Kategorie: Camino de Santiago

Is ek gereed vir die Camino?

~ Toortsie ~ 21 Kommentaar

Dís ‘n vraag waarvoor ‘n mense seker nooit die antwoord sal hê voor jy dit nie gestap het nie, want hoeveel moet jy nou regtig oefen om so ‘n ding aan te pak waar jy 20 km per dag stap? Jy kan tog nie hier elke dag 20 km stap nie? Jy kan seker as jy wil, maar is dit hoe die mense oefen? Saartjie het vir my gesê sy het net haar normale 10 km per dag geoefen. Nou ja, ons oefen ook nie eers regtig 10 km per dag en elke dag nie.

Wel, vir 2020 is die Camino de Santiago nou eers van die baan, maar die Baviaans Camino is nog ‘n moontlikheid. Dis iets wat ek nou ook met baie geïnteresseerde oë bekyk. As die ou simpel grendeltyd nou net sy gang wil gaan.

Toe ons die naweek regtig lank en ver gestap het, oor die berg, om die berg, weer oor die berg, op en af, het ek besef, onder normale omstandighede behoort ek reg te wees vir die Camino. Ek kan lank en ver stap. Dis net met die bulte wat ek ‘n bietjie spoed verloor en soms moet stop om te rus, maar ek kan aanhou en aanhou.

Ek moet darem vertel dat ons twee bobbejaanpartytjies ontwrig het. Hulle het glad nie gedink dit is snaaks nie en het luid kapsie gemaak. 🙂 Ag, hulle kon maar weer verder partytjie hou toe ons verby was. Vreemd, dis die eerste keer wat ons bobbejane raakgeloop het en ek belowe, wat ons aanbetref, het hulle die sosiale afstand behou soos wetgewing bepaal.

Wat ek ook dink ‘n groot verskil by die Camino sal wees, is dat jy mos stap en rus. Jy het die hele dag tyd. Dis nie soos ons wat stap om klaar te maak nie. Dis soos met ‘n staproete. Jy stap en rus wanneer jy so voel.

Ek skryf ook mos hierdie Camino-joernaal met die doel om myself op hoogte te hou. Nader aan die tyd wanneer ek dit dalk gaan stap, wil ek ‘n Whattsappgroep begin waarop ek met my kinders en wie sou belangstel, sal kommunikeer. Dit sal ‘n baie eensydige groep wees waar net die admins kan post, glad nie ‘n chatgroep nie. Die doel daarvan sal ook eintlik net ‘n joernaal wees, ‘n inligtingsblad van hoe ek vorder en wanneer ek (hopelik ons) dit stap, kan ek foto’s daarop post vir die belangstellendes, maar ook vir my eie rekord.

Of hierdie droom waar sal raak, sal net die tyd leer. Wat ek wel al in my lewe gesien het, is dat baie goed wat ek sommer net so terloops gedroom/gehoop/gedink het, uit die bloute waar geraak het wanneer ek nie eers daaraan gedink het nie. Ps 127 sê dat die Here dit vir Sy bemindes in hulle slaap gee. Daarvan kan ek beslis getuig.

Toortsie

Johan se Caminoraad

~ Toortsie ~ 28 Kommentaar

Vir my eie inligting.

Johan en vier vriendinne het onlangs die Portugese Camino gestap vanaf Porto tot Santiago. Hulle het ongeveer 15 tot 20 km per dag gestap. Ongeveer drie weke gestap.

Omdat hulle, volgens hom, korter as die ander mense per dag gestap het, was hulle elke keer van die eerstes wat by die herberge aangekom het en het hulle nooit probleme ondervind om slaapplek te kry nie.

As jy gebruik maak van die diens, hulle laai die sakke op ‘n sentrale punt af. Koste 5-7€ per dag. Jy moet aanmeld as jy wil hê hul moet jou sakke aanry.

Dis nie nidig km deur ‘n agentskap te werk nie, dit maak dit onnodig duur.

Die slaapplek in die herberge was minder as R100 per persoon per nag. Die meeste nagte kon hulle ‘n sesbedkamer kry. Soms was daar stapelbeddens, soms net gewone beddens. Die matrasse is goed, nie dunnetjies nie. Hy voel jy moet die herbergding doen ipv hotelle om die Camino regtig te ervaar.

‘n Goggatjie wat maar ‘n probleem op die Camino kan wees, het een van die dames getref. Alhoewel daar by die meeste van die herberge ‘n plastiekoortreksel oor die beddens is, is dit tog ‘n goeie idee om ‘n onderlaken saam te neem en jou eie slaapsak. Daar was van die plekke waar beddegoed voorsien is, en dit was skoon.

Hul het soggens ‘n ontbyt gemaak en dan later in die oggend iewers gaan sit en eet. Saans het hulle gaan uiteet of vir hulle kos gemaak.

Die versorging van jou voete is belangriker as jou fiksheid. Party mense smeer spiritus aan om hulle voete te beskerm. Hy het ‘n sykousie aangehad, plus twee paar sokkies. (Maréth het net een paar katoensokkies op ‘n slag gedra en dit dan gereeld omgeruil.) Skoene en sokkies word elke twee uur uitgetrek sodat jou voete rus. Dan word droë sokkies aangetrek. Die nat sokkies word aan jou rugsak vasgemaak met ‘n wasgoedpennetjie sodat dit droog kan word vir die volgende omruilslag.

Hy het 5 T-hemde saamgeneem. Van die ander in die groep het elke dag dieselfde klere gedra, dalk wel een paar verskonings gehad. Jy spoel daagliks jou klere uit as jy by die blyplek kom. Hy het ‘n koekie Sunlight seep ingepak om daagliks klere te was.

Hy het ‘n oulike App op sy doon afgelaai. Camino Portugese wat baie oulike inligting gee oor due riete, slaapplek, besienswaardighede en eetplekke.

Hy het dit geweldig baie geniet.

Toortsie

Caminogesels

~ Toortsie ~ 19 Kommentaar

Ek het mos nog steeds die gedagte om eendag die Camino in Spanje te gaan stap. Hierdie bloginskrywing dien as aantekeninge vir myself vir wanneer ek dit eendag wel doen. Dalk vind dit baat vir iemand anders ook.

Na aanleiding met ‘n gesprek met twee persone, skryf ek hierdie.

Die een was ‘n man wat dit saam met sy vrou gedoen het. Hulle het ‘n week gestap en in hotelle gebly en hulle sakke laat aanry. Hy beveel dit aan dat jou slaapplek bespreek is waar jy die volgende aand wil slaap. Dan hoef jy nie so te jaag om daar te kom en slaapplek te vind nie. Hulle het soggens 9 vm eers begin stap en rustig gestap tot sowat 4 nm. Dit klink vir my goed, want ek is nie so vroeg soggens op-en-wakker nie. Ek was bekommerd oor die siësta war in Spanje beoefen word en dat jy dalk nie etes langs die pad kan kry nie. Hulle het nie ‘n probleem daarmee gehad nie. Tog het Maréth die siësta genoem. Maréth het juis eerder vroeër soggens begin stap sodat sy haar bestemming bereik voor die siësta begin.

Die dame met wie ek gesels het, het die Aubergeding gedoen. Hulle was twee dames bymekaar. Vir haar het dit juis gegaan oor die gedagte met hoe min jy kan klaarkom. Dit was deel van die ervaring van die Camino om in daardie massiewe slaapsale te slaap, mans en vroue deurmekaar met mense wat jy glad nie ken nie.

Sy sê dit was skoon, gemaklike beddens elke nag met goeie matrasse op. Daar word ‘n matrasbeskermer oorgetrek. Hulle het slaapsakke saamgeneem.

Hulle het 10 dae gestap vanaf die punt in Frankryk waar almal begin, ek kan nie nou op die naam kom nie.

Die Camino-sertifikaat was nie vir hulle belangrik nie en daarom het hulle juis die eerste 10 dae van die Franse roete gekies omdat dit so mooi was.

Sy het met lekker gemaklike tekkies gestap en sokkies, haar voete soggens met Vaseline gesmeer en sokkies aan. Hulle voete het nooit probleme gegee nie.

Sy het nie spesiaal geoefen nie, net haar normale stap van ongeveer 10 km per dag vooraf. Haar normale stap sluit bulte in. Of dit nou élke dag was, weet ek nie.

Hul het hulle rugsakke aanvanklik self gedra, maar het ook later van die aanryopsie teen €5 per dag gebruik gemaak.

Hul het in Augustus gestap. Sy voel dit was nog te warm en beveel aan dat ‘n mens eerder in September sal gaan.

Sy sê ‘n waar ding, dat as jy so stap, het jy baie tyd om te dink. Jy moet ‘n boekie saamdra om gedagtes neer te skryf. Jy kry soveel keer perspektief oor dinge. Dinge wat jy dalk anders wil doen in die toekoms.

Toortsie

Camino de Santiago video

~ Toortsie ~ 15 Kommentaar

youtu.be/mvElrX–hN4

To the end of the world.

Dankie, Scrapy, vir die deel hiervan. Ek deel dit hier sodat ek dit weer maklik in die hande kan kry.

Nota aan myself: Dieman het geweldig gesukkel met blase onder sy voete, soveel so dat hy by ‘n dokter beland het en vir drie dae moes rus.

Toe koop hy vir hom trail runners en alles verander.

Camino aantekeninge

~ Toortsie ~ 22 Kommentaar

Hierdie is die aantekeninge wat ek gemaak het toe Maréth Spamer ons VLV kom toespreek het nadat sy al ‘n tweede roete van die Camino de Santiago in Spanje voltooi het. Ek het een keer sommer uit my kop geskryf, maar nou eers weer die aantekeninge ontdek.

  • Sy sê die ‘magic van die Camino’ het haar getrek en sy wou al lankal gaan om dit te beleef.
  • Rugsak is simbolies van wat het ek regtig nodig. As jy jou sak laat anry, moet jy steeds met min gaan.
  • Dis swaar, lekker, mooi.
  • Om alleen te gaan is minder ingewikkeld. Ingewikkelde verhoudings raak meer ingewikkeld. As jy alleen gaan, is jy meer afhanklik van die plaaslike mense.
  • Daar kom spontane ontmoetings met ander mense wat jy onthou.
  • Dit help baie as jy ‘n bietjie Spaans kan praat. Die oomblik as jy vrot Spaans uitruk, ruk hulle hulle vrot Engels uit.
  • Jy moet jou intuïsie vertrou, jy sal weet waar jy veilig is.
  • Euro’s. Betaal meestal kontant.
  • Goedkoop manier van reis. Hou by die Camino. Bly in Albergues.
  • Slapery is ‘n uitdaging op sy eie.
  • Albergues E9-15 per nag. Gem E12 per nag.
  • Pilgrims menu is ‘n driegang ete vir E12-E14. Hou by Pilgrims Menu en slaap in Albergues E35/nag.
  • Jy koop niks, want alles moet jy saamdra. Haar budget: E45-50 per dag.
  • Pension kos E22, is netjieser as die Albergues.
  • As jy alleen in ‘n kamer wil slaap, is dit duur.
  • Dis veilig, niemand vat iemand se rugsak nie.
  • ATM’s is oral.
  • Jou voete is jou kosbaarste besitting, jy moet goed kyk na jou voete. Leuse: Om te stap sodat hulle môre weer kan stap.
  • Jou lyf moet gebrei wees. Sy glo dat die feit dat sy yoga doen, haar baie help.
  • Die beste tyd om dit te doen, is van einde Maart/begin April tot einde Oktober.
  • Onthou dat daar siësta is vanaf 2 tot 6 nm. Dan is alles toe.
  • Daaglikse roetine: Walk, eat, wash cothes, sleep.
  • Ligter skoene, twee paar katoensokkies. (Sy het 3 paar sokkies by haar.) Elke keer as sy stop, trek sy haar skoene uit sodat haar voete lug kry. Sy ruil elke keer by die ruskans haar sokkies om en trek droë sokkies aan.
  • Sy smeer lavenderolie en teatreeolie aan haar voete.
  • Kyk by eetplekke of jy jou skoene kan uittrek.
  • Sy verkies om allen te gaan. Neem alle medisyne saam: Corenza, Rehidrate, Linctagon, Teatree, iets vir bytplekke.
  • Loop met ‘n langbroek, al is dit warm.
  • Kyk dat jy gesond is as jy by die huis weggaan. Boost jou gesondheid voor jy gaan.
  • Loop liggies, dis nie ‘n wedstryd nie.
  • As jou tyd min is en jy wil wel tot by Finestera stap, kan jy dalk ‘n bus vat vanaf Santiago na Hoeksera (?0 en net die laaste stukkie seelangs tot by Finestera stap.
  • Haar rugsak is 7 kg. Daarin is slaapsak, donsjas, reënjas, kaak om sak aan op te hang, hoed, plakkies, emergency kit, kneeguard, ancle guard.
  • ‘n Mens verdwaal nie op die Camino nie.
  • Wandelstokke noodsaaklik.

Dit bly steeds iets wat my aandag trek en wie weet, dalk kom die geleentheid tog eendag oor my pad. Dit sal nie meer vanjaar wees, soos ek gehoop het nie, maar wie weet wat die toekoms inhou? My lewe hang nie daarvan af nie, ek sit nie my hele hart daarop nie, maar dalk, net dalk, gebeur dit tog.

Groete

Toortsie