Die selfoonsage

So breek my selfoon nou die dag. Totaal uit die bloute. Totaal sonder rede.

Ek het ‘n Apple selfoon. My tweede Apple. Die eerste Apple het ek ‘n hele klompie jare gelede oornag gekoop nadat die ander maak wat ek gebruik het, elke keer een of ander pyn gehad het en ek net eenvoudig moedeloos was.

Apple nommer een het 5 jaar gehou. Toe was daar probleme en ek dink toe dat daar met my foon fout was en kry ‘n nuwe een. Die fout was toe nie met my foon nie, en ek het sowaar R3000 daarvoor gekry by die Applewinkel. Ek het vir my weer ‘n Apple gekoop, sommer ‘n kleintjie. Hy is nou al amper 3 jaar oud.

Verlede Donderdag sit ek en stiltetyd hou. Behoorlike stiltetyd noem ek dit, wanneer ek regtig lank stil word by die Here. Bid. Bybel lees. Die Woord oordink. Skryf in my bidboek. Iewers loor ek op my foon.

Nou, dis al jare lank ‘n stryd. Hoekom het ek nodig om op my foon te loer terwyl ek stiltetyd hou? Die meeste van die tyd sit ek hom sommer in ‘n ander vertrek sulke tye. Ek gaan tog nie as iemand by my kuier die hele tyd met my een oog op die foon loer nie! Dis mos swak maniere! En dit wat op die foon is gaan nie skielik wegraak nie, dit kan wag tot ek weer tyd het om daarna te kyk. en hier is ek nou met die heel belangrikste Persoon in my lewe besig en ek loer op my foon!

Toe ek uiteindelik Amen sê en my Boeke wegpak, is foon dood. Morsdood. Totaal dood. Nee, daar kom nie eers ‘n batterytjie te voorskyn as ek dit probeer aansit nie. Ook nie ná 24 uur op die laaier nie. My gewete kla my aan. Ek weet mos wat die fout is.

Neem die foon na Vodacom, ná nog ‘n paar uur skud hulle net kop. Foon sal vervang moet word. Daar is in elk geval nie Apple fone onmiddellik beskikbaar nie, daar is ‘n waglys.

Gelukkig het my man kort gelede sy foon laat opgradeer en sy vorige foon is beskikbaar. Die hele naweek sukkel ek en die nie-Apple om mekaar te vind. My en my man se kontakte is deurmekaar. Alles is deurmekaar. Die foon het ‘n heerlike groot skerm! Ons twee vind mekaar wel …

Gister kry ek skielik hierdie lawwe gedagte: Kyk gou of Appeltjie nie werk nie. Wat jy waar kry? Hoekom sal hy nou skielik wil werk? Sit hom aan … daar gebeur iets … my foon werk asof hy nog nooit ‘n probleem gehad het nie!

Die les? Soos ‘n wonderlike pappa het my Here vir my op ‘n liefdevolle manier gewys: My tyd met Hom is kosbaar. Dán wil Hy my volle aandag hê. Vir die Hele Tyd. En dat ek nooit iets belangriker as Hy kan stel nie.En dat ‘n mens iets wat vir jou SO belangrik is in ‘n oogwink kan verloor.

Ja, ek het gehoor. Ek het my speelding teruggekry, maar ek het gehoor.

Toortsie