ervaar jy huiwering om die kwaad te laat gaan? Wat dink jy gaan gebeur as jy die kwaad gaan laat gaan?

Die waarheid is dat jy nie die ander persoon gevange hou met jou kwaad nie, maar eerder jouself. Dat as jy die kwaad aanhou koester, jy self nie vorentoe kan beweeg nie. Dat jy nie regtig die ander persoon se gedrag met jou kwaad kan regkry of verander nie. Dat die ander persoon sy eie issues moet uitsorteer. Sy eie probleme. Dit waarmee hy sukkel. En dat ons, solank ons ons kwaad koester, aanhou kwaad bly, ons die doringboompies in ons brein toelaat om te groei, groter te word en skade toe doen aan ons eie liggaam en siel. En nee, die verkeerd wat die ander persoon doen of gedoen het, gaan nie reggestel word as ons nie meer kwaad is vir die persoon nie. Dit is sy dinge waarmee hy self moet regmaak in sy hart. Die verkeerd wat hy doen is nie nou skielik reg net omdat ons ons kwaad laat gaan nie.

Gestel jy voel om wel die kwaad wat jy voel teenoor die ander persoon (of jouself) te laat gaan, kan jy hierdie gebed bid:

Here, ek is baie kwaad vir (sy naam) omdat hy (noem op wat hy alles genoem het). Dit was verkeerd van hom om dit te doen, maar ek wil nie meer die kwaad dra nie. Ek kies om dit te laat gaan sodat ek vorentoe kan beweeg.

Gee jouself kans. Sien jy hoe jy die kwaad laat gaan? Voel jy dit?

En hoe voel dit nou daar? Daar waar die kwaad was? Voel jy steeds die kwaad? Voel jy beter?

Onthou om nou vir die Here te dank dat Hy jou hiermee gehelp het. Gee aan Hom die eer, want sonder Hom is geen vergifnis moontlik nie.

Deur dit te doen, het jy ‘n toksiese doringboompie in jou brein uitgeskoffel en dit vervang met ‘n pragtige, gesonde, groeiende stuik. En aan jou siel goed gedoen.

Toortsie

Met erkenning aan die Prosesgids van TPM Kaap. (Transformation Prayer Ministry – Transformasie Gebedsbediening)

Seksuele sonde

Januarie 27, 2021Januarie 27, 2021 ~ Toortsie ~ 10 Kommentaar

Hierdie is vir my ‘n moeilike blog wat ek vandag skryf, omdat dit so een honderd persent indruis met wat vandag geleef en verkondig word. Dis amper outyds. Uit die oude doos. Wel, Ou Testamenties, sal sommige sê en saam met dit dit so effens wegwaai met die hand en die gesig afwysend trek. Met hierdie skrywe wil ek ook geen las op iemand se skouer sit nie of oordeel nie. Glad nie. Ek kon net nie help om dit te skryf nadat ek die stuk in Levitikus gelees het nie. Toe ek dink om dit eerder te verwyder, het ek baie duidelik gehoor dat ek eerder aan God gehoorsaam moet wees as aan mense.

Ek is seker dat die Ou Testament in die Bybel ingesluit is omdat God wil hê dat ons dit ook moet lees. Deur die Ou Testament te lees, verstaan ek God beter, verstaan ek die Nuwe Testament beter. Want God het nog nooit verander nie. Dit wat Hy in die Ou Testament haat, haat Hy vandag nog. Al verskil is dat Jesus gekom het om ons van ons sondes te verlos, dat ons nie meer doodgemaak word as ons dit doen nie. Maar, soos Paulus soveel keer in die Nuwe Testament waarsku, gee die voorreg van Jesus se verlossing ons nie die reg om te maak wat ons wil, ons skouers op te trek en aan te gaan nie. Nee, dit gee ons juis die verantwoordelikheid om self te besluit om te doen wat God wil hê.

Levitikus is baie reguit, op die man af. En ja, ek eet ook onrein kos, maar in die Nuwe Testament is alle kos rein verklaar. En ja, ek doen baie sonde. Elke dag. Ek oordeel. Ek praat soms lelik. Het soms lelike gedagtes. Maar omdat ek self sondig, beteken dit nie dat ek moet stilbly oor wat God haat nie.

God haat seksuele sondes. Hy haat egbreuk. Hy haat dit as iemand gemeenskap het met iemand anders se vrou of man. Hy haat dit as jy gemeenskap met jou skoondogter het, soveel so dat Hy sê hulle verdien die dood. Hy haat dit as ‘n mens met ‘n dier geslagsgemeenskap het, dit is afskuwelik! Vieslik! Ook nie met jou oom of tante nie. Hy haat dit as ‘n man iemand anders se vrou afneem. Hy haat homoseksuele verhoudings.

En net indien ons tog dink dit is Ou Testamenties, word dit oor en oor herhaal in die Nuwe Testament ook. God haat seksuele sonde. Seksuele reinheid is vir Hom só belangrik, hy vergelyk Sy verhouding met die kerk soos met ‘n huweliksverhouding met ‘n vrou. Hy verwag dat ons seksueel rein sal wees. Selfs tot aan die einde van Openbaring praat Hy baie duidelik daarteen. Seks is vir die huwelik tussen een man en een vrou.

Dalk moet ons weer begin dink oor die flieks en sepies en alles wat ons op TV kyk. Dit word so ‘reggepraat’ dat ons dit al begin glo. Dat dit algemeen raak. Dat saamblyverhoudings niks vreemds meer is nie. Dat ek my man of vrou verneuk, maar sommer net iets so in die verbygaan is. Solank ons nog nie seks gehad het nie, het ons niks gedoen nie. Solank ons net nie uitgevang raak nie, en dan maak dit ook eintlik nie saak nie. Dat mense in die platteland sal skinder oor ‘n huwelikspaar wat skei, net om môre aan te gaan asof dit niks is nie. Nie vreemd is as ek vandag die een buurvrou het en môre ‘n ander nie. Of as ek self oor die draad loer nie.

Dalk moet ons almal ‘n slag weer introspeksie doen. Ook ek. Nee, dit gaan my sekerlik nie in die hel laat beland nie, maar dat dit God se hart seermaak en ‘n klomp mense s’n daarmee saam, is nie altemit nie. Dalk moet ons, ook ek, op my knieë gaan, ‘n sirkeltjie om my trek met bordkryt en vra, Here, maak reg wat verkeerd is binne hierdie sirkel.

Toortsie

Introvert? Ekstrovert?

Januarie 7, 2021 ~ Toortsie ~ 10 Kommentaar

Is ek ‘n introvert of ‘n ekstrovert? Dit maak seker nie regtig saak nie, maar hoekom ek vra, is, ek is mal oor mense, maar geniet my eie tyd verskriklik baie. So lief soos wat ek vir mense is, net so graag wil ek alleen dinge doen, maak mense my moeg. Alhoewel ek oor jare my ekstroverteienskappe baie ontwikkel het, is ek eintlik skaam, glo dit as jy wil.

Skielik kom die gedagte vanoggend in my kop op: Google ‘can an extrovert also be a loner’. Terloops, ek het hierdie vakansie behoorlik baie gegoogle. Google se antwoord?

Of course. A loner? Most definitely. Some of this tendency for certain types of extroverts to also exist as loners can be their draw towards freedom.

Google bring my toe by hierdie artikel deur Jessica Booth uit.

Nege dinge wat ekstroverts graag wil hê dat introverte moet weet. Interessant. Ek hoor gewoonlik die andersom pleidooi, naamlik dit wat introverte wil hê ekstroverte moet weet. Dalk is dit goed om mekaar beter te verstaan en kan dit moontlike misverstande uit die weg ruim.

Mense kan eienskappe van beide ekstrovert sowel as introvert hê. Om ‘n ekstrovert te wees, beteken nie noodwendig dat jy uitgaande, luidrugtig en vriendelik is nie, maar dat jy jou energie kry deur tussen mense te wees. Ekstroverte kan steeds skaam wees. ‘n Ekstrovert is nie áltyd die spil waarom al die aandag draai nie.

‘n Ekstrovert- of introvert benaming moet nooit ‘n persoon in ‘n sekere boksie plaas nie. Mense verskil steeds. Tog is dit goed dat introverte die volgende dinge verstaan van ekstroverte:

Hulle probeer nie om jou uit jou dop te kry omdat hulle nie van jou hou soos wat jy is nie. Hulle probeer eintlik net help. Omdat ekstroverte van nature meer sosiaal is, vind hulle dit moeilik om te verstaan as iemand totaal assosiaal is. Dit sal help as ‘n introvert aan die ekstrovert verduidelik dat hy dit verkies om alleen te wees en dat die introvert dit nie as persoonlik sal opneem wanneer ‘n ekstrovert hom probeer help nie. Sy intensies is regtig goed. (As ekstrovert kan ek sê dat dit my selfs soms gespanne maak, maar ek het al geleer om dit dan te aanvaar en aan te stap.)
Hulle kan nie jou gedagtes lees nie, jy moet dit dalk duideliker kommunikeer. Ekstroverts is nie subtiel nie. Hulle sê duidelik wat hulle dink. Ek, as ekstrovert raak baie verward en gespanne as iemand ‘tussen die lyne’ praat of een iets sê en iets anders bedoel. Dit sal baie help as jy, wanneer jy met ‘n ekstrovert praat, reguit en direk praat. Ekstroverte tel moeilik subtiele woordjies of betekenisse ope en hulle hou niks van gedagtespeletjies nie. Hulle hou van totale eerlikheid.
Hulle kan nie help dat hulle te veel inligting gee nie. Hulle hou van praat! Waar introverte van stilte hou, voel ekstroverte geweldig ongemaklik in stilte. Hulle hou daarvan om te praat en om sosiaal te wees. Hulle praat soms te veel, veral as daar ongemaklike stiltes is. Hulle kan nie daarvoor help nie, dis maar net wie hulle is!
Hulle hou daarvan om tussen ander mense te wees, so as hulle meer mense nooi, is dit nie omdat hulle nie alleen saam met jou wil wees nie. The more the merrier. Moenie dit as persoonlik opneem as ekstroverte meer mense nooi nie, hulle koppe werk net so!
Jy kan enige tyd by hulle aanklop, sonder afspraak en sal altyd welkom wees. En nee, hulle is nie net ordentlik deur jou vriendelik te ontvang nie. Om die waarheid te sê, hulle geniet dit baie! Hulle bedoel dit as hulle sê dat jy kan kom kuier net wanneer jy wil.
Ekstroverte geniet ook alleentyd. Soveel soos wat ekstroverte die geselskap van ander mense geniet, net so hou hulle ook van alleentyd. Dit gee hulle tyd om hulle gedagtes te orden en om te ontspan.
Ekstroverte kan skaam wees. Dit neem soms vir hulle tyd om uit die dop te kom. Hulle kan selfs skaam wees om eerste ‘n hand uit te steek in vriendskap.
Dit is nie dat hulle daarvan hou om oor koeitjies en kalfies te praat nie, dis eintlik dat hulle glad nie van stilte hou nie.
(HIerdie een is ‘n vreemde gedagte.) Ekstroverte is nie altyd aan die ‘flirt’ nie. Soms kry ekstroverte die reputasie dat hulle flirt met almal, maar dit is nie wat hulle altyd doen nie. Omdat hulle baie vriendelik en gesellig is en met ander mense ‘n geselsie kan aanknoop, mag dit lyk of hulle ‘n flirtasie probeer maak, maar dit is nie altyd so nie.