‘n Goeie dag vir boomklim

‘n Goeie dag vir boomklim – Jaco Jacobs

Marnus Middelkind verdwyn tussen sy twee broers, hul misbruik hom om hulle werkies te doen. Dan klop daar ‘n meisie aan hulle voordeur met ‘n petisie en sy hele lewe verander.

Geen mens kan dieselfde bly as jy vir ‘n paar dae dag en nag in ‘n boom sit om sodoende die boom te red nie. Om die waarheid te sê, as jy so iets doen, kan jy reaksie verwag. Soms ander reaksie as waarop jy gehoop het, maar so ‘n aksie beïnvloed meer mense as wat jy sou dink.

In die proses leer hy homself ken, leer hy ook nuwe vriende ken. As gevolg van hierdie aksie verander dinge tóg.

Marnus is 13 jaar oud en ‘n oulike boek vir kinders so van 11 tot 14 jaar. Ek het die boek baie geniet en sal dit graag aanbeveel. Jaco Jacobs is ‘n uitstekende skrywer.

Toortsie

Dinge wat ek nie van skape geweet het nie

Dinge wat ek nie van skape geweet het nie – Jaco Jacobs.

Ek het ‘n oulike jeugboek gesoek om vir my kleinkinders te lees, toe iemand Jaco Jacobs voorstel. Wat ‘n oulike boek! Die seun in hierdie storie is 14 jaar oud, so ek dink dit was ‘n bietjie te gevorderd vir my kleinkinders op hierdie stadium, maar ék het die boek baie geniet! Om die waarheid, te sê, ek wou die boek nie neersit nie en sla dit graag oor ‘n paar jaar vir my kleinspan aanbeveel.

Luan is in groot moeilikheid en word ‘gestraf’ deur vir die vakansie saam met sy ouma in die Karoo rond te kuier. Sy ouma, wat hy eintlik glad nie meer ken nie omdat hulle mekaar so min sien.

Hy leer ‘n oulike meisie ken, doen ‘n behoorlike belaglike ding, en leer hy om verantwoordelikheid te neem vir sy keuses, raak hy en sy ouma groot maats.

Hierdie is beslis ‘n boek vir alle jong tieners, en hulle mammas en oumas!

Toortsie

Ns. Ek het die boek uitgeneem by Libby, ‘n e-boek biblioteek. Om lid daarvan te wees, moet jy lid wees van ‘n biblioteek wat by hulle ingeskakel is.

Nog ‘n Goue Vroue E-boek

Dis elke keer lekker as ons ‘n e-boek publiseer. Die nuutste e-boek bevat ons Afrika-avontuur. Goue Vroue in Jumanji.

Ons is baie opgewonde hieroor. Die Goue Vroue was weer op een van hulle vele wonderlike avonture – hierdie keer in die oerwoud in Afrika. Soos dit altyd met die Goues die geval is, is hierdie geen uitsondering nie en was dit ’n avontuur gevul met opwinding en gevaar. Adrenalienbelaai. Die dames het soms tuimelend bo-oor mekaar rondgeval, ander kere gillend vasgeklou vir lewe en dood! Op die ou end, soos nog altyd vantevore, het hulle die Jumanji-uitdaging met vlieënde vaandels geslaag. 

Soos elke keer het ons tog te lekker saamgeskryf en saamgelag. Laai gerus vir jou die GRATIS E-BOEK HIER af en geniet die storie saam met ons.

Loer gerus HIER watter boeke en e-boeke nóg beskikbaar is uit die Goue Vroue se pen en ook deur Toortsie geskryf.

Toortsie

En toe was daar Marilyn

Ek bewonder enige persoon wat ‘n kortverhaal kan skryf. Wat nog nie te sê ‘n hele storieboek nie! Maar ‘n reeks! Hoe beskryf ‘n mens daardie bewondering vir die persoon wat dit regkry om vier boeke in ‘n ry te skryf en die leser se belangstelling te behou tot by die laaste woord? Channette Paul, ek bewonder jou! Hartlik geluk! Dit is natuurlik nie die eerste reeks wat ek van haar lees nie, elkeen was uitstekend.

Die eerste boek in hierdie reeks was Lira. Ag, ek het die storie van die Vywervroue geniet. Elke woord. Hulle kreatiwiteit. Lira wat uit niks uit iets kan skep. Haar vriendinne: Mirre, Corali en Marilyn. Mirre wat moet wegkruip vir haar emosioneel siek man. Corali, die kunstige bont ene.

En dan Marilyn. Marilyn. Anders as die ander. Amper hardgebak? Kom nie met haar kleindogter reg nie, maar wel, so verward die kleindogter in daardie tyd was sou ek dalk ook nie met haar reggekom het nie. Die Marilyn wat jy in die vorige drie boeke ontmoet, is een met losse sedes. Een wat haar eie ding doen. Maar een met ‘n hart van goud. Die een wat nie sal skroom om die ander Vywervroue te help nie.

En dan val die kollig op Marilyn in die laaste boek. Wat ‘n verhaal! En jy besef net weer eens dat elke persoon ‘n storie het en voor jy nie sy storie gehoor het nie, jy nie ‘n opinie kan gee nie. Want Marilyn het haar lewe geleef as gevolg van ander mense se misstappe wat haar lewe op ‘n spoor gegooi het wat sy nie self kon kies nie. En op haar manier het sy die beste daarvan gemaak. Het sy oorleef. Het sy die keuses gemaak wat op daardie stadium vir haar die beste gelyk het.

Sjoe! dit is ‘n wonderlike boek. As ek na die hele reeks kyk, het ek gevoel dat Mirre ietwat ‘n herhaling was van die storie wat ons reeds in Lira gelees het. Tog moet jy dit ook lees omdat daar soveel meer is. En dan Corali. Ek was mal oor Corali die mens, maar ook Corali die boek. Marilyn is regtig die toppunt en ‘n wonderlike manier om die hele reeks af te sluit. Gaan kry asseblief al vier die boeke, dit is beslis die moeite werd.

Dankie, Chanette, dankie! Mag daar nog baie wonderlike boeke uit jou pen kom.

Toortsie

Corali

Corali is die derde boek in die Vyvervrou Trilogie wat deur Chanette Paul geskryf is. Deur die hele reeks al trek Corali my aandag. Voel dit vir my of ek na haar aard.

Ek het Corali geniet van die eerste woord af dwarsdeur tot die einde. Nee, ek dink nie ons aard na mekaar nie, maar daar is baie raakpunte. As Corali ‘n regte mens was, kon ons maats wees.

Corali bied ‘n goeie oor vir haar vriende. Sy is kreatief. Sy kan haarself goed besig hou op haar eie, maar geniet dit baie saam met haar maats. Sy is uitstekend in haar kuns, ongeag watter kunsvorm sy beoefen. Sy praat ‘n bietjie baie lelik. Sy het haar huis PERS geverf en het haar trap met die mooiste mosaïek versier. Sy het beslis baie meer gutz as ek!

Aangesien dit ‘n reeks is wat in dieselfde tyd afspeel, is daar weer eens gebeure uit boek 1 en 2 wat herhaal, maar nie té veel nie. Daar is spanning teenwoordig, maar ook nie te veel nie. Ek het haar en Thomas se stories baie geniet en dit was veral heerlik vars om vir Thomas, ‘n nuwe karakter, te ontmoet.

Ek beveel hierdie boek beslis aan. Ek kon dit net nie neersit nie.

Toortsie