Z. Ek het dit gemaak! Uiteindelik! Agteros kom ook in die kraal. Stadig maar seker wen dikwels die beker. Ek het darem van die begin af gesê dat ek dit op my eie pas gaan doen. Julle, dis regtig GLAD nie my persoonlikheid en aard of wat ook al om so ‘n reeks te doen nie. Ek voel om nou op my rug te loop lê!

Eintlik dink ek ek moet NIKS oor Z skryf nie. Nee. Niks. Ek dink JULLE kan ‘n bietjie oor Z skryf.  Maar dan moet ek darem sê, ek het ‘n hele groepie saamspelers gehad wat elke keer ‘n bydrae gemaak het. Dankie vir julle!

Z staan vir Zero. Nul.

Z is natuurlik die laaste letter van ons alfabet, maar dis nuttelose inligting, julle weet dit tog!

Z is ‘n zebra. Almal vra altyd, is hy wit met swart strepe of swart met wit strepe? My antwoord? Logika moet heers! Natuurik is hy wit met swart strepe. Kyk bietjie onder sy maag of loop die strepe dwarsdeur? Wat sê jy? Wit met swart, of swart met wit? Het julle al ‘n sebra se geluid gehoor? Dis nou ‘n ander storie, hoor!

Zorba the Greek. Ons het dit so graag gedans in ons studentejare. As ek nou na hierdie video kyk, besef ek ons het dit heeltemal verkeerd gedans! Hoe verlang ek nou na Griekeland! Nou ja, dan het ons die Boere-Zorba gedans!

Dan is daar Zettie. Toe ek my seuns die heel eerste keer by ons laerskool gaan inskryf het, was sy daar, en sewe jaar later toe ek vir meisiekind daar inskryf, was sy steeds daar. Ook toe ek baie jare later weer musiek gegee het by dieselfde skool. As ek aan haar dink, dink ek aan haar humor, haar lag. Zettie. 🙂

Klaar, klaar klaar!

Toortsie.

Kameel, nou is dit REGTIG klaar. 🙂

Nou gaan ek slaap.

zzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzz

Wag nee! Ek het nog woorde oor! Zanzibar! Ek was nog nie daar nie. Blykbaar ‘n moeite werd plek om heen te gaan.

Die woordeboek het sowaar 20 Z woorde. Dis nou die Ou HAT. Van die meeste van hulle het ek nog nie gehoor nie. Zoeloe ken ek wel. Ag man, ek kan nie Zulu praat nie, maar dis een van ons land se groepe mense.  Zoem. Die gezoem van die bye en die lekker turksvye en die sodaspuitfonteine. Zirkonium. Kubiese zirkonium wat amper soos ‘n diamant lyk. Ek dog dit word met ‘n S gespel, maar julle weet wat van gedog geword het!

Baai!

Toortsie by Finesse: Saam-saam

Toortsie se faceboekpage

Toortsie se Bantingboerekosboek Faceboekpage

Ek is seker ek het al ‘n hele stuk oor Y geskryf, maar WAAR het die Y heen verdwYn?

Y staan vir yskastert. Heerlik. Soet. Met kondensmelk gemaak. Peppermentkrisptert. Suurlemoenmeringue. Nou Bant die uwe mos, so nou lyk die terte ‘n bietjie anders. Eintlik nog baie dieselfde, net baie romerig. My yskasterte word deesdae van roomkaas en room gemaak. Oeee, ek maak deesdae ‘n mokka een en gebruik sommer Mascarpone roomkaas want hy het 3x (ja, DRIE KEER) room in. Njam. Purrrrr.

Y staan vir Ywerig. Vol geesdrif. Nogals ‘n mooi woord in Afrikaans. Terloops, daar is nou ‘n kompetisie op RSG aan die gang wat ‘n mens jou gunsteling Afrikaanse woord kan instuur en groot wen. Jammer, ek kon nie nou die skakel vind nie. Van ywerig gepraat, ek het voor soveel ander begin met hierdie A-Z van Blogging, en hulle is al laaaankal klaar. Sal dit my nou minder ywerig maak? Of eerder dat ek hou van multitask?

Y staan vir Yvonne. My peetma wat vir my so goed was. Sy het my altyd baie spesiaal laat voel.

Y staan vir yster. Soms is iemand ‘n yster … uhm … ‘n Strykyster word al hoe minder gebruik. In my kinderdae het ons sulke strykysters gehad, natuurlik glad nie so geroes soos hierdie nie! Hulle is op die AGA stoof se warmplaat neergesit, sommer so 4 op ‘n slag, tot hulle vuurwarm was. Op ons etenstafel in die kombuis is ‘n dik kombers en nog stryklappe bo-op gesit en wanneer die ysters dan warm genoeg was, is die klere op die tafel gestryk. Ek kan nou nog die reuk van die materiaal wat eintlik brand as daardie warm yster daarop gesit word, onthou. Vele kere is ‘bn baie duur kledingstuk verwoes met een hou. Ai, jai, jai! En dan hét my ma gesê hulle moet versigtig stryk. 😦  Ek het altyd ‘help’ stryk en kon dan die manssakdoeke stryk. Dis vasgehou met ‘n hele paar vatlappe sodat jou hand nie brand nie.

Y staan natuurlik vir ys. My man is MAL oor ys. Soms amper belaglik mal. Hy koop daar in Namibië amper die hele voorraad op, ons kon later amper ys smous!

Amper daar!

Toortsie

Toortsie by Finesse: Saam-saam

Toortsie se Faceboekblad

Toortsie se Bantingboerekosboek faceboekblad

Hier aan die einde van die alfabet kom ek nou by MOEILIKE letters!

X staan vir Xhosa, een van ons inheemse tale. Ag, ek wou graag leer Xhosa praat toe ek op Stellenbosch was en het die taallab bygewoon waar jy gratis enige taal kon aanleer. Almal sit daar met goed oor die ore, so jy kan na hartelus praat. Ek het só hard gepraat en gesukkel dat van die ander studente omgekyk het. Dit, saam met my kys wat toe uit was, (manlief wat toe in Cradock was), het ek maar die lesse gelos. Sien, ek het gedink dit sou goed wees om Xhosa te kon praat as jy in die Oos-Kaap sou woon. Jare later het Nellie my ook probeer leer, maar ek het weer eens nie veel verder as molo gekom nie! Nou is ek te lui.

X staan vir xilofoon. Toe ek in die laerskool was het ons skool ‘n hele versameling xylofone gekoop. Elkeen met sy eie naam, wat ek natuurlik nie meer kan onthou nie. Ek is spyt dat ek nooit geleer het om dit regtig goed te kan speel nie. In Heidelberg, Duitsland, het ek twee jongmanne gesien wat saam speel, elkeen ‘n meester op sy eie! Ek kan maar net staan en kyk en dit indrink. Dis natuurlik vir my van die lekkerste dinge in baie Europese stede, dat die musikante sommer net daar staan en speel, en dit nie sommer ping-pong nie, ordentlik speel. Ek wonder altyd of dit musiekstudente is wat sommer ‘n bietjie blootstelling soek?

Daar is natuurlik baie afrikaanse liefdjies wat met ‘n X begin. Sommer net om een te noem: X ‘n dapper muis, kyk hoe stap ek deur die huis! 😉

X is ook die afkorting van Christus. Eintlik Xs. En ‘n Christen Xen (superscript).

En dan staan x natuurlik vir soentjies. xxxx vir al my blogmaats!

En nou is ek sommer klaar. X klaar.

Toortsie

Ek het laat by die huis gekom en moet gaan kosmaak, maar nou draai die W woorde so in my kop dat ek eers moet kom skryf.

Wie weet waar wilde Wouter woon? Wilde Wouter woon waar woeste winde waai! (of so iets)

W staan vir woorde. Wat ‘n lekkerte het die Here tog nie gegee toe hy mense woorde gegee het nie! Blykbaar 40 000 per dag vir vroue! Maar toe sit Hy sowaar hierdie baieprater op ‘n plaas!, en al plek waar ek van die baie woorde per dag kan ontslae raak, is by die blog. 400 per dag. Genade! Wat moet ek met die res doen? G’n wonder ek raak soos ‘n opgewende orreltjie as ek by mense kom en praat hulle MAL nie!

W staan vir die waarheid. Die volle waarheid. Nie amper die volle waarheid nie. Nie ‘n wit leuentjie nie. Die waarheid. Punt.

W staan vir wil. Die wil om te werk of nie. Die wil om van iets ‘n sukses te maak of nie. Saam met die Wil het ek die woord Werk gebruik. Ai man, in ons liewe land voel dit vir my of werksetiek nie aangemoedig word nie. Ek wens dit was anders. Werkloosheid ís ‘n groot probleem, tog neem soveel van ons nie ons werk ernstig op nie. Aan die ander kant is daar weer werkoliste …

W staan vir die wel en wee van Spanner Coetzee. Ek haal my hoed af vir Amoré Bekker vir alles wat sy uitdink. Om dag vir dag vir hoeveel ure Tjailatyd op RSG aan te bied en die hele tyd interessant te bly verg baie. Vir dié wat nie weet nie, sy is tans besig om met die hulp van die luisteraars die storie te skryf van ‘n fiktiewe persoon, Spanner Coetzee. Dis soos ‘n kursus in storieskryf en ek verlustig my in hoe sy die mense uitlok om stories in te stuur. Tog mis ek soveel van die verhaal, tien teen een is die storie al klaar teen hierdie tyd.

William Wikkelspies! 🙂 Dit hoor ek op RSG! 🙂 Dis nou die Afrikaanse weergawe van William Shakespeare. Oulik!

En ja, W staan vir wederhelf! My wederhelf! Saam het ons al ‘n hele ou paadjie gestap, deur mooi stukke pad, moeilike pad, opdraende, afdraende. Bly ek het hom!

Groete

Toortsie